Ura Lasi Herevadia Haerelaidia Daladia

Hereva Haida: Taunimanima ese mauri hanaihanai do idia abia dalana tamona be, Iehova Dirava do idia kamonai henia bona iena Basileia Keriso Iesu ena amo do idia badinaia. Dirava ena Basileia ena sivarai ese moale ia havaraia, bona taunimanima edia helaro namona tamona ia hahedinaraia. Unai sivarai ese taunimanima edia mauri ia haidaua diba. Ita ura taunimanima iboudiai ese unai sivarai do idia kamonai. Ita diba taunimanima haida sibodia ese do idia abia dae mai edia moale ida, to danu ita diba namona be iboudiai ese unai sivarai do idia kamonai bena edia lalona do idia hadaia do idia abia dae eiava lasi. To, haida idia ura lasi idia kamonai, bona ita doridia diba lasi do idia kamonai totona. To bema mai eda aonega ida ita kara henidia, edia ura lasi herevadia ita hanaidia diba bena idia ida ita herevahereva diba. Heduru herevadia haida be henuai ai torea. Haroro gaukarana idia manadalaia Witness taudia ese inai hereva idia gaukaralaia vadaeni, lalo-namo taudia tahudia totona. (Mat. 10⁠:11) Ai laloa namona be oi ese inai hereva idauidau iboudiai do oi laloatao toho lasi, to edia anina do oi laloa, bena sibomu emu hereva amo do oi gwauraia mai emu momokani ida. Unai bamona do oi karaia neganai, do oi diba momokani, lalo-namo taudia do idia kamonai bona Iehova ena hahemauri dalana do idia abia dae mai edia moale ida.​—⁠Ioane 6⁠:44; Kara 16⁠:⁠14.

‘LAU URA LASI’

● ‘Mani lau oi hamaoroa, dahaka oi ura lasi, Baibel ena hereva eiava tomadiho ibounai? Lau be inai bamona lau henanadai, badina be ai hereva henidia taudia momo ese guna tomadiho idia goadalaia, to hari dubu dekenai idia lao lasi, tomadiho oreadia momo edia koikoi karadia idia itaia dainai (eiava, badina be idia laloa tomadiho oreadia ese moni momo idia gogoa bisinesi hegeregeredia; eiava, badina be tomadiho oreadia be politik lalonai idia vareai). Baibel ese unai bamona kara ia gwauraidia maoro lasi, bona ia sibona ese helaro korikorina tamona, nega vaira ena, ia gwauraia hedinarai.’

● ‘Bema emu hereva ena anina be oi ura lasi tomadiho dalana idauna ta oi abia dae, oiemu lalohadai ena badina lau diba. To lau laloa oi ura oi diba, raskol karadia be edena bamona do idia koudia diba bena dala dekenai do ita raka neganai do ita gari lasi (eiava, edena bamona ita ese iseda natudia ita durudia diba drag do idia ania kava lasi totona; eiava, gavamani momo ese niuklia tuari kohudia idia haboudia noho dainai, nega vairai edena bamona noho do ita davaria.) Unai hekwakwanai kokidia dalana ta oi diba, a?’

● ‘Oi be mai sibomu emu tomadiho dainai oi ura lasi, a? . . . Mani lau oi hamaoroa, Oi laloa nega do ia mai, taunimanima iboudiai be tomadiho dalana tamona do idia badinaia, a? . . . Dahaka ese ia koudia? . . . Unai tomadiho dalana ese anina namona ia havaraia totona, namona be dahaka badina latanai idia haginia?’

● ‘Ia namo. Lagani haida gunanai lau danu be unai bamona lau laloa. To Baibel ena hereva ta lau duahia neganai, lalohadai idauna ta lau abia. (Baibel amo unai hereva oi hahedinarai henia.)’

● ‘Bema oiemu lalokau taudia, idia mase vadaeni taudia, do oi itaia lou dalana (eiava, mauri ena anina korikorina; eiava, emu ruma bese hatamonaia dalana) be Baibel amo lau gwauraia, oi ura kamonai, a?’

