Keristen Dala Momokanina ai Dahaka be Gau Badana?

HARI inai negai taunimanima momo idia gwau idia be Keristen tomadiho lalonai idia noho, ma tomadiho oreadia iboudiai edia taunimanima edia namba be unai bamona ia bada lasi. To sibodia idia gwauraia Keristen taudia idia abia dae herevadia idia tamona lasi, unai taunimanima idia gaukara hebou lasi, bona nega haida unai orea lalodiai idia ala-ala heheni bona sibona edia orea taudia idia hamasedia. Ia hedinarai goevagoeva, taunimanima momo be Keristen taudia momokanidia lasi. Iesu ia gwau hari iseda nega lalonai, taunimanima momo be ia dekenai do idia gwau, “Lohiabada e, Lohiabada e,” anina be, do idia gwau idia be Keristen taudia, to ia be idia dekenai do ia gwau: “Umui be lau diba lasi momokani. Idau gabuna dekenai umui lao, umui dika karaia taudia.” (Mataio 7:​21, 23) Momokani, ita ibounai ita ura lasi ita be unai taunimanima edia huanai ita noho! Vadaeni, ita be edena bamona ita diba, ita be Keristen taudia momokanidia, eiava lasi?

Hereva momokanina be inai: Taunimanima ta be Keristen tauna korikorina ta ai ia lao totona, gau momo ia karaia be namo. Keristen tauna korikorina ena abidadama ia goada be gau badana, badina “tau ta bema Dirava ia abidadama henia lasi neganai ia hegeregere lasi Dirava ena ura do ia badinaia.” (Heberu 11:6) Unai abidadama goadana be kara maoromaorodia ida ia karaia danu be gau badana. Hahediba tauna Iakobo ia gwau “abidadama mai ena kara namodia lasi, be mase gauna.” (Iakobo 2:26) Danu, Keristen tauna ese “hesiai tauna mai ena kamonai bona mai ena kara maoromaoro” ena siahu ia abia dae be gau badana. (Mataio 24:​45-47) To Keristen kara korikorina ena anina be unai gaudia lasi, to ia be ma gau idauna ta.

Ena anina be dahaka? Aposetolo Paulo be iena leta ginigunana Korinto taudia dekenai ia torea neganai, unai ia hahedinaraia, ia gwau: “Bema taunimanima edia gado idauidau lau hereva diba, aneru edia gado danu, to lauegu lalokau be lasi neganai, lauegu hereva be auri idia botaia, o gaba idia toua kava bamona. Bema peroveta siahuna lau abia, bona Dirava ena hunia gaudia lau diba, aonega ibounai danu, bona bema lauegu abidadama dekena amo ororo lau kokia diba, to lauegu lalokau be lasi neganai, lau be anina lasi gauna bamona. Bema lauegu kohu ibounai ogogami taudia dekenai lau henia, bona bema lauegu tauanina lau henia, do idia gabua ore totona, to lauegu lalokau be lasi neganai, lau be namo lasi.”​—1 Korinto 13:​1-3.

Unai dainai lalokau be Keristen kara momokanina ena anina. Abidadama, kara namodia, bona hebamo namodia be gau bada hereadia, bona unai kara ita negea diba lasi. To bema lalokau be lasi, unai kara edia namo ita davaria diba lasi. Dahaka dainai?

Badina badana be, ita tomadiho henia Diravana ena kara dainai. Aposetolo Ioane ese Iehova, Keristen tomadiho korikorina ena Dirava, ena kara be inai hereva amo ia gwauraia: “Dirava be lalokau.” (1 Ioane 4:8) Iehova Dirava ena kara be momo, ia be mai ena siahu, mai ena hahemaoro maoromaoro, bona mai ena aonega, to ena kara badana be ia be lalokau Diravana, unai dainai ia ura ia idia tomadiho henia taudia edia kara be edena bamona? Momokani, ia ura idia ese ia do idia tohotohoa bona lalokau do idia hahedinaraia.​—Mataio 5:​44, 45; 22:​37-39.

