Iehova ese Mai Moale Danu Gau Haida Idia Henia Taudia Ia Lalokau Henidia
“Ta ta edia laloa, edia laloa hegeregerena do idia henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.”—2 KORINTO 9:7.
1. Edena dalai Dirava bona Keriso be mai moale ida gau haida idia henia?
IEHOVA be mai moale danu gau henia tauna ginigunana. Mai moale danu ia ese ena Natuna tamona sibona mauri ia henia bona iena amo aneru bona taunimanima ia havaraia. (Hereva Lada-isidia 8:30, 31; Kolose 1:13-17) Dirava ese mauri bona laga bona gau iboudiai ita ia henia, guba amo ia diho meduna bona nega namodia tubutubu gaudia idia tubu totona, unai amo iseda kudou be moale amo idia honu. (Kara 14:17; 17:25) Momokani, Dirava bona ena Natuna, Iesu Keriso, ruaosi be mai edia moale gau henia taudia. Maumau lasi dekenai bona mai moale danu gau haida idia henia. Iehova ese tanobada taudia ia lalokau henidia bada dainai, “Iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” Bona Iesu ia gwau-edeede lasi, to “iena mauri . . . ia henia, taunimanima ibounai hamauria totona.”—Ioane 3:16; Mataio 20:28.
2. Paulo ena hereva hegeregerena, Dirava ese edena bamona henia tauna ia lalokau henia?
2 Unai dainai, Dirava bona Keriso edia hesiai taudia be mai moale danu gau haida be idia henia be namo. Lagani 55 C.E. bamona ai, Korinto Keristen taudia dekenai ia siaia toretore iharuana lalonai, Paulo ese tadikaka ia sisiba henidia gau henia karana idia karaia totona. Paulo ese tadikaka sibodia edia ura amo Ierusalem bona Iudea Keristen tadikakadia be moni amo idia durudia karana ia herevalaia neganai, ia gwau: “Ta ta edia laloa, edia laloa hegeregerena do idia henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Korinto 9:7; Roma 15:26; 1 Korinto 16:1, 2; Galatia 2:10) Bema mai edia dala neganai Dirava ena taunimanima ese edia kohu idia henia, a? Bona Paulo ena sisiba gau henia karana dekena amo dahaka ita diba?
Kudou Namo Dainai Gau Haida Idia Henia
3. Iehova ena tomadiho dubuna haginia gaukarana be Israel taudia edena bamona idia durua?
3 Ura namona amo idia honu kudoudia ese Dirava ena taunimanima idia doridia sibodia edia mauri bona edia kohu amo Dirava ena ura do idia karaia totona. Hegeregerena, Mose ena negai Israel taudia ese Iehova ena tomadiho dubuna haginia gaukarana idia durua mai edia moale danu. Mai edia moale ida taunimanima ese golo, siliva, au, dabua, bona ma kohu haida idia henia, hegeregerena “boubou gauna Iehova dekenai.” (Esodo 35:4-35) Idia henia kohudia be momo herea dainai “unai kohu be ia hegeregere gaukara ibounai karaia totona, gaukara idia haorea neganai orena ia noho unai.”—Esodo 36:4-7.
4. David bona ma haida be dahaka lalohadai amo dubu ena gaukara totona gau haida idia henia?
4 Lagani sinahu haida murinai, Pavapava David ese gau momo ia henia Iehova ena dubu totona, iena natuna Solomon ese do ia haginia gauna unai. Badina David ‘be Dirava ena ruma ia moalelaia’ dainai, ia ese ena “anina bada kohuna,” golo bona siliva unai, ia henia. Lohia, iduhu biagudia, bona ma haida ‘ese Iehova dekenai harihari gauna amo edia imadia idia hahonua.’ Unai amo dahaka ia vara? Vadaeni, “taunimanima be edia boubou henia gaudia dainai idia moale bada herea, badina edia kudou ibounai amo Iehova dekenai unai boubou gaudia idia henia dainai”! (1 Sisiga 29:3-9) Idia be mai moale danu gau haida idia henia taudia.
