Nega haida oi ura Baibel oi duahia, to unai bamona hemami oi abia danu, a? Taunimanima momo dekenai Baibel duahia karana be ia auka. To bema oi davaria Baibel ese oi ia durua diba oi moale bona mauri namona oi noholaia totona, dahaka do oi karaia? Bona bema oi davaria oi duahia gauna oi ura henia, dahaka do oi karaia? Baibel ese oi do ia durua dalana oi ura dibaia, a?

Baibel duahia karana amo namo idia abia taudia edia lalohadai mani oi itaia.

Ezekiel, ena mauri lagani 20 bamona, ia gwau: “Guna, lau be motuka ia taria bona ia lao henia gabuna ia diba lasi tauna bamona. To Baibel lau duahia neganai unai ese lau ia durua mauri namona lau moalelaia totona. Bona idia noho hakaua herevadia be egu dina ta ta maurina ai lau gaukaralaia diba.”

Frieda, ena mauri lagani 20 mai kahana, ia gwau: “Nega momo lau badu. To Baibel duahiduahi karana ese lau ia durua egu kara lau biagua totona. Unai dainai, hari egu turadia be momo.”

Eunice, ena mauri lagani 50 mai kahana ia gwau, “Baibel duahia karana ese lau ia durua egu kara gunadia lau haidaua bona hahine namona ai lau lao.”

Ataiai ekspiriens idia gwauraia taudia bona taunimanima milioni momo be Baibel duahia karana ese idia ia durua mauri namona idia moalelaia totona. (Isaia 48:17, 18) Inai gaudia foa amo, oi do ia durua (1) abia hidi maorodia oi karaia totona, (2) turadia namodia oi davaria totona, (3) lalometau oi hanaia totona, bona (4) gau badana be, Dirava amo hereva momokani oi dibaia. Baibel ena sisiba be Dirava amo ia mai, unai dainai do oi badinaia namonamo diba. Dirava be sisiba kereredia ia henia diba lasi.

Gau badana be Baibel oi duahia matamaia be namo. Edena dala haida ese oi do ia durua Baibel duahia karana oi matamaia bona emu duahiduahi karana oi moalelaia totona?

Dahaka ese oi do ia durua emu Baibel duahiduahi karana oi moalelaia bona namo oi abia totona? Taunimanima momo ia durua daladia faiv mani oi itaia.

Gabu namona abia hidi. Namona be regerege lasi gabuna oi abia hidi. Danu emu Baibel duahiduahi karana do idia hadikaia gaudia oi dadaraia. Diari bona hodahoda namona ese oi do ia durua emu duahiduahi oi moalelaia totona.

Lalohadai maorona abia. Baibel be iseda Guba Tamana amo dainai, oi duahia gaudia amo namo bada do oi abia bema emu kara be natu ta bamona, ia noho hegaegae, ena lalokau tamana amo diba ia abia totona. Bema Baibel dekenai lalohadai kereredia oi abia, namona be unai lalohadai oi dadaraia. Unai amo Dirava ese oi dekenai ena dala do ia hadibaia.​—Salamo 25:4.

Guriguri guna. Dirava ena lalohadai be Baibel ai ia noho, unai dainai ita lalopararalaia totona ena heduru ita noia be namo. Dirava ia gwauhamata ia ese “lauma helaga be idia noinoi taudia dekenai do ia henia.” (Luka 11:13) Lauma helaga ese oi ia durua diba Dirava ena lalohadai oi lalopararalaia totona. Baibel oi duahia neganai lauma helaga ese emu lalona do ia kehoa “Dirava ena dobu gaudia” oi dibaia totona.​—1 Korinto 2:10.

Lalopararalaia totona oi duahia. Namo lasi Baibel oi duahia kava. To, oi duahia gauna oi lalohadailaia be namo. Oi sibona oi nanadaia: ‘Lau duahia tauna ena sivarai amo dahaka lau dibaia? Edena dala ai, egu mauri ai unai do lau badinaia?’

