Karoa 25

Witness Taudia Rua Hamauria Lou Dalana

DIKA iharuana ia do ore lasi neganai, aneru goadana ese Ioane ia hamaoroa, peroveta laulau ma ta lalonai do ia vareai. Unai laulau lalonai dubu ia hedinarai. (Apokalupo 9:12; 10:⁠1) Ioane ia gwau: “Vadaeni itotohi ta, iena toana be hahetoho auna, lau dekenai idia henia, idia gwau, ‘Oi lao, Dirava ena dubu helaga bona pata helagana edia bada do oi hahetoho karaia. Bona dubu helaga lalonai idia tomadiho noho taudia do oi duahia.’ ”​—⁠Apokalupo 11:⁠1.

Dubu Helagana

² Unai dubu be tanobada Ierusalem hanuana ena dubu lasi. Lagani 70 C.E. ai Roma taudia ese Iuda taudia edia dubu ginigabena idia hadikaia ore. To aposetolo Paulo ia hahedinaraia, unai dubu idia do hadikaia ore lasi neganai, ma dubu ta ia noho, bona unai dubu do ia noho ema bona hari iseda negai. Unai dubu be lauma dubuna badana. Tomadiho kalagana bona gabeai Ierusalem dekenai idia haginidia dubudia ese idia laulaulaia. Unai lauma dubuna be “taunimanima ese idia haginia lasi, to [Iehova] sibona ese ia haginia.” Unai dubu ena Hahelaga Tauna Badana be Iesu. Paulo ia gwau Iesu “be Siahu Momokani Diravana ena helai gabuna badana idiba kahanai ia helai noho, guba dekenai.” Unai dubu ena Helaga Herea Gabuna be Iehova ena noho gabuna guba dekenai.​—⁠Heberu 8:​1, 2; 9:​11, 24.

³ Tomadiho kalagana lalonai koua dabuana ta ese Helaga Herea Gabuna bona Helaga Gabuna ia hapararaia. Aposetolo Paulo ia hahedinaraia unai koua dabuana ese Iesu ena hidio ia laulaulaia. Iesu ese sibona ena mauri ia bouboulaia neganai, unai koua dabuana be ia parara kahana rua. Unai ia vara neganai, ia hahedinaraia Iesu ena hidio ese dala ia koua noho lasi dainai, Iesu be Iehova ena noho gabuna lalonai ia vareai diba. Gabeai, Iesu ena horoa hahelaga taudia danu bema idia gini goada ela bona mase, guba lalonai do idia vareai, Iesu ena boubou gauna dainai. (Mataio 27:​50, 51; Heberu 9:3; 10:​19, 20) Danu, Paulo ia hahedinaraia, tomadiho kalagana lalonai animal idia bouboulaia hanaihanai. Unai ese Iesu ena mauri goevadaena ia bouboulaia karana tamona ia laulaulaia. Dubu ena magu lalonai boubou patana helagana ta ia noho. Unai be Iehova ese ia hegaegaelaia dalana ta ia laulaulaia, unai be iena ura hegeregerena, Iesu ena boubou, “taunimanima momo” totona​—⁠horoa taudia, bena, gabeai, mamoe idaudia totona​—⁠ia abia dae. Unai taudia ese Iesu idia “naria noho,” hahemauri do idia abia totona.​—⁠Heberu 9:28; 10:​9, 10; Ioane 10:⁠16.

⁴ Unai hereva ibounai be Dirava ena lauma helaga amo ia vara. Unai hereva dainai, ita gwau diba Helaga Gabuna, tomadiho kalaga dekenai, ese mauri helagana ia laulaulaia. Tanobada dekenai idia do noho bona “koua dabuana” lalonai idia do vareai lasi neganai, Keriso, bena gabeai hahelaga pavapava besena ena horoa taudia 144,000 danu, ese unai mauri helagana idia abia. (Heberu 6:​19, 20; 1 Petero 2:⁠9) Unai hegeregerena, Dirava ese horoa taudia ia abia dae bona iena lauma natudia ai ia halaodia. Lagani 29 C.E. ai, Iesu be Ioridane Sinavaina lalonai ia bapatiso neganai, Iehova ia gwau Iesu be iena Natuna. Idia danu be unai bamona ia natuna ai idia lao. (Luka 3:22; Roma 8:15) Hahelaga lasi Israel taudia ese tomadiho kalagana ena kahana tamona sibona idia itaia diba, unai gabu dekenai hahelaga taudia ese edia boubou idia karaia. Unai gabu be hahelaga taudia edia magu. Dahaka ia laulaulaia? Ena anina be, Iesu be tanobada dekenai ia noho neganai Dirava vairanai ia be kara maoromaoro tauna. Unai dainai ia be hegeregere ena mauri ia bouboulaia, taunimanima durua totona. Danu, unai gabu ese ia laulaulaia gauna ta be, Iesu ena boubou dainai iena horoa hadibaia taudia be tanobada dekenai idia noho neganai, idia be mai edia kara maoromaoro Dirava vairanai, helaga taudia bamona.a​—⁠Roma 1:7; 5:⁠1.

Dubu Ena Bada Ia Hahetohoa

⁵ Aneru ese Ioane ia hamaoroa, “Dirava ena dubu helaga bona pata helagana edia bada do oi hahetoho karaia. Bona dubu helaga lalonai idia tomadiho noho taudia do oi duahia.” Unai hereva ena anina be dahaka? Heberu Revarevadia edia peroveta hereva lalonai, gau ta ena bada idia hahetohoa ena anina be hahemaoro maoromaoro do idia karaia Iehova ena taravatu maorodia hegeregerena. Kara dika rohoroho Pavapavana Manase ena nega lalonai, Ierusalem ena bada ia hahetohoa peroveta karana ena anina be Iehova ese ia hahemaoro henia, bona unai hanua do idia hadikaia ore. (2 King Taudia 21:13; Lalohisihisi ena Ane 2:⁠8) To, gabeai, Ieremia ia itaia Ierusalem ena bada idia hahetohoa neganai, unai ese ia hamomokania unai hanua do idia haginia lou. (Ieremia 31:39; Sekaraia 2:​2-8 itaia danu.) Unai hegeregerena, Esekiel ese matahanai lalonai dubu ia itaia neganai, ena kahana iboudiai edia bada idia hahetohoa namonamo neganai, unai be Babulono dekenai idia guia Iuda taudia dekenai ia hamomokania tomadiho momokanina be edia hanua dekenai do idia haginia lou. Danu, unai dainai idia laloa guna idia kerere, bona namona be unai nega amo, Israel taudia be Dirava ena taravatu helagadia idia badinaia momokani.​—⁠Esekiela 40:​3, 4; 43:⁠10.