5. Nega daudau lalonai Israel taudia ese tomadiho momokanina edena bamona idia durua?
5 Lagani handred handred momo lalodiai, Israel taudia ese palai dubuna, gabeai idia haginia dubudia, bona unuseniai idia noho hahelaga taudia bona Levi taudia edia davana idia karaia. Haheitalai ta be, Nehemia ena negai, Iuda taudia idia gwau tomadiho goevadaena idia naria noho totona, harihari gaudia haida do idia henia, badina idia diba Dirava ena ruma idia laloaboio be namo lasi. (Nehemia 10:32-39) Danu hegeregerena, hari inai nega lalonai, Iehova ena Witness taudia be mai edia moale ida bona mai edia ura ida gau haida idia henia hebou rumadia idia haginidia bona idia naridia totona, bona tomadiho momokanina idia durua totona.
6. Keristen edia mai moale danu henia gaukarana edia haheitalai haida be dahaka?
6 Keristen ginigunadia be mai moale ida gau haida idia henia. Hegeregerena, Gaio be “gaukara namo herea” ia karaia badina ia ese Basileia ena gaukara idia karaia loaloa taudia ia abidia dae, hegeregerena, hari inai negai Iehova ena Witness taudia ese Watch Tower Bible and Tract Society ese idia siaia loaloa naria taudia idia abia dae bamona. (3 Ioane 5-8) Unai tadikaka be kongregesen ta ta dekenai idia lao ena davana bona unai taudia idia abia dae karana ena davana ese tadikaka edia moni sisina ia haorea, to unai amo idia ia durudia lauma dalanai!—Roma 1:11, 12.
7. Filipi taudia edia moni bona edia kohu be edena bamona idia gaukaralaidia?
7 Kongregesen oreadia iboudiai ese edia moni bona kohu idia henia Basileia gaukarana durua totona. Hegeregerena, Paulo ese Filipi kamonai taudia ia hamaorodia, ia gwau: “Tesalonika lau noho neganai, nega tamona lasi, to nega haida umui ese lau [umui] durua totona, moni umui siaia. Harihari gaudia sibona lau tahua lasi, to lau ura be inai emui kara namo dainai Dirava ese davana umui dekenai do ia henia.” (Filipi 4:15-17) Filipi taudia be mai moale danu unai gaudia idia henia, to dahaka ese ia doridia moale dekenai unai gaudia idia henia?
Dahaka ese Mai Ena Moale Gau Henia Karana Ia Havaraia?
8. Dirava ena lauma helaga ese ena taunimanima ia doridia mai moale ida gau haida idia henia, to unai be edena bamona oi hamomokania?
8 Iehova ena lauma helaga, eiava gaukara siahuna, ese ena taunimanima ia doridia mai moale ida gau haida idia henia totona. Iudea Keristen taudia idia dabu neganai, Dirava ena lauma ese ma kamonai taudia haida ia doridia moni bona kohu amo idia durudia totona. Korinto dekenai idia noho Keristen taudia unai bamona gau haida idia henia totona, Paulo ese ia sisiba henidia bona Makedonia ena kongregesen edia haheitalai ia gwauraia idia dekenai. Ena be Makedonia kamonai taudia ese dagedage bona ogogami negana idia davaria, edia tadikaka idia lalokau henia dainai gau haida idia henia, herevana sibodia idia dabu. Idia noinoi gau haida idia henia totona! (2 Korinto 8:1-5) Ita gwau lasi Dirava ena gaukara ia karaia ena badina be taga taudia edia henia gaudia dekenai sibona ia haginia. (Iakobo 2:5) Iena ogogami gwauhamata hesiai taudia ese Basileia harorolaia gaukarana ese ia haorea monina bada hereana idia henia. (Mataio 24:14) To, gau momo idia henia dainai dika idia davaria lasi, badina Dirava be iena taunimanima idia dabu neganai ia durudia, bona unai gaukara ia heau namo bona ia bada ena badina be iena lauma helaga.
