(15 min) “Emui Kingdom Hall Ia Goeva Nega Ibounai.” Namona be inai hereva ia karaia tadikakana ena ruma bese be haheitalai namona, inai gaukara idia karaia bona idia heduru dainai. Namona be emui Kingdom Hall hagoevaia gaukara karaia negana oi gwauraia lou.

Ane 65 (38) bona guriguri.

MAY 27 AI IA MATAMAIA PURANA

Ane 5 (18)

(10 min) Kongregesen ena hadibaia herevadia.

(15 min) “Gabu Daudau Teritori Dekenai Haroro Gaukara Karaia.” Namona be lo tadikaka ta be kongregesen taudia ida inai hereva ia gwauraia namonamo.

Itaia: Iseda gabu daudau teritori dekenai nega haida ita idia dagedage henia, unai dainai namona be idia lao taudia be Iseda Basileia Gaukara, June 1990 rau 2, dekenai idia torea sivaraina do idia duahia lou.

Iseda Hekwarahi Hegeregerena Anina Do Ita Abia

(Kahana 1)

¹ Iehova ese dala idauidau amo ia hahedinaraia taunimanima ia lalokau henidia. Iesu ese Dirava ena lalokau hereadae karana ia gwauraia hedinarai, idia hebou taudia momo dekenai ia gwau Dirava ese “kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho.” (Mat. 5:​43-48) Ma nega ta dekenai, Iesu ese ena Tamana ena lalokau bada karana ia hahedinaraia​—Dirava ese ena vara edea Natuna, ia bouboulaia ita ia hamauria totona. (Ioane 3:16) Iesu ese ia hereva henia taudia ia haganidia Iehova ena lalokau karana idia laloa bada totona. Ita be unai bamona ita karaia, a?

² Iehova ena lalokau karana dainai iseda moale ia dekenai ita hahedinaraia totona, bona namo ela bona hanaihanai do ita abia totona, gau badana be ia ita diba namonamo. (Ioane 17:3) Ia ura henia dalanai ena hesiai gaukara ita karaia totona, gau badana be sisiba bona hakaua herevadia ita abia. Iehova ena lalokau karana ia hahedinaraia ita dekenai badina iena Hereva, Bible, ia henia, bona iena orea namo hereana ia haginia, bena unai amo sisiba bona hakaua herevadia ita abia diba. (Mat. 24:​45-47; 2 Tim. 3:​16, 17) Ita be Iehova ena gwauhamata taudia dainai, ia ese ita ia hadibaia iena dala dekenai do ita raka totona. To, iseda hekwarahi amo ita hahedinaraia Iehova ena lalokau karana ita moalelaia, a? Iena sisiba hereva ita badinaia ia ita hamoalea bona unai amo namo ita davaria totona, a? (Isa. 48:17; Iak. 1:22) Aposetolo Paulo be 1 Korinto 3:8 dekenai ia gwau: “Hadoa tauna bona dairia tauna ruaosi be hegeregere, Dirava ese ta ta edia gaukara davana do ia henia, edia hekwarahi hegeregerena.”

³ Oibe, namona be ita hekwarahi Dirava ena ura ita karaia totona. Lauma dalana dekenai iseda tubu be idauidau. Gau idauidau dainai haida edia tubu be ia haraga to ma haida edia tubu be ia haraga lasi, unai dainai namo lasi ta ena tubu dalana be ma ta ena tubu dalana dekenai ita hahegeregerea. To, gau badana be ita ta ta ibounai ita hekwarahi noho. Dahaka do ita karaia orea ita kahirakahira henia totona? Iseda Keristen gaukara huaia dalana ita hanamoa diba, a? Ma ita hekwarahi diba kongregesen gaukara durua namonamo totona, a? Orea dekena amo hakaua herevana ita idia henia neganai, unai hereva ita badinaia karana haida ita hanamoa diba, a?​—1 Tim. 4:16.

