Tiokratik Laiberi Hegaegaelaia Dalana

SHEREZADE, Spain kekenina ta mai ena diba, ena mauri laganidia be hani neganai, ena tisa ese ena klas ia hamaorodia “Father Christmas” ena laulau do idia penia. Maoromaoro, Sherezade ese ia noia bema ia karaia lasi be namo, badina be ena lalona ia hegeregere lasi do ia karaia.

Tisa ese ena hereva ia hoalaia, bona ia hamaoroa unai be doli ena laulau penia karana bamona bona ia kerere lasi. Sherezade ia gwau: “Bema ia be doli sibona, mani doli ta ena laulau do lau torea.”

Dina ma ta ai tisa ese klas ia hamaorodia edia bese ena pepe ena laulau do idia penia. Unai neganai danu Sherezade ese ia noia maoro do ia henia, kara idauna ta do ia karaia. Ena noinoi ena badina hadibalaia totona, Sadaraka, Mesaka, bona Abedenego edia sivarai ia hamaorolaia.​—Daniel 3:​1-28.

Gabeai, tisa ese Sherezade ena sinana ia rini henia bona ia hamaoroa ia hoa. Ia gwau: “Nega haida emu kekeni ese ena lalona ena mamina be lau ia hamaorolaia. Unai be hoa gauna, ani? Kekeni maragina ta ese lau ia hamaoroa dahaka dainai ena lalona ese ia hahekwarahia! Oi hadibaia herevadia lau abidia dae lasi, to momokani oiemu kara ai oi kwalimu. Bona lau ura oi diba emu kekeni lau laloa bada bona lau matauraia.”

Mauri laganidia hani kekenina ese ena lalona be Baibel amo edena bamona ia hadibaia diba? Ena sinana, Marina, ia gwau Sherezade be mai sibona ena tiokratik laiberi, ena mahuta daiutuna lalonai. Ena laiberi lalonai be sibona ena Gima Kohorona, ia makaia vadaeni gaudia, bona haroro gaukara bukadia, bona ia vara negana amo ema bona hari Watchtower Society ese ia halasidia gaudia danu. Ia ura henia bada gauna be Lau Egu Bible Sivarai Buka ena kaset teipi. Hanuaboi iboudiai ia kamonaia lalonai, ena hereva be buka ai ia duahia. Unai Baibel sivaraidia dainai ia ese ena lalona ia hadaia diba, ai sivarailaia vadaeni hegeregerena.

Tiokratik laiberi ta, oi hegaegaelaia namonamo gauna, ese oi bona emu natuna ia durua diba, a? Dahaka dainai emu ruma be mai ena laiberi be gau badana?

“Laiberi be Moale Gauna Sibona Lasi”

Henry Ward Beecher ia gwau: “Laiberi be moale gauna sibona lasi; ia be mauri durua gauna korikorina.” Momokani, ena be reana inai ita diba lasi, to kahirakahira ita ibounai be mai eda “mauri durua gauna korikorina” unai bamona. Badina be, bema ita be mai eda Baibel, ita be mai eda laiberi bamona gauna unai.

Baibel be tiokratik laiberi hereadaena. Lagani 300 C.E. murinai, Jerome ese Dirava ena lauma amo idia toredia bukadia iboudiai, buka tamona ai idia hakapudia gaudia, be Bibliotheca Divina (Dirava ena Laiberi) ia gwauraidia; hari edia ladana ita hatoa Baibel. Iehova ese unai laiberi helagana ita ia henia, ita do ia durua, do ia hadibaia, bona do ia hakaua totona. Namo lasi ita laloa maragi. Bema Baibel ibounai ita abia, anina be iseda laiberi ena bada ese Dirava ena hesiai taudia idaunegai idia noho edia laiberi ena bada ia hanaia.

