“Takisi Gogoa Tauna Dekenai Takisi do Umui Henia”

“HARI tanobadana lalonai idia vara momokani gaudia be mase bona takisi henia.” Lagani 1700 murinai ia noho America gavamani tauna bona gau matamatadia havaradia tauna Benjamin Franklin be unai bamona ia hereva. Taunimanima be nega momo iena hereva idia gwauraia, bona unai hereva ese idia hahedinaraia dala be lasi to takisi ita henia sibona, bona taunimanima be unai dainai idia gari. Taunimanima momo idia ura lasi takisi idia henia, hegeregerena idia ura lasi idia mase bamona.

Ena be takisi henia karana be hekwarahi bada, to unai be Keristen taudia korikoridia ese idia laloa bada maduna. Aposetolo Paulo be Roma dekenai Keristen kongregesen ia tore henidia, ia gwau: “Ibounai ta ta dekenai edia davana do umui henidia. Takisi gogoa tauna dekenai takisi do umui henia. Kastom moni gogoa tauna dekenai kastom moni do umui henia. Idia gari henia tauna dekenai do umui gari bona idia mataurai henia tauna dekenai do umui matauraia.” (Roma 13:7) Bona Iesu Keriso ese takisi ia herevalaia inai hereva ia gwauraia neganai: “Kaisara ena gaudia umui henia Kaisara dekenai, Dirava ena gaudia umui henia Dirava dekenai.”​—Mareko 12:​14, 17.

Iehova ese “gavamani” lohia taudia idia noho ia koua lasi bona ia ura iena hesiai taudia be gau momo dekenai unai gavamani idia kamonai henidia. Vadaeni, dahaka dainai Dirava ia ura momokani ia idia tomadiho henia taudia be takisi idia henia? Paulo ese badina toi ia gwauraidia: (1) taravatu idia utua taudia be “gavamani” ena “siahu” idia mamia panisi idia abia neganai; (2) Keristen tauna ena lalona ena mamina, bema takisi ia henia koikoi ena lalona ena mamina do ia goeva lasi; (3) unai ‘hesiai taudia’ be edia davana idia abia be namo badina taunimanima idia durudia bona mauri dalana be sisina ia heau namonamo diba. (Roma 13:​1-7) Taunimanima momo be reana idia ura lasi takisi idia henia. To, sedira do idia ura lasi tano ta dekenai idia noho bema inai gaudia idia noho lasi: pulisi, lahi habodoa taudia, dala hanamodia taudia, sikuli, bona revareva siaia dalana. America taravatudia ia diba momo tauna Oliver Wendell Holmes be nega ta inai bamona ia gwauraia: “Takisi ita henia ena badina be taunimanima idia noho hebou ena mauri dalana ia heau namonamo totona.”

Dirava ena hesiai taudia be takisi monina idia henia be kara matamatana lasi. Idaunegai Israel dekenai idia noho taudia be takisi idia henia edia pavapava idia durudia totona, bona unai lohia taudia haida be taunimanima idia hametaudia bada badina takisi badadia idia gwauraidia. Iuda taudia be hemataurai monina bona takisi be idia idia lohiadia besedia, hegeregere Aigupito, Parasa, bona Roma idia henidia danu. Unai dainai Paulo ena nega lalonai idia noho Keristen taudia idia diba momokani Paulo ese dahaka ia herevalaia ia be takisi henia karana ia gwauraia neganai. Idia diba herevana takisi idia namo eiava lasi, bona herevana edena dala dekenai gavamani ese unai moni idia gaukaralaia, to gavamani ese ia gwauraia takisi idia henia be maoro. Unai be momokani hari inai nega ena Keristen taudia dekediai danu. To iseda hekwarahi negadia ai, dahaka hahegani amo heduru ita abia diba iseda takisi ita henia neganai?

