Gabu Dikana ai Edena Bamona Oi Noho Namo Diba?

“NEGA ibounai lau gari. Lifi lalonai lau gari. Egu motuka lalonai lau gari. Egu ruma lalonai lau gari. Gabu ibounai kara dika ia vara. Henaohenao be nega ibounai ia vara.” Hahine ta Brazil dekenai, ladana Maria, be unai bamona ia hereva. Ia hegeregerena, emu gabu dekenai oi gari, bona hanuaboi neganai emu gari be ia bada, a?

Pulisi taudia ese kara dika taudia idia tahua sivaraidia koikoidia be buka lalonai duahia karana be reana mai ena moale, to unai kara be idia vara momokani neganai moale be lasi. Reana kara dika tauna idia davaria diba lasi. Bona ala-ala ia vara neganai, anina be taunimanima ta ena adavana, o ena tamana o sinana, o ena natuna ese ia masetania. Emu gabu dekenai taunimanima hadikaia karadia idia bada idia lao, a? Oi ura bada kara dika be lasi gabuna ta do oi davaria, unuseniai emu ruma bese do umui noho namo diba, a? Eiava, bema gabu idauna ta be lasi dainai, emu natuna be kara dika momo ia vara gabuna ai oi naridia, dahaka do oi karaia diba do umui noho namo totona?

Momokani, siti haida idia do noho, unuseniai kara dika ia vara momo lasi. Tano momo lalodiai, taunimanima be gunika kahanai eiava hanua dekenai maino ai idia do noho namonamo. To taunimanima edia noho ia senisi haraga; guna idia gwauraia kara dika be lasi gabudia dekenai danu be unai bamona. Hegeregere, Brazil lalonai, lagani 50 idia lao vadaeni, taunimanima 10 10 amo 7 7 be gunika kahanai idia noho. Hari, taunimanima 10 10 amo 7 7 be siti lalodiai idia noho. Unuseniai idia be mai edia dala moni gaukarana do idia abia, to danu kara dika bona dagedage idia bada idia lao. Herevana oi be gabu dikana ai oi noho eiava lasi, to oi be emu gaukara gabuna dekenai do oi lao noho, o sikuli dekenai do oi lao noho, o emu ruma do oi rakatania, kara idauidau karaia totona.

Pulisi biaguna ta Rio de Janeiro dekenai ia gwau, ogogami taudia kara maoromaoro henia lasi karana bona raskol oreadia edia kara ese “gari bada” idia havaraia. Ma ia laloa niuspepa bona televisen ese gari idia havaraia danu, badina be “sivarai dikadia” idia halasia dainai. Drag ania loulou karana, ruma bese hapararaia karana, bona tomadiho herevadia kereredia hadibaia karana dainai danu, taravatu utua karana be ia bada ia lao. Bona nega vairai dahaka do ia vara? Dagedage karadia be buka lalodiai idia sivarailaia loulou bona TV ai idia hahedinaraia loulou, taunimanima hamoalea totona; unai dainai taunimanima ese ma haida do idia hebogahisi henidia lasi, a? Kara dika ia do vara lasi gabudia be gabu dikadia ai do idia lao, a?

Dagedage ia davaria tauna ia moale lasi, unai dainai ita ura bada do ita noho namo. Unai idia laloa momo taudia idia ura pulisi ma haida be dala ai do idia loaloa, bona kara dika taudia edia dibura negana do idia halataia eiava do idia hamasedia! Haida ese ipidi idia abia sibodia do idia naria totona, herevana idia diba reana unai amo kerere ia vara diba. Ma haida idia ura gavamani ese taravatu haida do idia atoa, ipidi hoia karana dekenai. Ena be sivarai dikana be kara dika ia bada ia lao, to namo lasi ita dara doko. Siti badadia, hegeregere Johannesburg, Mexico City, New York, Rio de Janeiro, bona São Paulo ai idia noho taudia momo be nega ta taunimanima ese edia gau idia henaoa lasi. Gabu dikadia ai idia noho taudia idia haheauka dalana be hari do ita herevalaia.

Emu Lalona Ia Goada Noho be Namo

Toretore tauna ta ese kara dika momo idia vara gabuna ta ia herevalaia, ia gwau: “Ena be edia noho be auka herea, to Brazil taudia tausen tausen be edia aonega bona edia haheauka dainai idia noho mai edia hemataurai bona mai edia maoromaoro ida.” Lagani 38 lalonai Rio de Janeiro ai ia noho tauna ta ladana Jorge, ia gwau: “Dala bona gabu haida dekenai lau lao lasi bona dala ai idia karaia karadia laloa karana ena toana be lau hahedinaraia lasi. Hanuaboi momokani ai, dala dekenai lau loaloa lasi bona gari bada toana lau hahedinaraia lasi. Ena be lau naria namonamo, to taunimanima lau kara henidia mai egu hemataurai ida, hegeregere idia be kara maoromaoro taudia bamona.”