⁶ Unai dainai, aneru ese Ioane ia hamaoroa, dubu helagana ena bada ia hahetohoa bona unuseniai idia tomadiho hahelaga taudia edia namba ia duahia, unai ese ia hahedinaraia, gau ta lasi ese Iehova ia koua diba, lauma dubuna dekenai bona unuseniai idia tomadiho taudia dekenai ena ura do ia hagugurua totona, bona ia hahedinaraia, ena ura hagugurua negana be ia kahirakahira. Gau iboudiai be Iehova ena aneru goadana ena aena henunai idia atoa vadaeni, unai dainai nega ia ginidae, “Iehova ena dubu ororona be ororo badadia doridia ataiai do ia haginia” totona. (Isaia 2:​2-4) Lagani handred momo lalodiai Kerisendom ese tomadiho momokanina ia dadaraia. Hari be nega namona Iehova ena tomadiho goevana do idia abia isi totona. Danu, unai be nega korikori, Iesu ena kamonai tadikakadia, idia mase vadaeni taudia, be “Helaga Herea Gabuna” dekenai do idia toreisi lou totona. (Daniela 9:24; 1 Tesalonika 4:​14-​16; Apokalupo 6:11; 14:⁠4) Bona tanobada dekenai “iseda Dirava ena hesiai taudia,” maka idia abia taudia ginigabedia edia kara do idia tahua Dirava ena taravatu hegeregerena. Dubu lalonai do idia vareai totona, Dirava ena lauma natudia hegeregerena. Hari inai negai Ioane oreana taudia ese edia lalona idia hadaia unai taravatu helagadia do idia badinaia totona.​—⁠Apokalupo 7:​1-3; Mataio 13:​41, 42; Efeso 1:​13, 14; Roma 11:20 itaia danu.

Dubu Ena Magu ese Ia Koua Tanona be Aena amo Idia Moia

⁷ Dahaka dainai Ioane idia hamaoroa, magu ia koua tanona ena bada do ia hahetohoa lasi? Ioane ese ita ia hadibaia, ia gwau: “Dubu helaga ena magu, murimuri dekenai ia noho, be do oi hahetoho karaia lasi. Badina unai gabu be Dirava diba lasi taudia edia. Idia ese Hanua Helagana edia aena dekena amo do idia moia, hua 42 lalonai.” (Apokalupo 11:⁠2) Ita itaia vadaeni, hahelaga taudia be magu lalonai idia gini gabuna ese lauma idia abia Keristen taudia tanobada dekenai, edia kara maoromaoro Dirava vairanai, ia laulaulaia. Do ita itaia hegeregerena, unai siri lalonai namba 42 be namba korikorina ta. Hua 42, December 1914 amo ia lao June 1918 dekenai, sibodia idia gwauraia Keristen taudia iboudiai be dala dika herea amo idia tohodia. Unai lagani lalonai, tuari idia karaia neganai, Iehova ena taravatu maoromaorodia do idia badinaia, a? Idia momo herea ese unai taravatu idia badinaia lasi. Kerisendom ena dubu gunalaia taudia iboudiai ese edia gavamani idia laloa bada, Dirava ena taravatu badinaia karana idia laloa bada lasi. Unai tuari be Kerisendom ena tano ai idia karaia. Idia tuari heheni kahana ruaosi dekenai, dubu gunalaia taudia be tatau matamatadia idia doridia idia lao tuari totona. Taunimanima milion momo idia mase. Lagani 1918 ai, Dirava ese ena orea taudia ia hahemaoro henia matamaia neganai, United States danu be unai rara bubua karana lalonai ia vareai, bona Kerisendom ena kahana ibounai edia dubu gunalaia taudia be rara dekenai idia kerere, bona Dirava ese edia dika ena davana do ia henia. (1 Petero 4:17) Dirava ese ia negedia vadaeni, bona do ia abidia dae lou lasi.​—⁠Isaia 59:​1-3, 7, 8; Ieremia 19:​3, 4.

⁸ To, Bible Student taudia edia orea maragina be edena bamona? Lagani 1914 ai, Dirava be ena taravatu hegeregerena edia kara ia tahua, a? Lasi. Kerisendom lalonai sibodia idia gwauraia Keristen taudia hegeregerena, idia danu ese hahetoho idia abia be namo. Dirava ese idia ia negea ‘murimuri dekenai, Dirava diba lasi taudia’ ese do idia tohodia bona do idia dagedage henidia totona. Idia momo idia lalo-parara taunimanima idia alaia mase be dika, to unai neganai gavamani bona bese abia isi lasi Keristen karana dekenai idia do lalo-parara namonamo lasi. (Mika 4:3; Ioane 17:​14, 16; 1 Ioane 3:15) Gavamani ese idia doridia dainai idia haida be dala maorona idia rakatania.

⁹ To, unai bese ese hanua helagana be aena amo edena bamona idia moia? Unai hanua helagana be Ierusalem lasi, unai hanua idia hadikaia ore vadaeni lagani 25 idia do noho ema bona Ioane ese Apokalupo bukana ia torea neganai. Hanua helagana be Ierusalem Matamatana, Apokalupo bukana ena karoa ginigabedia lalonai ia gwauraia gauna. Tanobada dekenai, horoa Keristen taudia oredia ese unai hanua idia laulaulaia, dubu ena hahelaga taudia edia magu lalonai idia noho unai. Gabeai, idia danu be hanua helagana lalonai do idia vareai. Unai dainai, horoa taudia idia moia neganai, ia be hegeregere unai hanua idia moia.​—⁠Apokalupo 21:​2, 9-​21.

