Hahemauri, Iesu Keriso Do Ia Hedinarai Neganai
“Do umui moale . . . Keriso ena hairai ia hedinaraia neganai do umui moale bada herea.”—1 PETERO 4:13.
1. Iehova ese ena hesiai taudia dahaka ia henidia?
ISEDA Hadibaia Tauna Hereadaena Iehova ese harihari gaudia momo ita Witness taudia ia henia. Eda lalodia ia hadiaridia, ena ura bona ena palani ita ia hadibalaia goevagoeva. Iena lauma helaga amo diba bona goada ita ia henia, diari do ita hahedinaraia mai eda goada ida totona. Aposetolo Paulo be 1 Korinto 1:6, 7 (NW) ai ia gwau: “Keriso ena sivarai be umui lalonai idia hamomokania vadaeni. Unai dainai umui be harihari gauna ta ai umui dabu lasi, hari iseda Lohiabada Iesu Keriso hahedinaraia negana umui naria noho lalonai.”
2. “Keriso hahedinaraia negana” ai, dahaka moale gaudia do idia vara?
2 Unai neganai Hairai Pavapavana bamona do ia hedinarai; ena orea taudia mai edia kamonai edia davana namona do ia henidia, bona Dirava idia badinaia lasi taudia edia davana dikana do ia henidia. Unai neganai Keristen taudia mai edia kamonai, Dirava ese ena lauma amo ia horodia taudia bona edia bamodia “hutuma bada herea” danu, do idia “moale bada herea,” badina be unai be Satana ena orea ibounai ena dokona ena toana.—1 Petero 4:13.
3. Tesalonika taudia hegeregeredia, edena bamona do ita gini auka be namo?
3 Unai nega be ia kahirakahira dainai, Satana ese mai ena badu ida ita ia hakererea toho. Leona bamona, ita ia ania ore toho. Namona be do ita gini auka! (1 Petero 5:8-10) Gunaguna eda tadikaka Tesalonika ai ese hisihisi idia ania, Iehova ena Witness taudia momo hari inai negai idia ania hegeregerena. Unai dainai, Paulo ese ia tore henidia herevadia be mai anina bada ita edai. Ia gwau: “Hisihisi umui dekenai idia henia taudia dekenai be [Dirava] ese hisihisi do ia henidia. Dirava ese umui bona ai, hisihisi ita abia noho taudia dekenai iena mauri namona do ia henia. Inai be do ia vara Lohiabada Iesu bona iena aneru mai siahu bada danu guba dekena amo do idia [hedinarai] neganai. Mai lahi siahu bada danu, Dirava ura lasi taudia bona Lohiabada Iesu ena Sivarai Namona idia abia dae lasi taudia dekenai davana metau do ia henidia.”—2 Tesalonika 1:6-8.
4. Dahaka dainai Iesu ese Kerisendom ena haroro taudia do ia panisidia be maoro?
4 Paulo ena negai unai hisihisi momo be Iuda ena tomadiho gunalaia taudia ese idia havaraia. Unai hegeregerena, hari inai negai Kerisendom ena haroro taudia be sibodia idia gwauraia Dirava ena gwaukau taudia, to taunimanima idia ha-uradia, Iehova ena Witness taudia do idia koudia totona. Idia gwau Dirava idia diba, to ‘Iehova tamona’ idia dadaraia, bona Toi Tamona Diravana idia tomadiho henia. (Mareko 12:29) Iseda Lohiabada Iesu Keriso ena Basileia sivaraina namona idia kamonai henia lasi, to taunimanima edia gavamani idia abidadama henidia. Unai tomadiho taudia do idia mase ore, ‘Lohiabada Iesu be guba dekena amo do ia hedinarai neganai’!
