Moale Ia Havaraia Ruma Bese Stadi

“Inai tau ena diba dainai, ruma ena daiutu be davana bada kohu, bona gau namodia dekenai ia hahonua noho.” (Aonega Herevadia 24:4) Unai dava bada kohu be tauanina gaudia sibona lasi to idia be lalokau korikorina, Dirava gari henia karana, bona abidadama goadana. Unai bamona kara ese ruma bese ena mauri dalana ia hanamoa. (Aonega Herevadia 15:​16, 17; 1 Petero 1:7) To unai bamona kohu ita abia totona, Dirava ena diba do ita abia vareai iseda ruma bese lalonai.

RUMA bese taudia dekenai unai diba do ia hadibaia be ruma bese kwarana ena maduna. (Deuteronomi 6:​6, 7; Efeso 5:​25, 26; 6:4) Unai karaia dalana namona ta be ruma bese stadi karana amo. Idia helai vareai taudia totona ia be namo herea bema stadi karaia dalana amo diba bona moale idia abia! Vadaeni, mani ita ese ruma bese stadi karaia namonamo daladia haida ita kikilaia.a

Ruma bese stadi be namo do ia havaraia bema hanaihanai umui karaia. Bema palani umui karaia lasi eiava umui karaia dinana ta umui abia hidi lasi, toana be nega ta ta sibona do umui stadi. Unai dainai stadi totona nega do umui hoia. (Efeso 5:​15-17) Ibounai dekenai ia hegeregere nega ta davaria totona be auka. Ruma bese kwarana ta ia gwau: “Emai ruma bese stadi be hanaihanai ai karaia be auka. Nega idauidau ai tohodia ela bona ai moalelaia negana ta ai davaria adorahi kahana ai. Hari emai ruma bese stadi ai karaia hanaihanai.”

Nega namona umui davaria neganai, umui naria namonamo gau haida ese emui stadi negana ia hadikaia garina. Maria,b hari ena lagani be 33, ia gwau: “Ai stadi lalonai vadivadi taudia idia mai neganai, Papa ese ia noidia do idia naria ela bona stadi ai haorea. Bona haida idia rini neganai, ia hamaorodia gabeai do ia rini henidia.”

To, namo lasi umui laloa unai stadi negana do umui haidaua diba lasi. Lasi, reana dika ta eiava umui diba lasi gauna ta ia vara neganai, stadi umui karaia lasi eiava umui atoa lao ma dina ta ai umui karaia be namo. (Hadibaia Tauna 9:11) To namona be umui naria namonamo unai gaudia ese umui abia hidi sediual idia hadikaia lasi.​—Filipi 3:16.

Stadi ena lata be edena bamona? Robert, mai kwalimu ida ena natuna kekeni bona mero ia naridia, ia gwau: “Emai stadi be hora tamona lalonai ai karaia. Natudia be do maragi neganai, gau idauidau ai stadilaia edia lalona ai veria totona, hegeregere paragraf haida Gima Kohorona ena stadi herevana amo, Baibel ena siri haida, bona buka ma haida ena kahana ta ta ai stadilaia danu.” Maria ia gwau: “Lau bona egu taihudia rua be maragi momokani neganai, emai stadi be miniti 20 lalonai ai karaia nega rua eiava toi wiki ta lalonai. Ai bada ai lao neganai, emai ruma bese ena wiki ta ta ena stadi be hora tamona bamona lalonai ai karaia.”

Dahaka Do Ai Stadilaia?

Stadi totona ibounai umui helai hebou neganai, unai henanadai umui laloa ese hesiku ia havaraia diba bona stadi negana do umui haorea kava. Bema unai bamona ia vara neganai, natudia be stadi negana do idia laloa bada lasi bona daudau lasi murinai edia ura do ia boio. Unai dainai stadi umui do karaia lasi neganai, Society ena buka ta umui abia hidi stadi totona.

“Hesiai tauna mai ena kamonai, bona mai ena kara maoromaoro” ese ia karaia buka momo herea amo ta umui abia hidi diba. (Mataio 24:​45-47) Reana emu ruma bese ese ia do stadilaia lasi bukana ta umui gaukaralaia diba. Bona bema Insight on the Scriptures be emui gado ai, umui abia hidi kahana ta umui duahia be moale gauna momokani! Hegeregere, Memorial be kahirakahira neganai wiki haida lalonai Lohiabada Ena Anibou ena hereva umui riviulaia diba. Ruma bese momo idia moale wiki ena Gima Kohorona stadi idia hegaegaelaia totona. To Gima Kohorona ena murina kahanai idia noho hereva danu be stadi gaudia namodia. Ruma bese kwarana, ena bese ena lauma dalanai ia dabu gauna ia diba tauna, ese edena buka do idia stadilaia ia abia hidi diba.

