Naria Namonamo Dika Oi Laloa Ma Ta be Ura Dikana ta Dainai Ia Kara

TELEVISEN dekenai ia haroro evanelia tauna ta be haroro tauna ma ta ia samania auka, sihari kava karana ia karaia dainai. To lagani ta ia orea lasi murinai, unai samani auka tauna idia davaria ariara hahine ta ida.

Sivarai ma ta be tanobada ena tano ta mai siahuna ese ena gwaukau taudia ia siaia idia tuari heheni tanodia rua dekenai, maino karaia totona. To ia karaia lalonai, unai bese be hunia dalana amo tuari kohu hoihoilaia taudia ia siaia tano ma haida dekenai, dola bilioni momo do ia abia tuari kohu hoihoilaia karana amo.

Unai bamona kara koikoi ia bada ia lao dainai, ita hoa lasi ta abidadama henia karana be ia ore bona laloa kerere karana ia bada, ani? Hari, hanaihanai taunimanima momo edia lalohadai be ma ta be ura dikana ta dainai ia kara.

To namona be ita Keristani taudia ita naria namonamo, abidadama tamona taudia huanai unai bamona lalohadai ese iseda tura heheni karana ia hadikaia garina. Ena be Iesu Keriso ena sisiba be iseda inai taudia huanai ita “aonega, gaigai bamona,” to ia gwau lasi ena murinai idia raka taudia korikoridia dekenai ita laloa kerere. (Mataio 10:16) Unai dainai, dahaka do ia vara bema hanaihanai oi laloa ma ta be ura dikana ta dainai ia kara? Edena negadia ai unai bamona lalohadai dekenai ita naria namonamo be gau badana? Bona edena dala ai tadikaka tura heheni karana namona ita naria diba?

Sisiba ta Sivarai Gunana Amo

Bema oi laloa ma ta be ura dikana dainai ia kara, to emu lalohadai be mai ena badina lasi, ia be hegeregere ma ta oi hahemaoro henia vadaeni. Ia be hegeregere, oi laloa edia hereva eiava edia kara be toana koikoina, ia be gau dikana ta hunia karana sibona. To Baibel ena sivarai Iosua karoa 22 ai ia hahedinaraia nega momo hekwakwanai havaraia gauna be iseda lalohadai kererena.

Israela taudia be Gwauhamata Tanona idia abia bona iduhu idauidau be edia tano ahuna idia abia vadaeni. Rubena iduhu, Gado iduhu, bona Manase iduhu kahana taudia ese Ioridane Sinavai ena badibadinai “boubou patana badana ta idia haginia.” Iduhu oredia idia laloa kerere, idia laloa tomadiho momokani dadaraia karana ta idia karaia. Idia laloa unai iduhu toi be pata badana do idia gaukaralaia boubou karaia totona, bona Iehova ia abia hidi tomadiho gabuna, palai dubuna Silo ai, do idia rakatania. Karaharaga samani hereva henia iduhu oredia idia hegaegae, do idia tuari henidia totona.​—Iosua 22:10-​12.

To aonega karana ta idia karaia, Pineha ia biagua gwaukau oreana ta idia siaia edia Israela tadikaka ida idia herevahereva totona. Samania herevadia, hegeregere idia be abidadama lasi, idia gwau-edeede, bona Iehova ena dala dadaraia karadia idia karaia herevadia idia kamonai murinai, toana be idia kerere iduhudia ese unai pata badana idia haginia ena badina korikorina idia hamaorolaidia. Unai pata be boubou patana ta lasi, idia gwau ia be “toa gauna sibona,” Israela iduhu ibounai be mai lalo-tamona ida Iehova idia tomadiho henia hahedinaraia gauna. (Iosua 22:26, 27) Unai orea idia giroa lou edia noho gabudia ai, idia diba edia tadikaka idia kara kerere lasi. Unai amo tuari bona rara bada herea bubua karana idia reaia.

Ita ia hadibaia, namona be ma ta be ura dikana ta dainai ia kara lalohadaina ita abia dae haraga lasi! Nega momo ita itaia haraga gaudia edia toana be idau, to ita itaia namonamo neganai edia toana be idau. Keristani tau o hahine edia mauri lalonai idia vara gaudia idauidau dekenai unai hereva be momokani.

Iseda Lalohadai Elda Taudia Dekenai

Elda taudia be “Dirava ena ekalesia” naria maduna idia huaia neganai, nega haida tadikaka haida do idia sisiba henia. (Kara 20:28) Hegeregere, dahaka do ita karaia bema elda tauna ese sisiba ia henia ita dekenai, iseda natuna be mai ena hebamo dikana, o mero be kekeni ida o kekeni be mero ida ia kara maoro lasi dainai? Do ita laloa ura dikana ta dainai sisiba ia henia, bona sibona dekenai do ita gwau, ‘Egu ruma bese ia ura lasi dainai ia karaia,’ a? Bema unai bamona lalohadai ita dadaraia lasi, gabeai do ita sori bada herea. Sisiba namona Baibel amo ita kamonaia be namo, badina bema ita dadaraia, reana iseda natudia be lauma dalanai do idia manoka.​—Aonega Herevadia 12:15.