Baibel ena hereva torea hanai dalana tamona be imadia amo neganai, ena davana be bada herea. Unai dainai ruma bese ta ta sibodia mo be mai edia Baibel ibounai. Roma ai Paulo be dibura rumana ai idia koua negana ginigabena ai, ia ura Buka Helaga do ia stadilaia neganai, Timoteo ia noia, heloku bukadia haida be Asia Maragina amo do ia mailaidia​—reana gaudia be Heberu Revarevadia. (2 Timoteo 4:13) Unai neganai dubu be mai edia heloku bukadia, bona Iesu Keriso bona aposetolo Paulo ese unai laiberi idia gaukaralaidia, edia haroro gaukarana lalonai. (Luka 4:​15-17; Kara 17:​1-3) Ita moale, badina be hari inai negai Buka Helaga abia dalana be haraga, unai negai hegeregerena lasi.

Printa masinidia dainai, hari inai negai Dirava ena hesiai taudia kahirakahira iboudiai ese Baibel ibounai be sibodia edia gado ai idia abia diba, dava bada lasi ai. Ita be mai eda dala, buka ma haida be hari “laiberi” helagana ai do ita atodia. Lagani 100 mai kahana lalodiai, “hesiai tauna mai ena kamonai bona mai ena kara maoromaoro” be ia gaukara goada, lauma anianina be nega korikori ai ita ia henia.​—Mataio 24:​45-47.

To, bema siboda eda tiokratik laiberi ita hegaegaelaia lasi, reana unai hereva namo hereadia edia heduru do ita abia guguru lasi. Laiberi hegaegaelaia karana ginigunana be inai: Laiberi bukadia ita abidia. Unai hekwarahi ena anina namona be inai: Ita be mai eda dala, diba do ita abia haraga, iseda hekwakwanai hanaidia totona bona iseda henanadai Baibel dekenai edia haere davaridia totona.

Edena Buka Do Lau Abidia be Namo?

Bema oi bona emu adavana emui hekwakwanai be herevahereva hebou karana, edena bamona do umui kokia diba, eiava edena bamona oi ese emu natudia do oi durudia, drag do idia dadaraidia totona​—unai be nega haida oi henanadailaia, a? Bema emu turana ta ena lalona ia metau, edena bamona do oi durua diba? Dahaka ese ia hamomokania Dirava ia noho, bona dahaka dainai kara dika ia koua lasi​—unai oi gwauraia goevagoeva diba, a? Dagedage gauna kakakakana, Apokalupo karoa 17 ese ia gwauraia gauna, ese dahaka ia laulaulaia?

Bema oi be mai emu tiokratik laiberi mai ena buka momo, unai henanadai bona ma momo edia haere oi davaridia diba. Watchtower Society ese buka, buklet, bona magasin lalodiai Baibel herevadia idauidau momo ia halasidia. Ruma bese edia mauri idia herevalaia, Dirava bona Baibel abidadama henidia karana idia habadaia, bona ita idia durua, iseda haroro karana do ita hanamoa totona bona Baibel ena peroveta herevadia do ita lalo-pararalaidia totona.

Idia hanai laganidia 20 lalodiai Society ese ia printadia gaudia momo be hari ita abidia diba. Bema vanegai sibona hereva momokani lalonai oi vareai, namona be unai gau iboudiai, oi diba gadona ai idia printadia gaudia, do oi abidia. Gima Kohorona gunadia, lagani ta ta amo buka tamodia ai idia haboudia gaudia, do oi abidia diba. Hereva tahulaidia bukadia namodia, Insight on the Scriptures bona Comprehensive Concordance, be gado idauidau ai idia printadia vadaeni. To, hari buka oi abidia be kara ginigunana mo.

Emu Laiberi Oi Hegaegaelaia!

Bema oi diba oi be mai emu buka ta, unai be namo, to gau badana be oi diba ia be edeseniai. Ita ura stadilaia bukana tahua karana ai bema nega bada ita haorea, reana do ita hesiku bena do ita ura lasi ita stadilaia. To, iseda buka be ita abidia haraga gabuna ai bema ita atodia namonamo, do ita ura edia hereva do ita tahudia.

