Hamatamaia Herevadia Haroro Gaukarana Totona
Hereva Haida: Oiemu haroro ena hamatamaia herevana oi lalohadailaia neganai, mani inai gau toiosi oi laloa namonamo: (1) Iesu ena hahegani be, “Basileia ena Sivarai Namona” ita harorolaia. (Mat. 24:14) Ena be hereva idauna ta be taunimanima ida ita herevalaia, to namona be dala ita tahua edia lalona do ita ania Basileia ena namo do idia laloa totona, eiava edia lalona koua gaudia kokidia dalana ita tahua, Basileia do idia laloa namonamo totona. (2) Ita davaria taudia edia namo bema ita tahua mai eda momokani ida, Iesu ia karaia bamona, unai ese ita do ia durua edia kudouna do ita hamarerea totona. (Mar. 6:34) Iseda lalo-namo korikori ita hahedinaraia totona, inai bamona ita karaia diba: Ita kiri henidia bona ita gado namo henidia; idia hereva neganai ita hakala henidia bona edia hereva hegeregerena ita hereva henidia; bona henanadai ita henidia, edia lalohadai do idia gwauraia hedinarai totona. Korinto Ginigunana 9:19-23 ese ia hahedinaraia, aposetolo Paulo ese sivarai namona ia harorolaia, ia haroro henidia taudia edia toana hegeregeredia. (3) Bese haida edia kastom be, vadivadi taudia ese hereva haida idia gwauraia guna ruma taudia edia lalona hanamoa totona, bena gabeai edia ura gauna idia herevalaia. Tano ma haida lalodiai, ruma taudia idia ura edia ruma dekenai idia vadivadi taudia, idia boiridia lasi taudia unai, be edia vadivadi ena badina idia gwauraia hedinarai haraga.—Luka 10:5 itaia.
Inai paragraf murinai, haroro herevadia hamatamaia herevadia haida idia noho. Haroro gaukarana idia manadalaia Witness taudia be inai hereva idauidau amo edia haroro herevadia idia hamatamaia. Bema hari oi gwauraia herevana ese dala ia kehoa lasi ruma taudia do oi haroro henidia totona, inai hereva haida oi gwauraidia toho. Reana oi ura lasi buka ena hereva sibona do oi gwauraia, to oi ura unai lalohadai be sibomu emu hereva amo do oi gwauraia. Danu, emu kongregesen taudia haida, hereva hamatamaia daladia dekenai idia kwalimu vadaeni taudia, oi noidia edia hereva hamatamaia daladia do idia gwauraidia hedinarai oi dekenai.
ARAMAGEDONO
● ‘Taunimanima momo ese Aramagedono idia laloa momo. Tanobada ena lohia taudia edia hereva idia kamonai, idia gwau Aramagedono be niuklia tuarina, iena amo taunimanima do idia roho mauri diba lasi tuarina. Dahaka oi laloa, Aramagedono ena anina be dahaka taunimanima dekenai? . . . Inai ladana Aramagedono be Baibel amo idia abia, bona ena anina be taunimanima momo ese idia gwauraia anina hegeregerena lasi. (Apok. 16:14, 16) Baibel ia hahedinaraia kara haida ita karaia diba unai tuari amo do ita roho mauri totona. (Sef. 2:2, 3)’ (Rau 38-43 itaia danu, inai sinado badana “Aramagedono” henunai.)
BAIBEL/DIRAVA
● ‘Namo. Lau mai, badina lau ura anina bada herevana ta lau gwauraia hedinarai oi dekenai. Mani emu kara inai hereva Baibel ena amo oi kamonai. (Siri ta, Apokalupo 21:3, 4 eiava unai bamona sirina ma ta oi duahia.) Unai hereva be edena bamona oi laloa? Oi moalelaia, a?’