Ita Badinadia Hahegani Ima

Kara karaia namonamo. Iehova ita hesiai henia bona ita tohotohoa, “ia ura lasi hereva kava bona heai, ia be maino Diravana.” (1 Korinto 14:33; Efeso 5:1) Takisi ita henia neganai kara ita karaia namonamo be gau badana. Emu pepapepa iboudiai idia noho, oi toredia maoro, bona faila dekenai oi atodia namonamo, a? Nega momo davana bada faila gauna oi abia be anina lasi. Reana pepa haida be folder tamona lalonai oi udadia diba (hegeregere receipt, oi henia moni davadia ta ta be unai pepa ta ta ai oi toredia). Reana ia hegeregere lagani ta lagani ta ai oi haboudia diba folder badadia dekenai. Tano momo dekenai idia ura lagani haida dekenai oi dogodia tao badina reana gavamani ia ura pepa haida idia sekedia. Unai dainai gau ta oi negea lasi ela bona oi diba momokani do idia ura lasi idia itaia.

Oi koikoi lasi. Paulo ia toretore, ia gwau: “Umui ese ai totona do umui guriguri, badina be aiemai lalona be maoromaoro Dirava ena vairanai. Ai ura be nega ibounai kara maoromaoro do ai karaia.” (Heberu 13:18) Takisi ita henia neganai namona be mai iseda kudou ibounai ida ita ura laloa maoromaorona amo ita henia. Ita laloa gauna ginigunana be inai: Gavamani idia ura ita gwauraia ita abia monina amo takisi moni hida ita henia. Tano momo lalodiai, bema ita abia monina​—gaukara ta dainai hariharibada monina amo, gaukara idauidau amo, gau ta ita hoihoilaia amo​—be gavamani ese ia gwauraia maka ia hanaia neganai takisi do idia abia diba. Mai ena ‘lalona maoromaoro’ Keristen tauna be do ia tahua ia noho gabuna dekenai dahaka monina amo gavamani idia ura takisi do idia abia diba bona do ia henia.

Gau iharuana be inai: Nega momo gavamani taudia idia gwau, idia ura idia diba ita abia monina amo takisi moni hida ita henia, to gau haida dekenai ita negea monina amo takisi ita henia lasi. Nega momo gavamani taudia idia gwau ia namo takisi henia taudia ese gau haida dekenai idia negea monina be idia davaria monina amo idia kokia, gabeai orena amo takisi idia henia. Inai koikoi tanobadana lalonai, taunimanima momo idia laloa idia kerere lasi bema unai negea monina idia torea neganai idia “lalohadai kava,” bona idia hadibaia koikoi. Sivarai ta be United States lalonai tau ta be iena adavana ena davana bada animal huina dabua ta ia hoia, bena dina tamona lalonai iena bisinesi gabuna dekenai ia atoa, unai amo ia torea diba ena davana be negea monina bona takisi henia lasi gauna ta badina gaukara gabuna ai ia be “hahairaia gauna”! Ma tau ta ia gwau iena natuna kekeni ena headava aria davana be bisinesi dekenai ia negea bona takisi henia lasi monina. Ma tau ta be Asia kahanai iena adavana ia abia loaloa hua momo lalodiai bona unai ia torea takisi henia lasi negea monina, to adavana be ia ida ia loa hebou hebamo bona moale karadia totona. Unai bamona kara be momo. Vadaeni, bema gau ta ita torea bisinesi dekenai moni negea to takisi henia lasi gauna to unai be momokani lasi unai be koikoi karana​—iseda Dirava, Iehova, be unai kara ia inai henia momokani.​—Hereva Lada-isidia 6:​16-19.

