Vara Lou Karana​​—⁠Be Mauri Hanaihanai Abia Dalana, A?

EDENA bamona inai henanadai do oi haerelaia, “Oi vara lou vadaeni, a?” Tanobada hegegemadai dubu taudia momo be do idia haere, “Oibe!” Idia abia dae momokani vara lou karana be mai anina bada Keristani taudia korikoridia dekenai, bona ia be mauri hanaihanai abia dalana tamona. Idia be tomadiho stadilaia tauna ta ladana Robert C. Sproul ena lalohadai idia hahedinaraia, ia gwau: “Bema tau ta be ia vara lou lasi, . . . vadaeni ia be Keristani tauna lasi.”

Oi danu oi abia dae vara lou karana be mauri hanaihanai abia dalana, a? Bema oibe, vadaeni oi ura emu varavara bona turadia oi durua idia danu be unai dala idia diba bona abia dae totona, ani? To, unai idia karaia totona, namona be ia vara lou tauna ena idau bona ia vara lou lasi tauna ena idau idia lalopararalaia guna. Edena dala ai idia dekenai vara lou karana ena anina do oi gwauraia hedinarai?

Momo idia abia dae inai hereva “vara lou” ena anina be, ta ese Dirava bona Keriso dekenai gwauhamata ta ia karaia, bena idia ruaosi ia hesiai henia hanaihanai. Unai ia karaia dainai, guna ia be Dirava ia tura henia lasi, to hari ia be Dirava kahirakahira ia noho.

Bema oi davaria Baibel ese unai hereva ena anina ia gwauraia dalana be idau, do oi hoa, a? Oi ura Dirava ena Hereva vara lou karana dekenai oi diba, a? Vara lou ena anina oi stadilaia namonamo neganai namo do oi davaria. Dahaka dainai? Vara lou karana dekenai diba maorona oi abia be mai anina bada, badina unai diba ese hari bona nega vairai oiemu mauri dalana ia haidaua diba.

Baibel be Dahaka Ia Hadibaia?

Inai hereva “vara lou” be Ioane 3:​1-​12 lalonai ia noho. Unai siri ese Ierusalema ai Iesu bona tomadiho gunalaia tauna ta edia herevahereva karana ta ia hahedinaraia. Unai sivarai ibounai be henunai ia noho maua dekenai oi duahia diba. Oi ai noia unai sivarai oi duahia namonamo totona.

Unai sivarai lalonai, Iesu ese “vara lou” karana ena kahana idauidau ia herevalaia. Iesu ena hereva ese ita do ia durua inai henanadai 5 edia haere ita davaria totona:

◼ Vara lou karana be mai anina bada, a?

◼ Vara lou karana be tau ta sibona ese ia abia hidi, a?

◼ Vara lou karana ena badina be dahaka?

◼ Vara lou karana be edena bamona ia vara?

◼ Edena dala ai vara lou karana ese iseda hetura karana Dirava ida ia haidaua diba?

Mani unai henanadai ta ta ita laloa.

[Box/Picture on page 4]

“Do Oi Vara Lou”