Mai Ura Maoromaorona

Oibe, lalokau dainai Keristen taudia be idia tomadiho henia Diravana ena kara idia tohotohoa. Unai ena anina be edia ura be Dirava ena ura bamona. Iehova Dirava ese Iesu be tanobada dekenai ia siaia, ia ese dala ia kehoa mauri hanaihanai ita abia totona. Dahaka dainai Dirava be unai bamona ia karaia? Lalokau dainai. “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Unai dainai, namona be Dirava ena ura ita karaia ena badina be dahaka? Haere be tamona, lalokau. “Dirava ita lalokau henia ena anina be inai: Dirava ena taravatu do ita badinaia.”​—1 Ioane 5:3.

Dirava ita hesiai henia diba, to eda kara ena badina be maoro lasi, a? Oibe. Paulo ia gwau iena nega lalonai haida ese Dirava ena hesiai gaukara idia karaia badina idia mama bona idia ura sibona edia ladana idia habadaia dainai. (Filipi 1:​15-17) Ita ese unai kerere ita karaia diba. Inai tanobada lalonai taunimanima idia halusia heheni toho, bona unai kara ese iseda kara ia hagagevaia diba danu. Reana, ita hekokoroku badina pablik tok ita karaia namonamo eiava buka, buklet bona magasin momo ita hariharilaia bona ma tadikaka haida be unai bamona idia karaia lasi. Reana ita ese iseda dagi kongregesen lalonai bona ma tadikaka ta ena dagi ita hahegeregerea bena ita hekokoroku​—eiava ita mama. Reana elda tauna ta ia ura iena dagi o iena siahu be ia sibona ia dogoatao, bona unai dainai eregabe tauna mai dibana ena dala ia koua kongregesen ena dagi do ia abia garina. Reana, ita haida ita ura moni o kohu ita abia, bona unai ura dainai taga Keristen taudia ita tura henidia, to ogogami Keristen taudia ita tura henidia lasi.

Ita goevadae lasi dainai, unai kerere idia vara diba. To, bema​—Iehova hegeregerena​—iseda kara edia badina badana be lalokau, unai kerere do ita koua toho. Bema ita sibona eda namo ita tahua, bema ita ura sibona eda ladana ita habadaia, o bema ita hekokoroku, unai ese iseda lalokau ia koua diba, bona unai amo ita ‘be namo ita davaria lasi.’​—Hereva Lada-isidia 11:2; 1 Korinto 13:3.

Lalokau Hahedinaraia Karana Sibona Edia Namo Idia Tahua Taudia Edia Huanai

Iesu ia gwau ia murinai idia raka taudia be do “tanobada ena lasi.” (Ioane 17:14) Dahaka ita karaia diba, inai tanobada ena siahu ese ita do ia veria garina? Lalokau ese ita do ia durua. Hegeregere, hari inai negai taunimanima momo ese ‘lebulebu karadia idauidau idia ura henia bada, to Dirava idia ura henia maragi.’ (2 Timoteo 3:4) Ioane ese ita ia hamaoroa, unai bamona do ita karaia lasi. Ia gwau: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai. Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho.”​—1 Ioane 2:​15, 16.

To, “tauanina ena ura dikadia” bona “matabodaga ena ura dikadia” ita dadaraia momokani be auka. Ita taunimanima ese unai gaudia ita ura henia badina iseda tauanina idia hamoalea dainai. Danu, hari inai negai tauanina hamoalea gaudia be momo herea bona idia be idauidau; Ioane ena negai idia be unai bamona lasi. Unai dainai, bema unai negai matabodaga ena ura be hekwakwanai gauna ta, hari inai negai ia be hekwakwanai gauna badana ta.