● ‘Ai be heduru namona davaria gabuna ai herevalaia inai gabu taudia ida. Unai heduru amo, mauri ena hekwakwanai do ita hanaidia diba. Gunaguna, taunimanima momo ese Baibel idia tahua unai heduru abia totona. To hari inai neganai, taunimanima momo edia lalohadai be idau. Dahaka oi laloa? Oi laloa Baibel be Dirava ena Hereva, eiava oi laloa ia be taunimanima ese idia torea bukana namona sibona, a? . . . Bema ia be Dirava ena amo ia mai, edena bamona unai ita hamomokania diba?’ (Rau 53-63 itaia, inai sinado badana “Baibel” henunai.)
● ‘Lau moale oi lau davaria dainai. Lau ura lalona hagoadaia herevana ta Baibel amo lau herevalaia oi dekenai. Nega ta oi ese inai oi laloa, a: . . . ? (Henanadai ta oi henia, unai amo dala do oi kehoa emu Kiki Herevana do oi gwauraia totona.)’
● ‘Ai ese taunimanima edia lalona ai hagoadaia edia Baibel do idia duahia totona. Baibel ena haere henanadai badadia dekenai ese taunimanima momo ia hahoadia. Ta be inai: . . . (Sal. 104:5; eiava Dan. 2:44; eiava siri ma ta).’
● ‘Hari dina, ai be inai gabu dekenai umui noho taudia ai vadivadi henia. Ai hereva henidia taudia haida ese Dirava idia abidadama henia. Ma haida idia daradara, idia diba momokani lasi Dirava ia noho eiava lasi. Oi be edena bamona oi laloa? . . . Baibel ia gwau, namona be guba gaudia ita lalodia. (Sal. 19:1) Idia iboudiai ese taravatu idia badinaia. Unai taravatu ia henidia Diravana ese taravatu namodia ita ia henia danu, ita do idia hakaua namonamo totona. (Sal. 19:7-9)’ (Rau 100-106, 125-9 itaia danu, inai sinado badadia “Dirava” bona “Gau Iboudiai Havaradia” henudiai.)
BAIBEL STADI
● ‘Lau mai, Baibel stadi kosi ta oi lau hamaorolaia totona. Ia be davana lasi gauna bona emu ruma dekenai do ita karaia diba. Bema emu lalona be hegeregere, harihari, nega sisina sibona lalonai, inai Baibel stadilaia dalana do lau hahedinaraia oi dekenai. Tano 200 bamona lalodiai ruma bese momo ese inai dala amo Baibel idia stadilaia. Inai hereva ta ita herevalaia diba. (Stadi bukana oi kehoa bona ena karoa ta ta edia ladadia edia lisi oi hahedinarai henia.) Oi ura edena hereva ita tahua?’
● ‘Ai ese inai Baibel stadi bukana ruma taudia ai hahedinarai henidia. (Oi hahedinaraia.) Ta oi itaia vadaeni, a? . . . Bema oi be mai emu nega, inai buka be emu Baibel danu do oi gaukaralaia dalana be nega kwadogi lalonai do lau hahedinaraia oi dekenai.’
BASILEIA
● ‘Inai gabu dekenai idia noho taudia ida lau herevahereva neganai, idia momo idia gwau, inai bamona gavamani idia ura henia: Hekwakwanai badadia, hegeregere raskol karadia bona aniani ena davana badana (eiava idia laloa momo gauna ma ta), do ia kokidia diba gavamanina. Ita ibounai be unai bamona gavamani ita ura henia, ani? . . . Hari inai negai, unai bamona gavamani ta ia noho, a? Taunimanima momo ese unai bamona do ia karaia diba gavamanina idia gurigurilaia vadaeni. Momokani, oi danu ese oi gurigurilaia vadaeni, to taunimanima momo idia laloa lasi unai idia gurigurilaia gauna be gavamani ta. (Dan. 2:44; Sal. 67:6, 7; Mika 4:4)’ (Rau 67-75 bona 129-34 itaia danu, inai sinado badadia “Basileia” bona “Gavamani” henudiai.)