ABIDADAMA TAUDIA TOHOTOHODIA

⁴ Lagani momo lalodiai mai edia abidadama tadikaka bona taihu ese Basileia ena sivarai namona idia harorolaia. Unai abidadama taudia edia kara be Paulo ena kara bamona, unai dainai edia kara ita tohotohoa be namo. (1 Kor. 11:1) Idia be Dirava ena lalokau idia moalelaia, bona idia ta ta ibounai idia hekwarahi Bible ena sisiba idia badinaia totona, bona gaukara bada idia karaia dainai hahenamo momo idia davaria. Kongregesen lalonai idia be gaukara namonamo taudia, bona edia maduna idia huaia. Ita diba unai be maoro badina idia ta ta ibounai edia hekwarahi amo huahua idia davaria.​—Roma 1:13; 2 Kor. 3:​1-3.

⁵ Hari inai nega lalonai, lagani ta ta iboudiai kamonai matamata taudia tausen tausen be iseda orea dekenai idia vareai noho. (Isa. 60:8) Unai taudia danu ese edia lalona idia hadaia bona idia hekwarahi noho lauma dalanai idia tubu idia lao totona, bona haroro gaukara idia goadalaia dainai ita hanamodia be namo. Unai taudia ese namo idia davaria badina idia itaia Dirava Iehova ese iena hesiai gaukara dekenai idia hekwarahi bada taudia ia hanamodia. Lauma dalanai idia lo tadikaka bona taihu edia gaukara bada be haheitalai namona kamonai matamata taudia dekenai, idia lalo-parara hari inai nega lalonai, edia hesiai gaukara idia hamaragia be namo lasi. Reana ita be pablisa gaukara ita manadalaia vadaeni eiava ita be pablisa matamatadia, to gau badana be lauma dalanai do ita tubu lao noho, iseda Keristen maduna ita huaia, bona tiokratik gaukara ibounai ita karaia, ani?

Iseda Hekwarahi Hegeregerena Anina Do Ita Abia

(Kahana 2)

¹ Iseda hekwarahi hegeregerena anina do ita abia totona gau badana be ita diba gaudia do ita gaukaralaidia. Iakobo ia gwau namona be ‘hereva ita kamonai bona karana ita karaia.’ (Iak. 1:25) Danu idau negai, Mose ese Iuda taudia dekenai ia gwau: ‘Hereva be emui lalona dekenai umui atoa bona umui badinaia.’ (Deut. 11:18) Unai dainai diba sibona be ia hegeregere lasi. Unai hereva maorona ia idau lasi. Dirava ena Natuna, Iesu, ia diba hereva badinaia karana be gau badana. (Ioane 8:28) Ia be Mataio 7:24 dekenai, ia gwau: ‘Lauegu hereva inai idia kamonai, bona idia karaia taudia iboudiai be aonega taudia.’

² Sekit hebouhebou iboudiai dekenai ita kamonai henia herevadia ita badinaia, a? Hari inai nega lalonai ita gima noho bona hereva ita badinaia ena badina ita lalo-pararalaia, a? Ita gima noho Diabolo ena hehuni karana eiava idoa lalonai ita moru garina, a? Nega hanaihanai orea dekena amo ita idia sisiba henia badina kongregesen lalonai tauanina bona lauma dalanai mauri ena kara goeva ita karaia totona. Unai sisiba ita laloa bada, a? Ita ta ta ibounai ita kamonai henia hereva iboudiai ita badinaia, a?​—Iak. 1:​23-25.

³ Dina tamona hebouhebouna ena program ese ia hahedinaraia namona be ita helaga, badina Iehova be ia helaga dainai. (1 Pet. 1:​14-16) Helaga karana ena anina be iseda tomadiho dalana be ia goeva, ia be mai ena helaga. Anina be Dirava ese ita ia abia hidi iena hesiai gaukara ita karaia totona. Ita dekenai maduna ia henia sivarai namona do ita harorolaia totona. Unai dainai, helaga Hereva momokanina ita huaia totona gau badana be lauma dalanai, bona tauanina dalanai mauri ena kara goeva do ita karaia. Unai ita karaia totona, gau badana be nega ibounai iseda kara do ita naria namonamo. (Heb. 2:1) Bema unai bamona ita karaia, iseda hekwarahi hegeregerena hahenamo do ita davaria.

