Toana be Do Idia Tubu Noho

Idia haginia ruma lalodiai tubutubu gaudia do idia tubu diba totona, idia ese tano lalona amo ia daekau siahuna idia gaukaralaia ruma hasiahua totona bona paua amo diari idia karaia; unai dala amo Iceland ena biru taudia ese au huahua, aniani, bona tubutubu gaudia idauidau idia hatubudia diba. Unai hegeregerena, Witness taudia be lauma dalanai hereva momokani idia gaukaralaia, bona unai siahu gauna amo, bona Iehova ena lauma helaga ena hahenamo amo, Iceland dekenai edia haroro gaukara amo anina namona idia davaria.

Hari lagani lalonai, taunimanima 542 be Keriso ena mase laloatao totona, Memorial hebouna dekenai idia lao, bona hari idia karaia Baibel stadi edia namba be kahirakahira 200. Danu, daudau teritori dekenai do idia lao haroro ena hagoadaia herevana idia kamonai neganai, idia ura karaia dainai ai diba unai motumotu badana dekenai mamoe bamona taudia be Mamoe Naria Tauna Namona, Iesu Keriso, ena gadona do idia kamonai. (Ioane 10:​14-16) Mai edia abidadama Basileia harorolaia taudia dekenai unai be moale bada gauna, badina idia ore lagani 64 lalodiai idia be mai edia haheauka danu aisi bona lahi tanona dekenai sivarai namona idia harorolaia!

Pioneer Gaukara Haheaukalaia Noho

TANOBADA hegegemadai, Iehova ena Witness taudia 4,500,000 bamona ese sivarai namona idia harorolaia. Idia dekena amo 600,000 bona ma haida be pioneer taudia, eiava ful-taim Basileia sivaraina harorolaia taudia. Unai ami lalonai pioneer taudia edia lagani be idauidau, haida be 13 idia do abia lasi bona haida be idia ritaea bona 90 idia davaria taudia. Edia mauri toana, bese bona taga be idauidau.

Reana, unai ful-taim haroro taudia idia ura edia pioneer gaukara dekenai do idia kwalimu. Idia momo be edia mauri ibounai lalonai unai gaukara idia ura karaia noho. To badina idauidau dainai idia haida be unai bamona idia karaia diba lasi. Ena be haida ese hekwakwanai idia davaria badina moni ia hegeregere lasi, idia gorere, idia lalo-hekwarahi, eiava ma gau haida dainai, to edia pioneer gaukara idia do karaia noho. Vadaeni, nega ibounai hesiai gaukara idia karaia taudia ese unai bamona hekwakwanai idia davaria neganai, dahaka idia karaia diba idia haheauka bona pioneer gaukara do idia karaia noho totona?

Moni Ia Hegeregere Dalana

Aposetolo Paulo bamona, pioneer taudia momo be moni gaukara sisina idia karaia edia mauri durua gaudia idia abia totona. (1 Tesalonika 2:9) Kahirakahira tanobada ibounai dekenai, aniani, dabua, ruma, bona loaloa davana idia daekau bada herea. Pat-taim gaukarana idia abia be gau badana, to nega haida idia davaria dalana be ia auka. Bema unai bamona gaukara idia davaria, nega momo davana be ia bada lasi, bona health insurens ena heduru idia henia lasi.

Bema ‘Dirava ena Basileia mai ena kara maoromaoro ita tahua guna,’ ita diba momokani Iehova ese tauanina dalanai ita do ia durua. Vadaeni, moni ia hegeregere lasi neganai, pioneer taudia be ‘kerukeru totona idia laloa hekwarahi lasi.’ (Mataio 6:​25-34) Ena be idia hekwarahi noho unai hekwakwanai idia hanaia totona, to bema edia abidadama Iehova dekenai ia goada, do idia lalo-hekwarahi bada lasi.