Kongregesen elda ta ese ita ia sisiba henia neganai, namo lasi ita laloa ura dikana ta dainai ia kara. Namona be sibona ita tahua bema dala ta ia noho Baibel amo ia henia sisibana ita gaukaralaia. Aposetolo Paulo ia gwau: “Tamana ese metau bona hisihisi ita dekenai ia henia neganai, iseda lalona idia hisihisi bona ita be moale lasi. To gabeai, inai matakani ese idia ia hamaoromaoroa vadaeni taudia ese, kara maoromaoro ena davana namona, mai maino danu do idia davaria.” (Heberu 12:11) Unai dainai namona be unai gaudia ita abia dae mai moale ida bona ita laloa namonamo. Laloaboio lasi, nega momo elda taudia dekenai sisiba henia karana be auka, sisiba ita abia dae be auka hegeregerena.

Iseda Hemami Iseda Tamana Bona Sinana Dekenai

Memero bona kekeni haida be edia tamana bona sinana idia henia taravatudia idia laloa neganai, nega haida idia laloa ura dikana ta dainai idia haginia. Reana memero bona kekeni haida idia gwau: ‘Dahaka dainai egu tama sina be taravatu momo idia haginia? Idia ura lasi egu mauri lau moalelaia.’ To unai bamona lalohadai idia dogoatao lasi be namo, namona be matamata taudia ese edia tamana bona sinana edia kara idia laloa namonamo.

Tama sina be lagani momo lalodia edia natudia idia naria. Edia ura gaudia bona kohu idia reaia edia natudia durua totona. Badina ta ia noho, edia mero o kekeni badadia edia mauri hari do idia hadikaia totona, a? Oi laloa lalohadai maorona be lalokau dainai idia ura edia natudia idia naria bona ubua, a? Unai lalokau dainai taravatu haida idia haginia, mauri lalonai edia natudia be gau matamata idia mamia neganai kerere ta do idia karaia lasi totona, ani? Bema ta ia laloa ena lalokau tamana o sinana be ura dikana ta dainai ia kara, unai be hebogahisi lasi bona tanikiu henia lasi karana!​—Efeso 6:​1-3.

Iseda Lalohadai Iseda Keristani Tadikaka Dekenai

Taunimanima momo be ma haida idia hahemaoro henia haraga bamona bona idia laloa edia kara ibounai idia diba vadaeni. Edena bamona bema unai be iseda manoka gauna bona taunimanima haida ita abidadama henia haraga lasi? Tanobada taudia edia lalohadai do ita abia, a?

Unai hegeregerena, reana iseda Keristani tadikaka ta be mai ena ruma namona bona dava bada motukana. Maoromaoro do ita laloa ia be kohu ura dikadika tauna ta bona Basileia ia atoa guna lasi, a? Keristani taudia haida edia moni be hegeregere kohu namodia abia totona, to ena anina lasi be ura dikana ta idia hunia eiava Basileia idia “tahua guna” lasi. Reana lauma gaudia karaia totona idia bisi bada herea, bona mai edia hariharibada ida, to hunia dalana amo, edia moni bona kohu idia gaukaralaia Basileia durua totona.​—Mataio 6:​1-4, 33.

Keristani kongregesen ginigunana lalonai be taunimanima idauidau​—⁠ogogami taudia bona taga taudia idia noho. (Kara 17:34; 1 Timoteo 2:​3, 4; 6:​17; Iamesi 2:5) Dirava ese taunimanima be edia moni hegeregerena ai ia laloa lasi, bona namona be ita karaia lasi danu. Ita ese edia abidadama idia hahedinaraia vadaeni tadikaka ita lalokau henidia, bona ‘ibounai maka tamona dekenai do ita kara henidia.’​—1 Timoteo 5:​21.

Satani ena tanobada ai, taunimanima ma haida kota henia bona lalo-kerere haraga daladia be idauidau. Hegeregere, ta be hanua ta o gabu ta amo dainai, maoromaoro haida ese do idia gwauraia dagedage tauna, o kohu tahua goadagoada tauna. Ita Keristani taudia ita ura lasi unai tarapu lalonai ita moru. Iehova ena orea lalonai gabu ta ia noho lasi bese ta inai henia karana o taunimanima haida lalo-dika henia karana karaia totona. Keristani korikori taudia iboudiai ese Iehova Dirava idia tohotohoa be gau badana, “iena kota ia hagagevaia lasi, bona taunimanima ibounai be maka tamona dekenai ia kota henidia.”​—2 Sivarai 19:7; Kara 10:34, 35.