Witness Taudia Rua

¹⁰ Ena be haida ese idia moidia noho, to unai abidadama taudia be Iehova ena kamonai witness taudia edia kara idia rakatania lasi. Unai dainai, peroveta herevana be ma ia gwau: “ ‘Lau ese lauegu uitnesi taudia rua dekenai siahu do lau henia. Vadaeni idia ese puse dabua do idia karaia, bona dina 1,260 lalonai Dirava ena peroveta hereva do idia gwauraia hedinarai.’ Inai uitnesi taudia rua be olive audia rua bona lamepa rua, tanobada ena Lohiabada ena vairanai idia gini noho.”​—⁠Apokalupo 11:​3, 4.

¹¹ Unai kamonai horoa Keristen taudia idia haheauka be gau badana, badina idia peroveta neganai, “puse dabua” do idia hahedokilaia. Unai ena anina be dahaka? Baibel ena nega lalonai, taunimanima edia mase idia taitailaia neganai, puse dabua idia karaia. Unai dabua idia hahedokilaia neganai, unai ese ia hahedinaraia idia lalohisihisi eiava idia lalo-metau bada. (Genese 37:34; Iobu 16:​15, 16; Esekiela 27:31) Puse dabua idia karaia ena anina be Dirava ena peroveta taudia ese dika eiava lalohisihisi sivaraina metauna idia harorolaia. (Isaia 3:​8, 24-​26; Ieremia 48:37; 49:⁠3) Puse dabuana idia karaia neganai, reana anina be Dirava ena sisiba dainai idia lalo-manau eiava idia helalo-kerehai. (Iona 3:⁠5) Witness taudia rua ese puse dabuana idia karaia ena anina be mai edia manau danu idia haheauka, Iehova ena hahemaoro herevadia idia harorolaia neganai. Idia ese Iehova ena dika davana karaia dinana idia harorolaia noho. Unai dina lalonai bese badadia danu do idia taitai.​—⁠Deuteronomi 32:​41⁠-⁠43.

¹² Ioane oreana taudia ese unai sivarai idia harorolaia negana be idia gwauraia vadaeni: Dina 1,260, eiava hua 42. Bese ese hanua helagana be aena amo idia moia negana danu be hua 42. Unai nega be nega korikori. Unai bamona ita laloa badina dala rua amo ena daudau idia gwauraia, hua ena namba idia gwauraia, bena murinai dina ena namba idia gwauraia. Danu, Lohiabada ena dina ia hamatamaia neganai, lagani toi bona kahana lalonai​—⁠December 1914 ai ia matamaia bona ia lao ela bona June 1918 ai​—⁠Dirava ena orea taudia ese hekwakwanai momo idia davaria. Unai siri lalonai ia perovetalaia gaudia be idia davaria gaudia aukadia danu idia hegeregere. (Apokalupo 1:10) Iehova ena hahemaoro Kerisendom dekenai bona tanobada dekenai idia harorolaia neganai, ia be hegeregere “puse dabua” haroro bamona.

¹³ Witness taudia rua ese unai orea idia laulaulaia. Unai ese ia hamomokania, edia sivarai be maoromaoro bona mai ena badina. (Deuteronomi 17:6; Ioane 8:​17, 18 itaia danu.) Ioane ia gwau, idia “be olive audia rua bona lamepa rua,” bona ia gwau “tanobada ena Lohiabada ena vairanai idia gini noho.” Unai be Sekaria ena peroveta herevana hegeregerena. Ia ese lamepa ta mai ena imana 7 bona olive audia rua ia itaia. Unai olive audia be “horoa taudia rua” bamona, anina be Gavana Serubabele bona Hahelaga Tauna Badana Iosua, idia be “tanobada ibounai ena Lohiabadana badibadinai idia gini.”​—⁠Sekaraia 4:​1-3, 14.

¹⁴ Sekaria ena nega lalonai, taunimanima ese ruma idia haginia lou. Sekaria be ena matahanai lalonai olive audia rua ia itaia ena anina be inai: Serubabele bona Iosua ese taunimanima idia hagoadaia do idia gaukara goadagoada totona. Unai idia karaia neganai, Iehova be ena lauma helaga amo do ia hanamoa. Sekaria be matahanai lalonai lamepa ia itaia neganai, ia laloatao namona be ‘gau maragidia dinana do ia dadaraia’ lasi, badina Iehova ese iena ura iboudiai do ia karaia guguru. “Tuari orea edia Iehova ia gwau: ‘Tuari orea amo lasi, eiava siahu amo lasi, to lauegu lauma amo’ ” do ia karaia. (Sekaraia 4:​6, 10; 8:⁠9) Unai hegeregerena, Dirava ese Keristen oreana maragina, tanobada ibounai tuarina ginigunana lalonai, hereva momokani ena diari be taunimanima dekenai idia mailaia taudia unai, be do ia gaukaralaidia haginia lou gaukarana ta lalonai. Idia danu ese taunimanima edia lalona do idia hagoadaia, bona, ena be idia be momo lasi, to Iehova ena goada tabekau henia dalana do idia diba, bona gau maragidia ena dinana do idia dadaraia lasi.

¹⁵ Unai orea taudia idia gwauraia witness taudia rua dainai, Iesu ena toana ia haidaua negana ita laloa. Unai matahanai lalonai, Iesu ena aposetolo taudia toi ese Iesu be ena Basileia ena hairai lalonai idia itaia, ia be Mose bona Elia danu idia gini hebou. Unai matahanai ia perovetalaia Iesu be lagani 1914 ai guba terona latanai do ia helai, unai peroveta taudia rua ese idia laulaulaia gaukarana do ia karaia totona. (Mataio 17:​1-3) Unai hegeregerena, witness taudia rua ese toa karadia idia karaia, bona unai be Mose bona Elia edia gaukara hegeregerena. Haheitalai ta be Ioane ese ia herevalaia inai bamona: “Tau ta bema ia ura unai uitnesi ruaosi do ia hadikaia neganai, idia ese edia uduna dekena amo lahi do idia negea, unai tau do idia araia ore. Vadaeni, bema tau ta ese unai uitnesi taudia ia alaia toho neganai ia be do ia mase momokani. Unai uitnesi ruaosi be mai edia siahu guba do idia koua, vadaeni edia haroro dinadia lalonai medu do ia diho lasi.”​—⁠Apokalupo 11:​5, 6a.