Tau ta ena moni ia hegeregere lasi neganai, reana ia negea moni ena bada ia hamaragia diba. Reana gau haida do ia hoidia lasi, mauri durua gaudia sibona do ia hoidia, to ena ura gaudia ia hoidia lasi, unai neganai ena moni do ia hegeregere diba. Idia negea moni ena bada hamaragia totona, pioneer taudia haida be Keristen taudia ida idia noho bona ruma rentalaia davana idia haboua. Tama sina idia ura edia natudia be pioneer gaukara do idia karaia, unai dainai idia haida be edia ruma idia kehoa pioneer be davana lasi eiava davana maragina dekenai edia ruma dekenai do idia noho totona. Ma haida be aniani bona loaloa davana idia henia pioneer taudia idia durudia totona. To namo lasi pioneer taudia be taunimanima dekenai metau idia henia, badina Baibel ena taravatu be idia gaukara mauri durua gaudia do idia abia totona.​—2 Tesalonika 3:​10-12.

Pioneer taudia idia gaukara hebou neganai edia loaloa davana idia hamaragia diba. Bema pioneer taudia ruaosi ta ta be mai edia motuka ta, namona be gabu tamona dekenai idia haroro hebou, bona motuka tamona sibona idia gaukaralaia, unai neganai motuka rua gaukaralaia davana idia hamaragia. Bema pioneer taudia be motuka idia abia lasi, reana mai edia motuka taudia ida idia gaukara hebou diba bona loaloa davana sisina idia henia heduru totona. Danu, teritori ia kahirakahira neganai, moni haboioa kava lasi totona, aena dekenai idia raka diba. Gabu momo dekenai PMV dekenai idia guia be davana bada lasi.

Moni dekenai hekwakwanai idia hanaia bona ful-taim hesiai gaukara idia karaia noho taudia be Newton Cantwell mai ena adavana. Lagani 193 2 ai, Great Depression (gaukara lasi nega dikana) lalonai, edia ruma mai ena biru tanona idia hoilaia bona edia natudia 7 amo 6 be idia danu idia lao pioneer gaukara idia karaia totona. Tadikaka Cantwell ia torea ia gwau: “Daudau lasi murinai ruma bona tano ai hoilaia karana amo ai davaria moni be kahirakahira ibounai ia ore​—moni bada be doketa edia davana karaia totona ia ore. Ai idia siaia gabu iharuana dekenai ai ginidae neganai, ai dekenai ia noho moni be ia hegeregere pura rua ena renta moni ai henia guna totona, bena ai dekenai K5.00 ia noho. To, ai diba bema emai hesiai gaukara ai karaia goadagoada noho, Iehova ese ai do ia naria. . . . Dala idauidau ai tahua moni ai negea kava lasi totona. Taoni matamatana ta dekenai ai noho matamaia neganai, bensini hoia taudia haida lau hereva henidia, lau gwau aiemai ruma bese be motuka toi ai gaukaralaidia emai Keristen haroro gaukara ai karaia totona. Unai idia diba neganai, bensini davana idia hamaragia sisina. Aiemai natuna merodia be karaharaga motuka hanamoa dalana idia diba, bena unai neganai moni bada ai negea lasi motuka hanamoa bisinesi taudia dekenai.” Unai dala amo Cantwell ena ruma bese be moni hekwakwanai idia hanaia bona ful-taim hesiai gaukara idia karaia diba. Tadikaka Cantwell be pioneer lista dekenai ia noho ela bona ia mase, ena lagani be 103.

Pat-Taim Gaukara Abia

Edia mauri durua gaudia idia abia totona, pioneer taudia momo be pat-taim moni gaukara idia karaia. Korinto dekenai haroro gaukara ia karaia noho diba totona, Paulo ese abidadama taudia Akula bona Priskila ida dabua ruma idia karaia moni idia davaria totona. (Kara 18:​1-11) Hari inai negai, lauma dalanai tadikaka idia ura pioneer taudia dekenai pat-taim moni gaukara idia henidia. Pioneer taudia ma haida ese pat-taim moni gaukara idia abia gaukara henia oreadia amo. Moni gaukara abia hidi gwauraia neganai, Dirava abidadama henia be gau badana, danu, lalona ibounai ida idia guriguri henia ena hakaua dalana idia abia totona be gau badana.​—Hereva Lada-isidia 15:29.

