Keristen Heboudia Oi Lao Henidia be Namo

HUA momo ai, Rosario, South America ai ia noho hahinena, be Elizabeth ida Baibel idia stadilaia. Dirava ena Basileia bona tanobada ai Paradaiso do ia havaraia dalana ia dibaia neganai, Rosario ia moale. To, Elizabeth ese ia boiria Kingdom Hall do ia lao neganai, ia ura lasi. Ia laloa Keristen heboudia do ia lao be herevana, ena ruma ai Baibel ia stadilaia bona ena hereva ia badinaia diba ia gwau. Oi daradara, Keristen heboudia ese oi idia durua momokania eiava, a? Dahaka dainai Dirava ese ena orea taudia edia hebou dalana ia karaia?

Keristen taudia ginigunadia idia idau vaitani, idia bogaragidiai idia noho taudia hegeregeredia lasi, unai dainai dala maorona ai idia hebamo heheni be gau badana, do idia kwalimu totona. Aposetolo Paulo ese kongregesen ta ia tore henia, ia gwau: “Umui be kerere ta lasi, . . . inai tanobada taudia mai edia dika bona mai edia kerere bada danu edia huanai.” (Filipi 2:15) Keristen taudia Iudea ai idia hekwarahi bada be Paulo ese ia tore henidia, ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi haida ese idia hadokoa bamona. To umui ta ta emui ekalesia varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.”​—Heberu 10:​24, 25.

Keristen Taudia Idia “Segea” Heheni Dalana

Greek gado herevana Paulo ese ia torea be Motu gado ai idia hahanaia neganai, “durua” idia torea. To unai hereva ena anina korikorina be “segea.” Baibel ese ia hahedinaraia Keristen taudia be edena bamona idia “segea” heheni; ia gwau: “Auri ese auri ia segea. Unai hegeregerena tau ta ese ma tau ta ena vairana ia segea.” (Hereva Lada-isidia 27:17; Kohelete 10:10) Ita be kaia, idia segea loulou be namo gaudia, hegeregeredia. Iehova ita lalokau henia bona iseda abidadama hegeregerena iseda lalodia ita hadaidia dainai, anina be ita be tanobada hegeregerena lasi, bona taunimanima hutuma ese idia badinaia dalana be ita badinaia lasi.

Nega ibounai ita hekwarahi do ita idau totona; unai ese iseda ura, kara namo goadalaia urana, ia haburua diba. To Iehova idia lalokau henia taudia ida ita hebou negadiai, ita segea heheni​—ita heduru heheni, lalokau bona kara namodia do ita havaradia totona. To siboda ita noho negadiai, vaia siboda eda ura ita tahua bona kara mirodia eiava kara kava ita lalodia reana. “Sibona do ia noho totona taunimanima ia rakatanidia tauna ese sibona ena ura do ia tahua; lalohadai namodia iboudiai do ia inai henidia.” (Hereva Lada-isidia 18:1) Unai dainai Paulo ia gwau: “Umui ta ta dekenai goada do umui henia, bona durua umui henia, harihari umui karaia noho bamona.”​—1 Tesalonika 5:11.

Rosario ese Baibel ena hereva badadia ia stadilaidia ore neganai, ia do ura lasi kongregesen heboudia do ia lao. Elizabeth ese heduru ma haida ia henia diba lasi dainai, ia vadivadi henia lou lasi. Hua haida murinai sekit naria tauna ese Rosario ia vadivadi henia, ia nanadaia, ia gwau: “Ena be ruma bese taudia ta ta be aniani rumadia ai aniani namodia idia ania, to sibodia edia ruma ai idia aniani hebou lasi dainai, dahaka idia reaia?” Rosario ia gwau: “Ruma bese taudia edia hebamo.” Ia lalo-parara unai, bena hebou ia lao henidia matamaia. Edia heduru ia moalelaia dainai, unai nega amo ema hebou kahirakahira iboudiai ia lao henidia.

Oi bona ma haida ese umui abia dae herevadia be idia gwauraidia neganai bema oi kamonai, bona edia abidadama ese edia noho ia haidaua dalana bema oi itaia, unai ese oi ia hagoadaia. Paulo ese unai ia hamomokania. Kongregesen Roma ai ia tore henia, ia gwau: “Lau ura bada umui lau itaia gwauraia, bona umui dekenai Lauma Helaga ena hanamoa do lau henia, vadaeni Lauma ena goada do umui abia. . . . Lau ura umui emui abidadama ese ia durua lau, bona lauegu abidadama ese ia durua umui. Inai bamona be goada ita abia nega tamona.” (Roma 1:​11, 12) Unai neganai Paulo be dala lasi do ia lao Roma, to lagani haida murinai ia lao neganai ia be dibura tauna. To tadikaka Roma amo be kilomita 60 idia raka ia ida do idia hedavari totona be ia itadia neganai, “Dirava dekenai ia tanikiu henia bona lalona dekenai goada ia abia.”​—Kara 28:15.