9. Abidadama, diba, bona lalokau ese mai moale ida henia karana edena bamona idia durua?
9 Mai moale danu gau haida idia henia ena badina be abidadama, diba, bona lalokau. Paulo ia gwau: “Umui Korinto taudia be emui dala ibounai dekenai kara namodia momokani umui karaia noho. Emui abidadama, bona hereva, bona diba, bona haheauka, bona lalokau be mai sivarai danu. Lau ura inai harihari gaudia henia kara danu dekena amo umui be mai sivaraina. Lau ura lasi umui lau oda henia. To haida edia lalokau dekena amo harihari gaudia idia mailaia sivaraina umui lau hadibaia. Unai dekena amo umui emui lalokau do lau dibaia, ia momokani eiava lasi.” (2 Korinto 8:7, 8) Iehova ena gaukara hanamoa totona, bema gau ia henia tauna ena kohu o moni be bada lasi, namona be Iehova ese ia do ia durua karana ia abidadama henia. Diba idia abia bada Keristen taudia idia ura Iehova ena gaukara idia durua, bona ia bona ena taunimanima idia lalokau henia taudia be mai moale ida idia ura edia kohu bona edia moni idia henia iena gaukara hanamoa totona.
10. Dahaka dainai ita gwau diba Iesu ena haheitalai ese Keristen taudia ia doridia mai moale ida gau haida idia henia totona?
10 Iesu ena haheitalai ese Keristen taudia ia doridia mai moale ida gau haida idia henia totona. Paulo ese Korinto taudia ia hamaorodia namona be edia lalokau amo gau haida idia henia neganai, ia gwau: “Badina be iseda Lohiabada Iesu Keriso ena hariharibada umui diba vadaeni. Ia be kohu momo tauna, to umui [ia] durua totona ogogami tauna bamona ia lao, iena ogogami dekena amo umui ese kohu momo do umui abia totona.” (2 Korinto 8:9) Guba dekenai Iesu be Dirava ena natuna iboudiai amo taga bada tauna, to ia ese unai taga ibounai ia negea bona ia mai tanobada dekenai tanobada tauna ta ai ia lao totona. (Filipi 2:5-8) Unai sibona laloa lasi dalana amo ia ogogami dainai, Iesu ese Iehova ena ladana hanamoa gaukarana ia durua bona ia sibona ena mauri ia henia boubou gauna totona, bena boubou gauna idia abia dae taudia ia hanamodia. Iesu ena haheitalai hegeregerena, namona be gau haida ita henia ma taunimanima haida durudia totona bona Iehova ena ladana hanamoa totona danu, ani?
11, 12. Hegaegae karana ese ita edena bamona ia durua mai moale ida gau haida ita henia totona?
11 Bema emu mauri ena kohu oi naridia namonamo gau haida oi henia diba. Paulo ese Korinto taudia ia hamaorodia, ia gwau: “Pura ena dina ginigunana ibounai umui ta ta ese emui rumai moni taina do umui haboua noho, ena bada be emui gaukara davana ena bada hegeregerena. Vadaeni do lau ginidae neganai boubou haboua gaukara be lasi.” (1 Korinto 16:1, 2) Unai bamona hari inai negai sibodia edia ura namo amo idia ura gau haida idia henia Basileia gaukara idia durua totona. Namona be unai taudia ese edia gaukara davana amo moni sisina idia atoa idia henia totona. Unai bamona edia mauri ena kohu idia naria namonamo dainai Witness taudia ta ta, ruma bese, bona kongregesen ese gau haida idia henia diba tomadiho momokani ena gaukara idia durua totona.
12 Gau haida henia totona ita hegaegae neganai do ita moale. Badina Iesu ia gwau: “Henia kara ena moale be bada, abia kara ena moale be maragi.” (Kara 20:35) Unai dainai, Paulo ena sisiba idia badinaia Korinto taudia ese edia moale do idia habadaia Ierusalem dekenai moni idia siaia neganai, lagani tamona lalonai idia hegaegaelaia gaukarana unai. Paulo ia gwau: “Dirava ia diba unai tau ena kohu be hida, bona ia laloa karaia, unai tau ena harihari gauna be iena kohu hegeregerena o lasi. Bema ta ta madi be kohu lasi neganai, Dirava ese ia henia kara do ia laloa lasi.” Bema tau ta ese gau ta ia henia, ena kohu bona ena moni idia noho hegeregerena, unai be gau badana. Bema Dirava ita abidadama henia, ia ese kohu momo tadikakadia ia doridia gau momo idia henia, to idia negea kava lasi, bona kohu momo lasi tadikakadia do idia dabu lasi Dirava ena gaukara dekenai edia goada bona edia aonega idia henia neganai.—2 Korinto 8:10-15.