¹⁶ Unai be Israel lalonai Mose ena siahu idia hepapahuahulaia karana hegeregerena. Mose ese hahemaoro auka herevadia ia gwauraia, bona Iehova ese gwau-edeede taudia ia hadikaia ore. Lahi korikori be guba amo ia diho bona idia 250 ia araia ore. (Numera 16:​1-7, 28-​35) Unai hegeregerena, Kerisendom ena gunalaia taudia ese Bible Student taudia idia dadaraia, idia gwau idia be kolesi ena setifiket idia abia lasi. To Dirava ena witness taudia edia hesiai gaukara ena namo ia hamomokania gauna be namo herea, setifiket ia hanaia momokani. Unai gau be inai: Revareva Helagadia ena sivaraina idia kamonai henia manau taudia. (2 Korinto 3:​2, 3) Lagani 1917 ai, Bible Student taudia ese buka ta, The Finished Mystery, idia halasia. Unai buka lalonai Apokalupo bukana bona Esekiel bukana ia gwauraia namonamo. Unai murinai, mai ena rau hani pepapepana ta, ladana The Bible Students Monthly, 10,000,000 idia hariharilaia. Unai pepapepa ena hereva badana ena sinado be “Babulono Ia Moru​—⁠Hari Kerisendom Ia Hisihisi Bada​—⁠Gabeai Do Idia Vara Gaudia.” United States lalonai, dubu gunalaia taudia idia badu, bona tuari idia laloa momo taudia edia lalohadai kererena idia gaukaralaia, dala do idia hegaegaelaia unai buka do idia taravatulaia totona. Ma tano haida lalodiai danu, gavamani ese unai buka idia taravatulaia. To, Dirava ena hesiai taudia idia gaukara noho, gari lasi. Pepapepa siahuna ta, mai ena rau hani, ladana Kingdom News, idia karaia. Lohiabada ena dina ia heau lalonai, ma buka bona magasin haida danu idia hahedinaraia Kerisendom be lauma dalanai ia mase vadaeni.​—⁠Ieremia 5:14 itaia.

¹⁷ Elia be edena bamona? Israel ena pavapava edia nega lalonai, Elia ia gwau medu lasi negana do ia mai. Unai amo do ia hedinarai, Iehova ese Baal idia tomadiho henia Israel taudia ia badu henidia. Unai medu lasi negana ena daudau be lagani toi mai lagani kahana. (1 King Taudia 17:1; 18:​41-​45; Luka 4:25; Iamesi 5:17) Gabeai, kara dika Pavapavana Ahasia ese tuari taudia ia siaia, Elia do idia doria lao ena lohia gabuna vairanai. Unai neganai sibona, Elia ia boiboi bena lahi be guba amo ia diho mai bona unai tuari taudia ia araia ore. Bena, tuari orea biaguna ta ese Elia dekenai hemataurai maoromaorona ia hahedinaraia badina Elia be peroveta tauna dainai. Unai neganai, Elia ia gwau, unai tuari biaguna danu do idia lao pavapava idia itaia totona. (2 King Taudia 1:​5-​16) Unai hegeregerena, lagani 1914 ia lao 1918 ai, idia gari lasi horoa orena taudia idia gwau, Kerisendom lalonai medu lasi negana be lauma dalana ai ia vara bona idia gwau hahemaoro aukana lahi bamona do ia mai, “Iehova ena gari bada dina badana ia mai neganai.”​—⁠Malaki 4:​1, 5; Amosa 8:⁠11.

¹⁸ Bena, Ioane ese witness taudia rua be inai bamona ia gwauraia: “Idia be mai siahu danu tanobada ena ranu rara dekenai do idia halaoa. Mai edia siahu danu hisihisi idauidau dekena amo tanobada taudia do idia hahisia. Inai bamona idia karaia diba nega momo, edia ura hegeregerena.” (Apokalupo 11:6b) Iehova ese Mose ia gaukaralaia, dagedage besena Aigupito dekenai hisihisi ia mailaia totona, bena unai amo Iehova ese Farao ia doria Israel besena do ia ruhaia totona. Mose ena amo dagedage besena Aigupito dekenai hisihisi ia mailaia. Unai hisihisi ta be ranu be rara ai ia halaoa. Lagani handred haida murinai, Israel idia tuari henia Filistia taudia ese Iehova ena kara Aigupito dekenai idia laloatao namonamo. Unai dainai idia boiboi, idia gwau: “Daika ese ai do ia hamauria, inai siahu bada Diravana ena imana amo? Tano gagaena lalonai Aigupito taudia be hisihisi idauidau amo ia hahisia Diravana be inai.” (1 Samuela 4:8; Salamo 105:29) Mose ese Iesu ia laulaulaia badina Iesu be mai ena siahu, iena nega lalonai idia noho tomadiho gunalaia taudia dekenai Dirava ena hahemaoro herevadia do ia harorolaia totona. (Mataio 23:13; 28:18; Kara 3:22) Bona tanobada ibounai tuarina ginigunana lalonai, Keriso ena tadikaka, witness taudia rua unai, idia hahedinaraia Kerisendom be ena mamoe taudia dekenai ia henia ‘ranuna’ ese mase ia mailaia.