SIBONA EMU STADI KARANA AMO NAMO OI DAVARIA DIBA

⁴ Sibona eda stadi karana ese ita ia durua iseda abidadama ia goada totona, bona ita ia durua hereva momokani ita laloa bada totona. Ita ia durua ita gari lasi totona, bona mai goada danu ita haroro totona. Ita dekenai diba bona lalo-parara ia henia bona ita ia durua mauri ena kara matamatana ita karaia totona. (Kol. 1:​9-11) Stadi namonamo karana amo hahenamo ita davaria totona, gau badana be nega ita atoa bona ita hekwarahi, to nega kwadogina lalonai diba do ita abia lasi. Ita stadi ena bada hegeregerena hahenamo do ita davaria.​—2 Kor. 9:​6, 7.

⁵ Ita atoa negana be ia hegeregere kongregesen heboudia totona ita hegaegae, a? Unai dala amo ita hahedinaraia diba Iehova ese ita ia henia anianina ita moalelaia. Hebou totona ita hegaegae namonamo neganai, unai ese ita ia durua sediual ena hereva hegeregerena Dirava ena Hereva ita duahia bona ita stadilaia totona. Pura iboudiai nega ita atoa Haroro School sediual dekenai idia torea Bible duahiduahi ita duahia hegaegae totona, a? Hesiai Hebou dekenai ita idia hadibaia edena bamona iseda haroro gaukara ita hanamoa diba. Ita hegaegae unai hereva be haroro gaukara dekenai do ita gaukaralaidia totona, a? Bona kara haraga ita karaia toho, a? Namona be nega ita atoa Gima Kohorona magasin bona Kongregesen Buka stadi ena hereva ita hegaegaelaidia totona. Unai bamona ita karaia, a?

Iseda Hekwarahi Hegeregerena Anina Do Ita Abia

(Kahana 3)

HEBOU DEKENAI OI HAERE

¹ Hebou dekenai ita haere neganai namo bada do ita davaria diba. Hebou totona ita hegaegae bona hebou dekenai haere ita henia neganai, unai ese ita ia durua hebou ena hereva ibounai ita kamonai henia namonamo totona, bena haida idia haere neganai edia hereva ese ita ia durua diba. Hebou dekenai ita momo be iseda haere ginigunana ita henia neganai, eiava Haroro School dekenai iseda hereva ginigunana ita henia neganai, ita hegaegae namonamo karana ita do laloatao noho. Hari, hebou dekenai ita haere neganai reana ita gari momokani lasi, to ita do hekwarahi noho iseda tubu lauma dalanai ia hedinarai namonamo totona, a? (1 Tim. 4:15) Haere ita henia neganai unai ese taunimanima ma haida ia durudia bona idia ia hagoadaia. Bema hebou totona ita hegaegae, do idia kikilaia herevana ita stadilaia vadaeni dainai, haere mai aonegana ita henia neganai taunimanima ma haida do ia durudia lalokau bona kara namodia idia hahedinaraia totona.​—Heb. 10:​23-25.

² Haere ita henia neganai, hereva momo bona hereva dobu ita gwauraia be namo lasi. Namona be iseda haere idia kwadogi, bona henanadai ena badina korikori eiava Bible siri ena anina hahedinaraia herevana sibona ita gwauraia. Bema ita hegaegae guna, ita sibona eda hereva amo haere ita henia diba. Unai bamona ita karaia neganai, ita dekenai bona iseda hereva idia kamonai henia taudia dekenai hahenamo do ia bada. Dahaka dainai? Badina unai neganai iseda lalona ita gaukaralaia ita diba gauna ita herevalaia totona. Reana unai ese taunimanima ma haida ia durudia unai hereva idia lalo-pararalaia totona. Bona danu ita ia durua unai hereva ita laloatao bona ma nega ta ai do ita gaukaralaia totona.

