Nega Ibounai Oiemu Lalo-Hekwarahi be Iehova Dekenai Oi Henia

HARI inai negai taunimanima momo edia mamina be maduna metaudia ese idia moidia. Ogogami, ruma bese edia hekwakwanai, gorere, lohia taudia dikadia dainai idia vara hisihisidia, bona hisihisi havaraia gaudia ma haida be edia aiona dekenai idia kwatua nadi badadia bamona. Haida idia lalo-metau, unai hekwakwanai dainai sibona lasi, to badina be idia laloa idia be mai edia kerere dainai, idia be anina lasi bona idia hegeregere lasi. Idia momo idia laloa edia hekwarahi amo do idia laga-ani be namo. Emu maduna idia metau dikadika neganai, edena bamona oi haheauka diba?

Israela ena King Davida be nega ta ia mamia ena lalo-hekwarahi ia haheaukalaia diba lasi. Salamo karoa 55 ese ia hahedinaraia, iena inai taudia ese idia dagedage henia bona idia badu henia dainai ia lalo-hekwarahi bada. Ia lalohisihisi bada bona ia gari. Iena lalohisihisi ai ia taitai sibona. (Salamo 55:2, 5, 17) To ena be hisihisi momo ia davaria, to dala ia davaria do ia haheauka totona. Unai be dahaka? Dirava amo heduru ia tahua. Iena sisiba, ia bamona idia lalohisihisi taudia dekenai be inai: ‘Oiemu laloa hekwarahi be Iehova dekenai oi henia.’​—⁠Salamo 55:⁠22.

Iena hereva, ‘oiemu laloa hekwarahi be Iehova dekenai oi henia,’ ena anina be dahaka? Ena anina be Iehova dekenai ita guriguri bona iseda lalo-hekwarahi ita gwauraia hedinarai sibona, a? Eiava ita ese gau ta ita karaia diba, unai lalo-hekwarahi hamaragia totona, a? Edena bamona bema ita laloa ita be hegeregere lasi momokani Iehova do ita guriguri henia? Davida ena hereva ena anina do ita diba totona, ia dekenai idia vara gaudia haida do ita tahudia; unai hereva ia torea neganai, unai gau ia do lalodia tao.

Iehova Ena Goada amo Oi Karaia

Goliata ese Israela ena tuari taudia edia kudouna ia hagaridia dalana oi laloatao, a? Inai tau lata hereana, iena lata be mita toi bamona, ese ia hagaridia. (1 Samuela 17:​4-11, 24) To Davida be ia gari lasi. Badina be dahaka? Badina ia be sibona ena goada amo Goliata ia heatu henia lasi. Israela ena king ai do ia lao totona idia horoa negana amo, Dirava ena lauma helaga ia abia dae, ena kara iboudiai lalonai do ia hakaua bona do ia hagoadaia totona. (1 Samuela 16:13) Unai dainai Goliata dekenai ia gwau: “Lau be Lohiabada ena ladana dainai oi dekenai lau raka mai inai. Ia be Israela tuari orea, oi ese oi boiboi dika henia taudia edia Dirava. Hari dina dekenai Lohiabada ese lauegu imana dekenai oi do ia atoa.” (1 Samuela 17:​45, 46) Davida be vilipopo gaukaralaia dalana ia diba momo, to ita diba Iehova ena lauma helaga amo nadi ia negea maoromaoro bona Goliata ia hamasea momokani.​—⁠1 Samuela 17:​48-51.

Davida ese unai hetoho bada hereana dekenai ia kwalimu, badina be ia laloa Dirava ese do ia durua bona do ia hagoadaia. Dirava ida hetura karana namona ia karaia. Guna Iehova ese Davida ia hamauria dainai, unai ese edia hetura karana ia hagoadaia. (1 Samuela 17:​34-37) Davida hegeregerena, oi be Iehova oi tura henia namonamo diba bona herevana dahaka dahaka do idia vara, to oi diba momokani oi do ia durua bona oi do ia hagoadaia.​—⁠Salamo 34:​7, 8.