Henia Gaukara Idia Naria Namonamo
13. Dahaka dainai Korinto taudia idia daradara lasi Paulo ese idia henia boubou monina ia naria neganai?
13 Paulo ese henia gaukara ia naria unai dainai idia dabu kamonai taudia be kohu idia davaria bona haroro gaukara dekenai idia gaukara goadagoada diba, to ia bona ma haida ese unai moni idia abia lasi sibodia edia gaukara davana totona. (2 Korinto 8:16-24; 12:17, 18) Paulo be sibona ena kohu bona moni abia totona gaukara haida ia karaia bona kongregesen dekena amo moni ia tahua lasi, unai amo maduna ia henidia lasi. (1 Korinto 4:12; 2 Tesalonika 3:8) Unai dainai, Korinto taudia ese moni ia dekenai idia henia neganai, idia daradara lasi badina ia be koikoi lasi, gaukara goada tauna, Dirava ena hesiai gaukara dekenai.
14. Watch Tower Society edia kara be edena bamona unai henia monina idia abia neganai?
14 Watch Tower Bible and Tract Society be lagani 1884 dekenai idia haginia negana amo ia mai hari, ia dekenai moni idia henia taudia idia daradara lasi, to idia diba unai moni be Iehova ena Basileia gaukarana lalonai idia gaukaralaia sibona. Ena gaukara taravatu pepana (charter) dainai, unai Society ese taunimanima idia durudia edia hekwakwanai badana idia kokia totona. Edia hekwakwanai badana be lauma dalana dekenai idia dabu. Unai bamona idia karaia taunimanima ese mauri idia abia totona, Bible ena gaukara bona hahediba idia karaia neganai. Hari inai negai, Iehova ese ena orea badana dekenai idia vareai mamoe taudia ena haboua gaukarana ia haharagaia, bona tadikaka idia henia monina be Basileia harorolaia gaukarana lalonai ia hanamoa dainai ita diba ia ese unai moni idia gaukaralaia karana ia moalelaia. (Isaia 60:8, 22) Ita diba vadaeni ia ese mai edia moale ida gau haida idia henia taudia edia kudoudia ia hamareredia noho.
15. Dahaka dainai nega ta ta ai inai magasin be boubou moni henia karana ia herevalaia?
15 Nega ta ta ai, Society ese inai magasin ia gaukaralaia bona duahia taudia ia hadibadia idia be mai edia dala tanobada ibounai Basileia harorolaia gaukarana idia durua diba do idia henia monina amo. Unai bamona idia karaia neganai, ita gwau lasi Society ese tadikaka ia doria moni idia henia totona, to ia hadibadia sibona, idia be mai edia dala Dirava ese ia henidia gaudia hegeregerena amo “Dirava ena Sivarai Namona” ena gaukara helagana idia durua totona. (Roma 15:16; 3 Ioane 2) Tadikaka idia henia monina Society ese ia naria namonamo bona ia negea kava lasi, to Iehova ena ladana bona ena Basileia harorolaia gaukarana dekenai ia gaukaralaia. Idia henia monina ibounai mai moale danu Society ese ia abia, tanikiu leta ia siaia henia tauna dekenai, bona unai moni Society ese ia gaukaralaia Dirava ena Basileia ena sivarai namona harorolaia gaukarana karaia totona. Haheitalai ta be, unai moni amo tanobada idauidau dekenai misinari gaukara idia karaia, bona Bible ena diba hariharilaia totona printa gabudia Society ese ia haginidia bona ia naridia unai moni ena amo. Danu, tanobada ibounai ena gaukara totona idia siaia monina ia gaukaralaia Bible bona Bible bukadia bona audio kaset bona video kaset edia davana karaia totona. Unai dala amo mai edia moale gau haida idia henia taudia ese Basileia ena gaukara idia habadaia.