Mai anina bada gauna be inai: Inai tanobada ena moale karadia momo be gau dikadia lasi. Bema ita be mai eda ruma badana ta, o mai eda motuka namona, o mai eda televisen o mai eda stereo, unai be dika lasi. Bona bema ita be gabu daudauna dekenai ita laolao bona holide namona ita abia, unai ese Bible ena taravatu ta ia utua lasi. Vadaeni, dahaka dainai Ioane ese unai sisiba ia henia? Badina ta be inai: Bema ita dekenai unai bamona gaudia be gau bada hereadia bona ita tahua guna gaudia, vadaeni, unai be sibona ita laloa momo karana, kohu laloa bada karana bona hekokoroku ia havaraia karana. Bona bema ita gaukara goadagoada moni bada do ita abia unai gaudia do ita moalelaia totona, reana unai ese iseda hesiai gaukara Iehova dekenai do ia hadikaia diba. Danu, nega bada do ita halusia unai gau bona kohu do ita moalelaia totona, bona, ena be ita laga-ani nega sisina bona unai ese ita ia hagoadaia, to iseda nega be bada lasi, badina nega bada ita haorea iseda maduna idauidau ita huaia totona; hegeregere, Bible ita stadilaia, Keristen taudia danu tomadiho dekenai ita hebou, bona Basileia ena sivarai namona ita harorolaia.​—Salamo 1:​1-3; Mataio 24:14; 28:​19, 20; Heberu 10:​24, 25.

Hari inai negai, taunimanima momo ese kohu bona moni idia laloa bada dainai, namona be iseda lalona ita hadaia ‘Dirava ena Basileia do ita tahua guna’ bona ‘inai tanobada ena gau namodia do ita abia badabada’ lasi totona. (Mataio 6:33; 1 Korinto 7:​31, NW) Bema iseda abidadama ia goada, unai ese ita do ia durua. To, heduru gauna badana be mai eda momokani ida Iehova bona iseda dekena taudia ita lalokau henia neganai, unai ese ita do ia hagoadaia hedibagani bamona taudia do ita dadaraia totona; unai gaudia, ena be idia be gau dikadia lasi, to reana iseda dala idia koua dainai ‘Dirava ena hesiai tauna ena dagi karadia ibounai do ita karaia namonamo’ lasi. (2 Timoteo 4:5) Bema unai bamona lalokau ita abia lasi, iseda hesiai gaukara ia dika ia lao diba bena mai eda momokani ida do ita karaia lasi, to koukouna sibona ita karaia.

Lalokau Kongregesen Lalonai

Iesu ia hahedinaraia lalokau be gau badana. Ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Ita diba elda taudia ese edia Keristen tadikaka idia lalokau henidia, badina nega bada idia halusia tadikaka idia naria bona idia durua totona. Ita diba kongregesen taudia ese lalokau idia hahedinaraia, badina edia tadikaka​—elda taudia danu​—edia manoka gabudia idia haheaukalaia. Keristen taudia idia kamonai haida idia dabu neganai, lalokau ese idia ia ha-uraia bena tauanina dalanai heduru idia henia. (Kara 2:​44, 45) Dagedage negadia ai, Keristen taudia idia heduru heheni, bona sibodia edia mauri idia atoa diho idia durua heheni totona. Dahaka dainai? Lalokau dainai.​—Ioane 15:13.

Nega haida kara maragidia amo lalokau ia hedinarai goevagoeva. Reana, elda ta be mai ena gaukara metaudia momo to iena Keristen tadikaka o taihu ta be ia dekenai ia lao bona gau ta ia maumauraia lou; to elda ia laloa unai gau be gau badana lasi. Elda tauna ia badu be namo, a? Namo lasi unai tadikaka ena kara dainai elda tauna be ia amo ia parara, to namona be mai ena haheauka bona hebogahisi ida unai tadikaka ia kara namo henia. Unai gau ma idia kikilaia hebou, bona unai dainai edia hetura karana idia hagoadaia danu. (Mataio 5:​23, 24; 18:​15-17) Namo lasi tadikaka ta ta iboudiai idia gwau edia maoro idia abia be gau badana, to idau, namona be idia iboudiai ese dala idia tahua hebogahisi karana do idia habadaia Iesu ena sisiba hegeregerena, bona edia lalona ai idia hegaegae edia tadikaka edia kerere do idia gwauatao “nega 77.” (Mataio 18:​21, 22, NW) Unai dainai Keristen taudia idia goada karaia lalokau idia atoa dabua idia atoa bamona, ‘vadaeni do idia noho hebou namo herea mai laloa tamona danu.’​—Kolose 3:14.