● ‘Ai ese inai gabu dekenai idia noho taudia be henanadai ta ai henidia. Bema emu lalona be hegeregere, mani oi ese emu lalohadai ia dekenai oi gwauraia. Oi diba, Iesu ese guriguri dalana ita ia hadibalaia neganai, ia gwau namona be ita noinoi, Dirava ena Basileia do ia mai bona Iena ura be tanobada ai do ia vara guba ai ia vara bamona. Oi laloa, inai guriguri herevana hegeregerena gabeai Dirava ena ura be tanobada ai do ia vara, a? . . . (Isa. 55:10, 11; Apok. 21:3-5)’
● ‘Lau ese anina bada herevana ta be inai gabu dekenai umui noho taudia ida lau herevalaia. Hereva be inai: Edena gavamani ita ura henia bada—Dirava ena, eiava taunimanima edia? Hari inai negai idia vara gaudia dainai, oi laloa taunimanima edia gavamani be hegeregere, eiava oi laloa gavamani idauna ta do ita abia be namo a? . . . (Mat. 6:9, 10; Sal. 146:3-5)’
BURUKA/MASE
● ‘Nega ta oiemu lalona dekenai oi henanadai, oi gwau, dahaka dainai ita buruka ita lao bona ita mase, a? Matabudi haida edia mauri laganidia be lagani 100 mai kahana idia hanaia. Au haida be lagani 3,000 bamona idia tubu noho. To ita taunimanima be lagani 70 eiava 80 sibona ita noho bena ita mase. Unai ena badina oi laloa vadaeni, a? . . . (Roma 5:12) Gabeai iseda mauri ena daudau do ia idau, a? . . . (Apok. 21:3, 4)’
● ‘Nega ta inai bamona oi henanadai, a: Taunimanima ta ia mase neganai, ia boio vaitani, a? . . . Baibel ese iseda henanadai iboudiai mase dekenai ia haerelaidia goevagoeva. (Koh. 9:5, 10) Danu, ia hahedinaraia abidadama taudia be mai edia helaro korikorina. (Ioane 11:25)’ (Rau 254-5 bona 274-80 itaia danu, inai sinado “Lalona Hagoadaia Herevadia” bona “Mase” henudiai.)
DINA GABEDIA
● ‘Ai mai, hari inai negai idia vara gaudia edia anina herevalaia totona. Guna, taunimanima momo ese Dirava idia laloa, to hari inai negai idia momo ese Dirava bona iena taravatu Baibel lalonai idia laloa lasi. Unai dainai, hari inai negai taunimanima idia kara namo heheni lasi guna idia kara namo heheni bamona. Mani 2 Timoteo 3:1-5 ena hereva lau duahia, bena unai murinai lau oi hamaoroa, oi laloa unai siri ese ia gwauraia karadia be hari inai negai idia vara eiava. (Duahia) . . . Vadaeni, oi laloa nega vairai nega namona do ia vara, a? (2 Pet. 3:13)’
● ‘Taunimanima momo idia laloa tanobada dokona be ia kahirakahira. Hari inai nega idia gwauraia “dina gabedia.” To inai oi diba a, Baibel ese hari tanobada oromana ena dokona amo do ita roho mauri diba dalana ia gwauraia? Roho mauri taudia be paradaiso lalonai do idia noho tanobada dekenai. (Sef. 2:2, 3)’ (Rau 83-93 itaia danu, inai sinado badana “Dina Gabedia” henunai.)
Hereva gabena, “Hari Inai Negai Idia Vara Karadia,” itaia danu.