Pioneer tauna ta ia gwau: “Lau gurigurilaia murinai goada lau abia, bena egu gaukara biaguna lau hamaoroa ful-taim moni gaukara lau karaia diba lasi, badina egu hesiai gaukara lau hagugurua be mai anina bada lau dekenai. Murina Wednesday dekenai, lau idia hamaoroa, bema lau ura, pat-taim moni gaukara do lau karaia diba. Mai moale danu unai gaukara lau karaia.” Guriguri ena siahu oi laloa maragi lasi, bona oi guriguri murinai kara oi karadia.

Aonega dalana be pioneer taudia ese edia moni gaukara biagudia idia hamaorodia pat-taim gaukara idia ura badina unai amo heduru idia abia edia haroro gaukara do idia karaia noho totona. Reana edena dina idia gaukara diba bona pura ta ta iboudiai hora hida idia gaukara diba do idia hadibadia be namo. Taihu korikori ruaosi be ful-taim moni gaukara tamona idia karaia loia ena opesi dekenai, idia ruaosi ta ta be pura iboudiai dina rua mai kahana idia gaukara. Unai amo mauri durua gaudia idia davaria diba ela bona Watchtower Bible School of Gilead dekenai idia lao, bona murinai misinari gaukara idia karaia.

Baibel ena taravatu ia utua lasi gaukara namodia idia davaria diba bema Witness taudia bona taunimanima ma haida idia henanadai henidia, eiava niuspepa lalonai idia tahua. Hekokoroku lasi karana be gau badana, badina unai ese pioneer taudia ia durudia gaukara toana tamona sibona lasi, to gaukara idauidau idia tahua totona. (Iakobo 4:10 itaia danu.) Pioneer gaukara do idia karaia noho totona, reana taunimanima idia gwauraia anina bada lasi eiava leiba moni gaukarana do idia karaia. Bema unai gaukara idia karaia, to gaukara idauna ta idia ura henia, reana gabeai idia ura henia gaukarana do idia davaria diba.

Gorere Bona Lalo-Hekwarahi

Haida be edia pioneer gaukara idia rakatania badina idia gorere bada dainai. To, gorere neganai, namo lasi pioneer taudia be karaharaga edia pioneer gaukara idia rakatania, badina reana edia gorere hanamoa dalana ia noho eiava gabeai idia namo sisina dainai edia pioneer gaukara idia karaia noho diba. Ena be gorere idia davaria, to pioneer taudia momo ese muramura idia abia, idia dekenai ia hegeregere anianina sibona idia ania, idia mahuta namonamo bona eksasais idia abia dainai, idia pioneer noho diba. Loaloa naria tauna ta ia itaia taihu ta ena turia idia dika roki dainai, bona ruma ta ruma ta dekenai ia raka haroro gaukara ia karaia totona, ta ese ia durua. (Kara 20:20) To, ia bona ena adavana be Baibel stadi 33 idia karaia bona taunimanima 83 idia durudia Dirava ena hereva momokani idia abia dae totona. Nega ia hanaia murinai ena gorere ia namo sisina, bona lagani 11 murinai Pioneer Gaukara School dekenai ia lao.