UMA DEKENAI HADOHADO GAUKARA BADANA KARAIA

³ Iseda Keristen haroro gaukarana be davana bada gauna ta bamona. (2 Kor. 4:7) Unai bamona oi laloa, a? Iseda maduna be haroro gaukara karana amo iseda abidadama taunimanima dekenai ita hahedinaraia totona. Iesu ia gwau taunimanima edia lalona dekenai idia noho gaudia be edia uduna amo do idia gwauraia. (Luka 6:45) Ita ta ta ibounai ita hekwarahi neganai haroro gaukara ena kahana ibounai ita karaia totona, hahenamo momo ita davaria diba. Hegeregere, iseda lalo-parara hereva momokani dekenai do ia habadaia, bona Bible gaukaralaia dalana do ita diba namonamo. Danu ita moale badina taunimanima dekenai hereva momokani dalana ita herevalaia bona ita durudia idia Ia Havaraia Diravana idia diba totona. Iseda haroro gaukarana amo ita hahedinaraia Dirava ena lohia dalana bona lohia siahuna be ia maoro. Ita moale badina ita diba Iehova ita hamoalea, iena kara ita tohotohoa bona iena ura ita karaia.​—Mat. 5:48.

⁴ Bema hanaihanai iseda hekwarahi tomadiho karana Iehova dekenai ita sekea, unai gaukara do ita laloa maragi lasi. Unai ena anina be dahaka? Anina be emu ura maragi karana amo Dirava ena ura do oi karaia lasi, gaukara ena koukouna sibona do oi karaia lasi, to emu ura ibounai amo, emu abidadama ibounai amo, bona emu hekwarahi bada amo iena ura do oi karaia. Iseda kudouna ibounai danu Iehova ena hesiai gaukara ita karaia. Bible ese ita ia hagania iseda goada ibounai danu iena hesiai gaukara ita karaia totona. (Kol. 3:​23, 24) Momokani, iseda mauri ena maduna be idauidau, bona Iehova ese ita dekenai ita karaia diba lasi gauna ia tahua lasi. To, ita karaia diba gaudia, ia ura ita karaia! (Mat. 22:37) Taunimanima be mai edia kara dika dainai, ta ta ibounai idia ura lasi idia hekwarahi, unai dainai nega ta ta ai iseda kara ita sekea iseda hesiai gaukara Dirava dekenai ita habadaia dalana do ita diba totona. Unai bamona ita karaia, a?

⁵ Iseda kara ita naria namonamo be gau badana, ita sibona eda kara bona ura gaudia ita tahua bona Iehova ena hesiai gaukara ita karaia namonamo lasi garina. Moale karadia, ita ura tahua karadia, bona tauanina hamoalea karadia be namo, to nega haida sibona do ita karaia. Danu, nega ibounai moni gaukara sibona do ita karaia be namo lasi. Iesu ena sisiba Mataio 6:​22, 23 dekenai ita badinaia neganai, unai ese ita ia durua ita hekwarahi lauma gaudia do ita tahua totona, bena unai neganai iseda hekwarahi hegeregerena hahenamo do ita davaria.

⁶ Ita hekwarahi noho mauri matamata ena kara ita karaia neganai, iseda maduna be kongregesen heboudia dekenai, sekit bona distrik hebouhebou dekenai, bona buka eiava magasin dekena amo ita idia henia sisiba bona heduru herevadia ita badinaia. Namona be ita ta ta ibounai be ita stadi namonamo, hebou dekenai haere ita henia, bona iseda nega hegeregerena hahediba taudia halaoa gaukarana ita karaia. Unai dala amo ita hahedinaraia Iehova ena lalokau karana ita dekenai ita laloa bada, bona ita diba harihari hahenamo momo do ita abia, bona Iehova ena tanobada matamatana lalonai mauri hanaihanai do ita abia ena helaro namona do ita dogoatao noho diba.

[Questions for Part 1]

1. (a) Iehova ese taunimanima dekenai ena lalokau ia hahedinaraia daladia haida be dahaka? (b) Namona be unai ese ita ta ta ibounai ia doria dahaka ita karaia totona?

2. (a) Iehova ese dahaka gau rua ita ia henia dainai iena lalokau karana ita moalelaia be namo? (b) Korinto Ginigunana 3:8 ena hereva badana be dahaka?