Hekwakwanai Oi Hanaia Toho

To ita gwau lasi unai ena anina be lalohisihisi bada, lalo-hekwarahi, o gari do idia vara diba lasi. Salamo 55 ese ia hahedinaraia goevagoeva do idia vara diba. Haheitalai ta be inai: Davida ese Goliata ia heatu henia neganai ia hahedinaraia ia gari lasi bona Iehova ia abidadama henia, to lagani haida murinai iena inai taudia vairadiai ia gari bada. King Saulo ese ia lalo-dika henia dainai ia heau oho, do ia hamasea garina. Davida ena mamina mani oi laloa toho; ia vara gauna ese ena lalona ia hahisia bada, bona Iehova ena palani ena anina do ia vara dalana ia daradaralaia. Ia ese ia horoa vadaeni nega vaira ai Israela ena king ai do ia lao totona, to Saulo ena kara dainai ia heau mauri bona tano gagaena ai ia loa kava bona Saulo ese ia gavaia, labana tauna ese uda boroma ia gavaia bamona. Davida be Goliata ena hanua Gata dekenai ia hunia gwauraia neganai, idia lalo-parara ia be daika. Dahaka ia vara? Baibel ia gwau “ia gari bada” herea.​—⁠1 Samuela 21:​10-12.

To ena gari bona lalo-hekwarahi bada ese ia koua lasi, Iehova ena heduru do ia tahua totona. Salamo 34 (unai hekwakwanai dainai ia torea herevana) hegeregerena, Davida ia gwau: “Lohiabada dekenai lau guriguri, bona ia ese lau dekenai ia haere. Ia ese egu gari ibounai dekena amo, lau ia hamauria. Lau be durua tauna lasi neganai, Lohiabada dekenai lau taitai, vadaeni ia ese lau dekenai ia haere, bona egu hekwakwanai ibounai dekena amo lau ia hamauria.”​—⁠Salamo 34:​4, 6.

Oibe, Iehova ese ia durua. To, ita itaia Davida be ia helai kava lasi, ia naria lasi ela bona Iehova ese do ia hamauria. Lasi. Ia diba namona be ena diba bona ena goada hegeregerena do ia kara, unai hekwakwanai amo do ia siri oho totona. Ia gwau Iehova ese ia hamauria, to ia ese kara ta ia karaia danu, ia be kavakava tauna ta bamona, unai dainai Gata ena king ese ia hamasea lasi. (1 Samuela 21:​14–22:⁠1) Namona be ita danu be eda diba bona eda goada hegeregerena ita kara, iseda maduna ita huaia totona, namo lasi ita naria kava ela bona Iehova ese ita do ia durua.​—⁠Iamesi 1:​5, 6; 2:⁠26.

Emu Maduna Latadiai Ma Haida Oi Atoa Kau Lasi

Gabeai, Davida be ena kara ta dainai gau ma ta ia dibaia mai ena lalohisihisi ida. Unai be dahaka? Gauna be inai: Nega haida ita siboda ese iseda maduna latadiai ma haida ita atoa kau. Pilistia taudia ia halusidia murinai, Davida ese Dirava ena taravatu mauana be Ierusalema dekenai ia abia lao lalonai, kerere ia vara. Baibel ese unai sivarai be inai bamona ia gwauraia: “Davida ese idia ia gunalaia, idia lao Bala Iuda dekenai. Unai gabu dekena amo, Dirava ena Taravatu Maua, Ierusalema dekenai idia mailaia gwauraia . . . Vadaeni Dirava ena Taravatu Maua be treila matamata ena latanai idia atoa . . . Abinadaba ena natuna ruaosi, Usa bona Ahio, ese inai treila matamata idia heaulaia.”​—⁠2 Samuela 6:​2, 3.

Taravatu Mauana be treila dekenai idia abia lao dainai, Iehova ena hahegani, Maua huaia dalana haheganidia, idia badinaia lasi. Ia haganidia goevagoeva, unai Maua huaia taudia maorodia, Kohata iduhu taudia Levi oreana lalonai, sibodia be edia pagana dekenai do idia huaia inai dala amo: Huaia audia rua be Maua ena daiguni rinidia lalonai idia toia vareai bena unai huaia audia be edia pagana dekenai idia atoa. (Esodo 25:​13, 14; Numera 4:​15, 19; 7:​7-9) Unai hahegani idia badinaia lasi dainai dika ia vara. Treila idia veria boromakaudia ese kahirakahira Maua idia hamorua neganai, Usa ese ena imana ia duduia lao Maua dogoatao totona bena Iehova ese ia hamasea, ia hemataurai lasi dainai. Reana Usa be Levi tauna, to momokani ia be hahelaga tauna lasi.​—⁠2 Samuela 6:​6, 7.