Witness Taudia Rua Idia Hamasedia

¹⁹ Puse dabua idia hahedokilaia witness taudia rua ese Kerisendom idia hahisia bada herea. Unai dainai idia be hua 42 lalonai idia peroveta murinai, Kerisendom ese ena siahu tanobada dekenai ia gaukaralaia, unai witness taudia do ia “aladia mase” totona. Ioane ia gwau: “Edia peroveta hereva gwauraia hedinarai gaukara ia ore neganai, unai dagedage gauna dikana, guri dobu masemase dekena amo do ia daekau mai. Vadaeni ia ese idia ruaosi do ia tuari henia. Unai dagedage gauna be do ia kwalimu, ia ese unai uitnesi taudia ruaosi do ia aladia mase. Vadaeni ruaosi edia tauanidia be hanua badana ena ariara dekenai do idia hekure noho. Unai gabu be edia Lohiabada idia hasatauroa gabuna. Unai hanua badana ena ladana, parabole dekenai, be Sodoma, o Aigupito. Vadaeni dina toi mai dina kahana, taunimanima idauidau momo, bese idauidau, gado idauidau, kopina idauidau taudia ese unai uitnesi ruaosi edia tauanina do idia itaia noho. Bona taunimanima do idia koua, vadaeni ruaosi edia tauanina idia guria diba lasi. Bona tanobada taudia be idia ruaosi edia mase dainai do idia moale bada. Edia turana ta ta dekenai harihari gaudia do idia henia, edia moale hedinarai toana. Badina korikori be unai peroveta taudia ruaosi ese tanobada taudia idia hahisia bada herea dainai.”​—⁠Apokalupo 11:​7-10.

²⁰ Apokalupo bukana lalonai dagedage gauna be nega 37 idia gwauraia. Nega ginigunana be unai siri lalonai. Gabeai, unai dagedage gauna bona ma dagedage gaudia haida edia anina do ita tahua namonamo. To hari, namona be ita gwau, Satana ese “unai dagedage gauna dikana, guri dobu masemase dekena amo do ia daekau mai” gauna, ia havaraia, ia be politikol karana badana, hari ia noho gauna.b​—⁠Apokalupo 13:1; Daniela 7:​2, 3, 17 itaia danu.

²¹ Lagani 1914 amo ia lao 1918 lalonai, bese badadia be tanobada ibounai tuarina ginigunana lalonai idia vareai. Taunimanima momo ese edia bese idia abia isi, bona lagani 1918 ai, witness taudia rua edia tomadiho inai taudia ese unai nega idia gaukaralaia, edia ura idia havaraia totona. Gavamani ena taravatu dalana idia hagagevaia, Bible Student taudia edia gunalaia taudia idia samania koikoi, idia gwau Gavamani idia hadikaia, bena dibura ai idia negea. Witness taudia rua danu idia gaukara hebou abidadama taudia idia hoa dikadika. Basileia gaukarana be kahirakahira ia ore. Hegeregere, haroro gaukara ia mase vadaeni bamona. Baibel ena negai, mase tauna be guri lalonai idia guria lasi be hemarai gauna badana. (Salamo 79:​1-3; 1 King Taudia 13:​21, 22) Unai dainai, witness taudia rua idia guria lasi dainai, anina be edia ladana idia hadikaia momokani. Palestine be siahu gabuna dainai, bema mase tauanina ta be dala dekenai idia rakatania, dina toi mai dina kahana murinai, ena bonana do ia dika momokani.c (Ioane 11:39 itaia.) Unai hereva ia hahedinaraia, witness taudia rua idia hahemaraia bada herea. Dibura lalonai idia negea taudia, ataiai ai gwauraia taudia, ese kota badana idia noia edia kota do idia karaia lou totona. Unai kota badana idia naria neganai, gwaumaoro idia abia lasi beil monina do idia henia, dibura rumana amo do idia ruhadia totona. Taunimanima vairanai idia hemarai nega sisina daudau lalonai, unai dainai, “hanua badana” idia noholaia taudia dekenai idia be mai bonana dika herea. To unai “hanua badana” be dahaka?

²² Ioane ese gau haida ia gwauraia, unai hanua ena anina do ita diba totona. Ia gwau Iesu be unai hanua dekenai idia hasatauroa. Unai dainai Ierusalem ita laloa guna. To danu ia gwau, unai hanua badana ena ladana be Sodoma bona Aigupito. Vadaeni, Ierusalem hanua korikorina be nega ta idia gwauraia Sodoma, ena kara mirodia dainai. (Isaia 1:​8-​10; Esekiela 16:​49, 53-​58 itaia danu.) Bona nega haida Aigupito, tanobada basileia badana ginigunana, ena anina be inai nega ena tanobada. (Isaia 19:​1, 19; Ioela 3:19) Unai dainai, unai hanua badana ese “Ierusalem” mirona ta ia laulaulaia. Unai Ierusalem ia gwau Dirava ia tomadiho henia, to ena kara ia miro bona ia dika, Sodoma bamona, bona ia be Satana ena tanobada lalonai ia noho, Aigupito bamona. Ia ese Kerisendom​—⁠kara dika Ierusalem hari inai nega lalonai​—⁠ia laulaulaia. Badina momo dainai, unai orea lalonai idia noho taudia idia moale bada, edia maino idia hadikaia witness taudia rua edia uduna idia koua neganai.

Idia Toreisi Lou!

²³ Niuspepa oreadia be tomadiho gunalaia taudia danu Dirava ena orea taudia edia ladana idia hadikaia. Niuspepa ta lalonai ia gwau: “The Finished Mystery bukana ena dokona ia ginidae.” To unai hereva be maoro lasi momokani! Witness taudia be mase dekenai idia noho daudau lasi. “To dina toi mai dina kahana ta ia ore, Dirava ese mauri ena laga idia ruaosi dekenai ia siaia lao, idia lalonai inai laga ia vareai. Vadaeni ruaosi idia toreisi, idia gini. Unai kara idia itaia taudia idia gari bada herea. Unai neganai unai peroveta taudia ruaosi ese gado ta guba dekena amo idia kamonai, ia hereva badabada, idia ia boiboi henia. Ia gwau, ‘Umui daekau mai iniseni.’ Vadaeni idia ruaosi ori ta lalonai guba dekenai idia daekau. Idia badu henidia taudia ese ruaosi idia itaia, idia daekau lao noho.” (Apokalupo 11:​11, 12) Vadaeni, idia dekenai ia vara gauna be Esekiel ese matahanai lalonai ia itaia gauna ta hegeregerena. Esekiel ese koura ta ia itaia. Unuseniai, turia kakorodia idia noho. Iehova ese mauri ena laga be unai turia dekenai ia atoa vareai, bena idia toreisi lou. Unai matahanai ia laulaulaia gauna be inai: Israel besena be lagani 70 lalonai Babulono dekenai idia guia murinai, unai bese idia haginia lou. (Esekiela 37:​1-​14) Hari inai negai, Iehova be lagani 1919 ai iena “mase” witness taudia ia hamauridia neganai, unai peroveta herevadia rua, Esekiela lalonai bona Apokalupo lalonai, idia guguru.