Oibe, gau dikadia amo oi siri. Haida edia kara lalodiai oi vareai lasi. Inai oi laloa maragi lasi: Gari bada dainai taunimanima idia kara kava diba, kara namo taudia danu. Tau ta ladana Odair be ena gaukara, gabu dikadia lalonai, ia herevalaia, ia gwau: “Gau namodia lau laloa toho, bona do idia vara diba karadia dikadia be lau laloa loulou lasi, badina unai ese gari kava ia havaraia diba. Taunimanima iboudiai lau matauraia toho.” Ia naria namonamo bona ia daradaralaia taudia kahirakahira dekenai ia lao lasi, bona ena lalona do ia biagua totona ia durua gauna ma ta ia gwauraia, ia gwau: “Gau badana be, Iehova Dirava lau abidadama henia; lau laloatao gau iboudiai ia itaia bona ia koua lasi gaudia sibodia mo idia vara diba.”

To, ta ia ura lasi nega ibounai ia gari noho. Bona, daika do ia gwau gari bada bona lalo-hekwarahi ese iseda lalona bona iseda tauanina idia hamanokaia diba lasi? Unai dainai, ta ese do ia hadikadia garina idia gari taudia ese gau namona ta idia naria diba, a? Taunimanima momo idia laloa nega vairai kara dika do ia bada momokani dainai, dagedage ena dokona be do ita itaia, a? Oi ai noia hereva gabena do oi duahia; ena sinado be “Edena Negai Gari Do Ia Ore?”

Edena Negai Gari Do Ia Ore?

NOHO namo dalana korikorina be lagani 2,000 gunanai ia noho tauna ta ese ia herevalaia; unai oi hoalaia a? Iesu Keriso ese parabole ta amo ia hahedinaraia lalokau be gau badana; ia gwau: “Tau ta Ierusalema dekena amo Ieriko dekenai ia lao neganai henaoa taudia haida ese idia davaria. Vadaeni iena dabua idia dadia, idia botaia, kahirakahira ia mase, vadaeni idia rakatania.” Ena be dala ai idia raka taudia rua ese dika ia davaria tauna idia durua lasi, to Samaria tauna mai ena hebogahisi ese ia durua. To, hari inai negai, daika ese dika idia davaria taudia ia durua? Nega vairai dahaka ese iseda gari do ia haorea?​—⁠Luka 10:​30-37.

Taunimanima momo idia gwau Dirava idia abidadama henia, to idia laloa namona be taunimanima ese taravatu idia ha-aukaia. To bema dibura negadia do idia halataia eiava pulisi taudia ma haida do idia abia bona edia pei do ia habadaia, unai ese raskol edia dagedage karadia do idia hadokoa, a? Ena be taravatu ha-aukaia oreadia be mai edia momokani ida idia gaukara goada taunimanima naria totona, to oi laloa idia ese drag ania kava karana, raskol oreadia, bona ogogami do idia haorea vaitani, a? To, ia totona ita hitolo bona ita ranu mase gauna, kara maoromaoro unai, be ita abia diba.​—⁠Mataio 5:⁠6.

Salamo 46:1 ia gwau: “Dirava be iseda heau mauri gabuna, bona ia ese ita dekenai goada ia henia. Iseda nega dika negadia ibounai ita dekenai ia noho, ita do ia durua totona.” Do ita davaria unai be hereva namona sibona mo lasi.

Oi diba, dina dina iboudiai niuspepa, reidio, bona TV ese ala-ala sivaraidia idia halasia; unai ala-ala be tano tamona taudia idia tuari heheni dainai bona dagedage taudia edia kara dainai idia vara. Tano haida lalonai, ruma lasi memerodia bona kekenidia eiava taravatu utua karana ta idia uitnesilaia taudia be vaia idia hamasedia kava. Dahaka dainai taunimanima ese mauri be anina maragina gauna ai idia halaoa? Ena be reana unai dagedage karadia be mai edia badina idauidau, to edia badina tamona do ita laloa be namo.

Dirava ena Hereva, Baibel, ia gwau: “Satani ese tanobada taudia ibounai ia gunalaia noho.” (1 Ioane 5:19) Iesu Keriso ia gwau Satani Diabolo be koikoi tauna sibona lasi to ia be “alaia tauna” danu. (Ioane 8:44) Inai lauma tauna mai ena siahu bada ese dala idauidau amo taunimanima edia lalodia ia ania, bona hari inai negai idia vara dagedage karadia be ia ese ia durua. Apokalupo 12:12 ia gwau: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” To moale sivaraina be inai: Inai nega dikana ena gabu ai ‘guba matamata bona tanobada matamata do idia vara. . . . Unai gabu dekenai be kara maoromaoro sibona do ia noho.’​—⁠2 Petero 3:13.

Unai be helaro namona, tanobada matamatana ita naria diba; to harihari dahaka heduru ita abia diba?