Davida be king dainai, kerere kahana be iena. Unai neganai ia karaia karana ese ia hahedinaraia hedibagani idia vara negadiai, Iehova Dirava ida idia hetura namonamo taudia danu be nega haida idia kara kerere diba. Davida ia badu guna, bena gabeai ia gari. (2 Samuela 6:​8, 9) Iehova ida ia hetura namonamo karana dekenai hetoho bada ia davaria. Unai neganai Iehova ena oda herevana ia badinaia lasi dainai, toana be iena maduna Iehova dekenai ia henia lasi. Reana nega haida ita be unai bamona ita karaia, a? Iehova ena hahegani ita badinaia lasi dainai hekwakwanai idia vara neganai, nega haida ita gwau unai be Iehova ena kerere, a?​—⁠Aonega Herevadia 19:⁠3.

Emu Kerere Ena Metau Oi Haheaukalaia

Gabeai, Davida ese Iehova ena kara maoromaoro taravatudia ia makohia dainai, sibona ena kerere ena metau ia habadaia. Unai nega ai, Davida ese ena maduna, tuari taudia be tuari lalonai do ia gunalaia madunana ia dadaraia. Tuari taudia idia lao tuari neganai, ia be Ierusalema dekenai ia noho. Unai dainai hekwakwanai badana ta ia vara.​—⁠2 Samuela 11:⁠1.

King Davida ese hahine mai hairaina, Bataseba, ia itaia ia digu. Ia be Bataseba ida idia mahuta hebou, bena ia rogorogo. (2 Samuela 11:​2-5) Iena kerere ia hunia totona, dala ia karaia Bataseba ena adavana, Uria, be tuari gabuna amo Ierusalema dekenai do ia giroa mai. Israela taudia idia tuari noho dainai, Uria ia ura lasi iena adavana ida do idia mahuta hebou. (2 Samuela 11:​6-11) Vadaeni, Davida ese koikoi daladia dikadia ia gaukaralaia, iena kerere do ia hunia totona. Dala ia karaia Uria ena tuari bamodia ese Uria be tuari ia auka momokani gabuna dekenai do idia atoa, bena iena amo do idia raka siri, haida ese do idia alaia mase totona. Unai be kara dika bada rohorohona!​—⁠2 Samuela 11:​12-17.

Oibe, dokonai, Davida ena kara dika dainai ta ese ia samania, bona ena kara ia gwauraia hedinarai. (2 Samuela 12:​7-12) Davida ena lalohisihisi, iena hegahusi dainai ia karaia karana ena dika ena bada ia lalo-pararalaia neganai, ia mamia lalohisihisi bona kerere ena metau be mani oi laloa toho. Ia be sibona ena manoka ia laloa dainai reana ia dara doko, badina ia be hebogahisi tauna. Reana ia laloa ia be anina lasi momokani!

To, karaharaga Davida ia gwau ia kerere, bona peroveta tauna Natana dekenai, ia gwau: “Lohiabada dekenai lau kara dika vadaeni.” (2 Samuela 12:13) Salamo 51 ena hereva amo Davida ena mamina ita diba, bona ita diba ia ese Iehova ia noia goadagoada do ia hagoevaia bona ena dika do ia gwauatao. Ia guriguri, ia gwau: “Egu dika mani do oi huria ore, bona egu kerere dekena amo lau do oi hagoevaia. Badina be egu kara dika be lau diba momokani. Lauegu kerere be egu vairana dekena ia noho nega ibounai.” (Salamo 51:​2, 3) Ia helalo-kerehai momokani dainai, iena hetura karana namona Iehova ida ia hagoadaia lou diba. Davida ese iena kerere ia lalohisihisi noho lasi bona ia laloa lasi ia be anina lasi. Ia ese mai ena manau ida Iehova ia hamaoroa ia kara dika, helalo-kerehai korikorina ia hahedinaraia, bona ena lalona ibounai ida Iehova ia noia ena dika do ia gwauatao, unai amo ia hahedinaraia iena lalo-hekwarahi be Iehova dekenai ia henia. Iehova ese ia lalo-namo henia lou.​—⁠Salamo 51:​7-12, 15-19.

