“Hahetoho Negana” ai Idia Gini Goada

LAGANI 1914 ai, Tanobada Tuarina Ginigunana ia matamaia neganai, taunimanima momo idia itaia Bible Student taudia be tuari amo idia gini siri. (Isa. 2:2-4; Ioa. 18:36; Efe. 6:12) Britain dekenai Dirava ena hesiai taudia be edena bamona?

Lagani 1916 ai, Britain dekenai Military Service Act idia karaia. Unai taravatu ia gwau, singul tatau edia mauri lagani 18 bona 40 huanai be tuari lalonai do idia vareai. To, unai taravatu ena kahana ma ta ia gwau, “tomadiho bona Dirava ena kara maoromaoro taravatudia” idia badinaia momokani taudia sibona be tuari lalonai do idia vareai lasi. Unai idia badinaia totona gavamani ese kota ia karaia, bona ia tahua daidia be gwaumaoro idia abia diba tuari do idia lao lasi, bona edena bamona gaukara do idia karaia.

Daudau lasi murinai, Bible Student taudia 40 bamona be ami edia dibura ruma ai idia atoa, bona 8 be France ena tuari gabuna dekenai idia siaidia lao. Unai kara dainai, Britain ai tadikaka ese Praiminista Herbert Asquith dekenai leta ta idia torea. Tadikaka taihu 5,500 bamona ese unai leta idia sainia bona idia gwau, France gavamani ese unai tadikaka be dibura ruma ai ia atoa be kerere.

Gabeai tadikaka idia kamonai France dekenai idia siaia tadikaka 8 be idia ura lasi tuari lalonai idia vareai dainai do idia pididia. To tadikaka idia pididia gwauraia neganai, ami taudia ese edia lalona idia haidaua, bena idia gwau unai tadikaka be lagani 10 dibura ruma ai do idia noho. England dekenai idia siaidia, bona gavamani ena dibura ruma ai idia atoa.

Tuari idia karaia noho lalonai, gavamani ese oda ia henia headava tatau be ami dekenai do idia vareai danu. Manchester, England ai, Henry Hudson idia samania, ia be medikol doketa bona Bible Student tauna. August 3, 1916 ai, kota ia gwau ia be gavamani ena hereva ia badinaia lasi dainai, ia idia fainia bona ami taudia dekenai idia henia. Unai nega ai, Edinburgh, Scotland ai kota ma ta idia karaia danu. To, kota ese ia davaria James Frederick Scott, ena mauri lagani be 25 kolpota tauna ta, be kerere ta ia karaia lasi. Gavamani ese unai keis ia apil, to gabeai ia kokia badina ia ura London ai Herbert Kipps ena keis do ia hepapahuahulaia. Gavamani ia kwalimu bona kota ese Herbert Kipps ia fainia bona ami taudia dekenai ia henia.

September 1916 ai, tadikaka 264 be tuari lalonai do idia vareai lasi totona aplikeisen idia atoa. Idia amo 5 sibona be gwaumaoro idia abia tuari lalonai do idia vareai lasi, 154 be gaukara aukadia, hegeregere dala idia karaia o nadi makohia gaukaradia idia karaia, 23 be ami kamepa ai gaukara haida idia karaia, 82 be ami dekenai idia siaia, bona ma haida be kota vairanai idia gini. Ami edia dibura ruma ai tadikaka be dagedage bada idia davaria dainai, taunimanima momo be gavamani idia badu henia. Unai dainai, gavamani ese tadikaka be ami edia dibura ruma amo idia kokia, bena gavamani edia dibura ruma ai idia atodia.

Edgar Clay bona Pryce Hughes, gabeai ia be Britain ena brens ovasia ai ia lao, be Wales dekenai ranu idia haboua magu haginia gaukarana idia karaia. To, Herbert Senior, France amo idia siaia lou tadikaka ta, be Wakefield Dibura Rumana, Yorkshire dekenai idia atoa. Tadikaka momo be Dartmoor Dibura Ruma dekenai idia atoa bona unuseniai gaukara aukadia idia karaia. Unai dibura ruma ai idia noho taudia momo herea be edia lalomamina dainai tuari lalonai idia vareai lasi.

Bible Student tauna ta, Frank Platt be abia hidi ia karaia ami kamepa ai gaukara haida do ia karaia. To, idia oda henia tuari lalonai ia vareai neganai unai ia abia dae lasi, unai dainai ia idia dagedage henia bada. Atkinson Padgett be ami lalonai ia vareai, to daudau lasi hereva momokani ia dibaia neganai, ia ura lasi tuari ipidi ia abia. Unai dainai, ami taudia ese idia dagedage henia bada.

Ena be unai negai, iseda tadikaka ese Keristani gini siri karana idia lalopararalaia namonamo lasi, to idia ura bada Iehova Dirava idia hamoalea. Inai sivarai lalonai ita herevalaia taudia be unai “hahetoho negana” lalonai, Keristani gini siri karana idia hahedinaraia goevagoeva. (Apok. 3:10)​—⁠Orea ena histori Britain ai.