Iesu Keriso ena Mai
5 Iesu do ia hedinarai neganai do idia vara gaudia be ia ese ia gwauraidia, Mataio 24:29, 30 ai. Iena noho bona tanobada ena dokona edia toana ia gwauraia, ia gwau: “Dina be do ia dibura, hua danu do ia diari lasi, hisiu guba dekena amo do idia moru, bona guba dekenai idia noho siahu gaudia do idia mareremarere.” Unai neganai “Taunimanima ena Natuna ena toana guba dekenai do ia hedinarai.” “Tanobada ena bese ibounai do idia tai, badina be Taunimanima ena Natuna [Dirava ena Mesia Pavapavana] do idia itaia, guba ena ori latanai do ia mai, mai ena siahu bada, bona mai ena hairai danu.” Unai ena anina be Iesu be do ia hedinarai, Iehova ena hereva Hamomokania Tauna.
6, 7. Daidia danu ese “do idia itaia,” bona edena bamona do idia itaia?
6 Iena “mai” be aposetolo Ioane danu ese Apokalupo 1:7 ai ia gwauraia, ia gwau: “Umui itaia, ia be ori latanai ia mai noho.” Iesu ena inai taudia ese edia matadia korikoridia amo do idia itaia lasi, badina be “ori” latanai ia mai hehuni edia davadia henidia totona. Bema taunimanima be ena guba hairaina do idia itaia, unai ese edia matadia do ia hakepuludia, Iesu be diari badana ai Saulo vairanai ia hedinarai neganai ena matana ia hakepuludia hegeregerena.—Kara 9:3-8; 22:6-11.
7 Apokalupo ia gwau: “Taunimanima ibounai be momokani do idia itaia. Idia gwadaia taudia ese danu do idia itaia. Tanobada besedia ibounai be ia dainai do idia tai.” Anina be, Iesu ese ena inai taudia tanobada ai do ia hadikadia ore matamaia neganai, do idia diba ia be mai ena siahu bona mai ena hairai bada ida ia mai vadaeni. Badina be dahaka Apokalupo ese ia gwauraidia “idia gwadaia taudia”? Badina be Iehova ena hesiai taudia idia lalo-dika henidia, Iesu idia dagedage henia taudia edia lalohadai hegeregerena. Idia be momokani “ia dainai do idia tai.”
8. Do ia ginidae haraga hisihisina be Iesu bona Paulo ese edena bamona idia herevalaia?
8 Dika davana henia dinana, Iehova ena, be edena bamona do ia ginidae? Luka karoa 21 ai Iesu ese hisihisi badadia ia gwauraidia; idia be toa ta, idia hahedinaraia lagani 1914 amo ia noho hehuni. Bena siri 34 bona 35 ai ia gwau: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena dina do ia mai haraga, umui hegaegae lasi garina. Badina be unai dina be tanobadai idia noho taunimanima ibounai dekenai do ia ginidae.” Oibe, karaharaga do ia ginidae! Paulo be 1 Tesalonika 5:2, 3 ai ia gwau: “Lohiabada ena Dina be do ia mai, henaoa tauna hanuaboi neganai ia mai bamona. Inai bamona hereva, ‘Maino bona gari lasi ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae!” Hari inai negai tanobada besedia ese maino bona noho namona idia herevalaia, bona United Nations oreana idia hagoadaia gwauraia, tuari siahuna amo kerere gabudia do ia naridia totona.
9. “Diari ia tara” daidia edia, bona dahaka dainai?
9 Siri 4 bona 5 ai aposetolo be ma ia gwau: “To aiemai varavara taudia e, umui be dibura taudia lasi, unai dainai unai Dina ia ginidae neganai do umui hoa lasi. . . . Umui ibounai be diari ena taudia, umui be dina ena taudia.” Ita moale, badina be ita be diari taudia—diari ita laohaia, maino bona noho namona korikori Dirava ena tanobada matamatana ai idia tahua taudia dekediai. Salamo 97:10, 11 ia gwau: “Iehova [ese] . . . ia idia abidadama henia taudia edia mauri ia naria; kara dika taudia edia imadia amo ia harohodia mauri. Diari ia tara, kara maoromaoro taudia edia, bona moale ia vara, lalo-goevagoeva taudia edia.”