“Farisea tauna ta ena ladana be Nikodemo, ia be Iuda taudia edia lohia ta. Hanuaboi ta Iesu dekenai ia lao, ia hereva henia, ia gwau, ‘Rabi e, ai diba oi be hadibaia tauna, Dirava dekena amo oi mai vadaeni, badina oi karaia toadia be tau ta ia karaia diba lasi, bema Dirava ese ia durua lasi neganai.’ Iesu ia haere henia, ia gwau, ‘Momokani, momokani lau hamaoroa oi dekenai, bema taunimanima ta be ia vara lou lasi, ia be Dirava ena Basileia do ia itaia diba lasi.’ Vadaeni Nikodemo ese ia nanadaia, ia gwau, ‘Taunimanima be ia tau badana neganai, edena bamona do ia vara lou diba? Iena sinana ena bogana dekenai do ia vareai lou diba, vadaeni do ia vara lou, a?’ Iesu ia haere, ia gwau, ‘Momokani, momokani lau hamaoroa oi dekenai, taunimanima be ranu dekena amo bona Lauma Helaga dekena amo bema ia vara lasi, ia be Dirava ena Basileia lalonai do ia vareai diba lasi. Tauanina dekena amo ia vara gauna be tauanina, Lauma Helaga dekena amo ia vara gauna be lauma. Lauegu hereva dekenai oi hoa lasi, lau gwau do oi vara lou. Lai be ena ura gabuna dekena amo ia toa, bona ena regena oi kamonai, to oi diba lasi edeseni dekena amo ia mai, bona edeseni ia lao. Lauma Helaga dekena amo idia vara taudia ibounai danu unai bamona.’ Nikodemo ma ia gwau, ‘Inai gaudia be edena bamona do idia vara?’ Iesu ma ia haere, ia gwau, ‘Oi be Israela taudia edia hadibaia tauna, to inai gaudia be oi diba lasi, a? Momokani, momokani lau hamaoroa oi dekenai, ai be ai diba gauna ai herevalaia, bona ai itaia gauna ai gwauraia, to aiemai hereva be umui ta umui abia dae lasi. Tanobada gaudia lau herevalaia oi dekenai to oi abia dae lasi, to bema guba gaudia do lau herevalaia oi dekenai, be edena bamona do oi abia dae diba?’ ” ​​—⁠Ioane 3:​1-​12.

Vara Lou Karana​​—⁠Be mai Anina Bada, A?

IESU be Nikodemo ida ia herevahereva lalonai, ia hahedinaraia vara lou karana be mai anina bada. Edena dala ai unai ia hahedinaraia?

Mani ita tahua edena dala ai, Iesu be Nikodemo dekenai ia hahedinaraia vara lou karana be mai anina bada. Iesu ia gwau: “Bema taunimanima ta be ia vara lou lasi, ia be Dirava ena Basileia do ia itaia diba lasi.” (Ioane 3:⁠3) Unai hereva “bema” bona “diba lasi” ese idia hahedinaraia, tau ta ia ura “Dirava ena Basileia ia itaia” neganai, ia vara lou be gau badana.

Nikodemo be vara lou karana dekenai ia daradara lasi totona, Iesu be ma ia gwau: “Do oi vara lou.” (Ioane 3:⁠7) Iesu ena hereva ese ia hahedinaraia goevagoeva, tau ta be “Dirava ena Basileia lalonai do ia vareai” totona, ia vara lou be mai anina bada.​​—⁠Ioane 3:⁠5.

Iesu dekenai vara lou karana be mai anina bada dainai, Keristani taudia ese unai hereva idia lalopararalaia namonamo be gau badana. Hegeregere, oi laloa, Keristani tauna ta be sibona ena vara lou karana ia abia hidi diba, a?

Vara Lou Karana​​—⁠Be Tau ta Sibona ese Ia Abia Hidi, A?

VARA lou karana be daika ese ia havaraia? Haroro taudia be nega momo Iesu ena hereva idia gwauraia, hegeregere kamonai taudia dekenai idia gwau: “Do oi vara lou.” (Ioane 3:⁠7) Unai haroro taudia ese Iesu ena hereva be oda herevana ta bamona idia boiboilaia, idia gwau: “Oi vara lou!” Idia gwau taunimanima ta ta sibona ese abia hidi do ia karaia, Iesu ena hereva do ia badinaia bona kara haida do ia karaia ela bona do ia vara lou. Unai hahediba herevana amo idia hahedinaraia, taunimanima ta ta sibona ese vara lou karana ia abia hidi diba. To, unai hahediba herevana be Iesu ese Nikodemo ia hamaoroa herevana hegeregerena, a?

Iesu ena hereva ita duahia namonamo neganai, ita itaia Iesu ia gwau lasi vara lou karana be taunimanima sibodia ese idia abia hidi gauna. Dahaka dainai unai bamona ita hereva? Greek gado herevana idia hahanaia “vara lou” ena anina ma ta be “atai dekenai amo ia vara.”a Unai hereva hegeregerena ita gwau diba vara lou karana be “atai dekenai” amo ia mai​​—⁠anina be “Dirava dekena amo” o guba amo ia vara. (Ioane 19:11; Iamesi 1:17) Oibe, unai ese ia hamomokania Dirava ese vara lou karana ia havaraia.​​—⁠1 Ioane 3:⁠9.

