natudia idia naria tama sina dekenai idia haroro hanaihanai. Badina tama sina momo be miniti 20 bamona idia naria, nega ia hegeregere idia ida Baibel ena hereva ta oi kikilaia namonamo diba.

²⁹ Painia taudia momo ese iseda magasin lalonai idia herevalaia gauna ta reana idia laloa bada taudia idia tahua. Haheitalai ta be, taihu ta be kamonai taudia momo ia davaria ena kongregesen teritori dekenai idia noho sikuli 6 dekenai December 22, 1995 ena Awake! “Schools in Crisis” ia abia lao neganai. Ma danu ia ese famili edia hekwakwanai dekenai heduru idia henia taudia edia opesi ia vadivadi henidia bona ruma bese maurina bona natudia hadikaia karana idia herevalaia magasin ia abidia lao, bona idia boiria gabeai unai bamona gaudia idia herevalaia magasin do ia mailaia danu. Gaukara lasi taudia idia durua opesi dekenai gaukara lasi ia herevalaia magasin, March 8, 1996, Awake! idia abia dae dalana ia gwauraia “hoa gauna.”

³⁰ Distrik naria tauna ia gwau ia bona ena adavana be hanaihanai nega bona gabu idauidau ai idia haroro edia aniani idia hoia neganai. Sitoa dekenai taunimanima momo idia noho lasi bona hoia taudia be bisi lasi dalanai do idia hoia gaudia idia tahua negadiai aniani hoia totona idia lao. Idia gwau nega momo idia herevahereva namo herea.

³¹ Pablisa momo idia gwau taunimanima idia kamonai namo herea dabua huria gabudia dekenai idia haroro neganai. Ta ia noho lasi neganai magasin idia rakatanidia lasi. To idia ura bada taunimanima dekenai sivarai namona idia harorolaia, unai dainai unai gabu idia gaukaralaia taudia idia haroro henia toho.

³² Gabu haida dekenai, idia abia hidi pablisa haida ese gwaumaoro idia abia peleini gabuna dekenai idia haroro totona. Nega haida, Iehova ena taunimanima be momo lasi tanodia amo idia mai laolao taudia idia haroro henia dainai idia moale. Bema kamonai taudia idia davaria, pepapepa eiava magasin idia hariharilaia.

³³ Bema kongregesen teritori mai sekuriti ruma badadia dekenai idia noho taunimanima ta ta idia haroro henia be hegeregere lasi, haida be unai gau dekenai idia gaukara sekuriti taudia eiava opesi ai idia noho biaguna taudia idia haroro henia. Unai idia karaia danu sekuriti geiti idia noho neganai idia karaia danu. Sekit naria tauna ta bona pablisa haida be unai bamona ruma badadia 7 idia vadivadi henia. Nega ta ta ibounai biaguna tauna idia hadibaia ena be hanaihanai ita karaia dalana ai unai ruma taudia idia vadivadi diba lasi, to idia ura lasi ia ese magasin matamatadia edia diba namona ia reaia. Unai ruma 7 edia biaguna taudia iboudiai be magasin idia abia dae bona idia noia gabeai matamata gaudia do idia abia totona! Unai bamona ruma dekenai idia noho taunimanima be telefon amo idia haroro henia toho.

³⁴ Goada Karaia Gabu Iboudiai Haroro Totona: Basileia ena sivarai ita harorolaia goadagoada be iseda gwauhamata hagugurua dalana ta. Taunimanima be edia nega namona ai ita davaria totona, sibona eda ura ita atoa siri ‘haida do ita veria mauri totona.’ Iehova ena gwauhamata hesiai taudia iboudiai idia ura aposetolo Paulo hegeregerena do idia gwau: “Sivarai Namona dainai, inai kara ibounai lau karaia noho. Bona lau diba, bema inai gaukara lau karaia noho, lau danu ese Sivarai Namona ena mauri hanamoa gaudia do lau abia.”—1 Kor. 9:22, 23.

³⁵ Paulo be ma ia torea: “Unai dainai, lauegu manoka do lau heagilaia mai moale danu, vadaeni Keriso ena siahu lau dekenai do ia noho. . . . Badina be lau manoka neganai, unai be Dirava ena goada lau abia.” (2 Kor. 12:9, 10) Unai ena anina be, unai gaukara be ita sibona eda goada dekenai ita haorea diba lasi. Iehova ita guriguri henia iena lauma helaga goadana ita abia totona. Bema goada totona Dirava ita guriguri henia ita diba momokani iseda guriguri ia haere henia. Bena taunimanima ita lalokau henia dainai, herevana edeseniai idia noho, sivarai namona ita harorolaia totona dala idauidau do ita tahua. Vaira pura lalonai, reana oi ura inai pepa dekenai idia gwauraia gaudia ta do oi tohoa, ani?

Harihari Gauna Ita Henia Diba, Ani?

¹ September hua lalonai Mauri Hanaihanai Paradaiso Lalonai bukana ita gaukaralaia. Mai anina bada herevadia be inai buka namona lalonai idia noho. Taunimanima be lauma dalanai ia durudia diba.

² Taunimanima dekenai buka gunadia ita rakatania ena namo be tau ta ena ekspiriens ese ia hahedinaraia. Ia ese ena adavana, Witness hahinena amo, buka gunana be harihari gauna bamona ia abia. Unai ia do vara lasi neganai, ia be Baibel ia ura henia lasi. To ena adavana ia hoa bada herea badina hanuaboi tamona lalonai ia ese unai buka ia duahia ore. Unai amo ia abia dae momokani Baibel be Dirava ena Hereva bona unai dainai, ia be kongregesen ena hebouhebou dekenai ia lao bona Baibel stadi totona ia noinoi. Hua toi idia ore lasi lalonai, haroro gaukara ia karaia bona hari ia bapatiso vadaeni.

³ Mauri Hanaihanai bukana hariharilaia dala namona be ruma-ta-ruma-ta gaukarana lalonai. To ita gaukaralaia diba ta dekenai harihari gauna bamona ita henia totona. Sedira oi ura unai buka do oi henia oi dibaia bisinesi taudia, gaukara hebou taudia, sikuli turadia, doketa taudia, tisa taudia, emu dekena taudia eiava oi ura kara namo oi karaia tauna dekenai. Reana oiemu tubuna tau bona hahine, oiemu tubudia, eiava oiemu varavara haida ese emu harihari gauna do idia ura henia. Unai buka idia ura henia taudia ita hagoadadia diba unai buka be ma harihari gauna bamona do idia henia diba edia turadia eiava varavara dekenai.

⁴ Bema unai buka be harihari gauna bamona oi henia reana oi ura danu hereva kwadogina do oi torea unai buka ena rau ginigunana dekenai. Unai bamona hebogahisi karana bona ma haida laloa karana be momo ese do idia laloa bada. Bona unai buka idia duahia totona nega idia atoa taudia be hahenamo bada do idia abia.