Unai ena haere namona ita do herevalaia lasi neganai, namona be inai ita laloatao: Kara dika be Keristani korikori taudia dekenai do ia vara lasi gwauhamatana ta be lasi. Aposetolo Paulo ese ia davaria gaudia dikadia ia herevalaia. Ia gwau: “Sinavai abata edia lalonai kahirakahira lau mase. Henaoa taudia ese lau idia hadikaia. Lauegu bese taudia ese lau idia hadikaia. Idau bese taudia danu lau idia hadikaia. Hanua lalonai lau be dika, bona taunimanima idia noho lasi gabudia dekenai lau be dika. Davara bada dekenai lau dika.” (2 Korinto 11:⁠26) To Paulo be unai dika amo ia roho mauri. Hari inai nega be hegeregere; bema ita naria namonamo, iseda gaukara idauidau be vaia ita karaia diba. Mani ita ese heduru karadia haida do ita herevalaia.

Bema ta be gabu dikana ta ai ia noho, kara namo ese ia gimaia diba, badina be taunimanima ese ma haida edia kara idia itaia namonamo. Ena be dadidadi taudia ese edia kara dika idia palania bona idia karaia, to idia momo idia laloa idia be taunimanima oredia hegeregeredia. Edia kara oi maumauraia lasi, bona dahaka dahaka idia karaia be oi dibaia toho lasi. Bena, reana oiemu kara ena davana be oi do idia henia toho lasi. Mani oi laloatao, henaohenao taudia be inai idia dibaia toho: Daika ese gau matamatana ta ia hoia eiava daidia be edia ruma do idia rakatania, gabu idauna ta ai do idia laga-ani totona. Unai dainai oi laloa namonamo, emu kara haida be taunimanima oi hadibaia neganai.

Iehova ena Witness taudia momo idia davaria, taunimanima idia diba idia be haroro taudia neganai, unai ese ia gimadia. Nega momo raskol ese idia hahedinaraia unai bamona Keristani taudia, sibodia idia henia hanua taudia iboudiai durua totona taudia, idia matauraia. Iehova ena Witness taudia be ala-ala taudia lasi eiava henaohenao taudia lasi, bona ‘haida edia kara idia herevalaia kerere’ lasi, unai dainai taunimanima idia diba do idia hadikadia lasi.​—⁠1 Petero 4:15.

Noho Namo Dirava Ena Tanobada Matamatana Lalonai

Iesu Keriso ia peroveta “kara dikadia danu do idia vara gabu idauidau dekenai.” Unai gau ita lalohisihisilaia, to namo lasi idia dainai iseda lalona idia hekwarahi bada, to namona be Dirava ita abidadama henia; nega daudau lasi inai nega dikana do ia haorea vaitani. Iesu ese “Basileia ena Sivarai Namona” be tanobada hegegemadai harorolaia gaukarana ia perovetalaia, to danu ia murinai idia raka taudia ia hamaoroa, ia gwau: “Iena lalona do ia goada noho ela bona dokona, unai tauna be do ia mauri.”​—⁠Mataio 24:​12-14.

Ita diba momokani, henaohenao taudia, nega haida mai edia dagedage bada ida idia henaohenao taudia, be do idia haoredia vaitani. Aonega Herevadia 22:​22, 23 ia gwau: “Ogogami taudia dekena amo do oi henaoa lasi, badina idia be ogogami, bona gau lasi taudia be kota lalonai, do oi hadikadia ore lasi. Badina be Lohiabada ese edia kota hereva do ia durua, bona edia kohu ia henaoa tauna do ia alaia mase.” Iehova ese kara dika taudia, hegeregere henaohenao taudia, ala-ala taudia, bona kara bodaga taudia, do ia haoredia vaitani. Bona, idia hadikaia taudia do ia laloaboio lasi. Idia edia amo idia boio gaudia be do ia henidia lou bona edia tauanina do ia hanamoa lou vaitani.

Momokani, ‘kara dika idia rakatania bena kara namo idia karaia’ taudia ese mauri hanaihanai do idia abia; ia mai noho hisihisina badana amo do idia roho mauri dalana amo eiava mase amo hatorea isi lou karana amo. “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:​27-29) Iesu ena boubou, taunimanima edia mauri davalaia boubouna, dainai, unai hahenamo do idia abia diba. (Ioane 3:⁠16) To do ia vara lou Paradaisona lalonai taunimanima edia noho be edena bamona?

Dirava ena Basileia henunai taunimanima ese edia noho do idia moalelaia. Iehova ia gwau: “Dirava ena taudia be do idia laloa hekwarahi lasi, bona mai hadikaia gauna ta lasi do idia noho.” (Isaia 32:18) Mauri hanaihanai do idia abia taudia iboudiai be edia kara bona edia lalohadai do idia hamaoromaoroa vadaeni. Taunimanima ta do ia kara dika lasi eiava do ia kara gagevagageva lasi, bona ta ese dika do ia davaria lasi. Peroveta tauna Mika ia gwau: “Taunimanima ta ta ibounai, be maino dekenai do idia noho. Ta ta ese sibona edia vain uma bona fig audia, be do idia naria noho, bona tau ta ese idia do ia hagaria lasi.” (Mika 4:4; Esekiela 34:⁠28) Unai be idau vaitani, hari idia noho gabudia dikadia hegeregerena lasi!