Oi ura hagugurua gaudia oi abia hidi. Emu Baibel duahiduahi amo namo oi abia totona oi ura dibaia gauna oi abia hidi, badina unai ese emu mauri do ia hanamoa bada. Oi ura inai bamona gaudia oi hagugurua hegeregere: ‘Lau ura Dirava ena kara lau diba namonamo.’ ‘Lau ura tau eiava hahine namona ai lau lao.’ Bena Baibel ena kahana haida oi abia hidi unai amo oi do ia durua oi ura dibaia gaudia oi abia totona.a

Baibel duahiduahi karana oi hamatamaia totona, inai dala faiv ese oi do ia durua. To edena bamona emu duahiduahi karana do oi moalelaia? Atikol gabena ese unai do herevalaia.

Oi hesikulaia,a? Eiava oi moalelaia? Baibel duahiduahi karana ese oi dekenai dahaka namo ia havaraia diba? Baibel duahiduahi karana be mai anina bada. Hari, dahaka do oi karaia diba emu Baibel duahiduahi urana oi habadaia bona moalelaia dalana do ita itaia.

Oi manadalaia gado ena Baibel gaukaralaia. Bema oi duahia gauna amo hekwakwanai momo oi davaria eiava guna idia gaukaralaia herevadia oi diba lasi, emu duahiduahi do oi moalelaia lasi. Namona be oi manadalaia gado ena Baibel oi gaukaralaia unai amo ena hereva do oi lalopararalaia bona mamia momokani. Danu namona be Baibel ena hereva idia stadilaia bona hahanaia namonamo.a

Inai nega ena teknoloji gaukaralaia. Hari, Baibel be idia printaia buka sibona ai ia noho lasi, to fon eiava tablet ai danu. Baibel haida be intanet amo oi duahia diba eiava sibona emu duahiduahi totona, kompuita, tablet, eiava mobael fon dekenai oi daonloud diba. Idia noho diba matamata be mai ena tulu haida bema oi ura unai topik amo gado haida edia Baibel oi sekea, haraga herea do oi davaria diba. Bema duahiduahi oi ura lasi, intanet ai idia rekodia Baibel oi daonloud bona kamonaia diba. Momo be idia rekodia Baibel duahiduahi idia moalelaia, hegeregere, pablik gabudia dekenai idia loaloa, dabua huria gabudia, eiava ma gabu haida ai. Reana oi dekenai ia hegeregere dala ta oi badinaia diba?

Baibel stadi ena tulu idauidau gaukaralaia. Baibel stadi ena tulu idauidau ese oi do ia durua diba emu duahiduahi oi moalelaia totona. Emu duahiduahi lalonai, Baibel tanodia edia mapu idia noho unai ese oi ia durua oi duahia gabu ena ladana bona unai gabu ai idia vara sivarai be gabu maorona ai ia noho. Inai bamona stadi gaudia hegeregere, inai magasin eiava jw.org ena websait ena “Bible Teachings” ena kahana ta, ese oi do ia durua Baibel ena anina momo kahadia do oi davaria diba.

Oi ura kahana oi abia hidi diba. Bema Baibel ibounai oi duahia totona oi hesiku, namona be oi ura henia kahana ta oi abia hidi bena unai ese emu duahiduahi ena ura do ia habadaia. Bema oi ura Baibel ese ia sivarailaia momo taudia edia kara oi dibaia, edia sivarai ia gwauraia bukana ai oi hamatamaia diba. Maua ladana “Baibel Lalonai Idia Noho Taudia Dibaia Namonamo” ai, edia hamatamaia herevadia idia noho. O reana oi ura Baibel be edia topik ida eiava idia vara sivarai hegeregerena oi duahia diba. Idia gwauraia dala ta oi tohoa diba, a?