3. (a) Lauma dalanai ita tubu ita lao totona bona Iehova ena lalokau karana ita moalelaia totona, dahaka ita laloatao be gau badana? (b) Sibona dekenai dahaka henanadai do ita gwauraia?

4. (a) Iseda kongregesen lalonai daidia edia kara ita tohotohoa diba? (b) Korinto Iharuana 3:​1-3 ena hereva hegeregerena edena bamona ita diba Paulo be haroro tauna namona?

5. (a) Lauma dalanai idia lo tadikaka bona taihu edia haheitalai namona dainai dahaka ita diba? (b) To, pablisa ta ta iboudiai dekenai edena henanadai be mai anina bada?

[Questions for Part 2]

1. (a) Idau negai ia mai hari, edena hereva maorona be ia idau lasi? (b) Iesu ena hereva Mataio 7:24 dekenai ese edena bamona unai ia hamomokania?

2. (a) Iakobo 1:​23-25 ena hereva hegeregerena, edena bamona tauna do ia moale? (b) Ta ta ibounai be edena henanadai do idia laloa be namo?

3. (a) Ita helaga ena anina be dahaka? (b) Dahaka ese ita ia durua ita helaga totona?

4. (a) Sibona eda stadi karana amo ita abia hahenamo haida be dahaka? (b) Hahenamo do ita abia totona dahaka do ita karaia?

5. (a) Pura ta ta iboudiai kongregesen heboudia be hida? (b) Bema unai hebou ita lalodia bada dahaka do ita karaia?

[Questions for Part 3]

1. (a) Hebou dekenai ta ese haere mai aonegana ia henia neganai, ia sibona dekenai dahaka namo ia davaria? (b) Edena bamona taunimanima ita durudia diba lalokau bona kara namodia idia hahedinaraia totona?

2. (a) Sibona eda hereva amo haere ita henia neganai ita dekenai ena namo be dahaka? (b) Sibona eda hereva amo haere ita henia neganai taunimanima haida dekenai ena namo be dahaka?

3. Ita hekwarahi neganai haroro gaukara ena kahana ibounai ita karaia totona, dahaka hahenamo do ita davaria?

4. (a) Dahaka dainai Iehova ese ‘hesiai gaukara koukouna’ sibona ia moalelaia lasi? (b) Dahaka dainai nega ta ta ai sibona eda kara ita sekea be namo?

5. Iesu ena sisiba Mataio 6:​22, 23 dekenai badinaia neganai, ita ia durua dahaka do ita karaia lasi totona? Ita ia durua dahaka ita karaia totona?

Kingdom Hall Ia Goeva Nega Ibounai

DAHAKA DAINAI KINGDOM HALL IA GOEVA BE GAU BADANA?

Nehemia 12:30: “Bena hahelaga taudia bona Levi taudia be sibodia idia hagoevaia; bena idia ese taunimanima bona geiti bona magu idia hagoevaia danu.”

2 Sisiga 29:​2-5, 15-17: “Ia be Iehova vairanai ia kara maoromaoro. . . . Ena lohia laganina ginigunana ai ia ese Iehova ena dubu ena iduara ia kehodia bena ia hanamodia.”

NATUDIA BE EDENA BAMONA IDIA HADIBADIA, UNAI GAUKARA IDIA LALOA BADA TOTONA?

Hereva Lada-isidia 22:6.

KINGDOM HALL HAGOEVAIA DALANA BE EDENA BAMONA IDIA HEGAEGAELAIA?

1 Hanua Pavapavadia 5:14: “[King Solomon] ese idia ia siaia, Lebanon ai idia lao, hua ta ta iboudiai taunimanima 10,000 10,000 idia lao, unai bamona ia siaidia unai; idia be hua ta Lebanon ai idia noho bena idia giroa mai bena hua rua edia hanua ai idia noho. Adoniram ese unai gaukara taudia ia biagudia.”

KINGDOM HALL ENA MEI RUMADIA EDIA TOANA BE EDENA BAMONA BE NAMO?