Nega Dikadia ai Lauma Anianina Davaria Gabuna

Roma ai dibura ai ia noho neganai, Paulo ese Heberu taudia ia tore henidia, ia hamaorodia edia hebou karana do idia hadokoa lasi be namo. Ma ia gwau: “Inai kara do umui habadaia be namo. Badina be Lohiabada ena Dina be kahirakahira do ia ginidae.” (Heberu 10:25) Unai be mai anina ita edai danu. Iehova ena Witness taudia be Baibel amo idia hahedinaraia, lagani 1914 be inai tanobada ena dokona negana ena matamana, bona hahemaoro bona Dirava idia badinaia lasi taudia haoredia dinana be kahirakahira. (2 Petero 3:7) Baibel ia gwau, dokona negana ena matamanai Diabolo be guba amo idia negea diho tanobada ai neganai, ia badu dikadika bena “hahine ena natuna oredia . . . ia tuari henia . . . Idia ese Dirava ena taravatu idia badinaia momokani. Bona Iesu ena hereva momokani idia gwauraia hedinarai.” (Apokalupo 12:​7-17) Unai dainai, hari, Dirava ena taravatu ita badinaia be auka; abidadama taudia ida ita hebou momo be gau badana. Hebou ese ita do idia durua, iseda abidadama do ita hagoadaia bona Iehova do ita lalokau henia bada totona, bena Diabolo ena hedibagani do ita koua diba.

Dirava lalokau henia karana bona abidadama be ruma bamona lasi, taunimanima ese idia haginidia bena gabunai idia noho. To idia be mauri gaudia bamona; bema haida ese idia ubudia hanaihanai, metairametaira idia bada idia lao, to bema idia ubudia lasi, idia varoda-varoda bena idia mase. Unai dainai Iehova ese lauma anianina na iena orea taudia ia henidia loulou hagoadadia totona. Ita ibounai ita abia be namo, to bema Dirava ena orea bona ena hebou amo ita abia lasi, edeseniai do ita abia? Gabu ta be lasi.​—Deuteronomi 32:2; Mataio 4:4; 5:3.

Iesu ese Keristen kongregesen ia ubua dalana ita diba totona, iena henanadai ita laloa be namo. Ia gwau: “Hesiai tauna mai ena kamonai bona mai ena kara maoromaoro, ena biaguna ese ia abia hidi, ena ruma do ia naria, bona aniani neganai edia aniani do ia henia, tauna be daika? Ena biaguna do ia mai neganai do ia davaria, unai bamona ia karaia noho tauna be ia namo.” (Mataio 24:​45, 46) Aposetolo edia negai, Iesu ese daika ia abia hidi iena orea taudia ubudia totona, bona ia lou mai mai ena Basileia siahuna ida neganai, daika ia davaria ia ubudia noho? Tau tamona be unai lagani 1,900 bamona ai ia noho lasi. Unai dainai unai hesiai tauna be horoa Keristen taudia edia ekalesia. Unai hegeregerena, idaunegai Israel besena be Dirava ena hesiai tauna. (Isaia 43:10) Oibe, Dirava ena lauma ese ia horodia Keristen taudia edia orea amo Iesu ese eda lauma anianina ita ia henia, bona Iehova ena Witness taudia edia kongregesen amo idia hariharilaia.

Iesu ese lauma anianina ia henia dalana be Paulo ese ia gwauraia, ia gwau: “ ‘Atai dekenai ia daekau lao neganai . . . harihari gaudia taunimanima dekenai ia henia.’ . . . Haida dekenai be aposetolo dagi ia henia, haida dekenai be peroveta dagi ia henia, haida be evanelia gaukara taudia, haida be haroro taudia, haida be hadibaia taudia. Inai bamona harihari gaudia ia henia, be Dirava ena taudia ibounai do ia durua totona. Dirava ena hesiai gaukara do idia karaia namonamo, bona Keriso ena tauanina do ia gini goada totona. Unai dekena amo ita ibounai iseda abidadama do ia tamona, bona iseda diba Dirava ena Natuna dekenai danu be tamona. Bona ita be tau badadia do ita halaoa.”​—Efeso 4:​8, 11-13.

Kongregesen edia hebou ai unai tatau, “harihari gaudia” ia gwauraidia, ese tadikaka idia hagoadadia. Antioka ai, Iuda bona Sila, peroveta taudia, ese “edia hereva goada amo varavara idia hagoadaia.” (Kara 15:32) Unai hegeregerena, hari inai negai lauma dalanai idia goada taudia edia haroro herevadia ese iseda abidadama do idia hagoadaia, bena do ia maragi ia lao lasi bona do ia mase lasi.