Bema mai dalana, namona be iseda tiokratik bukadia iboudiai be gabu tamona ai ita atodia. Bema buka atodia patana ita hoia diba lasi, davana maragi gauna ta, gabu badana do ia koua lasi gauna, ita karaia be namo. Gau badana be iseda laiberi bukadia be do ita abidia haraga gabuna ai ita atodia.

Kara iharuana be buka haboudia goevagoeva. Nega kwadogi lalonai bema unai ita karaia, gabeai iseda kara ena anina namona do ita abia.

Bema emu ruma taudia momo be Iehova ena Witness taudia lasi, dahaka do oi karaia? Ena be reana laiberi be emu ura hegeregerena do oi hegaegaelaia diba lasi, to reana sibomu emu daiutu lalonai Baibel bona herevalaia bukadia haida be pata ta latanai do oi atodia diba.

Tiokratik Laiberi ese Lauma Dalanai Oi Ia Hagoadaia Diba

Buka ita haboudia goevagoeva murinai, edia hereva tahudia haraga dalana ita abia be namo. Reana hereva ita laloatao namonamo diba lasi, bona reana iseda tiokratik laiberi ena buka momo edia hereva ita manadalaidia lasi. To, unai hereva iboudiai ita davaridia haraga diba. Bema nao gado ita diba, Watch Tower Publications Index ese ita ia durua diba hereva idauidau momo do ita davaridia totona.

Julián, lagani momo lalodiai special pioneer gaukarana bona elda gaukarana ia karadia tauna, ia gwau ia ese Index bukana amo ena mero maragina be sibona ena stadi karaia dalana ia hadibalaia namonamo diba. Ia gwau: “Jairo, lagani 7 merona, be vanegai sikuli amo ia lou mai neganai, ia gwau, ‘Tamagu, Society ese dinosaurs edena bamona ia herevalaidia?’ Maoromaoro Index bukana ai abia, bena inai hereva ‘dinosaurs’ be ia lalonai ai tahua. Maoromaoro Awake! magasin ta ai davaria, ia herevalaidia gauna unai. [February 8, 1990] Unai dina ai Jairo ese ia duahia matama. Ia diba vadaeni gau idauidau momo herevadia be emai tiokratik laiberi lalonai. Lau laloa iseda natudia be tiokratik laiberi idia gaukaralaia namonamo neganai, unai ese ia durudia lauma dalanai do idia tubu totona. Laloa namonamo dalana idia dibaia, bona idia davaria sibodia edia stadi karaia karana ese moale ia havaraia diba.”

Fausto, inai hereva ena matamanai ai gwauraia kekenina Sherezade ena tamana, ia laloa memero kekeni edia lagani idia maragi neganai, tiokratik laiberi gaukaralaia dalana ita hadibalaidia be namo. Ia gwau: “Ai ese Sherezade, lagani 6 kekenina, be Index bukana gaukaralaia dalana ai hadibalaia noho. Tanobada Paradaisona ai do ita noho helarona ia laloa bada dainai, ai ese Index bukana lalonai inai hereva ‘paradaiso’ ai hahedinarai henia, bena Gima Kohorona haida, unai idia herevalaia gaudia, ai tahudia. Ai ese vaia paradaiso ena laulau sibodia ai hahedinarai henia, to unai dala amo ia diba hereva idauidau emai laiberi lalonai davaria dalana be Index bukana amo. Ai diba unai ia lalo-pararalaia, badina be dina ta sikuli amo ia mai bena Ista hahelagaia karana be ena sinana ia nanadailaia, ma ia gwau: ‘Namona be Index bukana lalonai do ita tahua, ani?’ ”

Herevana iseda mauri laganidia be hida, to Baibel ese ita ia hagoadaia, ‘hereva ibounai do ita laloa namonamo Dirava dekena amo idia mai eiava lasi, hereva namodia do ita dogoatao momokani’ totona. (1 Tesalonika 5:21) Unai do ita karaia totona, namona be dina iboudiai Buka Helaga do ita tahua. (Kara 17:11) Bema ita be mai eda tiokratik laiberi, ita hegaegaelaia namonamo gauna, unai tahua karana do ita moalelaia. Hereva ta hegaegaelaia totona, o hekwakwanai ta hanaia dalana sisibalaia herevana tahua totona, o ita ura henia herevana idauna ta tahua totona, iseda laiberi be mai eda kwalimu ida ita gaukaralaia negadiai, unai ese ita ia hadibaia ia be mai ena namo bada.