Bema unai hereva “atai dekenai” ita laloa neganai, do ita laloparara dahaka dainai tau ta sibona ese ena vara lou karana ia havaraia diba lasi. Mani beibi ta oi laloa: Ia vara totona ia sibona be abia hidi ia karaia, a? Lasi! Unai hegeregerena, ita sibona ese vara lou totona abia hidi ita karaia lasi. To, vara lou karana be Dirava, iseda guba Tamana sibona ese ia havaraia karana. (Ioane 1:​13) Unai dainai, aposetolo Petero ia gwau: “Namona be Dirava, iseda Lohiabada Iesu Keriso ena Tamana, ita hanamoa. Iena hebogahisi bada dainai ita vara lou.”​​—⁠1 Petero 1:⁠3.

Ia be Oda Herevana ta, A?

To haida idia laloa, ‘Bema tau ta be sibona ena vara lou karana ia abia hidi diba lasi, vadaeni, dahaka dainai Iesu be inai oda herevana ia gwauraia: “Do oi vara lou”?’ Unai be henanadai namona. Mani inai ita laloa: Bema Iesu ena hereva be oda ta bamona, anina be ia ese ita ia hamaoroa ita karaia diba lasi gauna ta ita karaia totona, ani? To, unai lalohadai be maoro lasi. Vadaeni, edena dala ai unai hereva, “Do oi vara lou” ita lalopararalaia be namo?

Bema Greek gado ai unai hereva ita stadilaia namonamo, do ita davaria unai hereva be oda herevana lasi, to guba lao dalana ia herevalaia. Mani inai haheitalai ita laloa: Siti badana ta be mai ena sikuli momo bona sikuli tamona be idia makaia, tano biagudia edia natudia sibona idia sikuli totona. Dina ta ai, idau tano merona ta ese hedmasta ia hereva henia ia gwau: “Lau ura emu sikuli dekenai lau sikuli.” Hedmasta ia gwau: “Emai sikuli dekenai oi vareai totona, namona be oi be inai hanua merona ta.” Hedmasta be unai mero ia oda henia lasi unai hanua merona ai ia lao totona. Lasi, hedmasta be unai sikuli dekenai do ia lao diba dalana ia gwauraia hedinarai. Unai hegeregerena, Iesu ia gwau: “Do oi vara lou” neganai, ia be guba lao dalana ia gwauraia hedinarai. Oibe, ta be Dirava ena Basileia lalonai ia vareai totona, ia vara lou be mai anina bada.

Unai hereva​—⁠Dirava ena Basileia​—⁠be mai anina bada vara lou karana dekenai danu. Hegeregere, inai henanadai: Ta ia vara lou ena badina be dahaka? Unai henanadai ena haere ita lalopararalaia neganai, vara lou ena anina do ita diba namonamo.

[Footnote]

[Picture on page 6]

Edena dala ai beibi ia vara karana bona vara lou karana be idia hegeregere?

Vara Lou Karana​​—⁠Ena Badina be Dahaka?

MOMO idia abia dae mauri hanaihanai idia davaria totona, idia vara lou be gau badana. To, mani Iesu ese vara lou ena badina ia herevalaia dalana ita laloa. Iesu ia gwau: “Bema taunimanima ta be ia vara lou lasi, ia be Dirava ena Basileia do ia itaia diba lasi.” (Ioane 3:​3) Unai siri ese ia hahedinaraia, tau ta be Dirava ena Basileia lalonai ia vareai totona, ia vara lou be gau badana. To, tanobada ai mauri hanaihanai abia totona, ia vara lou be anina lasi. Reana, ma haida do idia gwau: ‘To, unai hereva rua​​—⁠Basileia lalonai ita vareai bona mauri hanaihanai ita davaria⁠​—⁠​edia anina be tamona!’ Lasi, edia anina be tamona lasi. Edia idau ita lalopararalaia totona, mani “Dirava ena Basileia” ena anina ita tahua guna.

