Inai Hesiai Gaukara Oi Karaia be Namo, A?

IEHOVA ena hariharibada ita dekenai ia hahedinaraia dalana be, ia ese tanobada namona ia henia ita dekenai ita moalelaia totona. Ena be Adam bona Eva idia gwau-edeede ia dekenai, to iena lalonamo dainai, ia ese unai hahenamo ita do ia henia noho. Unai sibona lasi, to ena lalokau bada ia hahedinaraia gauna be ena Natuna ia siaia idia abidadama taudia ia hamauridia kara dika dekenai.​—Mataio 5:45; Ioane 3:16.

Edena bamona unai lalokau karana ita ese do ita hahedinaraia? Iesu ia gwau, namona be iseda Dirava Iehova do ita lalokau henia mai iseda lalona ibounai, mai iseda [souli] ibounai, mai iseda aonega ibounai, bona mai iseda goada ibounai. Unai ese ia hahedinaraia ia do ita tomadiho henia bona do ita kamonai henia, bona namona be iseda mauri dalana ai ita be iena ura hegeregerenai ita raka be namo.​—Mareko 12:30; 1 Petero 4:2.

To dahaka gaudia ita karaia bema Dirava ena ura ita karaia neganai? Gaukara ta ia noho ita karaia ia totona​—hesiai gaukara ta ita karaia totona, a?

Hesiai Taudia Ita Ura Abia

Dubu orea taudia ese taunimanima edia lalona idia hadaradaraia Dirava tomadiho henia dalana dekenai bona ena hesiai gaukara karaia dalana dekenai. To, Bible ese ia hahedinaraia tomadiho momokanina tamona sibona ia noho, bona “lohiabada be tamona, abidadama be tamona, bapatiso be tamona. Dirava danu be tamona, ia be ita ibounai iseda Tamana.” Iesu ia gwau: “Tomadiho taudia momokani ese mai Lauma bona mai momokani danu Tamana do idia tomadiho henia.” Unai dainai Bible ena sisiba idia dekenai be inai: “Umui parara lasi. Hereva tamona do umui gwauraia.”​—Efeso 4:​3-6; Ioane 4:23; 1 Korinto 1:10.

Tomadiho momokani daradaralaia karana be Eden dekenai ia vara matamaia, Satana ese Iehova be gau ibounai ia lohiaia dalana ia hepapahuahulaia, bona Dirava ena lohia dalana ia henanadailaia neganai. (Genese 3:​1-6, 13) Hari, Satana be Dirava ia inai henia karana ia goadalaia noho totona, hahediba koikoi herevadia ia gwauraia bona tomadiho koikoi edia hesiai gaukara taudia ese unai hahediba koikoi herevadia idia halasia noho bona idia ese “edia kara idia senisia, bona taunimanima vairanai idia be kara maoromaoro taudia bamona.” Unai dainai Bible ia gwau: “Lauegu lalokau taudia e, lauma amo idia vara herevadia haida sibona oi abia dae, iboudiai lasi . . . badina peroveta koikoi taudia momo be tanobada ena kahana ibounai dekenai idia lao noho.”​—2 Korinto 11:​14, 15; 1 Ioane 4:1, NW.

Gau namona be Dirava be gau haida ia karaia vadaeni unai henanadai badana, ena lohia dalana dekenai, ia hamaoromaoroa totona. Iena Natuna ia siaia vadaeni taunimanima be kara dika ena igui amo ia ruhaia totona, bona hari ia ese Iesu be Dirava ena Guba Basileia ena Pavapava ai ia halaoa vadaeni bona gwaumaoro ia henia Satana bona ena peroveta koikoi taudia, eiava ena hesiai taudia, do ia hadikadia ore totona. Unai ese do ia hahedinaraia Dirava ena ura be tanobada dekenai do ia guguru, bona kamonai taudia be hahenamo do idia abia ela bona hanaihanai.​—Daniel 7:​13, 14; Heberu 2:9.