● ‘Bema emu hereva ena anina be oi ura lasi buka ta oi hoia, mani unai oi laloa momo lasi, badina lau be bisinesi gaukara lau karaia lasi. To oi ura tanobada ena paradaiso lalonai do oi noho diba dalana oi dibalaia, ani? Unai negai gorere bona raskol karadia be lasi bona oiemu dekena taudia ese oi do idia lalokau henia momokani.’

● ‘Iehova ena Witness taudia idia mai negadia iboudiai unai bamona oi hereva, a? . . . Nega ta emu lalona dekenai oi henanadai, dahaka dainai ai mai loulou eiava dahaka ai herevalaia, a? . . . Lau mai, badina lau laloa lau diba herevana ta be oi danu oi diba be namo. Mani, hari inai nega tamona inai hereva oi kamonai.’

‘LAU URA LASI TOMADIHO HEREVADIA LAU KAMONAI’

● ‘Emu hereva ena anina lau lalo-pararalaia sisina. Momokani, tomadiho oreadia ese tanobada be gabu namona ai idia halaoa lasi, ani? . . . Nega ibounai inai bamona oi laloa, a? . . . To oi laloa Dirava ia noho, a?’

● ‘Taunimanima momo be unai bamona idia hereva. Tomadiho oreadia ese Dirava bona iena palani taunimanima totona idia hadibadia maoromaoro lasi, unai dainai ai mai unai do ai gwauraia hedinarai totona.’

● ‘Ia namo, to lau laloa oi be emu vaira dinadia oi laloa. Oi diba Baibel ese hari inai negai idia vara gaudia ia perovetalaidia, a? . . . Danu, gabeai do idia vara gaudia ia gwauraidia hedinarai.’

● ‘Nega ibounai unai bamona oi laloa, a? . . . Vaira dinadia be edena bamona oi lalodia?’

‘LAU URA LASI IEHOVA ENA WITNESS TAUDIA EDIA HEREVA LAU KAMONAI’

● ‘Taunimanima momo be unai bamona idia hereva. Reana oi ura oi diba dahaka dainai ai mai, herevana ai diba taunimanima momo ese ai do idia abia dae lasi. (Mataio 25⁠:​31-33 ena hereva badadia oi gwauraidia, oi gwau, hari inai negai taunimanima iboudiai hapararadia gaukarana idia karaia noho, bona Basileia ena hereva idia abia dae eiava idia dadaraia be mai anina unai hapararaia gaukarana dekenai. Eiava Esekiel 9⁠:​1-11 ena anina oi gwauraia, oi gwau, Basileia ena sivarai idia abia dae taudia ese maka idia abia hisihisi badana amo do idia roho mauri totona, to taunimanima oredia be Dirava ese do ia hamasedia ore.)’

● ‘Ia namo, guna lau danu be unai bamona lau laloa. To, dina ta lau laloa edia hereva do lau kamonai be namo. Unai neganai lau davaria taunimanima haida ese Witness taudia idia samanidia koikoi. (Taunimanima momo edia samani herevana koikoina ta oi gwauraia, bena iseda hahediba herevana korikorina oi gwauraia.)’

● ‘Nega daudau lasi gunanai, lau danu be unai bamona lau hereva, Witness tauna ta be egu ruma dekenai ia mai neganai. Henanadai ta lau henia, lau laloa ia haerelaia diba lasi. Lau henanadai, lau gwau: . . . (Henanadai ta be inai: Kain ese daika ia adavaia?)’ (Edia mauri lalonai unai bamona ia vara momokani taudia sibodia ese inai hereva idia gwauraia be namo.)

● ‘Bema oi be tomadiho oi laloa bada dainai unai bamona oi hereva, emu lalona ena mamina lau abia. Oiemu tomadiho be mai anina bada oi dekenai. To lau laloa, oi bona lau be inai ita laloa momo: (gau ta oi gwauraia).’