Ta Ena Kara Koikoi Ia Haheaukalaia

Davida ese Salamo 55 ia torea ena badina be hari do ita herevalaia. Unai neganai ia lalohisihisi bada. Ia gwau: “Egu kudouna be gari dainai ia hisihisi noho. Mase ena gari be egu latanai ia ginidae vadaeni.” (Salamo 55:⁠4) Dahaka ese unai hisihisi ia havaraia? Davida ena natuna, Abesaloma, ia ura Davida ena pavapava dagina do ia henaoa. (2 Samuela 15:​1-6) Sibona ena natuna ese ia kara dika henia dainai Davida ia lalohisihisi, to iena lalohisihisi ia habadaia gauna be, iena sisiba tauna, ia abidadama henia bada tauna, Ahitopela, be Abesaloma ida idia gwaubou ia do idia alaia. Davida ese Salamo 55:​12-14 dekenai ia gwauraia tauna be Ahitopela. Idia gwaubou do idia alaia bona ena sisiba tauna namona ese ia ia kara koikoi henia dainai, Davida ese Ierusalema ia heautania. (2 Samuela 15:​13, 14) Unai ese ena lalona ia hahisia bada herea!

Ena be ia lalohisihisi bada bona ia daradoko, to unai ese iena abidadama Iehova dekenai ia hamanokaia lasi. Iehova ia noia ia idia ura alaia taudia edia palani do ia hadikaia. (2 Samuela 15:​30, 31) Ita itaia lou, Davida be ia helai kava lasi, ia naria lasi ela bona Iehova ese gaukara ibounai do ia karaia. To dala ia hegeregere neganai, gau ibounai ia karaia ia idia ura alaia taudia ia koudia toho. Ia ese ena sisiba tauna ma ta, Husai, ia siaia giroa lao Ierusalema dekenai, ia idia ura alaia taudia ia koidia totona. Ia gwau ia be idia ida ia gaukara, to gauna be ia be hehuni dalana ai edia palani hamanokaia totona ia lao. (2 Samuela 15:​32-34) Iehova ena heduru amo, unai palani ia guguru. Husai ese Abesaloma ena nega bada ia haorea, unai nega lalonai Davida ese iena taunimanima ia haboudia bona ia hegaegae diba, tuari totona.​—⁠2 Samuela 17:⁠14.

Davida ena mauri ibounai lalonai, Iehova ese ia naria, ia haheaukalaia, bona ena dika ia gwauatao karana be ia laloa bada momokani! (Salamo 34:​18, 19; 51:17) Davida dekenai unai bamona ia vara dainai, mai momokani ida ita ia hagoadaia, hekwakwanai ita davaria negadia ai Iehova do ita noia ita ia durua, ‘iseda laloa hekwarahi Iehova dekenai do ita henia.’​—⁠1 Petero 5:​6, 7 itaia.

Abidadama ida Iehova Tura Henia Karana Habadaia Bona Naria

Davida be Iehova ida ia hetura namo herea dainai, bona Davida be hedibagani bona hisihisi ia davaria neganai, Iehova ese ia hagoadaia. Edena bamona ita ese Iehova be unai bamona ita tura henia diba? Dalana be inai: Dirava ena Hereva, Baibel, ita stadilaia hanaihanai. Ita dekenai iena taravatu, iena hakaua herevadia, bona iena kara do ia hadibaia. (Salamo 19:​7-11) Dirava ena Hereva ita duahia bona ita laloa dobu neganai, ia kahirakahira dekenai do ita lao bona ia do ita abidadama henia momokani. (Salamo 143:​1-5) Iehova ese ita do ia hadibaia totona iseda tadikaka bona taihu ida ita hebou neganai, unai hetura karana ita hagoadaia. (Salamo 122:​1-4) Iseda kudouna amo Iehova ita guriguri henia neganai, iseda hetura karana ita ha-aukaia.​—⁠Salamo 55:⁠1.

Momokani, ita bamona, nega haida Davida ena hetura karana Iehova ida be ia goada momokani lasi neganai ia lalohisihisi. Haida ese ita idia hahisia dainai ita “kavakava” diba. (Hadibaia Tauna 7:⁠7) To Iehova ia itaia dahaka ia vara, bona iseda kudouna dekenai ia noho gauna ia diba. (Hadibaia Tauna 4:1; 5:⁠8) Namona be ita gaukara goada, iseda hetura karana Iehova ida do ia goada noho totona. Bena, herevana dahaka maduna ita huaia, ita diba momokani Iehova ese iseda maduna do ia haharagaia eiava goada do ia henia, do ita huaia totona. (Filipi 4:​6, 7, 13) Gau badana be Iehova kahirakahira dekenai do ita noho. Davida be unai bamona ia karaia neganai, ia noho namo.

Unai dainai, Davida ia gwau, herevana oiemu hekwakwanai be dahaka, hanaihanai emu lalo-hekwarahi be Iehova dekenai do oi henia. Bena inai gwauhamata ena anina do ita abia: “Ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.”​—⁠Salamo 55:⁠22.