Iseda Lalokau Heheni Karana Ita Habadaia Dalana

Oibe, Iehova ena hesiai gaukara ita karaia ena badina maorona be lalokau. Lalokau ese ita do ia hagoadaia bena inai tanobada amo do ita gini siri, bona lalokau dainai kongregesen ena kara do ia Keristen momokani. Ena be lalokau ese gaukara namonamo karana ia hadikaia lasi, to lalokau ese siahu taudia ia durudia dainai gaukara namonamo dalana idia tahua goadagoada neganai ma taunimanima haida idia kara henidia neganai, hebogahisi bona manau do idia hahedinaraia. Lalokau ese ita ibounai ia durua ‘hakaua taudia do ita kamonai henia, bona edia hereva do ita badinaia . . . bona idia henunai do ita noho.’​—Heberu 13:17.

Aposetolo Petro ese ita ia hagoadaia, ita ‘lalokau heheni mai iseda lalona ibounai danu,’ badina “lalokau ese kara dika momo ia hunia.” (1 Petero 4:8, NW) Ita be edena bamona unai bamona ita karaia diba? Dirava ese taunimanima ia havaraia ia sibona ena toana bona laulau hegeregerena, unai dainai taunimanima ese lalokau idia hahedinaraia diba. To hari ita kikilaia lalokauna ita hahedinaraia totona ma ita habadaia be namo. Momokani, unai lalokau be Dirava ena lauma helaga ena kara badana. (Galatia 5:22) Unai dainai, lalokau ita hahedinaraia totona Dirava ena lauma helaga ita abia be namo. Edena dala amo? Daladia be inai: Iehova ena lauma helaga ese ia havaraia gauna, Bible, ita stadilaia. (2 Timoteo 3:16) Guriguri amo ita noinoi Iehova ena lauma helaga ese iseda lalokau Iehova dekenai bona iseda tadikaka dekenai do ia habadaia totona. Bona Keristen kongregesen ita bamoa, ia lalonai lauma helaga ia gaukara namonamo, bona ia koua gauna ta be lasi.

Danu, namona be ita sibona eda kara ita tahua, bena do ita diba lalokau lasi karadia o lalohadai be ita dekenai idia noho eiava lasi. Oi laloaboio lasi, lalokau be kudouna amo ia mai, bona “taunimanima edia kudouna be koikoi herea bona dika rohoroho.” (Ieremia 17:9) Ena be Iehova ese ita ia durua bada, to nega haida lalokau lasi karana ta do ita karaia. Reana, tadikaka ta ita hereva auka henia, eiava taunimanima ta ena hereva ta dekenai ita badu, to unai bamona ita karaia be maoro lasi. Unai dainai David ena guriguri ita gurigurilaia be namo, ia gwau: “Dirava e, oi ese lau oi tahua, bona egu kudouna oi diba. Oi ese lau oi tohoa, bona lauegu lalohadai oi diba, bona oi itaia, dala dikana ta lau lalonai ia noho eiava, bona noho hanaihanai dalana dekenai oi ese lau oi hakaua.”​—Salamo 139:​23, 24.

Bible ia gwau: “Lalokau be do ia doko lasi.” (1 Korinto 13:8) Bema nega ibounai ita lalokau heheni, hetoho negadia ai iseda lalokau do ia hegeregere. Dirava ena orea taudia idia lalokau heheni bona unai lalokau ese hari inai negai ia noho lauma paradaisona ia durua bada. Edia kudouna amo idia lalokau heheni bada taudia sibona ese moale do idia davaria tanobada matamatana lalonai idia noho neganai. Unai dainai Iehova oi tohotohoa, lalokau oi hahedinaraia bona lalo-tamona karana oi hagoadaia. Lalokau oi habadaia, bona Keristen dala momokanina ena gau badana oi abia.