Satana ese unai hereva momokanidia ia hunidia. (2 Korinto 4:4) Unai dainai, Dirava ena hesiai gaukara ita karaia be mai ena badina, bona namona be Satana ena koikoi herevadia ita hahedinaraia bona hereva momokani ita gwauraia hedinarai. Iehova ese ita ia doria lasi unai hesiai gaukara do ita karaia totona. Ia ura ita be Iesu bamona bona ita sibona ia ita laloa bada bona iena kara ita dekenai dainai iseda ura amo iena hesiai gaukara do ita karaia.​—Salamo 110:3; Heberu 12:​1-3.

Keristen Hesiai Gaukarana

Iesu be “hanua badadia bona hanua maragidia edia lalonai ia haroro loaloa, Dirava ena Basileia ena Sivarai Namona ia harorolaia.” (Luka 8:1) Danu, ia ese ena aposetolo taudia ia hadibaia hesiai taudia namodia ai do idia lao ia bamona, bona ia siaidia lao haroro totona. (Mataio 10:​1-14, 27) Gabeai, ia hamaorodia tanobada ena kahana ibounai dekenai do idia lao haroro totona.​—Mataio 28:​19, 20; Kara 1:8.

Unai hahegani herevana be Keristen taudia momokani dekenai ia noho, bona Dirava ena lauma helaga ese ia hagoadaia unai haroro gaukara idia karaia totona. Pentekoste 33 C.E. ai ia vara bamona, sivarai namona idia abia dae taudia ibounai ese inai maduna idia abia dae: edia uduna dekenai edia abidadama karana do idia hahedinaraia.​—Kara 2:​1-4, 16-21; Roma 10:​9, 13-15.

To, taunimanima momo be idia ura lasi hesiai gaukara taudia ai idia lao. Iehova ena Witness tauna ta, ladana Peter, be ia gwau: “Tatau taudia Germany dekenai idia laloa bema tomadiho idia herevalaia unai be hemarai gauna. Idia gwau: ‘Unai be dubu gunalaia taudia edia gaukara.’ ” Lagani momo lalodiai misinari gaukara ia karaia tauna ta, ladana Tony, be ia gwau, England dekenai idia noho taudia idia gwau: “Umui herevalaia gaudia be namo, bona lau laloa Iehova ena Witness taudia be taunimanima namodia. To ruma ta ruma ta haroro gaukara​—unai lau karaia diba lasi.” Ben be Nigeria tauna ta danu nega daudau lalonai Bible idia stadilaia hebou, bona unai Nigeria tauna ese ia hamaoroa, ia gwau: “Taunimanima edia vairana dekenai ruma ta ruma ta gaukara do lau karaia diba lasi; to emui kongregesen dekenai moni lau henia diba unai ruma ta ruma ta gaukarana idia ura karaia taudia do lau durudia totona.” Oibe, taunimanima momo be abidadama lasi, bona Keristen hesiai gaukarana idia hemarailaia.

To, taunimanima haroro henidia ena maduna be Keristen kongregesen taudia ibounai dekenai ia noho, buruka taudia, matamata taudia, tatau, bona hahine. Ena be elda taudia bona hesiai taudia ese ‘unai gaukara idia gunalaia,’ to ia be idia sibodia edia gaukara lasi, to Keristen taudia iboudiai danu. Idia iboudiai dekenai Bible ia gwau: “Bona inai hanamoa Dirava do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada. . . . Umui idia hakaua taudia do umui kamonai henia, bona edia hereva do umui badinaia.”​—Heberu 13:​15, 17.

Ororo dekenai taunimanima hutuma dekenai ia haroro neganai, Iesu ia gwau: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana guba dekenai ia noho ena ura idia karaia taudia, idia sibona do idia vareai.” Nega ta ia hahedinaraia Dirava ena ura karaia dalana ta be abidadama lasi taudia ita haroro henidia. Iena aposetolo taudia ese ia idia hamaoroa Samaria taudia dekenai ena haroro herevana do ia hadokoa badina do ia aniani totona, to ia gwau: “Egu aniani be inai, lau ia siaia Diravana ena ura do lau karaia, iena gaukara do lau karaia haorea momokani.”​—Mataio 7:21; Ioane 4:​27-38.

Unai Gaukara Oi Tahua Be Namo, A?