Maria ia gwau: “Hanaihanai, emai stadi ai do karaia lasi neganai, dina haida gunanai buka ta ai abia hidi ai stadilaia totona. To bema henanadai ta ia vara eiava sikuli dekenai gau ta ia vara, vadaeni unai gaudia idia kikilaia herevana ai stadilaia.” Mai anina bada hekwakwanai, hegeregere sikuli dekenai matamata taudia ese idia davaria hekwakwanai, memero kekeni idia hetura karana, sikuli murinai karaia gaudia, bona ma haida idia vara danu. Unai ia vara neganai, unai hekwakwanai idia kikilaia magasin eiava buka umui stadilaia. Bema umui ura Gima Kohorona eiava Awake! lalonai umui itaia herevana be maoromaoro emu ruma bese ida do umui stadilaia, umui naria lasi unai umui hegaegaelaia totona. Oibe, namona be umui emu ruma bese taudia dekenai unai haidaua karana do umui hadibaia. To unai gauna umui stadilaia murinai, namona be guna umui abia hidi bukana dekenai umui giroa lou.

Stadi Negana be Maino Negana

Maino negadia ai taunimanima ese idia dibaia noho gauna idia abia haraga diba. (Iamesi 3:18) Unai dainai laga-ani negana namona mai hemataurai ida do umui havaraia. United States dekenai, ruma bese kwarana ta ia gwau: “Herevana ai be ruma lalonai ai helai eiava dehe dekenai ai stadi, ibounai be kahirakahira do idia helai, namo lasi daudau gabudia ai idia helai. Ai totona, unai be hemami namona ia havaraia.” Bona Maria be mai moale ida ia gwau: “Lau bona egu taihudia be gwaumaoro idia henia edena gabu ruma lalonai do ai abia hidi stadi totona. Unai ese emai mamina ia hanamoa.” Laloatao danu, laiti namona, helai gaudia namodia, bona moale bona gau momo idia hekure kava lasi gabuna be stadi gabuna namona. Stadi murinai aniani gaudia maragidia umui ania hebou karana ese moale ia havaraia.

Ruma bese haida be nega haida ruma bese ma ta idia boiria mai edia stadi lalonai idia helai totona, unai ese stadi ia hanamoa bona haere idauidau idia kamonai. Hereva momokani lalonai idia vareai matamata taudia idia boiridia neganai, idia ese manada ruma bese kwarana ena ruma bese stadi karaia dalana idia itaia amo namo idia davaria.

Baibel Ena Sivarai Oi Hamauria Bamona

Natudia totona stadi negadia oi hamauria bamona, unai amo stadi negana do idia ura henia. Natudia maragidia oi hagoadaia Baibel ena sivarai ena laulau idia torea karana amo unai oi karaia diba. Bema dala ia noho, natudia be Baibel ena sivarai idia haheitalaia diba, drama amo. Natudia maragidia ida henanadai bona haere dalana sibona umui gaukaralaia lasi. Baibel ese ia herevalaia taudia edia sivarai umui duahia eiava umui kikilaia be Dirava ena taravatu umui hadibadia dalana namona ta. Guna ai herevalaia tauna, Robert, be ia gwau: “Nega haida Baibel ena sivarai ta ai duahia, ta ta ena nega ena nega ai ‘gadona’ idauna ai duahia.” Natudia ese edena Baibel tauna ena hereva idia ura duahia idia abia hidi diba.

Mapu bona haheitalai gaudia haida gaukaralaia karana ese natudia do idia durua umui kikilaia Baibel sivaraina ena gabu bona ena toana idia diba totona. Momokani, dala idauidau amo, ruma bese stadi be ia mauri bamona bona mai moale ida umui karaia diba. Bona natudia be Dirava ena Hereva dibaia urana do idia manadalaia.​—1 Petero 2:​2, 3.

Ibounai Durua Stadi Lalonai Idia Haere Totona

Natudia ese stadi idia moalelaia totona, namona be idia danu kara ta do idia karaia. Stadi lalonai lagani idauidau natudia oi durudia gau ta do idia karaia totona be auka. To Baibel ena hakaua hereva ta ia gwau: “Daika ese gaukara ia naria, be iena gaukara do ia karaia mai goada danu.” (Roma 12:8) Bema stadi oi ura henia bada, unai ese ma haida ia hagoadaia.

Ronald ese iena natuna kekeni, Dina, ena mauri lagani be ima ia abia hidi idia stadilaia gauna ena hereva kwaradia maragidia ia duahia bona laulau ia herevalaidia totona. Vanegai lagani Keriso ena mase ena Anibou ia mai kahirakahira neganai, ia ese Tau Hereadaenac bukana lalonai idia noho laulau namodia ia gaukaralaia. Ia gwau: “Unai ese ia durua Anibou ena anina ia lalo-pararalaia totona.”

Iena natuna kekenina, Misha, ena mauri lagani be 10 ida, ia ese ma kara ta ia karaia. Ronald ia gwau: “Misha be hari laulau ia lalo-pararalaidia sibona lasi to edia anina danu ia lalo-pararalaia. Unai dainai Apokalupo​—Ena Hagugurua Negana Ia Kahirakahira!* bukana ai stadilaia neganai, ena laulau edia anina ai herevalaia momo bona unai ese ia durua.”