Lalo-hekwarahi karana dainai haida be edia pioneer gaukara idia rakatania. (Hereva Lada-isidia 24:10) Pioneer ta be loaloa naria tauna dekenai ia gwau: “Egu pioneer gaukara do lau hadokoa. . . . Abitore davana do lau karaia totona.” Ia ura mata-galasi ia abia, ena davana be 20 kina. Loaloa naria tauna ia gwau: “Kina 20 sibona dainai oi ura pioneer gaukara oi rakatania, a?” Ia hamaoroa namona be dina tamona lalonai, hanua ena kofi umana dekenai do ia gaukara, 20 kina ia abia, mata-galasi do ia hoia, bona pioneer gaukara do ia karaia noho. Idia kiki noho lalonai, ia hedinarai unai pioneer tauna ia lalo-hekwarahi badina ena motuka hanamoa davana be bada herea dainai. Pioneer tauna idia hamaoroa ia negea monina do ia hamaragia totona, namona be dina ta ta iboudiai motuka amo gabu daudau dekenai do ia heau lao lasi, to kahirakahira dekenai do ia haroro. Danu idia sisiba henia ena goada lauma dalanai do ia hagoadaia noho totona. Unai pioneer tauna ese unai sisiba ia abia dae bona gabeai idia boiria Gilead School dekenai do ia lao totona. Unai sikuli kosi ia haorea murinai, idia siaia idau tanona ta dekenai bona unuseniai ia be mai abidadama danu lagani momo ia noho ela bona ia mase. Oibe, bema lalo-hekwarahi karana ita hanaia, bona ita laloatao Iehova be ita kahirakahira dekenai ia noho, nega momo hahenamo momo ita davaria.

Emu Hesiai Gaukara Oi Laloa Bada

Ena be hekwakwanai idia vara, hegeregere nega haida ia dabu, bona ena aniani be lasi, to Paulo ese ena hesiai gaukara ia laloa bada. (2 Korinto 4:7; 6:​3-6) Hari inai negai, ena be hekwakwanai bona dagedage idia davaria, to Asia, Eastern Europe, bona ma tano haida lalodiai Iehova ena hesiai taudia momo, ese edia pioneer gaukara idia karaia noho. Vadaeni, hedibagani oi davaria neganai, oi goada karaia unai gaukara namona oi haheaukalaia bona Iehova ena ladana oi hanamoa totona.

Pioneer taudia momo be ful-taim haroro gaukarana lalonai idia vareai diba badina edia mauri dalana idia haidaua dainai. Paulo bamona, idia ese kohu tahua karana idia dadaraia, bona “aniani bona dabua” idia davaria dainai idia hegeregere. Pioneer gaukara do idia haheaukalaia noho totona, namona be mauri durua gaudia sibona idia abia dainai idia moale noho. (1 Timoteo 6:8) Kohu abia karana lasi, to Dirava ese ita ia henia gaukarana ita laloa bada neganai, moale ita davaria.

Inai sivarai oi laloa: Washington, D.C. ai, Anton Koerber be gavamani tau badadia ida idia herevahereva karana amo Basileia gaukara ia durua diba. Nega daudau pioneer gaukara ia karaia bona lagani 1952 ia lao 1959 ai, sekit naria gaukarana ia karaia. Nega ta ena bisinesi turadia gunadia be ia dekenai idia mai, idia ura gaukara idia karaia hebou, bona unai amo kina milion tamona do ia davaria diba sibona ena. To, unai ia karaia totona, lagani tamona lalonai ena nega ibounai do ia henia unai bisinesi dekenai. Heduru bona lalohadai maorona do ia abia totona ia guriguri murinai, ia gwau: “Lagani tamona lalonai Iehova hesiai henia gaukara namona do lau rakatania be dala lasi, lasi, ena be tanobada ena moni ibounai lau abia diba, to unai gaukara lau rakatania diba lasi. Washington dekenai egu tadikaka lau hesiai henidia gaukarana lau laloa bada, bona lau diba iniseniai Iehova ena hahenamo lau abia. Bema lau ura, unai kina milion tamona lau tahua diba, to unai lagani tamona dokonai egu mauri be edena bamona, egu goada lauma dalanai be edena bamona, bona egu tauanina be edena bamona?” Ia ese edia hereva ia dadaraia. Bema pioneer taudia ese ia bamona edia pioneer gaukara idia laloa bada, unai ese do ia durudia edia pioneer gaukara do idia haheaukalaia noho totona.