Basileia be gavamani ta. Unai dainai, unai hereva “Dirava ena Basileia” anina be “Dirava ena gavamani.” Baibel ese ita ia hadibaia Iesu Keriso, “Taunimanima ena Natuna,” be Dirava ena Basileia ena King, bona ma haida be unai King ida do idia lohia hebou. (Daniela 7:​1, 13, 14; Mataio 26:​63, 64) Danu, aposetolo Ioane ese ia itaia matahanai lalonai ia hahedinaraia, Keriso ida do idia lohia taudia be “bese ibounai, gado ibounai, hanua ibounai, bona kopina idauidau” amo ia hoidia bona “idia ese tanobada do idia gunalaia.” (Apokalupo 5:​9, 10; 20:⁠6) Dirava ena Hereva ia gwau, unai lohia taudia be “orea maragi” taudia bona edia namba be 144,000. Danu, ia hahedinaraia unai taudia be Dirava ese “tanobada dekena amo ia hamauria.”​​—⁠Luka 12:32; Apokalupo 14:​1, 3.

Dirava ena Basileia be edeseniai do ia lohia? “Dirava ena Basileia” ena ladana ma ta be “guba Basileia,” unai amo ita diba Iesu bona ia danu do idia lohia taudia be guba ai do idia lohia. (Luka 8:​10; Mataio 13:11) Unai ese ia hahedinaraia, Dirava ena Basileia be guba gavamanina ta, bona ia lalonai Iesu Keriso bona tanobada amo ia abia hidi orea maragi taudia do idia lohia hebou.

Vadaeni, Iesu ia gwau tau ta be “Dirava ena Basileia lalonai do ia vareai” totona, ia vara lou be namo ena anina be dahaka? Ena anina be inai: Tau ta be Keriso danu guba dekenai ia lohia totona, ia vara lou be gau badana. Ita gwau diba, vara lou ena badina be inai: Dirava be taunimanima edia orea maragina ta ia hegaegaelaia guba dekenai idia lohia totona.

Vadaeni, hari ita diba: Vara lou karana be mai anina bada, unai kara be Dirava ese ia havaraia gauna, bona unai kara amo Dirava ese taunimanima edia orea maragina ta ia hegaegaelaia guba dekenai idia lohia totona. To, unai vara lou karana be edena bamona ia vara?

[Blurb on page 7]

Vara lou ena badina be Dirava ese taunimanima edia orea maragina ta ia hegaegaelaia, guba dekenai idia lohia totona

[Picture on page 7]

Iesu Keriso bona tanobada amo Dirava ese ia abia hidi taudia haida be Dirava ena Basileia lalonai do idia lohia

Vara Lou Karana​​—⁠Edena Bamona Ia Vara?

IESU be Nikodemo dekenai ia hahedinaraia vara lou be mai anina bada, daika ese ia havaraia, bona ena badina be dahaka. To danu, Iesu be ta ia vara lou dalana ia herevalaia neganai, ia gwau: “Taunimanima be ranu dekena amo bona Lauma Helaga dekena amo bema ia vara lasi, ia be Dirava ena Basileia lalonai do ia vareai diba lasi.” (Ioane 3:⁠5) Unai ese ia hahedinaraia, tau ta be ranu bona lauma helaga amo do ia vara lou. To, unai hereva rua, “ranu bona Lauma Helaga” edia anina be dahaka?

“Ranu Bona Lauma Helaga”​​—⁠Idia be Dahaka?

Nikodemo be Iuda tomadiho ena diba bada tauna ta dainai, Heberu Revarevadia ese Dirava ena “Lauma” idia herevalaia dalana ia lalopararalaia. Lauma Helaga be Dirava ena gaukara siahuna bona taunimanima ia hasiahua diba hoa karadia bona gau ma haida idia karaia totona. (Genese 41:38; Esodo 1:3; 1 Samuela 10:⁠6) Unai dainai, Iesu ese “lauma helaga” ia gwauraia neganai, Nikodemo ia laloparara Iesu be Dirava ena gaukara siahuna ia herevalaia.