Natudia be uhau bona ulato ai idia lao neganai, oi nanadaidia edia mauri lalonai umui stadilaia gauna be edena bamona idia gaukaralaia diba. Bema stadi lalonai henanadai haida idia vara, kahana ta ta oi henidia idia tahua totona. Robert ese unai ia karaia iena natuna merona, Paul, ena mauri lagani be 12, ese sikuli dekenai Dungeons and Dragons kompiuta gadara ena klab matamatana ia henanadailaia neganai. Paul bona ruma bese taudia ma haida ese Watchtower Publications Index amo hereva haida idia tahua, bena edia ruma bese stadi dekenai idia kikilaia. Robert ia gwau: “Unai kara dainai, Paul ia lalo-parara haraga unai kompiuta gadara be Keristani taudia totona lasi.”

Robert ese tahua gaukara be nega ma haida ai ia henidia danu. Iena adavana, Nancy, ia gwau: “Iesu ena aposetolo taudia edia sivarai ai tahua neganai, pura ta lalonai ai ta ta be aposetolo ta ai herevalaia. Ruma bese stadi dekenai natudia be mai edia lalona ibounai ida edia ripoti idia henia neganai, ai moale bada!” Sibodia edia tahua gaukara idia karaia bona idia davaria gaudia be ruma bese taudia ida idia herevalaia karana ese natudia ia durudia Iehova ‘ena vairana dekenai idia tubu namonamo’ totona.​—1 Samuela 2:​20, 21.

Henanadai oi henidia​—edia lalohadai idia gwauraia bona haere maorona dekenai oi hakaudia lao totona​—unai be dala namona danu natudia edia lalona veria bona stadi lalonai idia haere totona. Hadibaia Tauna Badana, Iesu, ese taunimanima edia lalohadai idia gwauraia hedinaraia henanadai ia henia danu, hegeregere, “Dahaka oi laloa?” (Mataio 17:25) Maria ia gwau: “Ai ta be mai emai henanadai neganai, emai tama sina be maoromaoro haere idia henia lasi. Idia ese henanadai idia henia ai dekenai, haere maorona ena anina ai laloa namonamo totona.”

Herevahereva​—Habadua Lasi!

Ruma bese stadi lalonai moale umui davaria diba bema idia helai taudia ibounai ese edia lalohadai bona hemami idia gwauraia hedinarai diba bona ta ese do ia hevasehalaia lasi. To tamana ta ia gwau: “Ruma bese stadi lalonai herevahereva karana do ia namo dalana tamona be bema nega ma haida ai herevahereva dalana ia kehoa noho danu. Stadi negana sibona dekenai toana sibona umui hahedinaraia be hegeregere lasi.” Namona be umui naria namonamo, ta ena lalona hahisia herevana umui hereva lasi, hegeregere: ‘Unai sibona, a? Lau laloa ia be mai anina bada gauna’; ‘Unai be kavakava herevana’; ‘Be, dahaka oi laloa? Oi be natuna maragina sibona.’ (Aonega Herevadia 12:18) Namona be emui natudia umui kara henidia mai hebogahisi danu. (Salamo 103:13; Malaki 3:17) Umui moalelaidia, bona idia hekwarahi idia dibaia gaudia idia badinaia neganai, namona be umui durudia.

Ruma bese stadi umui karaia neganai, namona be ia be nega namona natuna be ena lalona dekenai hadibaia herevadia ia abia vareai totona. Natudia hani ia naridia namonamo tama ta ia gwau: “Natudia edia kerere umui hamaoromaoroa matamaia neganai, natudia do idia ura lasi idia kamonai.” Unai bamona ia vara neganai, umui stadilaia herevadia be edia kudouna dekenai do idia vareai lasi. Unai dainai stadi negadia be hahemaoro bona panisi negadia ai umui halaodia lasi. Bema ta umui sisiba henia be maoro, namona be gabeai ia sibona umui hereva henia.

Emui Hekwarahi ese Anina Namona Do Ia Havaraia

Lauma dalanai ia goada ruma besena havaraia totona, nega do umui atoa bona umui hekwarahi bada. To Salamo torea tauna ia gwau: “Kamonai! Iseda natudia be Dirava ena harihari gauna ita dekenai. Dirava ese ita dekenai ia henidia, bona idia ese ita idia hanamoa noho.” (Salamo 127:3) Bona tama sina be mai edia maduna ‘Lohiabada ena hadibaia hereva [natudia] dekenai do idia hadibaia.’ (Efeso 6:4) Unai dainai namo bona moale do ia havaraia ruma bese stadi karaia dalana namona do umui badinaia. Umui hekwarahi bada Dirava ena hereva ‘ena rata goevana’ umui henidia totona, unai amo emui natudia be ‘hahemauri do idia davaria.’​—1 Petero 2:2; Ioane 17:3.

[Footnotes]