Pioneer taudia ese hahenamo badadia idia moalelaidia! Hora momo idia negea diba Iehova ena hairai pavapava sivaraina idia kikilaia totona. (Salamo 145:​11-13) Nega bada haroro gaukara dekenai idia negea dainai, lauma dalanai pioneer taudia ese idia ogogami bona hisihisi idia davaria taudia, gorere eiava edia bese ta ia mase taudia, bona hisihisi idia davaria taudia ma haida, idia durudia diba helaro namona idia abia totona. Unai dainai, bema ita be mai iseda dala ful-taim haroro gaukarana ita karaia totona, hahenamo momo do ita moalelaidia. ‘Iehova ena hahenamo ese taga ia habadaia.’ (Hereva-Lada-isidia 10:22) Bona iena heduru bona iena hahenamo dainai, Basileia harorolaia taudia momo be mai edia moale danu pioneer gaukara idia haheaukalaia noho diba.

Duahia Taudia Edia Henanadai

Roma 9:​3 ai, aposetolo Paulo ia torea, ia gwau: “Sedira egu mase dekena amo Dirava ese lauegu bese Israela ia hanamoa diba. Bema inai bamona dala ta ia noho, lauegu bese do lau durudia totona, lau ura be Keriso lau noia, ia ese lau do ia negea, vadaeni lau boio momokani.” Unai hereva ena anina be ia ura ena mauri do ia bouboulaia Iuda taudia ia hamauridia totona, a?

Iesu ese lalokau hereadaena ia hahedinaraia ita tohotohoa totona. Ia ura ena souli, eiava mauri ia henia, kara dika taudia hamauridia totona. Iena haroro gaukara lalonai, ena goada ibounai ia henia iena bese taudia​—Iuda taudia unai​—ia durudia totona, bona sibona ena mauri ia bouboulaia karana amo idia momo be namo do idia davaria totona. (Mareko 6:​30-34) Ena be idia momo be unai hahemauri sivaraina idia abia dae lasi bona idia dagedage henia, to Iesu be mai lalokau danu Iuda taudia edia namo ia tahua goadagoada noho. (Mataio 23:37) Bona iena ‘kara toana ita dekenai ia hedinaraia, iena aena gabudiai do ita raka totona.’​—1 Petero 2:21.

Idia goevadae lasi taudia be mai edia dala Iesu ena lalokau karana idia tohotohoa totona, a? Oibe, aposetolo Paulo be unai ia hamomokania. Ena bamona Iuda taudia edia namo ia tahua dainai, bona idia ia lalokau henidia dainai, ia gwau idia totona “lau ura be Keriso lau noia, ia ese lau do ia negea, vadaeni lau boio momokani.”

Unai siri lalonai, ena hereva ia hedinarai herea totona, Paulo ese hahegeregere herevana ia gwauraia. Iesu be hahegeregere herevana ia gwauraia Mataio 5:​18 ai, ia gwau: “Harihari ela bona guba bona tanobada do idia noho lasi neganai, taravatu ena leta ta o ena koma ta do ia boio lasi, ela bona gau ibounai do idia hamomokania.” Iesu ia diba guba bona tanobada do idia ore lasi. Danu, ia ese Paulo do ia negea lasi, bona Iuda taudia haida sibona be Keristen ena tomadiho do idia abia dae. To, unai hereva amo Paulo ese ia hahedinaraia ia ura dikadika Iuda taudia ia durudia, bena Iesu Keriso dekena amo Dirava ena hahemauri dalana do idia abia dae. Unai dainai, aposetolo tauna ese ena bamona Keristen taudia be inai bamona ia hagoadadia diba: “Lau karaia bamona do umui karaia, Keriso ena kara lau karaia bamona”!​—1 Korinto 11:1.

Hari inai negai, namona be Keristen taudia be Iesu bona Paulo bamona, kamonai lasi taudia edia namo idia tahua. Ena be iseda haroro teritori dekenai taunimanima be iseda hereva idia ura lasi kamonai eiava ita idia dagedage henia, to namona be dekena taudia ita lalokau henidia noho bona ita gaukara goadagoada, ita durudia hahemauri dalana do idia diba totona.​—Mataio 22:39.