Taunimanima edia mauri lalonai idia ura be aniani bona moni momo idia tahua. To Iesu be ororo dekenai ia haroro neganai, kamonai taudia ia sisiba henidia, unai gaudia tahua goadagoada karana dekenai do idia naria namonamo. “To,” ia gwau, “umui emui kohu be guba dekenai do umui haboua. . . . To umui be [Dirava ena] Basileia bona iena kara maoromaoro do umui tahua guna.”​—Mataio 6:​20, 33.

Basileia tahua guna ena anina be iseda ura gaudia idauidau ese iseda hesiai gaukarana do idia hadikaia lasi. To, namo lasi unai gaukara dainai ma gau ibounai do ita karaia lasi. Hegeregere, Bible ese ita ia hagoadaia iseda ruma bese lalonai iseda maduna korikori idauidau ita huaia be namo. Ita bona taunimanima iboudiai danu ese unai maduna idia abia. Bema iseda maduna ita huaia namonamo lasi neganai, Keristen tomadihona hegeregerena ita karaia lasi. (1 Timoteo 5:8) To, gau badana be hesiai gaukarana ita karaia neganai, namona iseda maduna ma iboudiai ita huaia namonamo danu.

Iesu ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Mataio 24:14) Unai peroveta herevana danu ia gwauraia gaudia ese idia hahedinaraia iseda nega lalonai ia guguru noho. Lagani 1914 amo ema bona hari, sivarai namona ita dekenai be Basileia be siahu ia abia vadaeni, ia be Iehova ena lohia kahana ai ia gini bona Satana bona ena tanobada do ia hadikadia ore totona. (Apokalupo 11:​15-18) Unai ena anina ita laloa namonamo be gau badana. Dokona ia do ginidae lasi neganai, ita ese haroro gaukara ita karaia guna be gau badana. Taunimanima edia mauri be dika bada dekenai ia noho; ita ese idia momo ita durudia diba mauri idia davaria totona.

Oiemu Hesiai Gaukara Oi Habadaia

Iehova ena Witness taudia momo be hua ta ta dekenai hora 10 eiava ma haida idia halusia ma haida danu sivarai namona idia harorolaia totona. Witness taudia tausen tausen be heduru pioneer gaukara dekenai hora rua eiava ma haida idia halusia dina ta ta iboudiai dekenai, bona haida be nega ibounai regular pioneer bona special pioneer gaukara idia karaia noho. Idia diba inai gaukara be gau badana, bona idia ura edia nega bada idia halusia unai gaukara dekenai hari moale lasi tanobadana ia do ore lasi neganai.

Oi be Iehova ena Witness gaukara goada tauna ta, a? Bema oibe, namona be oi goada noho oiemu hesiai gaukara oi habadaia totona. Oiemu diba haroro gaukara bona hahediba gaukara dekenai oi hanamoa noho, hesiai gaukara dekenai gaukara momo do oi hagugurua noho totona. Bema dala ia noho pioneer gaukara oi karaia totona, namona be oi karaia. Bema dala ia noho lasi oi karaia totona, namona be haida oi hagoadaia unai hesiai gaukara do idia karaia totona.

Bema oi be Iehova dekenai oiemu mauri do oi gwauhamatalaia lasi, namo lasi oi laloa hesiai gaukara be oiemu gaukara lasi. Enjinia gaukarana ia karaia tauna ta ena ladana be Peter, bona ia ura lasi ena adavana be sivarai namona do ia harorolaia haida dekenai. Ia henanadai, ia gwau: “Edena bamona lauegu adavana lau hagoadaia diba haroro ruma ta ruma ta gaukara ia karaia totona?” Lagani momo lalodiai ia ese ena adavana ena abidadama karana Dirava ena Hereva momokani dekenai ia itaia, bona ia ura Bible do ia stadilaia danu. Hari, ena adavana bamona, ia be ena mauri Iehova dekenai ia gwauhamatalaia bona ia be sivarai namona ena bapatiso hesiai tauna ta danu.