● ‘Oi be mai emu tomadiho, ani? Mani lau oi hamaoroa, oiemu tomadiho be edena? . . . Ai be oiemu tomadiho taudia ida ai herevahereva neganai ai moale. Oiemu lalohadai be dahaka inai hereva dekenai? (Kiki Herevana ena sinado oi gwauraia)’

● ‘Ia namo. To lau mai egu ruma bese ida ai mai badina ai ura taunimanima be maino dekenai do idia noho hebou. Dina iboudiai reidio eiava TV dekenai nius ai kamonai neganai, heatu, tuari bona hisihisi edia sivarai ai hesikulaia. Lau laloa oi danu oi hesikulaia, ani? . . . To dahaka ese ia koudia diba? . . . Baibel ena gwauhamata ese emai lalona ia hagoadaia.’

● ‘Tanikiu, oiemu lalohadai oi gwauraia hedinarai dainai. Bema emu lalona be hegeregere, mani lau oi hamaoroa, dahaka dainai ai oi ura henia lasi​—⁠Baibel ena hereva ai gwauraia hedinarai dainai, eiava emu ruma dekenai ai mai dainai?’

‘LAU BE MAI EGU TOMADIHO’

● ‘Bema emu lalona be hegeregere, mani lau oi hamaoroa, Oiemu tomadiho oreana ia gwau, nega do ia mai bena kara maoromaoro taudia be tanobada ai do idia mauri hanaihanai, a? . . . Unai be lalohadai namona, ani? . . . Ia be inai Baibel sirina lalonai ia noho. (Sal. 37⁠:29; Mat. 5⁠:5; Apok. 21⁠:⁠4)’

● ‘Oibe, namona be ita ta ta ibounai ese iseda lalona ita hadaia edena tomadiho dalana do ita badinaia. To inai oi diba a, Dirava ese taunimanima haida ia tahudia iena tomadiho taudia korikoridia ai do idia lao totona? Mani inai hereva Ioane 4⁠:​23, 24 dekenai oi itaia. “Mai momokani danu” Dirava ita tomadiho henia ena anina be dahaka? . . . Dirava ese dahaka ia henia ita dekenai, hereva momokani bona hereva koikoi edia idau do ita dibaia totona? . . . (Ioane 17⁠:17) Hereva momokani ita diba be mai anina bada ita dekenai. (Ioane 17⁠:⁠3)’

● ‘Oi maragi negana amo ema bona hari oi ese tomadiho oi goadalaia, a? . . . Oi laloa gabeai taunimanima iboudiai be tomadiho tamona lalonai do idia noho mai edia lalo-tamona ida, a? . . . Inai hereva Apokalupo 5⁠:13 dekenai dainai, nega momo unai lau laloa. . . . Dahaka do ia vara guna be namo, bena ita ibounai be unai bamona do ita karaia diba?’

● ‘Lau ura oi bamona taudia lau davaria, badina umui ese Baibel bona tomadiho umui laloa bada dainai. Hari inai negai taunimanima momo be unai bamona lasi, ani? Dirava ena gwauhamata ta Baibel lalonai be edena bamona oi laloa? Ia gwau kara dika ibounai do ia haorea bona tanobada be gabu namona ai do ia halaoa, bena kara maoromaoro taudia sibodia ese do idia noholaia. Unai gwauhamata oi moalelaia, a?’

● ‘Emu tomadiho oreana ena gaukara haida oi karaia, a? . . . Hari inai negai taunimanima momo be emui guriguri heboudia dekenai idia lao, a? Emu tomadiho orea taudia momo ese Dirava ena Hereva na edia mauri lalonai idia badinaia toho, a? (Eiava, Idia iboudiai be tanobada ena kerere hamaoromaorodia dalana idia lalo-tamonalaia, a?) Ai davaria ruma dekenai Baibel tahua karana be heduru namona.’

● ‘Oiemu tomadiho oi moalelaia, ani? To taunimanima momo be tanobada ai idia vara gaudia idia moalelaidia lasi. Reana oi danu be unai bamona, a? . . . Gabeai dahaka do ia vara?’

● ‘Baibel duahia karana oi moalelaia, a? . . . Oi be mai emu nega dina momo oi duahia, a?’