²⁴ Vadaeni, unai dagedage taudia idia hoa dikadika! Karaharaga, unai witness taudia rua edia mase tauanina idia mauri lou bona idia gaukara lou. Tomadiho gunalaia taudia idia lalohisihisi bada. Edia palani be Keristen hesiai taudia haida be dibura rumana lalonai do idia koua, to kota ese unai Keristen hesiai taudia ia ruhaia vadaeni, bona gabeai ia gwau idia edia kerere ta be lasi. Unai dainai unai tomadiho gunalaia taudia edia lalohisihisi ma ia bada herea momokani, badina September 1919 ai, Bible Student taudia ese hebouhebou ta Cedar Point, Ohio, U.S.A. ai, idia karaia. Unuseniai, unai negai dibura amo idia ruhaia tauna, J. F. Rutherford, ese hebouhebou dekenai idia mai taudia edia lalona ia hagoadaia ena hereva badana ta amo, ena sinado be “Basileia Harorolaia,” bona ena hereva momo be Apokalupo 15:2 bona Isaia 52:7 edia hereva amo idia mai. Ioane oreana taudia ese edia “peroveta” gaukara idia hamatamaia lou, anina be haroro gaukara idia karaia. Idia goada idia lao, bona gari lasi danu Kerisendom ena koikoi karana idia gwauraia hedinarai.

²⁵ Kerisendom ese dala ia tahua loulou, lagani 1918 ai ia kwalimu karana do ia karaia lou totona. Taunimanima hutuma ia hagoadadia, Keristen taudia do idia dagedage henia totona, danu gavamani ena taravatu ia hagagevaia, Keristen taudia be dibura dekenai idia negea, bona haida idia alaia mase​—⁠to idia kwalimu lasi! Lagani 1919 murinai, witness taudia rua edia lauma noho gabuna idia hadikaia diba lasi. Unai lagani ai, Iehova be idia dekenai ia gwau: “Umui daekau mai iniseni,” bena lauma dalanai idia goada idia lao. Edia inai taudia ese unai orea taudia idia itaia diba, to idia hadikaia diba lasi. Ioane ia hahedinaraia, idia goada lou neganai hanua badana dekenai dahaka ia vara, ia gwau: “Vadaeni, unai nega korikori, nega tamona, tano mareremarere badana ta ia vara. Unai hanua [ena] kahana 10 dekena amo, kahana ta ia hadikaia ore. Bona tano mareremarere dainai taunimanima 7,000 idia mase vadaeni. Taunimanima oredia, idia mauri noho taudia . . . idia gari dikadika, bona guba ena Dirava ena siahu idia hanamoa bada.” (Apokalupo 11:13) Tomadiho oreadia idia mareremarere, tano ia mareremarere bamona. Idia goada lou Keristen taudia ese edia gaukara idia hamatamaia neganai, toana be hegeregere tano ia mareremarere bamona tomadiho badadia edia gunalaia taudia edia aedia henunai. Edia hanua ena kahana 10 amo, kahana ta, taunimanima 7,000 hegeregerena, be idia mareremarere bada herea dainai, Apokalupo ia gwau idia mase vadaeni.

²⁶ “Hanua [ena] kahana 10 dekena amo, kahana ta” herevana be Isaia ena hereva ta bamona. Ia perovetalaia, idaunegai Ierusalem hanuana idia hadikaia neganai, Ierusalem ena kahana 10 amo kahana ta be garana helagana ta bamona, do ia roho mauri. (Isaia 6:13) Unai hegeregerena, namba 7,000 be Elia dekenai ia vara gauna ta hegeregerena. Ia laloa ia sibona ia kamonai noho Israel lalonai, to Iehova ese ia hamaoroa, taunimanima 7,000 be Baal kaivakukuna dekenai idia do tomadiho lasi. (1 King Taudia 19:​14, 18) Keristen taudia ginigunadia edia negai, aposetolo Paulo ia gwau unai taunimanima 7,000 ese Iesu Keriso ena sivarai namona idia kamonai henia Iuda taudia oredia ia laulaulaia. (Roma 11:​1-5) Unai siri dainai ita lalo-parara, Apokalupo 11:13 ai ia gwauraia “7,000” bona “hanua [ena] kahana 10 dekena amo, kahana ta” edia anina be idia mauri lou witness taudia rua idia kamonai henidia taudia, bena kara dika hanuana idia rakatania. Laulau dalana ai Kerisendom idia masetania. Edia ladana be edia dubu taudia edia lisi amo idia kokia. Kerisendom ena matana ai idia noho lasi bamona.d

²⁷ To edena bamona ‘taunimanima [Kerisendom] oredia ese guba ena Dirava ena siahu idia hanamoa bada’? Momokani, edia tomadiho koikoi idia rakatania lasi, bona Dirava ena hesiai taudia ai idia lao lasi. Vincent ia torea bukana Word Studies in the New Testament lalonai, “guba ena Dirava ena siahu idia hanamoa bada” herevana ena anina be inai bamona ia gwauraia: “Namo lasi ita gwau unai hereva ena anina be Keristen tomadiho lalonai vareai karana, helalo-kerehai, eiava Dirava tanikiu henia karana. Lasi, to ena anina korikori be hamomokania karana. Baibel ena siri momo lalonai ena anina be unai. Ios. vii. 19 (Sept.). Ioane ix. 24; Kara xii. 23; Roma iv. 20.” Kerisendom ia lalohisihisi, badina ena be ia ura lasi, to ia hamomokania Dirava ese iena Bible Student taudia ia hamauridia lou bena Keristen gaukara ia henidia neganai, ia ese kara badana ia karaia.