Unai dainai namo lasi oi sibona emu dala oi koua, Iehova ena hesiai gaukara dekenai. Ai ese oi ai hagoadaia Bible do oi stadilaia bona Keristen taudia momokanidia danu oi hebamo edia hebou dekenai. Unai ese oi do ia durua emu mauri be Dirava ena kara maoromaoro dalanai do oi haidaua bona oiemu abidadama Dirava ena ura dekenai do oi habadaia. Bema inai kara oi goadalaia noho, oi danu be do oi hegeregere Dirava ena hesiai tauna ta ai do oi lao totona. Bena Iesu ena oda herevana do oi karaia diba, ia gwau: “Unai dainai do umui lao, bese ibounai be diba tahua taudia do umui halaoa . . . bona idia dekenai do umui hadibaia, umui dekenai lau henia hereva ibounai be do idia badinaia.”​—Mataio 28:​19, 20.

Oibe, hesiai gaukara ta ia noho do oi karaia totona, bona unai gaukara oi karaia haraga be namo.

[Box on page 25]

Sisita ta be ena ruma bese ia naridia bona ia gwau: “Dina ibounai hora ta mai kahana bamona lau lao hospital lauegu moni gaukara totona, unai dainai lau laloa heduru pioneer gaukara do lau karaia diba lasi. To lauegu gaukara idauidau lau haridia namonamo, badina lau ura daba momokani dekenai, eiava laga-ani negadia dekenai, bona lau gaukara lasi dinadia dekenai, haroro gaukara do lau karaia. Lau moale bada herea badina hua dokonai hora 117 be haroro gaukara dekenai lau halusia dainai! Magasin 263 lau hariharilaia, bona magasin sabskripsen 22 lau abia, bona Bible stadi 3 lau davaria.”

[Box on page 27]

Michael ena natuna maragidia ibounai be 7, bona Nigeria ena college ta dekenai gaukara badana ta ia karaia. Ia be elda ta Keristen kongregesen dekenai. Witness taudia tausen momo edia lalohadai ia gwauraia, ia gwau:

“Hesiai gaukarana be gaukara badana lauegu mauri lalonai, bona hanaihanai Paulo ena hereva lau laloa lou, ia gwau: ‘Lau ese lau hadoa, Apolo ese ia dairia, to Dirava ese ia hatubua noho.’ Lau bona egu adavana be ai ‘hadohado’ ruma ta ruma ta gaukara lalonai taunimanima ida sivarai namona ai herevalaia sisina neganai. Kamonai taudia ai lou henidia neganai, ‘dairia’ gaukarana ai karaia, Iesu ese ita ia hamaoroa hegeregerena. Pura ta ta dekenai Bible stadi ese taunimanima momo​—ruma bese haida danu​—idia durudia hereva momokani idia dibaia totona.”

Duahia Taudia Edia Henanadai

◼ Keristen ruma besena be dahaka do idia karaia bema ma dala ta be lasi to edia natuna ia lao sikulina dekenai taravatu be tomadiho hahediba klas dekenai ia lao?

Keristen tama sina idia ura lasi edia natudia be tomadiho koikoi dekenai diba idia abia. To reana nega haida natudia be dala lasi to tomadiho hahediba klas dekenai idia lao sibona, to idia be tomadiho koikoi karadia eiava hahelaga karadia haida idia karaia lasi.

Dirava ena turana Abraham be natudia hadibaia tomadiho dalana dekenai haheitalai namona ia karaia. Iena natudia be Kanana dekenai ia ubudia, unuseniai idia be tomadiho kereredia bona “hahelaga” karadia dikadia bogaraginai idia noho. (Esodo 34:​11-15 danu itaia; Levitiko 18:​21-30; Deuteronomi 7:​1-5, 25, 26; 18:​9-14.) To herevana, ia be iena ruma bese ia hadibaia tomadiho dalana dekenai. Dirava ia diba Abraham be “ena natudia bona ena tubudia dekenai do ia hadibaia namonamo . . . , idia ese [Iehova ena] taravatu do idia kamonai henia, kara maoromaoro bona kara namona dekenai.”​—Genese 18:19.

Ia be uhau neganai, Iesu danu be ruma bese bona kongregesen ena