Iesu ese ia herevalaia “ranu” be dahaka? Iesu bona Nikodemo edia herevahereva vairanai bona murinai idia torea sivarai rua mani ita laloa. Unai sivarai be Ioane Bapatiso bona Iesu ena hahediba taudia ese ranu amo taunimanima idia bapatisoa karana ia herevalaia. (Ioane 1:​19, 31; 3:​22; 4:​1-3) Ierusalema hanua taudia be unai kara dekenai idia manada. Unai dainai, Iesu be ranu ia herevalaia neganai, Nikodemo ia diba Iesu be bapatiso ranuna ia herevalaia.a

“Lauma Helaga” amo Idia Bapatiso

Bema inai hereva, “ranu dekenai amo . . . ia vara” ese ranu lalonai bapatiso karana ia herevalaia, vadaeni inai hereva “lauma helaga dekena amo . . . ia vara” ena anina be dahaka? Nikodemo be Iesu ida ia do herevahereva lasi neganai, Ioane Bapatiso ia gwau ranu sibona lasi, to taunimanima be lauma helaga amo bapatiso do idia abia danu. Ia gwau: “Lau ese umui lau bapatisoa ranu dekenai, to dohore inai tau [Iesu] ese umui do ia bapatisoa Lauma Helaga dekenai.” (Mareko 1:​7, 8) Evanelia bukana ia torea tauna Mareko ese unai bamona bapatiso ginigunana ena sivarai ia torea. Ia gwau: “Unai neganai, Iesu be Nasareta hanua, Galilea kahana dekena amo ia mai, bona Ioane ese Iesu ia bapatisoa Ioridane Sinavai lalonai. Iesu ese ranu ia rakatania neganai, nega tamona ia itaia guba ia kehoa, bona Lauma Helaga ia diho ia dekenai pune manu bamona.” (Mareko 1:​9, 10) Iesu be Ioridane Sinavaina lalonai ia diho neganai, ia be ranu amo bapatiso ia abia. Guba amo lauma helaga be Iesu latanai ia diho neganai, ia be lauma helaga amo bapatiso ia abia unai.

Iesu ia bapatiso bena lagani toi murinai, iena hahediba taudia dekenai ia gwau: “Dina momo do ia ore lasi neganai, Lauma Helaga dekenai bapatiso do umui abia.” (Kara 1:⁠5) Edena negai unai ia vara?

Lagani 33 C.E. Pentekoste dinana ai, Iesu ena hahediba taudia 120 be Ierusalema dekenai ruma ta lalonai idia hebou. “Vadaeni, guba dekena amo karaharaga regena ta ia diho mai, lai bada ena regena hegeregere, idia helai hebou noho ruma ena kahana ibounai ia hahonua. Bona lahi ena malana hegeregere idia hedinarai.  . . . Vadaeni unai abidadama taudia ibounai be Lauma Helaga dekenai idia honu.” (Kara 2:​1-4) Unai dina tamona ai, aposetolo Petero ese Ierusalema ai idia hebou taudia ma haida ia hagoadaia ranu amo bapatiso do idia abia. Ia gwau: “Umui ibounai ese emui lalona umui giroa bona bapatiso umui abia, Iesu Keriso ena ladana dekenai, umui emui kara dika do idia gwauatao totona, bona Lauma Helaga do umui abia, Dirava ena harihari gauna.” Vadaeni, dahaka ia vara? “Iena hereva idia abia dae taudia be bapatiso idia abia, bona unai dina tamona lalonai, taunimanima 3000 bamona be edia orea lalonai idia vareai.”​​—⁠Kara 2:​38, 41.

Bapatiso Rua

Unai bapatiso sivaraidia ese ita dekenai dahaka idia hahedinaraia? Idia hahedinaraia vara lou karana be mai ena kahana rua. Oi laloatao, Iesu be ranu amo bapatiso ia abia guna, bena unai murinai, lauma helaga be ia latanai ia diho. Unai hegeregerena, hahediba taudia ginigunadia be ranu amo bapatiso idia abia, (haida be Ioane Bapatiso ese ia bapatisodia) bena unai murinai lauma helaga be idia latanai ia diho. (Ioane 1:​26-36) Unai hegeregerena, hereva momokani idia abia dae taudia 3,000 be ranu amo idia bapatiso guna, bena gabeai lauma helaga idia abia.