Sherezade ena tamana sinana idia gwau: “Keristen ruma besena lalonai, tiokratik laiberi be moale gauna sibona lasi!”

[Box on page 30]

EMU BUKA BE EDENA BAMONA OI HABOUDIA DIBA?

Emu buka haboudia goevagoeva dalana taravatuna aukana ta be lasi. To, henuai ai gwauraia dalana ese buka edia anina hegeregeredia haboudia dalana ta ia hahedinaraia.

1. Baibel ena kahana haida edia siri ta ta iboudiai edia anina idia gwauraidia bukadia

(Hegeregere: Tau Hereadaena, Revelation​—Its Grand Climax At Hand!, “The Nations Shall Know That I Am Jehovah”​—How?, “Your Will Be Done on Earth”)

2. Ruma bese maurina idia herevalaia bukadia

(Hegeregere: Emu Ruma Bese Hamoalea Dalana, Memero Kekeni edia Henanadai​—Haere Maorodia, Lau Egu Baibel Sivarai Buka)

3. Baibel bona hereva tahulaidia bukadia

(Hegeregere: Buka Helaga, New World Translation of the Holy Scriptures​—With References, Baibel idaudia, Watch Tower Publications Indexes, Comprehensive Concordance, Insight on the Scriptures, The Kingdom Interlinear Translation of the Greek Scriptures, diksenari namona ta)

4. Kongregesen Buka Stadi bona Haroro Sikulina ai hari ita gaukaralaidia bukadia

5. Kaset teipi bona vidio teipi

6. Gima Kohorona bona Noga!, lagani ta ta amo buka tamodia o maua maragidia ai idia haboudia gaudia

7. Iehova ena Witness taudia edia sivarai

(Hegeregere: Yearbooks of Jehovah’s Witnesses, Jehovah’s Witnesses​—Proclaimers of God’s Kingdom)

8. Buka bona buklet, haroro gaukarana ai ita gaukaralaidia loulou gaudia

(Hegeregere: Mauri Hanaihanai Paradaiso Lalonai, Buka Helaga Herevalaia, Dirava Momokani Tamona Tomadiho Henia mai Lalo-Tamona Danu, Life​—How Did It Get Here? By Evolution or by Creation?, Mankind’s Search for God)

[Pictures on page 31]

Sherezade be Baibel stadilaia namonamo kekenina ai ia lao vadaeni

Ena be inai mero ia maragi,to tiokratik laiberi ia gaukaralaia

Hakaua Oreana Tauna Ma Ta

IEHOVA ena Witness taudia edia Hakaua Oreana habadaia totona, July 1, 1994 ai ma tadikaka ta be memba ai idia halaoa, ia be unai orea ena elda taudia 11 ida idia haboudia. Tauna be Gerrit Lösch.

Tadikaka Lösch be November 1, 1961 ai ful-taim hesiai gaukarana ia hamatamaia, bena gabeai, Gilead Ena Watchtower Baibel Sikulina ena klas namba 41 ai ia kwalimu. Sekit bona distrik gaukaradia be Austria ai ia karaia, lagani 1963 amo ela bona 1976. Lagani 1967 ai ia headava, bena gabeai ia bona ena adavana, Merete, be lagani 14 lalodiai Austria ena Betele ai idia gaukara, Vienna ai. Lagani hani gunanai, idia hanai lao Society ena hedikwota ai, Brooklyn, New York ai. Unuseniai Tadikaka Lösch be Executive Offices ai ia gaukara bona Hesiai Komiti ia durua. Gaukara idauidau be Europe ai ia karaia vadaeni dainai, bona Germany gado, English gado, Romania gado, bona Italy gado ia diba dainai, ia ese Hakaua Oreana ena gaukara do ia durua bada diba.