Namona be Lalokau ese Ia Doria

Baibel ia hahedinaraia goevagoeva “ita ibounai ita kara dika vadaeni, bona Dirava ena hairaina guba dekenai ita abia be hegeregere lasi.” (Roma 3:​23) Unai dainai iseda tadikaka ita laloa neganai, namona be ita laloa idia be mai edia lalo-tamona ida ita danu idia hekwarahi, Iehova dekenai hesiai gaukara namona idia henia totona. Bema idia ita abia dae momokani lasi o ita lalo-kerere dainai iseda Keristani tadikaka o taihu tura henia karana ia makohia, namona be Dirava ita noia ena heduru ita abia unai bamona lalohadai ita dadaraia bona Satani ena tarapu lalonai do ita moru lasi. (Mataio 6:​13) Satani ese Heva ia koia, bena ia laloa Iehova be ura dikana dainai ia kara, ia ese Heva ena namo ia tahua lasi, bona ia do idia hamoalea karadia ia taravatua. (Genese 3:​1-5) Bema ita laloa iseda tadikaka be ura dikana dainai kara ta idia karaia, unai ese Satani ena palani ia durua.​—2 Korinto 2:​11; 1 Petero 5:8.

Bema ita davaria hanaihanai ita laloa ura dikana ta dainai ma ta ia kara, namona be Iesu Keriso ena haheitalai ita laloa. Ena be ia be Dirava ena Natuna bona ia goevadae, to ena hahediba taudia dekenai ura dikana ta ia tahua lasi, Iesu be edia kara namo ia tahua. Iena hahediba taudia idia hepapahuahu, idia ta ta idia ura dagi badana idia abia dainai, to Iesu ia laloa lasi idia iboudiai idia dika dainai aposetolo matamatadia 12 ia abia be namo. (Mareko 9:​34, 35) Idia goevadae lasi dainai, reana tomadiho momokani idia dadaraia Iuda taudia edia kara, hekokoroku bona dagi laloa bada karadia, ese edia lalona idia veria. Iesu ia diba ia murinai idia raka taudia ia doria gauna badana be edia lalokau Iehova dekenai. Unai bamona lalokau idia hahedinaraia bona Iesu idia rakatania lasi dainai, ahuna namona idia abia.​—Luka 22:28-​30.

Bema iseda kamonai tadikaka ita itaia mai eda lalo-kerere ida, ia be hegeregere mata-galasi gagevana amo idia ita itaia. Toana korikorina ta do ita itaia diba lasi. Unai dainai lalokau mata-galasi amo idia ita itaia be namo. Kara maoromaoro Keristani tadikaka ese ita idia lalokau henia hamomokania gaudia be momo bona idia ita hebogahisi henia be namo. (1 Korinto 13:​4-8) Namona be idia dekenai lalokau bada ita hahedinaraia bona do ita laloa lasi ura dikana ta dainai idia kara.

[Picture on page 26]

Oiemu lalohadai Dirava idia tomadiho henia mai edia abidadama ida taudia dekenai be edena bamona?

[Picture on page 27]

Abidadama bona hemataurai heheni karana dainai, Iehova ena Witness taudia be ruma bese tamona taudia mai edia moale

‘Edia Tomadiho Ena Hahediba Karadia Idia Badinaia’

HAHINE ta Miami amo, Florida, U.S.A. dekenai, be inai revareva ia siaia iena gabu ena niuspepa ta dekenai: “Dec. 10 ai egu natuna mero ena paosi be hoihoi gabuna ta ai ena poketi amo idia henaoa. Ia lalonai be motuka taria ena laisens, ena Sekiuriti kadi, ma gau haida, bona $260 danu.

“Unai gabu biaguna tauna dekenai ia vara gauna ia herevalaia murinai, ia mai ruma dekenai. Adorahi kahanai, Spanish gado hahinena ta ese, telefon atoa hanai tauna ta ese gado hahanaia dalana amo, ia hamaoroa ia ese ena paosi ia davaria.

“Hahine ese ena adres ia henia. . . . Ia ese paosi ia henia, ena lalonai gau ta ia boio lasi, bona $260 idia noho danu.

“Hahine ese henaohenao tauna ia itaia paosi ia kokia bena ia boiboi. Henaohenao tauna ese paosi ia hamorua bena ia heau. Unai neganai lauegu natuna mero be ia raka siri vadaeni bona hahine ese ia itaia lasi, unai dainai paosi ia abia lao ruma bena ia rini mai.

“Ia bona ena ruma bese be Iehova ena Witness taudia. Idia edia tomadiho ena hahediba karadia be momokani idia badinaia.”

Iehova ena Witness taudia be koikoi lasi karana idia hahedinaraia lasi taunimanima ese do idia hanamodia totona. (Efeso 6:⁠7) Lasi, to idia ura dikadika edia guba Tamana, Iehova, idia hanamoa. (1 Korinto 10:31) Iehova bona edia dekena taudia idia lalokau henia dainai, Dirava ena Basileia “Sivarai Namona” idia harorolaia. (Mataio 24:14) Dirava ia gwauhamata unai Basileia amo tanobada be paradaiso mai hairaina ta ai do ia halaoa. Vadaeni tanobada be hairai gabuna ta sibona lasi to unuseniai kara goevagoeva bona koikoi lasi karadia do idia noho ela bona hanaihanai.​—⁠Heberu 13:18; 2 Petero 3:​13.