Pentekoste 33 C.E. ai idia vara bapatiso sivaraidia ita herevalaia murinai, reana ita henanadai: ‘Hari inai negai vara lou karana be edena bamona do ia vara?’ Iesu ena aposetolo bona hahediba taudia dekenai ia vara hegeregerena ai do ia vara danu. Kahana ginigunana be: Tau ta be iena kara dika amo do ia helalo-kerehai, kara dika do ia rakatania, gwauhamata ia karaia Iehova do ia tomadiho bona hesiai henia totona, bena taunimanima vairanai unai gwauhamata be ranu bapatisona amo ia hamomokania. Bema Dirava ese unai tau ia abia hidi iena Basileia lalonai ia lohia totona, vadaeni kahana iharuana be inai: Ia be lauma helaga ese do ia horoa. Unai kahana ginigunana (ranu amo bapatiso karana) be unai tau sibona ese ia abia hidi diba, to ena kahana iharuana (lauma helaga amo bapatiso karana) be Dirava ese ia abia hidi. Tau ta be unai bapatiso rua ia abia murinai, ita gwau diba ia be vara lou tauna ta.

To, Iesu be Nikodemo ida ia herevahereva neganai, dahaka dainai ia be inai hereva ia gwauraia, “ranu dekena amo bona Lauma Helaga dekena amo bema ia vara”? Badina ia ura hahedinaraia, ranu bona lauma amo do idia bapatiso taudia edia noho dalana be do ia idau momokani. Hereva gabena ese unai do ia herevalaia.

[Footnote]

[Picture on page 9]

Ioane ese helalo-kerehai Israela taudia be ranu amo ia bapatisodia

Vara Lou Karana​​—⁠Dahaka Namo Ia Mailaia?

DAHAKA dainai Iesu be lauma helaga amo bapatiso karana ia gwauraia neganai ia gwau, “Lauma Helaga dekena amo . . . ia vara”? (Ioane 3:⁠5) Unai hereva “vara” be laulau dalanai idia gaukaralaia neganai, ena anina be “hamatamaia.” Unai dainai, laulau dalanai “vara” bona “vara lou” edia anina be, lauma helaga amo bapatiso idia abia taudia be Dirava ida hetura karana matamatana idia hamatamaia unai. Edena dala ai unai hetura karana matamatana ia vara?

Aposetolo Paulo be Dirava ese taunimanima ia abia hidi guba dekenai do idia lohia karana ia herevalaia neganai, ruma bese ena haheitalai ta ia gwauraia. Iena negai idia noho Keristani taudia ia tore henidia neganai ia gwau, idia be “Dirava ena natuna korikori” ai do idia lao, unai dainai Dirava ese idia “ia kara henia, iena natuna korikori dekenai ia kara henia hegeregerena.” (Galatia 4:5; Heberu 12:⁠7) Tau ta be lauma helaga amo ia bapatiso neganai, Dirava ese unai tau be ena natuna ai ia halaoa bona ena noho dalana ia idau danu. Unai ita lalopararalaia namonamo totona, idau hanua merona ena haheitalai mani ita laloa lou.

Natuna ai Ia Halaoa Karana ese Ena Noho Dalana Ia Haidaua

Unai haheitalai lalonai, unai mero be unai hanua merona lasi dainai, unai sikuli dekenai ia vareai diba lasi. To, mani oi laloa, dina ta gau idauna ta ia vara. Unai hanua tauna ta ese gavamani ena taravatu hegeregerena ai, unai mero be ena natuna ai ia halaoa. Unai ese mero ena noho dalana ia haidaua momokani, ani? Oibe, hari tama ese ena natuna ai ia halaoa dainai, unai mero be unai hanua amo idia mai natudia ese idia abia hahenamo idauidau ia abia diba​—⁠hegeregere ia be unai sikuli dekenai ia vareai diba. Unai tama ese unai mero be iena natuna ai ia halaoa dainai, mero be hahenamo idauidau ia abia diba.