● ‘Tanikiu bada lau oi hadibaia dainai. Lau laloa oi ese inai hereva oi abia dae diba: Herevana ita be edena tomadiho taudia, to ita ibounai ita ura tanobada ibounai dekenai maino do ia vara (eiava, iseda natudia be dika amo do ita naridia dalana ita diba; eiava, iseda dekena taudia ida do ita lalokau heheni; eiava, taunimanima edia hetura karana namona do ita moalelaia, to unai be auka iseda lalona idia hekwarahi neganai).’

● ‘Lau moale oi ese tomadiho oi laloa bada dainai. Hari inai negai taunimanima momo ese tomadiho idia laloa lasi. Idia haida idia gwau Dirava be lasi. To, oiemu tomadiho ena hahediba herevana hegeregerena, oi laloa Dirava be edena bamona tauna? . . . Mani inai siri Baibel lalonai oi itaia, ia ese iena ladana korikori ia hatoa. (Eso. 6⁠:3; Sal. 83⁠:18)’

● ‘Iesu ese iena hahediba taudia haroro totona ia siaidia lao neganai, ia hamaorodia tanobada ena gabu iboudiai dekenai do idia lao, unai amo tomadiho idauidau taudia do idia hedavari henidia diba. (Kara 1⁠:⁠8) To ia diba, kara maoromaoro idia ura henia bada taudia ese edia hereva do idia kamonai. Iesu ia gwau edena sivarai be hari inai negai do idia harorolaia? (Mat. 24⁠:14) Unai Basileia ena anina ita dekenai be dahaka?’

‘AI BE KERISTEN TAUDIA’

● ‘Namo herea. Oi diba vadaeni Iesu danu be inai bamona gaukara ia karaia, taunimanima edia ruma dekediai ia lao; bona ena hahediba taudia ia haganidia idia danu ese inai gaukara do idia karaia. Idia harorolaia sivaraina be oi diba, a? . . . Hari dina ai mai unai sivarai gwauraia totona. (Luka 8⁠:1; Dan. 2⁠:44)’

● ‘Unai dainai lau laloa oi ese Iesu ena hereva oi laloa bada. Ia be ororo dekenai ia haroro neganai, inai bamona ia hereva . . . (Mat. 7⁠:​21-23) Namona be ita ta ta be sibona dekenai ita henanadai, Lauegu Tamana guba dekenai ena ura lau diba namonamo, a? (Ioane 17⁠:⁠3)’

‘LAU BISI’

● ‘Ia namo, oi bisi dainai lauegu hereva do lau hakwadogia. Lau ura inai anina bada herevana tamona lau gwauraia. (Sentens rua ai emu Kiki Herevana ena hereva badadia oi gwauraidia.)’

● ‘Ia namo. Ma nega ta, do oi bisi lasi neganai do lau giroa mai. To lau do raka lasi neganai, lau ura Baibel sirina tamona lau duahia hedinarai; iena anina bada ita laloa be namo.’

● ‘Ia namo. Lau be mai egu natudia (eiava, Lau be gaukara tauna; eiava, Lau be kolesi dekenai diba lau tahua noho) dainai lau danu be nega momo lau bisi. Unai dainai lauegu hereva do lau hakwadogia. Baibel ia gwau, kahirakahira Dirava ese inai tanobada oromana dikana do ia haorea, to taunimanima haida be unai dika amo do idia roho mauri. Henanadai badana be inai: Namona be oi bona lau ese dahaka ita karaia, unai dika amo do ita roho mauri totona? Baibel ena haere be inai: (Sef. 2⁠:​2, 3)’

● ‘Io, ita ibounai ita bisi ani, unai dainai nega haida anina bada gaudia iseda mauri lalonai ita laloa lasi? Lauegu hereva do lau hakwadogia. Lau ura inai Baibel sirina tamona lau duahia hedinarai. (Luka 17⁠:​26, 27) Ita ura lasi ita be unai bamona, ani? Unai dainai, ena be ita bisi, to namona be nega ita atoa Baibel ena hereva ita tahua totona. (Buka o magasin oi henia toho.)’