Edia Nega ta ta ai Do Idia Vara
10 Hisihisi badana do ia ginidae neganai, dahaka do ia vara guna? Apokalupo 16:13-16 ese ia hahedinaraia, lauma dikadia ese tanobada ena bese iboudiai do idia gogodia, Siahu Ibounai Diravana ena dina badana tuarina, Aramagedono, totona. Ma ia hahedinaraia, unai dina be henao tauna bamona do ia ginidae dainai, namona be do ita gima noho—iseda lauma dabuadia, hahemauri ena toana unai, do ita dokidia oho lasi. Nega ia ginidae Dirava ese tanobada besedia do ia hahemaoro henidia—bona ma ta danu. Unai be daika?
11. Apokalupo 17:5 ena hahine be sibona edena bamona ia hahedinaraia?
11 Ia be sibona ena ladana ia abia isi toho hahinena ta bamona. Apokalupo 17:5 ese ia gwauraia “hunia gauna: ‘Babulono badana, ariara hahine ibounai bona tanobada ena kara mirodia ibounai edia sinana.’ ” To Iehova ena Witness taudia ediai ia be hehuni gauna lasi. Ia be sibona ia hahedinaraia, tomadiho koikoi basileiana tanobada ibounai lalonai, bona Kerisendom ena tomadiho oreadia be iena kahana badana ta. Dirava vairanai ia dika rohoroho, badina be politikol karadia ia durudia, bona Keristen korikori taudia ia dagedage henidia dainai, ‘Dirava ena taudia edia rarana ia inua dainai ia kekero,’ bona iena kerere dainai, “tanobada dekenai idia alaia mase taudia ibounai edia rarana” ia hebubu, lagani 1900 amo ema bona hari tuari ai idia hamasedia taudia wan handred milion mai kahana edia danu.—Apokalupo 17:2, 6; 18:24.
12. Dahaka dainai Dirava ese Kerisendom ena tomadiho oreadia ia samanidia?
12 Kerisendom ena orea edia kerere badana be inai: Ena be idia gwau idia be Dirava ena orea taudia, to ena ladana idia hahemaraia. Iena Hereva goevana idia hahedibalaia lasi, to Babulono bona Greece edia hahediba herevadia hari. Baibel ena taravatu utudia karadia idia gwauraidia namo dainai, bese momo idia hakereredia. Mataganigani taudia, idia bogaragidiai idia noho, be Iakobo 5:1, 5 ese ia gwauraidia dika: “Kohu momo taudia e, . . . mai boiboi danu do umui tai, metau bona hisihisi umui dekenai do idia ginidae dainai. Tanobada dekenai umui noho neganai umui ura henia karadia bona gaudia umui moalelaia mai lebulebu danu. . . . Vadaeni umui noho hegaegae ala-ala dinana totona.”
Babulono Badana Do Idia Hamorua!
13 Hisihisi badana ai, Iehova ena hahemaoro herevana hegeregerena Babulono Badana do idia hadikaia ore guna. Apokalupo 17:15-18 ese Dirava ena “palani” ia gwauraia—ia ese “dagedage gauna” ena “doana 10,” bese mai siahudia United Nations oreana ai, do ia ha-uradia do idia hadikaia ore totona. “Bona dagedage gauna mai ena doana 10, oi itaia vadaeni gaudia ese ariara hahine do idia badu henia. Do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua. Oibe, Dirava ese iena palani be unai king 10 edia lalona dekenai do ia atoa.” Unai dainai, Apokalupo 18:4, 5 ai, gado ta guba amo ia boiboi, ia gwau: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina! Badina be iena kara dikadia be momo herea momokani, . . . bona Dirava ese iena kara dikadia do ia laloaboio lasi.” Ia boiboi noho: Naria lasi. Nega ia do ore lasi neganai, tomadiho koikoi umui rakatania vaitani!