Baibel be buka ma haida bamona lasi. Baibel lalonai, iseda Havaraia Tauna ena sisiba herevadia ia noho. (2 Timoteo 3:16) Bona ia lalonai idia noho sivarai ese ita ia hagoadaia diba. Baibel ia gwau: “Dirava ena hereva be ia mauri noho, bona ia be mai ena siahu.” (Heberu 4:12) Baibel be mai ena siahu bona iseda mauri ia hanamoa daladia rua be​—hari iseda mauri ai hakaua herevadia ia henia bona ita ia durua Dirava bona ena gwauhamata ita dibaia totona.​—1 Timoteo 4:8; Iamesi 4:8.

Emu mauri ia hanamoa. Baibel ese ita ia durua diba eda mauri ai ita lalohekwarahilaia gaudia ita hamaoromaoroa totona. Baibel ena heduru dainai henunai idia noho hahenamo oi mamia diba.

• Emu hetura karana ma haida ida oi hanamoa.​—Efeso 4:31, 32; 5:22, 25, 28, 33.

• Emu lalona bona tauanina ia goeva totona.​—Salamo 37:8; Aonega Herevadia 17:22.

• Kara namodia oi hahedinaraia totona.​—1 Korinto 6:9, 10.

• Moni oi gaukaralaia namonamo totona.​—Aonega Herevadia 10:4; 28:19; Efeso 4:28.a

Asia tanona ai, headava matamata taudia rua be Baibel ena sisiba idia moalelaia. Vanegai sibona idia headava taudia bamona, idia danu be idia hekwarahi edia kara idia diba namonamo bona edia herevahereva karana idia hanamoa totona. To, Baibel amo idia dibaia gauna be edia mauri ai idia badinaia. Dahaka namo idia abia? Vicent ia gwau, “Baibel amo lau duahia gauna ese lau ia durua dainai emai headava lalonai ai davaria hekwakwanai be lalokau dalanai ai hamaoromaoroa diba. Baibel ena hakaua herevadia ai badinaia dainai, emai headava maurina ai moalelaia.” Ena adavana ladana, Annalou ia gwau: Baibel ai idia noho haheitalai ese ai ia durua. Hari lau moale bona emai headava lalonai gau ta ai lalohekwarahilaia lasi bona emai tahua gaudia abia totona ai gaukara hebou.

Dirava ai dibaia. Vicent ma ia gwau: “Guna bamona lasi, to hari Baibel duahia karana amo lau mamia, lau be Iehova kahirakahira lau noho.” Vicent ena lalohadai ese mai anina bada gauna ta ia hahedinaraia​—Baibel ese oi ia durua diba Dirava oi dibaia totona. Unai oi karaia neganai, ena sisiba hereva amo namo do oi abia sibona lasi to oi do ia durua Dirava be emu turana ai oi halaoa totona. Bona do oi itaia Dirava ese vaira nega totona mauri namona noholaia dalana ia herevalaia​—unai be mauri hanaihanai. (1 Timoteo 6:19) Unai sivarai be buka ma ta ese do ia herevalaia diba lasi.

Bema nega oi atoa Baibel oi duahia totona, unai hahenamo do oi abia​—emu mauri do hanamoa bona Dirava do oi dibaia. To, Baibel oi duahia neganai, henanadai momo do oi laloa. Bona unai oi laloa neganai, lagani 2,000 mai kahana ia noho Etiopia tauna ena haheitalai oi laloa. Ia be Baibel dainai henanadai momo ia henia. Ia duahia gauna lalopararalaia totona Filipo ese ia nanadaia bona ena haere amo, ia gwau: “Edena bamona do lau laloparara bema ta ese lau ia hadibaia lasi?”b Bena Baibel ia diba namonamo bona hadibaia tauna namona, guna Iesu ena hahediba tauna ta, Filipo, ena heduru ia abia dae. (Kara 8:30, 31, 34) Oi danu bema oi ura ta ese oi ia durua Baibel amo diba ma oi haida abia totona, oi ai boiria emai Web sait www.pr2711.com oi lao o inai magasin ai ia noho adres dekenai revareva oi siaia. Reana Iehova ena Witnes taudia oi rini henia eiava ia noho kahirakahira Kingdom Hall ta ai oi lao diba. Hari Baibel oi abia dae be namo badina oi do ia hakaua mauri namona oi moalelaia totona.