● ‘Miniti 30 murinai, oiemu dekena taudia ai hereva henidia vadaeni neganai, bema ai giroa mai, do ita herevahereva diba, a?’

● ‘Ia namo, oi do lau koua lasi. Reana dina ma ta do lau giroa mai. To lau do raka lasi neganai, lau ura inai buka lau hahedinaraia oi dekenai. (Hua ena henia gauna oi hahedinarai henia.) Ia ese Baibel ena haere inai henanadai dekenai ia gwauraia: (henanadai tamona o rua oi gwauraia).’

● ‘Lau sori bada, oi bisi neganai lau ginidae dainai. Reana oi diba vadaeni lau be Iehova ena Witness tauna. Lau ura hereva badana ta Baibel amo lau gwauraia oi dekenai. To hari oi be nega lasi dainai, reana oi ura inai pepapepa oi abia; ia herevalaia gauna be inai: (oi gwauraia hedinarai). Nega sisina lalonai do oi duahia ore diba, bona do oi moalelaia bada.’

● ‘Io, lau diba. Nega be hegeregere lasi iseda gaukara ibounai do ita karaia, ani? Nega ta inai oi laloa a, bema ita mauri hanaihanai diba, inai bamona do ita hekwarahi lasi? Reana unai be lalohadai idauna ta oi dekenai. To mani inai Baibel sirina tamona do lau duahia; ia hahedinaraia mauri hanaihanai do ita abia diba. (Ioane 17⁠:⁠3) Unai dainai, namona be hari inai negai Dirava bona ena Natuna dekenai diba ita abia. Inai buka (o magasin) ai abia mai, badina ia ese ita ia durua unai diba do ita abia totona.’

‘DAHAKA DAINAI UMUI MAI HANAIHANAI?’

● ‘Badina be ai laloa, ita be Baibel ese ia gwauraia dina gabedia lalodiai ita noho. Ai laloa namona be ita ibounai ese hari inai nega ena dika idauidau dainai do idia vara gaudia ita laloa. (Vanegai o hari idia vara gaudia ta o rua oi gwauraia.) Henanadai badana be inai, Dahaka ita karaia diba, inai tanobada oromana ena dokona amo do ita roho mauri totona?’

● ‘Badina be ai ese Dirava bona emai dekena taudia ai lalokau henidia dainai. Namona be ita ibounai be inai bamona ita karaia, ani?’

‘EMUI GAUKARA LAU DIBA NAMONAMO VADAENI’

● ‘Unai be namo. Oiemu varavara ta eiava emu turana ta be Witness tauna, a? . . . Mani, lau oi hamaoroa, Baibel amo ai hadibaia herevadia oi abia dae eiava? Unai hereva haida be inai: Ita be “nega dokonai” ita noho, bona kahirakahira Dirava ese kara dika taudia iboudiai do ia hamasedia ore, bena tanobada be paradaiso gabuna ai do ia lao, taunimanima do idia noholaia hanaihanai mai edia gorere lasi, bona mai edia momokani ida do idia lalokau heheni. Unai hereva oi abia dae a?’

‘LAU BE MONI LASI’

● ‘Ai mai lasi moni noia totona. Aiemai ura be, ruma taudia ida Baibel stadi kosi do ai karaia, davana lasi. Inai kosi dekenai inai hereva do ita tahua (stadi buka ena karoa ta ena sinado oi gwauraia). Bema emu lalona be hegeregere, miniti haida lalodiai inai Baibel stadi kosi karaia dalana do lau hahedinaraia oi dekenai. Ia be davana lasi.’

● ‘Ai ese taunimanima edia namo ai tahua, edia moni ai tahua lasi. (Emu Kiki Herevana oi gwauraia. Hua ena henia gauna eiava buka ma ta oi hahedinarai henia, bena unai gau ese do ia durua dalana oi gwauraia hedinarai ia dekenai. Bema ia ura momokani bona ia gwauhamata do ia duahia, vadaeni oi henia. Bema hegeregere, oi hamaoroa edena dala amo moni ita abia tanobada hegegemadai haroro gaukarana ita haheaua totona.)’