GAUKARA/NOHO RUMADIA
● ‘Ai be emu dekena taudia ida inai ai herevalaia: Edena dala amo taunimanima iboudiai ese gaukara bona noho rumadia do idia davaria diba? Oi laloa tanobada ena gavamani ese unai dala do idia kehoa diba, a? . . . Unai hekwakwanai kokia dalana ia diba tauna ia noho, taunimanima ia havaradia Diravana unai. (Isa. 65:21-23)’
● ‘Ai be gavamani namona ena sivarai be inai gabu dekenai idia noho taudia ida ai herevalaia. Taunimanima momo idia gwau, inai bamona gavamanina idia ura henia: Ia kara kerere lasi, bona gaukara bona noho rumadia taunimanima iboudiai ia henidia. Oi laloa, edena bamona gavamani ese unai ibounai ia karaia diba? . . . (Sal. 97:1, 2; Isa. 65:21-23)’ (Rau 129-34 itaia danu, inai sinado badana “Gavamani” henunai.)
HARI INAI NEGAI IDIA VARA KARADIA
● ‘Namo. Lauegu ladana be ——. Lau be inai gabu tauna ta (emu dala ladana o seksen namba oi gwauraia). Boi hanuaboi TV eiava reidio dekenai nius oi kamonai, a? . . . Unai sivarai, (taunimanima idia laloa momo sivaraina ta oi gwauraia) be edena bamona oi laloa? . . . Unai dika dainai taunimanima momo idia henanadai, idia gwau, Dahaka do ia vara tanobada dekenai? Ai Iehova ena Witness taudia ai laloa, hari ita be “nega dokonai” ita noho, Baibel ese ia gwauraia negana. Inai nega ena toana be 2 Timoteo 3:1-5 ese ia gwauraia.’ (Rau 83-93 itaia danu.)
● ‘Hari pura, inai sivarai be niuspepa dekenai oi duahia, a? (Niuspepa ena hereva ta oi hahedinarai henia.) Dahaka oi laloa . . . ?’
● ‘Mani, lau ura henanadai ta lau henia oi dekenai. Tanobada dekenai hekwakwanai momo idia vara; oi ura edena do idia hamaoromaoroa guna? (Ruma tauna ese ia laloa momo gauna oi diba neganai, unai oi herevalaia emu haroro herevana ena anina oi hahedinaraia matamaia totona.)’
KARA GAGEVA/HISIHISI
● ‘Nega ta oi ese inai oi laloa a: Taunimanima be hisihisi idia ania bona haida ese idia kara maoro henidia lasi neganai, Dirava ese ia lalodia, eiava? . . . (Koh. 4:1; Sal. 72:12-14)’ (Inai sinado badadia “Hisihisi” bona “Lalona Hagoadaia Herevadia” itaia danu.)
LALOKAU/HEBOGAHISI
● ‘Ai vadivadi henidia taudia momo idia gwau, idia laloa momo, badina taunimanima momo ese lalokau korikori idia hahedinaraia lasi dainai. Oi danu be unai bamona oi laloa, a? . . . Dahaka dainai oi laloa taunimanima momo edia kara be unai bamona? . . . Oi diba Baibel ese unai kara ia perovetalaia, a? (2 Tim. 3:1- 4) Unai kara ena badina danu ia gwauraia hedinarai. (1 Ioane 4:8)’
● ‘Lauegu ladana be ——. Lau be oiemu noho gabuna kahirakahira dekenai lau noho. Lau mai, lau laloa momo gauna ta be oi ida ita herevalaia sisina totona. Lau laloa reana oi danu be inai gau oi laloa. Gauna be hebogahisi. Hari inai negai taunimanima momo ese hebogahisi idia hahedinaraia lasi, ani? Oi diba dahaka dainai idia be unai bamona, a? . . . (Mat. 24:12; 1 Ioane 4:8)’
MAURI/MOALE
● ‘Inai gabu dekenai umui noho taudia ai vadivadi henia, badina be ai ese mauri ena anina korikori idia laloa momo taudia ai tahudia. Taunimanima momo be edia mauri lalonai moale sisina idia davaria, to hekwakwanai momo idia davaria danu. Ita buruka ita lao neganai, ita diba iseda mauri negana ia kwadogi herea. Oi laloa iseda mauri ena anina be unai sibona, a? . . . (Dirava ena palani ginigunana Eden lalonai ia hahedinaraia be oi gwauraia; unai murinai Ioane 17:3 bona Apokalupo 21:3, 4 oi duahia.)’ (Rau 285-90 itaia danu, inai sinado badana “Mauri” henunai.)