Oi naria namonamo. Iesu ese ia murinai idia raka taudia ia hagoadadia idia “aonega, gaigai bamona, do [idia] dagedage lasi, pune bamona.” (Mataio 10:16) Unai sisiba ita badinaia diba iseda takisi henia karana dekenai. Kohu bada tanodia ai, hari inai negai, nega momo taunimanima be akaun idia naria kampani eiava unai gaukara ia diba momo tauna ta dekenai moni idia henia edia takisi fom idia hegaegaelaia totona. Bena unai murinai unai fom idia sainia bena takisi davana ena cheque idia siaia. Unai be nega namona Hereva Lada-isidia 14:15 dekenai ia torea sisiba idia badinaia totona, ia gwau: “Aonega lasi tauna ese hereva ibounai ia abia dae, to lalo-parara tauna ese ena raka dalana ia naria namonamo.”

Takisi henia taudia momo be gavamani amo dika idia davaria badina hereva momokani lasi akaun tauna ta eiava ia diba momo lasi takisi fom ia hegaegaelaia tauna ena ‘hereva ibounai idia abia dae’ dainai. Ita aonega be namo momokani! Oi naria namonamo, herevana dahaka fom to oi do sainia lasi neganai oi duahia namonamo. Bema idia torea gauna ta, eiava idia torea lasi gauna ta, eiava idia gwauraia takisi henia lasi negea monina oi laloa ia kerere, oi hamaorodia oi dekenai idia gwauraia hedinarai namonamo​—bema oi ura, namona be idia gwauraia hedinarai loulou​—ela bona oi diba momokani unai fom be momokani bona gavamani taravatu dekenai ia hegeregere. Momokani, tano momo lalodiai, takisi edia taravatu ita lalo-pararalaidia be auka, to dala ia noho hegeregerena, aonega dalana be gau ta oi do sainia lasi neganai oi lalo-pararalaia guna be namo. Nega haida, reana takisi ena taravatu ia diba momo Keristen tauna ta be oi ia durua diba oi lalo-parara totona. Keristen elda tauna ta be loea gaukara ia karaia dainai nega haida takisi gaudia ia naridia, bona ena hereva kwadogina be inai: “Bema oiemu akaun ia naria tauna ia gwau namona be gau ta oi torea bona oi laloa reana unai be momokani lasi, vadaeni, sedira ia momokani lasi!”

Emu maduna oi huaia namonamo. Aposetolo Paulo ia toretore, ia gwau: “Ibounai ta ta sibona ena metau, ena metau do idia huaia.” (Galatia 6:5) Takisi henia karana dekenai, namona be Keristen ta ta iboudiai be sibona sibona ena maduna idia huaia idia hereva momokani bona taravatu idia badinaia totona. Kongregesen elda taudia ese idia naridia mamoe taudia edia takisi henia karana dekenai idia vareai lasi. (Korinto Iharuana 1:24 itaia.) Tadikaka edia takisi karadia idia tahua be elda edia gaukara lasi, to bema idia kamonai kerere badana ta ia vara, hegeregere unai gabu dekenai taunimanima ese unai tadikaka idia gwauraia dika, vadaeni idia tahua diba. To nega momo, Keristen ta ta sibona sibona be iena lalona ena mamina ia hadibaia maoromaoro dainai iena maduna ia huaia Revareva Helagadia edia hahegani ia badinaia totona. (Heberu 5:14) Danu, anina be oi diba fom ta​—herevana daika ese ia hegaegaelaia​—oi sainia neganai unai be gavamani pepana ta bona unai fom oi duahia bona oi laloa ena hereva be momokani.a

Namona be oiemu kerere ta idia gwauraia diba lasi. Keristen elda taudia be edia dagi gaukara dekenai idia hegeregere totona namona be ‘edia kerere ta idia gwauraia diba lasi.’ Unai hegeregerena, namona be Dirava ena matana vairanai kongregesen taudia iboudiai be ta ese ena kerere ia gwauraia diba lasi. (1 Timoteo 3:2; Efeso 5:27 itaia danu.) Unai dainai idia gaukara goada edia gabu dekenai edia ladana ia namo noho totona, takisi idia henia neganai danu. Iesu Keriso be unai kara dekenai haheitalai namona ia karaia. Iena hahediba tauna Petero idia nanadaia, idia ura idia diba Iesu be dubu ena takisi ia henia eiava lasi; unai be moni rua sibona. Dubu be iena Tamana ena ruma dainai bona pavapava ta lasi ese sibona ena natuna mero amo takisi ia abia lasi dainai, Iesu ese unai takisi ia henia lasi be kerere lasi. Iesu be unai bamona ia hereva, to unai takisi ia henia. Unai moni ia abia totona hoa karana ta ia karaia! Dahaka dainai ena be unai takisi ia henia lasi be kerere lasi to ia henia? Iesu ia hereva, ia gwau “edia lalona ita hametaua garina.”​—Mataio 17:​24-27.b