Ta ese Ia Doridia Lasi
16. Ena be Iehova ena Witness taudia momo lasi idia taga, to dahaka dainai edia boubou monina maragina be gau badana?
16 Iehova ena Witness taudia momo lasi be taga taudia. Ena be idia ta ta ibounai moni sisina sibona idia henia Basileia gaukara durua totona, to idia henia monina be gau badana. Iesu ese ogogami vabuna ta ena moni maragidia rua dubu ena maua dekenai ia udaia karana ia itaia neganai, ia gwau: “Inai vabu mai ogogami danu ia udaia monidia ese idia ibounai edia moni ia hanaia. Badina be idia [moni idia udaia taudia ma iboudiai] ese edia moni bada herea dekena amo sisina sibona boubou maua dekenai idia udaia, to inai vabu be mai ogogami danu, to ena moni ibounai, ena mauri dekenai durua gauna ia udaia.” (Luka 21:1-4) Ena be ia henia gauna be maragi, to mai moale danu ia henia—bona ia henia gauna be mai anina bada.
17, 18. Korinto Iharuana 9:7 dekenai, Paulo ena hereva ena anina be dahaka? Bona unai Greek herevana, idia hahanaia “moale” herevana unai, ese dahaka ia hahedinaraia?
17 Iudea Keristen taudia durudia gaukarana ia herevalaia neganai, Paulo ia gwau: “Ta ta edia laloa, edia laloa hegeregerena do idia henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Korinto 9:7) Reana aposetolo Paulo ese Septuagint Bible ena hereva, Hereva Lada-isidia 22:8 dekenai, ia herevalaia. Unai hereva ia gwau: “Mai moale danu gau ta ia henia tauna Dirava ese ia hanamoa; bona ia ese ena gaukara dekenai ia dabu gauna do ia henia.” (The Septuagint Bible, Charles Thomson ese ia hahanaia gauna) Paulo ese unai hereva “hanamoa” ia haidaua bona ia gwau “lalokau henia,” to unai hereva rua be sisina hegeregere, badina Dirava ena lalokau amo hahenamo momo idia vara.
18 Mai ena moale danu gau ta ia henia tauna be unai gaukara dekenai ia moale bada. Korinto Iharuana karoa 9:7 ena hereva “moale” be Greek gado amo idia abia bona unai hereva amo hereva ta “moale hisidae” danu ia mai! Unai bamona ia hahedinaraia tauna, aonega tauna R. C. H. Lenski, ia gwau: “Dirava ese mai ena ura bada ida bona mai ena moale ida gau haida ia henia tauna ia lalokau henia . . . [unai tau] be mai ena moale ena abidadama amo ia ese dala ta ia davaria gau ta ia henia totona.” Unai mai ena moale tauna ia henia neganai ia maumau lasi, eiava ia henia lasi tau ta ese ia doria dainai. Oi danu be Basileia ena gaukara dekenai mai moale ida gau haida oi henia, a?
19. Keristen ginigunadia ese edia boubou monina edena bamona idia henia?
19 Keristen ginigunadia ese moni merekina ta idia loalaia lasi moni abia totona, eiava edia gaukara davana 10 10 amo moni ta ta idia henia lasi, tomadiho durua totona. To, idia henia monina be idia sibodia edia ura hegeregerena idia henia. Tertullian, lagani 190 C.E. dekenai Keristen oreana lalonai ia vareai tauna, ia gwau: “Ena be ita be mai iseda moni boubou mauana, to unai moni be mauri hoia monina lasi, hegeregerena tomadiho ta ita hoia diba bamona. Dina ta, hua ta ta iboudiai, bema tau ta ia ura, ia ese moni sisina ia henia boubou bamona; to bema ia moale neganai sibona unai moni ia henia, bona ia be mai ena dala neganai sibona; badina ta ese unai tau ia doria lasi; ia sibona mo ena ura dainai ia henia.”—Apology, Karoa 39.
20, 21. (a) Inai magasin ena kope gunana ta ese Dirava ena gaukara, moni amo ita durua dalana edena bamona ia herevalaia? Bona edena bamona unai be mai anina hari inai nega lalonai? (b) Iseda kohu bona moni amo Iehova ita hanamoa neganai dahaka do ia vara diba?
