Baibel be mai Anina Ita Edai Eiava?

OXANA, Russia hahinena ta, be Baibel ia itaia neganai ia moale bada. Tau ta ese Moscow ena dala ta ai ia hoihoilaia. Tano idauna tauna ta, iena turana unai, ladana John ese Oxana ena moale ia hoalaia, badina be iena tano ai Baibel momo idia noho. Ia gwau: “Ena be lau laloa Dirava be lasi, to lau ura lau hoia iena.” Oxana ese John ena harihari gauna ia abia dae.

Lagani momo lalodiai gavamani ese Baibel idia taravatua tanodia ai taunimanima momo be Oxana hegeregerena, idia ura dikadika Baibel do idia abia. Soviet Union ese guna ia biagudia gabudia ai bona tanobada ena kahana ma haida ai, taunimanima momo idia ura Baibel do idia abia, unai dainai inai magasin karaia taudia idia gaukara goada edia ura gauna henidia totona. Hari be idia momo edia nega ginigunana Baibel idia tahua namonamo, bona idia momo ese ena hereva mai siahuna idia ura henia.

Idia Hakoikoia Toho Taudia bona Idia Daradaralaia Taudia

To Europe ena mirigini kahanai, taunimanima momo ese edia Baibel be seipi ai idia atodia, bena idia lalodiaboio vaitani. Haida idia gwau: “Ia be anina lasi!” “Idaunegai taudia totona idia torea.” Haroro taudia haida mai edia ladana bada danu ese taunimanima vairadiai Baibel hadikaia herevadia idia gwauraidia vadaeni. South Africa ena niuspepa ladana The Star ia gwau Anglican ena bisop badana Desmond Tutu ia gwau: “Baibel ena kahana haida edia namo be noho hanaihanai gauna lasi.” Hereva unai bamodia dainai taunimanima momo idia daradara, Baibel do idia abia dae be namo eiava.

Ta ese Ita Do Ia Hakaua be Namo

Baibel idia hakoikoia toho taudia bona idia abia dae taudia danu be idia diba tanobada hadikaia karadia koudia momokani daladia do ita davaridia be namo. Buka ta ladana Future Shock ai, Alvin Toffler ia gwau: “Taunimanima ta ta edia noho daladia bona tanobada ena oromana be idia idau idia lao; bema taunimanima ese unai idia biagua haraga lasi, . . . dika bada herea do ita davaria.” Toana be Toffler ese ia gwauraia gauna be hari ia vara.

Hari inai negai, taunimanima edia diba matamata bona edia lalohadai idauidau ese noho namona tanobada hegegemadai idia havaraia lasi. Vanegai idia ese tanobada matamatana idia laroa, to unai helaro ia boio, bona momo be dina iboudiai idia hekwarahi idia mauri noho totona.

Ripoti haida ese idia hahedinaraia, taga taudia bona ogogami taudia edia moni edia momo be idau vaitani. Tanobada taudia 10 10 amo rua rua ese tanobada ena taga ibounai amo 82.7 pesen idia abia. Unai dainai ita hoa lasi, tuari, hitolo, gorere, heatu, bona heiriheiri be tano momo ai idia vara badabada negadiai, ani? Taunimanima edia noho ia dika ia lao dainai, edia lalodia idia hekwarahi bona ruma bese danu idia dika idia lao.

Ena be Toffler bona ma momo idia gwau namona be taunimanima ese “dala matamatadia do idia tahudia, noho namona davaria totona,” to idia vara gaudia ese idia hahedinaraia idia be hegeregere lasi do idia davaria.

Dala Idauna

Buka Helaga, lagani 3,500 bamona idia lao vadaeni idia torea matamaia bukana, ena sisiba herevadia be idia senisi lasi ema bona hari. Unai hegeregerena, Ieremia 10:23 ena hereva be ia do momokani, bona hari inai negai ia be mai anina bada; ia gwau: “Taunimanima ena dala be ia sibona lalonai lasi. Taunimanima ena raka be ia sibona ese do ia gwauraia hidi diba lasi.” Bema taunimanima be hegeregere lasi sibodia edia raka dalana do idia gwauraia hidi, daika be hegeregere? Ia hakaudia diba Tauna tamona be Baibel ese ia gwauraia: “Lau inai Iehova, emu Dirava; oi be sibomu do oi hanamoa dalana be oi lau hadibalaia, emu raka dalana namona ai oi lau hakaua.”​—Isaia 48:17.

Baibel amo, Iehova Dirava ese ita be sibona do ita hanamoa dalana ita ia hadibalaia. Baibel ena sisiba be momo; ia hahedinaraia edena dala ai do ita raka be namo. Iena sisiba be mai anina hari inai negai. Hereva gabena ese Baibel ena namo hari inai negai be do ia gwauraia. Inai gau do ia herevalaidia: gorere lasi maurina, taga, ruma bese nohona, bona taunimanima ta ta edia kara. Unai amo do oi itaia, ena be taunimanima edia noho ia idau, to Baibel ia idau lasi.

[Picture on page 4]

Baibel be dogo ta bamona inai heiriheiri tanobadana ai