14. Daidia ese Babulono hadikaia karana do idia taitailaia, bona badina be dahaka?
14 Babulono Badana do idia hadikaia ore neganai, politikol taudia dikadia—“tanobada ena king taudia”—be dauhai do idia gini, ia do idia taitailaia, badina be nega daudau lauma dalanai ia ida idia heudahanai mai edia moale ida. Bisinesi taudia mai edia mataganigani, “tanobada ena hoihoi taudia . . . moni momo unai hanua lalonai idia davaria” taudia, ese danu do idia taitailaia. Dauhai do idia gini, do idia gwau: “Madi o, madi o, hanua badana, guna ia ese davana bada dabuadia bona kakakaka kala rua dabuadia ia karaia, golo, bona nadi namo herea, bona kavabukavabu herahera gau namodia ia atoa, to hora tamona lalonai iena kohu ibounai idia ore vadaeni.” Tomadiho dabuadia bona dubudia edia hairai do ia boio vaitani! (Apokalupo 18:9-17) To taunimanima iboudiai ese Babulono Badana do idia taitailaia a?
15, 16. Dahaka dainai Dirava ena orea taudia do idia moale?
15 Apokalupo 18:20, 21 ena haere be inai: “Gubai noho taudia e, Babulono ena moru do umui moalelaia, Dirava ena helaga taudia, bona aposetolo taudia bona peroveta taudia, do umui moale bada, badina be umui dekenai Babulono ese ia kara henia hegeregerena, Dirava ese ena dika davana ia henia vadaeni.” Nadi badana be davara ai idia negea diho hegeregerena, ‘Babulono, hanua badana, unai bamona do idia negea diho, bena do ia hedinarai lou lasi.’
16 Moale gauna unai! Nega hani gado be guba amo idia boiboi, idia gwau: “Aleluia! Dirava ita hanamoa!” Nega toi Iehova idia hanamoa, badina be ia ese ariara hahinena, Babulono Badana, ena davana ia henia dainai. Tomadiho koikoi basileiana tanobada hegegemadai be ia ore! Dirava ena terona amo gado ta ia lasi, ia gwau: “Dirava ena hesiai taudia ibounai e, bona ia idia gari henia taudia badadia bona maragidia danu, iseda Dirava do umui hanamoa.” Unai ane do ita abia be hahenamo ta ita edai!—Apokalupo 19:1-8.
Mamoe Natuna ena Headava
17 Aleluia herevana namba foa ena anina be idau: “Aleluia! Dirava ita hanamoa! [Iehova] iseda Dirava, Siahu Ibounai Diravana, ia sibona be king.” Unai bamona herevana ta be Apokalupo 11:17 ai danu: “[Iehova] e, Siahu Ibounai Diravana, . . . ai ese oi ai tanikiu henia. Oi ese oiemu siahu bada oi gaukaralaia vadaeni. Bona oiemu Basileia oi biagua hamatamaia vadaeni.” To unai ese gau idauna ta ia herevalaia, gauna be Iehova ese Mesia ena Basileia na lagani 1914 ai ia haginia, “auri itotohi dekena amo bese ibounai do ia gunalaia” totona. (Apokalupo 12:5) Apokalupo 19:6 ese Babulono Badana do idia hadikaia ore neganai do ia vara gauna ta ia herevalaia. Ariara hahinena bamona tomadihona do idia kokia neganai, Iehova Dirava ena pavapava dagina do idia hamomokania vaitani, bena unai dagi hegeregerena ia do idia tomadiho henia ela bona hanaihanai!