● ‘Hari dina, ai ura inai gabu dekenai umui noho taudia ai nanadaia, inai hereva “mauri hanaihanai” be emui Baibel lalonai umui duahia neganai, umui laloa ena anina be dahaka? Nega 40 bamona Baibel lalonai idia torea, unai dainai ita diba ia be mai anina bada. Unai bamona mauri ena anina ita dekenai be dahaka? . . . Edena dala amo do ita abia diba? (Ioane 17:3; Apok. 21:4)’
● ‘Hari dina, ai be taunimanima edia mauri ena toana idia laloa momo taudia ida ai herevahereva. Ita momo ita moale ita mauri noho dainai, to taunimanima momo idia henanadai, idia gwau, Moale korikori ita davaria diba, a? Dahaka oi laloa? . . . Oi laloa hari inai negai iseda moale ia koua gauna badana be dahaka? . . . (Sal. 1:1, 2; eiava ruma tauna ena haere hegeregerena siri ma haida oi duahia)’
NEGA VAIRA/NOHO NAMONA
● ‘Daba namona. Oi namo? . . . Ai ura lalohadai namona nega vairai totona ai herevalaia sisina. Oi laloa nega vairai nega namona do ia vara a? . . . Hari inai negai idia vara gaudia dainai taunimanima momo idia laloa do ia vara diba lasi. Baibel ese lau ia durua, nega namona lau naria totona. Ia ese hari inai negai idia vara gaudia ia gwauraidia sibona lasi, to edia anina bona idia murinai do idia vara gaudia ia gwauraidia danu. (Luka 21:28, 31)’
● ‘Namo. Lauegu ladana be ——. Oiemu ladana be daika? . . . Lau ese memero kekeni edia lalona lau hagoadaia toho, Baibel ese ia gwauraia negana namo hereana, gabeai do ia vara negana, do idia laloa totona. (Siri ta, Apokalupo 21:3, 4 o unai bamona sirina ma ta oi duahia.) Unai hereva oi moalelaia, a?’
RUMA BESE/NATU
● ‘Ai be ruma bese edia hekwakwanai hanaidia dalana be taunimanima ida ai herevalaia. Ita ibounai be iseda diba hegeregerena iseda ruma bese edia hekwakwanai ita hanaidia toho, to bema heduru dalana ma ta ia noho, ita ura unai dala danu ita diba, ani? . . . (Kol. 3:12, 18-21) Baibel ese helaro namona ia gwauraia, ia gwau vaira neganai iseda ruma bese ese noho namona do idia davaria diba. (Apok. 21:3, 4)’
● ‘Ita ibounai ita ura iseda natudia be mai edia moale ida do idia noho, ani? Ena be hari inai negai dika idauidau idia vara, to oi laloa gabeai moale negana do ia vara diba, a? . . . Unai dainai, oi laloa iseda natudia do idia bada vadaeni neganai, tanobada ena toana be edena bamona? . . . Baibel ia hahedinaraia, Dirava ese inai tanobada be noho gabuna namo hereana ai do ia halaoa. (Sal. 37:10, 11) To, iseda natudia be do idia noholaia eiava lasi, be sibodia edia kara dainai sibona lasi, to reana iseda kara dainai danu. (Deut. 30:19)’
TARAVATU UTUA KARADIA/NOHO NAMO
● ‘Namo. Do ita noho namo dalana be taunimanima ida ai herevalaia. Raskol karadia bona taravatu utua karadia ma haida be bada, bona unai ese iseda noho ia hadikaia, ani? Oi laloa, nega do ia mai bena hanuaboi ai dala dekenai do ita loaloa diba mai edia gari lasi, a? (Eiava, Oi laloa unai hekwakwanai kokia dalana be ta ia diba, a?) . . . (Her. 15:3; Sal. 37:10, 11)’