Unai haheitalai ese idia vara lou taudia edia noho dalana ena idau karana ia haheitalaia namonamo. Idia hegeregere gaudia haida mani ita laloa. Unai mero be sikuli dekenai do idia abia vareai diba bema ia be sikuli ai ia vareai dalana ia hagugurua​—⁠unai hanua merona ta ai ia lao be namo. To, ia sibona ese unai ia hagugurua diba lasi. Unai hegeregerena, taunimanima haida be Dirava ena Basileia o guba gavamani lalonai do idia vareai diba, to namona be guba lao dalana idia hagugurua guna​—⁠idia “vara lou” be namo. To, idia sibodia ese unai idia karaia diba lasi, badina vara lou karana be Dirava ese ia havaraia gauna.

Edena dala ai unai idau hanua merona ena noho dalana ia idau? Gavamani ena taravatu hegeregerena ai, unai hanua tauna ta ese unai mero be ena natuna ai ia halaoa. Ena be unai ese mero ena kara ia haidaua lasi, to ena noho dalana ia idau. Ia be noho dalana matamatana ia hamatamaia​—⁠ia vara lou bamona. Ia be unai tauna ena natuna ai ia lao dainai, ia be mai ena maoro unai sikuli dekenai ia lao bona iena ubua tamana ena ruma bese taudia ida ia noho hebou diba.

Unai hegeregerena, Iehova ese goevadae lasi taudia be taravatu hegeregerena ai ena natudia ai ia halaoa neganai, edia noho dalana ia haidaua danu. Aposetolo Paulo be unai orea tauna ta, bona iena tadikaka ia tore henidia ia gwau: “Dirava ese umui ia henia Laumana ese Dirava ena natuna umui ia halaoa vadaeni. Unai dainai Lauma ena siahu dekena amo, Dirava dekenai ita hereva henia neganai, ‘Tamagu e, lauegu Tamana lalokau e!’ ita gwauraia diba. Dirava ena Lauma, bona iseda lauma danu idia hereva hebou, idia gwauraia, ita be Dirava ena natuna.” (Roma 8:​15, 16) Oibe, Dirava ese unai Keristani taudia be iena natudia ai ia halaodia dainai, Ia be edia Tamana.​​—⁠1 Ioane 3:1; 2 Korinto 6:​18.

Oibe, Dirava ese idia be iena natuna ai ia halaodia neganai, edia kara ia haidaua lasi​—⁠idia be do goevadae lasi taudia. (1 Ioane 1:⁠8) To, Paulo ia hereva bamona, Dirava ese ena natuna ai ia halaodia neganai, idia vara lou unai. Ma danu, Dirava ena lauma helaga ese ia hadibadia dainai, idia diba momokani idia be Keriso ida guba dekenai do idia noho. (1 Ioane 3:⁠2) Ita gwau diba lauma helaga ese idia dekenai noho dalana matamatana ia henia. (2 Korinto 1:​21, 22) Oibe, idia vara lou unai.

Baibel be Dirava ena natudia ia herevalaia neganai, ia gwau: “Idia be Dirava bona Keriso edia hahelagaia taudia. Bona lagani 1000 lalonai Keriso danu do idia lohia.” (Apokalupo 20:⁠6) Dirava ese iena natuna ai ia halaoa taudia be king ai do idia lao bona Keriso ida Dirava ena Basileia o guba gavamani lalonai do idia lohia. Aposetolo Petero ese iena tadikaka ia hamaoroa idia be “mauri ia noho hanaihanai, ia be goevagoeva, ia bodaga diba lasi” gauna do idia abia, bona ‘inai mauri be guba dekenai idia totona ia noho hegaegae.’ (1 Petero 1:​3, 4) Unai be hahenamo hereadaena!

To, edia lohia dagina dainai henanadai ta ia vara. Unai vara lou taudia be guba dekenai king bamona do idia lohia neganai, daidia do idia lohiaia? Unai henanadai be hereva gabena ai do ita herevalaia.

[Picture on page 10]

Dirava ese haida be iena natudia ai ia halaoa karana dekenai, Paulo be dahaka ia gwau?