²⁸ Reana tomadiho gunalaia taudia be edia lalona ai sibona unai idia abia dae. Momokani, idia ta lasi be taunimanima vairanai idia gwau witness taudia rua edia Dirava be Dirava momokanina. To, Iehova be Ioane ena amo ia henia peroveta herevana ese ita ia durua, ita diba edia lalona ai dahaka idia laloa, bona lagani 1919 ai mai hemarai bada herea danu idia hoa dikadika. Unai lagani amo, “taunimanima 7,000” be Kerisendom idia rakatania neganai, ena be idia hekwarahi bada ena mamoe taudia do idia dogoatao totona, to tomadiho gunalaia taudia idia hamomokania Ioane oreana taudia edia Dirava ena goada ese sibodia edia dirava ena goada ia hanaia. Murina laganidia lalonai, edia mamoe taudia momo ese edia dubu idia rakatania neganai, unai gau dekenai idia lalo-parara goevagoeva. Unai be Elia ena negai ia vara gauna ta hegeregerena. Elia ese Baal tomadiho henia taudia ia halusia Karamele Ororona dekenai, vadaeni taunimanima idia gwau: “Iehova be Dirava momokanina! Iehova be Dirava momokanina!”​—⁠1 King Taudia 18:⁠39.

²⁹ To kamonai! Ioane ia gwau: “Dika iharuana be ia ore vadaeni. Ihatoina be kahirakahira do ia mai.” (Apokalupo 11:14) Idia vara vadaeni gaudia ese Kerisendom idia hamarerea bada, vadaeni dahaka do ia karaia, dika ihatoina idia gwauraia neganai, aneru namba 7 ese ena kibi ia hiriria neganai, bona Dirava ena palani hehunina ia guguru neganai?​—⁠Apokalupo 10:⁠7.

[Footnotes]

[Study Questions]

1. Aneru goadana ese Ioane ia hamaoroa, dahaka do ia karaia?

2. (a) Dahaka dubu ia ore lasi to ia noho ema bona hari iseda negai? (b) Dubu lalonai Hahelaga Tauna Badana be daika, bona Helaga Herea Gabuna be dahaka?

3. Tomadiho kalagana lalonai, inai gaudia ese dahaka idia laulaulaia: (a) Helaga Herea Gabuna bona Helaga Gabuna ia hapararaia koua dabuana? (b) animal bouboulaia karadia? (c) boubou patana helagana?

4. (a) Helaga Gabuna ese dahaka ia laulaulaia? (b) Magu lalonai hahelaga taudia edia noho gabuna ese dahaka ia laulaulaia?

5. Heberu Revarevadia edia peroveta hereva lalonai, (a) Ierusalem ena bada ia hahetohoa ena anina be dahaka? (b) Esekiel be matahanai lalonai ia itaia dubuna ia hahetohoa ena anina be dahaka?

6. Ioane idia hamaoroa, dubu bona ia lalonai idia tomadiho hahelaga taudia edia bada ia hahetohoa, bona edia namba ia duahia ena anina be dahaka? Anina oi herevalaia sisina.

7. (a) Dahaka dainai Ioane idia hamaoroa magu ia koua tanona ena bada ia hahetohoa lasi? (b) Edena negai hanua helagana be aena amo idia moia hua 42 lalonai? (c) Kerisendom ena dubu gunalaia taudia be edena bamona Iehova ena taravatu maoromaorodia be hua 42 lalonai idia dadaraia?

8. Tanobada Ibounai Tuarina Ginigunana ia vara neganai, Bible Student taudia momo be dahaka dekenai idia lalo-parara, to dahaka gau dekenai idia lalo-parara namonamo lasi?

9. Hanua helagana, tanobada bese aedia amo idia moia gauna, be dahaka? Tanobada dekenai, daika daika ese unai hanua idia laulaulaia?

10. Iehova ena kamonai witness taudia be aena amo idia moidia noho neganai, namona be dahaka idia karaia?

11. Kamonai horoa Keristen taudia idia peroveta neganai, “puse dabua” idia karaia ena anina be dahaka?

12. Dahaka dainai hanua helagana idia moia negana be reana nega korikorina ta?

13. (a) Witness taudia rua ese horoa Keristen taudia idia laulaulaia. Unai ese dahaka ia hamomokania? (b) Ioane ia gwau witness taudia rua be “olive audia rua bona lamepa rua” bamona. Unai be dahaka Sekaria peroveta herevana hegeregerena?

14. (a) Sekaria ena matahanai lalonai olive audia rua bona lamepa edia anina be dahaka? (b) Tanobada ibounai tuarina ginigunana lalonai horoa Keristen taudia ese dahaka idia davaria?

15. (a) Horoa Keristen taudia idia gwauraia witness taudia rua dainai, ita ese ma dahaka danu ita laloatao? Anina oi herevalaia sisina. (b) Witness taudia rua ese siahu idia abia, dahaka toa idia karaia totona?

16. (a) Lahi be toa lalonai idia gaukaralaia karana, bona Mose ena siahu be Israel lalonai idia hepapahuahulaia negana, be edena bamona idia hegeregere? (b) Tanobada ibounai tuarina ginigunana lalonai, Kerisendom ena tomadiho gunalaia taudia be edena dala ai Bible Student taudia idia tuari henia, bona Bible Student taudia be edena bamona edia dagedage karana idia koua toho?

17. (a) Elia ena negai, edena negai medu ia diho lasi bona lahi ia mai? (b) Lahi be witness taudia rua edia uduna amo edena bamona ia mai, bona dahaka medu lasi negana ia vara?

