Katolik Hahine ta ese Ia Moalelaia

Iehova ena Witness hahinena ta be Virginia, U.S.A. ena gunika kahanai ia loaloa neganai, ena motuka ena taea ta ia diho. Ruma ta dekenai ia lao, bona ruma hahinena ese gwaumaoro ia henia, ena telefon do ia gaukaralaia heduru abia totona. Gabeai, Witness hahinena ese tanikiu herevana bona harihari gauna, Mauri Hanaihanai Paradaiso Lalonai bukana, ia siaia ia dekenai. Bena ruma hahine ese ia tore henia, ia gwau:

“Gau ta do lau hunia lasi. Lau be Roman Katolik hahinena. Bema ta be lauegu ruma dekenai Gima Kohorona magasin eiava ma pepapepa haida ia mailaia, lau abia dae lasi. Bema lau idia doria dainai lau abia dae, gabeai momoru gabuna dekenai lau negea. Lau maragi negana amo ema, Katolik tomadihona lau manadalaia.

“To, oiemu buka ese lauegu matana ia veria, badina ena ladana dekenai unai hereva ‘Paradaiso’ ia noho, bona ena toretore ia bada bona duahia be ia haraga danu. Rau edia henu kahanai idia noho henanadaidia ese lau idia ha-uraia buka do lau duahia totona, bona laulau danu ese lauegu matana idia veria. Rau 11 ena laulau lau ura henia bada, badina be iniseniai unai bamona gabu lau karaia toho, manu bona animal idauidau totona. Lau ese dia, rabit, vaura idauidau bona manu idauidau lau naridia. . . .

“Oi kwalimu vadaeni, badina Katokik hahinena ta oi ha-uraia, tomadiho idauna ta ena buka ta ia duahia totona. Lau laloa tomadiho oreana idauna ta dekenai do lau hanai lasi. To unai buka lau duahia, bona lauegu tau ese ia duahia hari. Oi lau tanikiu henia lou inai!”

Unai buka ena rau be 256; ena rau ta ena bada be inai magasin ena rau ta ena bada hegeregerena, bona ia lalonai be laulau 150 bamona mai edia kala. Bema K2.00 oi siaia, unai buka ta do oi abia diba.

Mani emui kara buka ta ladana Mauri Hanaihanai Paradaiso Lalonai umui siaia lau dekenai. Lau be K2.00 lau siaia inai.