Deuteronomi 23:14: “Badina be Iehova, emui Dirava, be emui kamepa bogaraginai ia loaloa umui ia hamauria bona emui inai taudia emui imana dekenai ia atodia totona. Unai dainai, namona be emui kamepa ia helaga, ia ese gau mirona ta umui bogaraginai do ia itaia bena umui amo do ia raka oho garina.”

KINGDOM HALL HAGOEVAIA KARANA BE EDENA BAMONA ITA LALOHADAILAIA BE NAMO?

Nehemia 10:39: ‘Badina be Israel taudia bona Levi garana taudia ese aniani do idia mailaia aniani daiutuna lalonai, . . . bona namona be iseda Dirava ena dubu ita laloa boio lasi.’

This article is unique to PNG.

Gabu Daudau Teritori Dekenai Haroro Gaukara Karaia

¹ Society ese July, 1991 ena hua idia abia hidi gabu daudau eiava idia haroro momo lasi gabudia dekenai ita haroro totona. Kongregesen ta ta iboudiai bona sibodia idia gaukara grup maragidia be Society ese edia gabu ta ta idia abia hidi idia vadivadi henidia totona bona Basileia ena sivarai namona amo idia haroro henidia.

² Henunai ai torea namba ese lagani 1989 bona 1990 lalonai ita karaia gaukara ena bada ai hahedinaraia ita laloa totona.

1989 1990 1989 1990

Kongregesen 43 37 Buka 161 459

Pablisa 550 497 Buklet 693 772

Magasin 1680 1828

³ Lagani 1990 ai, ita hariharilaia gaudia edia namba ese lagani 1989 ena namba ia hanaia. Ia hedinarai ‘uhe’ momo ita hadoa vadaeni. Kongregesen momo idia ura guna idia haroro gabuna dekenai ma idia giroa lao lagani 1991 dekenai. Unai be namo. Reana umui hegaegae hadohado gaukarana bona ‘dairia’ gaukarana danu umui karaia totona, a?​—1 Kor. 3:​6, 7.

⁴ Lagani 1990 lalonai, kongregesen eiava grup iboudiai 116 be sivarai namona idia abia lao gabu daudau dekenai idia harorolaia totona. To, kongregesen 37 sibona ese edia gaukara ena ripoti idia siaia Association dekenai. Unai gaukara reana umui karaia to ripoti siaia totona umui laloaboio, a? Eiava umui lao lasi badina motuka lasi eiava medu ia bada dainai, a? Ena be umui lao eiava umui lao lasi, to Association ia ura lagani 1991 ena ripoti umui siaia. Aposetolo Ioane ia diba ia itaia bona ia kamonai gaudia ia ripotilaia be mai anina bada gauna. (1 Ioane 1:2) Sivarai namona ripotilaia be hegeregere ranu keruma ia hesiku tauna dekenai bamona. (Her. 25:25) Umui laloaboio lasi, lagani 1991 ena gabu daudau ripotina do umui siaia ai dekenai, ani?

DAHAKA DAINAI GABU DAUDAU AI DO ITA HARORO?

⁵ Taunimanima momo Papua New Guinea dekenai be siti bona taoni murimuri dekenai idia noho. Nega haida ia auka unai taudia ita lao henidia totona. Unai dainai ita gwauhamata bona bapatiso vadaeni Witness taudia eda maduna be inai hahegani herevana Roma 10:​13-15 dekenai ita badinaia be namo. (Oi duahia) Ita be maduna ita abia unai sivarai namona do ita harorolaia totona, ani?

GABU DAUDAU TERITORI AI DAHAKA SIVARAI NAMONA DO ITA HAROROLAIA?

⁶ Aneru ese idia ia naria dainai, Iehova ena Witness taudia be noho hanaihanai ena sivarai namona be mai edia moale danu tanobada dekenai idia noho taudia ibounai dekenai, bese ibounai dekenai, iduhu ibounai bona gado idauidau ibounai dekenai idia harorolaia. Hahemaoro ena nega ia ginidae vadaeni. Unai sivarai namona ese ia hahedinaraia Dirava ena Basileia guba dekenai be ia vara lagani 1914 lalonai. Iesu Keriso be unai Basileia ena Pavapava. Unai Basileia sibona ese