Ena be kongregesen heboudia ita do lao henidia lasi, to reana kongregesen tauna ta ena heduru dainai ita goada ita lao. Baibel ia gwau, matamanai “tau ta ese Dirava ena hereva, diba hamatamaia gaudia umui dekenai ia hadibaia . . . be namo. Badina umui be rata sibona umui inua diba.” (Heberu 5:12) To ta ese rata ia inua hanaihanai be hegeregere lasi. Keristen heboudia amo Baibel be ita idia hadibalaia loulou, Dirava do ita lalokau henia noho bona do ita abidadama henia noho totona, bona ita idia durua, “Dirava ena ura ibounai” do ita badinaia totona. (Kara 20:27) Unai ese “rata” ia hereaia. Baibel be ma ia gwau: “Aniani korikori be tau badadia idia ania diba. Idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.” (Heberu 5:14) Hebou ai, Baibel ena peroveta herevadia mai anidia bada be Baibel karoadia edia siri ta ta amo idia herevalaidia bona Dirava ena kara do ita tohotohoa diba dalana idia herevalaia dobu danu, to unai bamona hahediba be ta ese ena ruma ai Baibel stadilaia karana amo ia abia diba lasi reana.

Iehova ena Hahediba Herevadia—Gado ta Bamona Emu Murina Kahana Amo

Kongregesen ena stadi amo Iehova ese ita ia hamaoroa loulou edena bamona do ita kara be namo. Unai be mai anina bada. Bema lasi, siboda eda ura do ita tahua, do ita hekokoroku, bona do ita mataganigani reana. Baibel ena hereva do ita kamonai loulou neganai, unai ese ita do ia durua, taunimanima bona Dirava tura henidia karana ai do ita kwalimu totona. Salamo 119:59 ia torea tauna ia gwau: “Egu dala lau lalodia, do lau giroa bena egu aedia be emu hahediba herevadia daladia ai do idia raka totona.”

Keristen heboudia ita lao henidia loulou neganai, Iehova ena peroveta herevana Isaia 30:​20, 21 ai ena anina be ita edai ia vara; ia gwau: “Emu matana ese emu Hahediba Tauna Hereadaena do idia itaia. Emui idiba kahana ai eiava emui lauri kahana ai bema umui raka siri neganai, emu taiana be hereva ta emu murina kahana amo do idia kamonai, do ia gwau: ‘Dalana be inai, ia lalonai umui raka.’ ” Iehova ese iseda raka dalana ia itaia, bona, bema ita raka kerere, ita ia hamaoromaoroa mai ena lalokau ida.​—Galatia 6:1.

Lauma Helaga Oi Abia Kongregesen Amo

Iehova ena Witness taudia edia Keristen heboudia ita lao henidia loulou neganai, Dirava ena lauma helaga, iena orea taudia latadiai ia noho gauna, ese ita ia hagoadaia. (1 Petero 4:14) Bona Keristen elda taudia kongregesen ai be lauma helaga amo ia duanaidia. (Kara 20:28) Hari lauma helaga, Dirava ena gaukara siahuna, be mai ena siahu bada Keristen tauna enai. “Lauma Helaga ese inai bamona karadia ia havaraia: Lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.” (Galatia 5:​22, 23) Dirava ena orea amo ia gaukara neganai, lauma helaga ese ita ia durua, Iehova ena palani ia idia lalokau henia taudia ediai do ita diba goevagoeva totona. Paulo ia gwau tanobada ena gunalaia taudia ese Dirava ena palani idia diba lasi, “to Dirava ese iena Lauma dekena amo ita dekenai ia hedinaraia.”​—1 Korinto 2:​8-10.

Kongregesen ese abidadama hagoadaia lauma anianina ita ia henia, bona ena gaukara badana idia ura karaia taudia be ia hadibalaidia danu. Dahaka gaukara?

Kongregesen ese Ia Hadibadia

Keristen kongregesen be sosel kalabu ta lasi. Iesu ese kongregesen taudia ia haganidia, Basileia ena sivarai namona be lauma diburana ai idia noho taudia do idia harorolai henidia. (Kara 1:8; 1 Petero 2:9) Pentekoste 33 C.E. ai, kongregesen ia matamaia negana amo, ia be haroro taudia edia orea. (Kara 2:4) Nega ta oi ese Iehova ena palani be ta oi hamaorolaia toho, to ena lalona oi ania diba lasi, a? Kongregesen heboudia ai hahediba gaukarana idia hahedibalaia. Baibel ena sivarai ita stadilaia neganai, ita ese lalo-ani herevadia namodia bona Baibel siridia bona henanadai bona hereva hegeregeredia gaukaralaidia dalana ita dibaia. Unai kara bema oi manadalaidia, oi do idia durua, ta be Baibel ena hereva momokani do oi hadibalaia neganai moale bada do oi davaria totona.

Tanobada ai heatu bona kara bodagadia be momo dainai, Keristen kongregesen be roho-mauri gabuna korikorina ta. Ena be ena taunimanima idia goevadae lasi, to ia be maino bona lalokau gabuna. Unai dainai, kongregesen heboudia oi lao henidia loulou bona salamo tauna ena hereva oi hamomokania; ia gwau: “Itaia! Tadikaka idia noho hebou mai edia lalo-tamona ida, unai be namo, bona mai moalena danu! . . . Iehova ese hahenamo ia haheganilaidia vadaeni. Unai hahenamo be mauri hanaihanai.”​—Salamo 133:​1, 3.