18. (a) Witness taudia rua be mai edia siahu dahaka do idia karaia totona, bona edia siahu bona Dirava be Mose dekenai ia henia siahuna be edena bamona idia hegeregere bamona? (b) Witness taudia rua idia hahedinaraia dahaka dika be Kerisendom lalonai ia noho?

19. Apokalupo ena hereva hegeregerena, witness taudia rua ese edia haroro idia hadokoa murinai, dahaka ia vara?

20. “Unai dagedage gauna dikana, guri dobu masemase dekena amo do ia daekau mai” gauna be dahaka?

21. (a) Witness taudia rua edia tomadiho inai taudia be edena bamona tuari negana idia gaukaralaia edia ura havaraia totona? (b) Witness taudia rua edia mase tauanina idia guria lasi ese dahaka ia hahedinaraia? (c) Dina toi mai dina kahana ena daudau be edena bamona ita laloa be namo? (Futnout itaia.)

22. (a) Hanua badana be dahaka? (b) Niuspepa be tomadiho gunalaia taudia ida witness taudia rua edia gaukara ena dokona edena bamona idia moalelaia hebou? (Maua itaia.)

23. (a) Dina toi bona kahana murinai, witness taudia rua dekenai dahaka ia vara, bona unai dainai edia inai taudia ese dahaka idia karaia? (b) Apokalupo 11:​11, 12 ena hereva bona Esekiel ena peroveta herevana idia gwau Iehova be koura dekenai idia noho turia kakorodia mauri ena laga ia henidia, be hari inai nega lalonai edena bamona idia guguru?

24. Witness taudia rua idia mauri lou neganai, dagedage tomadiho gunalaia taudia dekenai dahaka ia vara?

25. (a) Edena negai witness taudia rua idia hamaoroa, “Umui daekau mai iniseni,” bona unai be edena bamona ia vara? (b) Witness taudia rua idia mauri lou neganai, dahaka hoa gauna be hanua badana lalonai ia vara?

26. “Hanua [ena] kahana 10 dekena amo, kahana ta” bona “7,000,” Apokalupo 11:​13 lalonai ia gwauraia gaudia, ese daika daika idia laulaulaia? Anina herevalaia sisina.

27, 28. (a) Edena dala amo, ‘taunimanima oredia ese guba ena Dirava ena siahu idia hanamoa bada’? (b) Ena be idia ura lasi, to Kerisendom ena tomadiho gunalaia taudia ese dahaka idia hamomokania?

29. Ioane ia gwau dahaka be kahirakahira ia mai, bona Kerisendom ese dahaka mareremarere do ia davaria?

[Box on page 168]

Apokalupo 11:10 Lalonai Ia Gwauraia Moale Bada

Ray H. Abrams be ena buka, Preachers Present Arms, lagani 1933 ai idia halasia gauna, lalonai ia hahedinaraia tomadiho gunalaia taudia idia badu Bible Student taudia edia buka The Finished Mystery dainai. Tomadiho gunalaia taudia ese Bible Student Taudia bona edia “daihanai gorerena bamona hadibaia herevadia” idia hadikaia ore toho. Unai dainai kota idia karaia bona unai kota ese J. F. Rutherford bona ena bamodia 7 ia siaia dibura rumana dekenai, lagani momo lalonai unuseniai do idia noho totona. Dr. Abrams be ma ia gwau: “Unai kota ena sivarai ibounai ita tahua namonamo neganai, ita diba tomadiho oreadia bona edia gunalaia taudia ese taunimanima idia hagoadaia Russellite taudia edia orea idia hadikaia ore totona. February, 1918 lalonai, Canada ena gavamani taudia be edia palani hegeregerena unai orea taudia idia dagedage henia bona edia buka idia taravatua. The Finished Mystery bukana idia taravatua vaitani. Niuspepa ta, Winnipeg Tribune, ia gwau, . . . edia buka idia taravatua badina ‘tomadiho gunalaia taudia ese gavamani idia noia dainai.’ ”

Dr. Abrams be ma ia gwau: “Kota ia gwau [Bible Student taudia] be lagani 20 lalodiai dibura rumana lalonai do idia noho. Unai neganai, tomadiho niuspepa kahirakahira iboudiai, niuspepa badadia bona maragidia danu, ese unai gau idia moalelaia bada. Tomadiho badadia edia niuspepa iboudiai amo, ta lau davaria diba lasi, [Witness taudia] ia hebogahisi henidia. Upton Sinclair ia gwau, ‘Ita diba momokani, unai dagedage karana . . . ena badina ta be “tomadiho orea badadia” ese [Bible Student taudia] idia inai henia dainai.’ Tomadiho iboudiai ese idia karaia toho gauna to idia hagugurua diba lasi gauna, reana gavamani ese ia karaia guguru unai.” Dr. Abrams ese tomadiho orea edia buka haida edia hereva dika [Witness taudia dekenai] ia gwauraia lou, bena ia gwau Court of Appeals ia gwau kota ginigunana ia kerere. Ia be ma ia gwau: “Tomadiho oreadia ese Court of Appeals ena hereva idia gwauraia lasi.”

[Picture on page 163]

Ioane ese lauma dubuna ena bada ia hahetohoa​—⁠horoa hahelaga taudia ese Dirava ena taravatu idia badinaia be gau badana

[Pictures on page 165]

Serubabele bona Iosua ese dubu idia haginia lou. Unai ia hahedinaraia Lohiabada ena dina ia matamaia neganai, Dirava ena orea taudia be momo lasi, to gabeai Iehova ena Witness taudia edia namba do ia bada daekau. Laulau dekenai idia noho rumadia, Brooklyn, New York, dekenai idia habadaia, edia gaukara do idia karaia namonamo totona.

[Pictures on page 166]

Mose bona Elia ena peroveta gaukarana ese witness taudia rua edia gaukara, lahi bamona hahemaoro herevadia idia harorolaia gaukarana unai, ia laulaulaia

[Pictures on page 169]

Esekiela karoa 37 ese ia gwauraia turia kakorodia bamona, hari inai negai witness taudia rua ese mauri idia abia lou, haroro gaukara do idia karaia totona