18. Babulono Badana do idia kokia murinai, dahaka moale herevana do idia gwauraia hedinarai?
18 Unai dainai, do idia gwau: “Do ita moale, do ita moale bada! Ia sibona do ita hanamoa! Badina be Mamoe ena Natuna ena headava negana ia ginidae vadaeni. Bona iena adavana be headava totona ia hegaegae vadaeni. Davana bada dabua kurokuro, namo herea momokani ia karaia vadaeni . . . Inai dabua be goevagoeva bona ia diaridiari. Unai be Dirava ena helaga taudia edia kara namodia ena toana.” (Apokalupo 19:7, 8) Idia gwau lasi horoa taudia oredia be edena negai guba maurina do idia abia. To unai siri dainai ita diba idia ese edia ahudia Mamoe Natuna, Keriso Iesu, ena headava lalonai do idia abia neganai, do idia moale bada, badina be idia ese ariara hahinena, Babulono Badana, hahemaraia karana idia itaia vadaeni dainai.
Satana ena Tanobada Do Idia Hadikaia Ore
19 Apokalupo 6:2 ese ia gwauraia hosina kurokurona do ia hedinarai lou. “Ia latanai ia guia tauna ena ladana be ‘Abidadama’ bona ‘Momokani’. Ia ese taunimanima ia kota henidia, o bema tuari ia karaia neganai, ia be mai kara maoromaoro danu ia karaia noho.” (Apokalupo 19:11) “King ibounai edia King, bona lohia ibounai edia Lohia” be do ia lao, bese idauidau do ia tuari henidia bona “Siahu Ibounai Dirava ena badu, siahu dikadika” vinena gabuna ai do ia moidia. “Tanobada ena king taudia mai edia tuari oreadia” be Aramagedono tuarina tuarilaia totona do idia hebou, to do idia kwalimu lasi. Hosi kurokurona ai ia gui Tauna do ia kwalimu. Satana ena tanobada oreana ibounai do ia ore vaitani.—Apokalupo 19:12-21.
20. Dahaka do ia vara Diabolo enai?
20 Apokalupo 20:1-6 ese Keriso Iesu ia gwauraia “aneru ta . . . guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu.” Ia ese huala, idaunegai gaigaina, ena ladana idia hatoa Diabolo bona Satana, ia guia, guri dobu masemasena lalonai ia tahoa diho, bena guri ia koua bona koua toana ia karaia. Bena Satana ese tanobada besedia do ia koidia lou diba lasi dainai, Mamoe Natuna bona ena hahine matamatana edia Lohia Laganidia 1,000 do idia matamaia. Adam dainai ia vara masena do ia ore! Lalohisihisi, taitai, bona hisihisi do idia ore! “Gau gunadia be idia ore vadaeni.”—Apokalupo 21:4.
21. Keriso hahedinaraia negana do ita naria noho lalonai, edena bamona do ita kara be namo?
21 Iseda Lohiabada Iesu Keriso hahedinaraia negana do ita naria noho lalonai, namona be Dirava ena Basileia gwauhamatadia do ita harorolaidia mai eda goada ida. Eda hahemauri be kahirakahira! Namona be do ita raka vaira lao, Pavapava Badana Iehova ena lalo-diari memerodia hegeregeredia!
Riviu
◻ Dahaka ese ia hahedinaraia Keriso hahedinaraia negana be kahirakahira?
◻ Dika davana henia dinana be edena bamona do ia ginidae?
◻ Tanobada ai idia vara gaudia edena bamona do ita lalodia be namo?
◻ Hisihihisi badana ai, dahaka do ia vara guna, dahaka be gabeai?
5. Iesu do ia hedinarai negana be Mataio 24:29, 30 ese edena bamona ia gwauraia?
10. Dahaka sisiba do ita badinaia be namo? (Apokalupo 16:15)
13. Hisihisi badana be edena bamona do ia matamaia, bona Apokalupo 18:4, 5 ena sisiba be dahaka?
17. Apokalupo 11:17 bona 19:6 hegeregeredia, edena nega rua ai Iehova ia pavapava matamaia?
19. Apokalupo 19:11-21 ese dahaka danu ia gwauraia?
[Picture on page 23]
Iesu be ‘ori amo do ia mai’ hehuni, edia davadia henidia totona
[Picture on page 25]
Tomadiho koikoi, Satana ena tanobada dikana, bona Satana danu be do idia moru