Namona be Dirava Matauraia Tauna Oi Idia Gwauraia Noho

Hari inai negai danu Iehova ena Witness taudia idia ura bada ma haida edia lalona idia hametaua lasi. Unai dainai, ita hoa lasi, tanobada hegegemadai taunimanima ese iseda orea idia gwauraia kara momokani oreana, bona takisi henia taudia oreana. Hegeregere, Spain ena El Diario Vasco niuspepa be Spain lalonai momo ese takisi idia henia lasi karana ia herevalaia, to ia gwau: “Unai kara idia karaia lasi taudia [be] Iehova ena Witness taudia sibodia. Gau ta idia hoia eiava idia hoihoilaia neganai, unai [kohu] ena davana idia gwauraia neganai unai be davana momokanina.” Unai hegeregerena, U.S. niuspepa San Franciso Examiner be lagani haida gunanai ia gwau: “[Iehova ena Witness taudia] oi gwauraidia diba gabu noholaia taudia hereadia. Edia takisi moni idia henia namonamo, gorere taudia idia naridia, duahiduahi diba lasi karana idia kokia toho.”

Keristen korikorina ta lasi ia ura gau ta ese iena ladana namona ia hadikaia, unai ladana namona ia abia totona ia hekwarahi bada. Bema oi abia hidi diba neganai, moni sisina do oi dogoatao noho bona oi idia gwauraia diba takisi henia koikoi tauna, a? Lasi. Oi ura lasi emu ladana namona oi hadikaia bena taunimanima ese oi idia gwauraia kara namodia matauraia lasi tauna bona emu tomadiho karana Iehova dekenai idia gwauraia dika.

Momokani, taunimanima be oi idia gwauraia noho kara maoromaoro bona kara momokani tauna ta totona, nega haida moni do oi negea. Idaunegai Greece aonega tauna Plato be lagani 2,400 bona ma haida gunanai ia gwau hegeregerena: “Takisi henia neganai, moni davana ta amo kara namo tauna ese moni bada do ia henia bona kara kerere tauna be unai moni davana tamona amo sisina sibona do ia henia.” Reana ia gwau diba danu kara namo tauna ia lalohisihisi lasi ia kara namo dainai moni bada ia henia davana bamona iena ladana namona ia dogoatao noho totona. Unai bamona ladana ia dogoatao totona unai moni ia henia be ia henia kava lasi. Unai be momokani Keristen taudia dekediai. Idia dekediai edia ladana namona be mai anina bada gauna badina unai amo edia guba Tamana idia matauraia bona edia mauri dalana dekenai bona edia Dirava, Iehova, dekenai ma haida ia veridia diba.​—Hereva Lada-isidia 11:30; 1 Petero 3:1.

To gau badana be Keristen momokani taudia be edia turana karana Iehova ida idia laloa bada. Dirava ese idia karaia karadia iboudiai ia itadia, bona ia itaia ia idia hamoalea toho. (Heberu 4:13) Unai dainai, gavamani amo moni idia henaoa toho hedibaganina idia dadaraia. Idia diba Dirava ese momokani bona maoromaoro karana ia moalelaia. (Salamo 15:​1-3) Bona idia ura Iehova ena kudouna idia hamoalea dainai, takisi monina maorona ibounai idia henia.​—Hereva Lada-isidia 27:11; Roma 13:7.

[Footnotes]