● ‘Lauegu ladana be ——. Lau be inai gabu tauna ta. Hari dabai lau raka mai neganai, lau kamonai taunimanima momo be inai idia herevalaia: (varani o vanegai ia vara raskol karana ta eiava taunimanima ese idia kikilaia momo karana ma ta oi gwauraia hedinarai). Edena bamona oi laloa? . . . Oi ese iseda noho do ia hanamoa diba gauna ta oi laloa, a? (Her. 1:33; 3:5, 6)’
TUARI/MAINO
● ‘Hari inai negai taunimanima momo herea be niuklia tuarina do ia vara garina idia gari. Oi laloa maino korikorina be tanobada dekenai do ita davaria, a? . . . (Sal. 46:8, 9; Isa. 9:6, 7)’
● ‘Lau ese inai bamona taudia lau tahudia noho: Idia ura tuari lasi tanobadana lalonai do idia noho taudia. Lagani 1900 amo ema bona hari, tuari handred momo idia tuarilaidia; idia rua be tanobada ibounai lalonai idia tuarilaidia. Hari inai negai niuklia tuarina totona idia hegaegae. Dahaka oi laloa? Unai tuari koua dalana be dahaka? . . . Dahaka ese maino tanobada ai do ia havaraia diba? . . . (Mika 4:2-4)’
● ‘Ai hereva henidia taudia momo herea idia gwau, idia ura tanobada ibounai dekenai maino do ia vara. Gavamani gunalaia taudia momo danu be unai bamona idia hereva. Vadaeni, dahaka dainai maino havaraia dalana be auka? . . . (Apok. 12:7-12)’
BEMA TAUNIMANIMA MOMO IDIA GWAU: ‘LAU BE MAI EGU TOMADIHO’
● ‘Daba namona. Inai gabu dekenai ai vadivadi henidia taudia momo idia gwau idia be mai edia tomadiho. Oi danu be mai emu tomadiho, ani? . . . To herevana iseda tomadiho be edena, to aniani ena davana ia bada dainai ita hekwarahi, bona raskol karadia bona gorere ese iseda noho idia hadikaia, ani? . . . Oi laloa unai hekwakwanai hanaia dalana ta ia noho, a? . . . (2 Pet. 3:13)’
BEMA TAUNIMANIMA MOMO IDIA GWAU: ‘LAU BISI’
● ‘Namo. Ai mai, anina bada herevana ta gwauraia hedinarai totona. Ai diba oi bisi, unai dainai do lau hereva daudau lasi.’
● ‘Namo. Lauegu ladana be ——. Lau mai, Dirava ena Basileia ena hahenamo bona do ita abidia dalana herevalaia totona. To lau itaia oi bisi (eiava, oi raka lasi gwauraia). Hereva tamona sibona oi lau hamaoroa be hegeregere, a?’
NEGA MOMO ITA HARORO LOULOU GABUDIAI
● ‘Lau moale oi lau davaria dainai. Vaia emai kara, pura iboudiai inai gabu dekenai umui noho taudia ai vadivadi henia. Hari dina lau ura Dirava ena Basileia ena hahenamo ma ta lau gwauraia hedinarai oi dekenai.’
● ‘Namo. Lau moale oi lau davaria lou dainai. . . . Oi bona emu ruma bese taudia umui namo, a? . . . Lau mai inai hereva namona gwauraia totona . . . ’
● ‘Daba namona. Oi namo? . . . Lau ura oi ida do ita herevahereva lou. (Oi ura herevalaia gauna oi gwauraia hedinarai.)’