20 Sibodia edia ura hegeregerena idia henia karana be hari inai negai Iehova ena hesiai taudia vaia edia kara. To, nega haida, tadikaka haida ese gau ta idia henia Dirava ena gaukara durua totona idia laloa momo lasi. February ena hua lagani 1883 dekenai, inai magasin ena hereva ta be inai, ia gwau: “Haida be ma haida totona [moni henia ena] maduna idia huaia bada dainai, edia goada idia ore bamona, unai amo gaukara idia karaia namonamo diba lasi, to unai sibona lasi, . . . to henia gaukara idia karaia namonamo lasi tadikakadia be idia dabu, badina gau haida idia henia lasi dainai.”
21 Hari inai nega lalonai, hutuma bada herea taudia be Iehova ena orea lalonai idia vareai, bona East Europe bona ma gabu haida, guna gaukara idia koua gabudia dekenai, Dirava ena gaukara ia bada ia lao neganai, orea ena printa rumadia bona ma ruma badadia haida idia karaia gwauraia. Danu, namona be ma Bible haida bona ma buka haida do ai printaia. Dirava ena gaukara do ai karaia haraga diba bema ma moni haida do ai davaria. To vadaeni, emai abidadama be Dirava ese gau ibounai do ia henia, bona ai diba ‘edia taga gaudia amo Iehova idia hanamoa taudia’ ese namo do idia davaria. (Hereva Lada-isidia 3:9, 10) Oibe, “uhe momo do ia hadoa tauna be anina momo do ia geia.” Iehova ese ‘emui hebogahisi kara namodia dekena amo huahua momo do ia havaraia.’ Bona mai iseda moale danu gau haida ita henia neganai, taunimanima momo ese ia idia tanikiu henia bona idia hanamoa.—2 Korinto 9:6-14.
Dirava ese Ia Henia Gaudia Dainai Oiemu Moale Hahedinaraia
22, 23. (a) Dirava ena hariharibada hereadaena be dahaka? (b) Badina ita ese Dirava ia henia gaudia ita moalelaidia, dahaka do ita karaia?
22 Paulo ia moale dainai, ia gwau: “Namona be Dirava ita hanamoa bada, iena hariharibada namo herea momokani dainai.” (2 Korinto 9:15) Badina ia be horoa Keristen taudia edia “kara dika gwauatao dalana” bona danu, tanobada taudia edia dainai, Iesu be Iehova ena hariharibada hereadaena ena badina bona ena dalana. (1 Ioane 2:1, 2) Unai henia gauna be “Dirava ena hariharibada,” Iesu Keriso ena amo ena tanobada taudia dekenai ia hahedinaraia gauna unai, bona ia be edia hahemauri dalana bona Iehova bona Iena ladana ia hanamodia gauna danu.—2 Korinto 9:14.
23 Ai moale bada Iehova dekenai ena henia gauna bada hereana dainai, bona lauma dalanai bona tauani dalanai ena taunimanima ia durudia dainai. Madi, iseda guba Tamana ena kara namo ita dekenai ia bada herea dainai, ita taunimanima ese unai namo ita ibounai gwauraia diba lasi! Bona momokani ita ia doria mai moale danu gau haida ita henia totona. Vadaeni, mai kudou ibounai bona mai moale ibounai danu, namona be iseda Dirava, Iehova, gau momo ia henia Tauna, mai moale danu ia Henia Tauna ginigunana bona badana, ena gaukara ita durua!
Inai Oi Laloatao, A?
◻ Edia kudou namo dainai Iehova ena taunimanima ese dahaka idia karaia?
◻ Dahaka siahu ese henia karana ia havaraia?
◻ Watch Tower Society ese ia abia monina edena bamona idia gaukaralaia?
◻ Dirava ese edena dala dekenai kohu o moni ia henia tauna ia lalokau henia, bona Iena henia gaudia momo dainai edena bamona ita tanikiu henia be namo?
[Picture on page 15]
Palai dubuna idia haginia neganai, Israel taudia be idia gaukara goada bona moni bada Iehova ena gaukara totona idia henia
[Picture on page 18]
Ogogami vabuna ese ia henia monina bamona idia henia monidia be gau badadia