Keriso Tuari Henia Tauna
Anina: Keriso tuari henia taudia be inai: Baibel ena hereva Iesu Keriso dekenai bona iena Basileia idia dadaraia taudia, bona ia murinai idia raka taudia idia hadikadia taudia. Danu, bema taunimanima eiava orea eiava bese idia koikoi, idia gwau idia be Keriso ena gwaukau taudia eiava Mesia dagina idia abia, idia danu be Keriso tuari henia taudia.
Baibel ese Keriso tuari henia tauna tamona sibona ia gwauraia, a?
1 Ioane 2:18: “Lauegu natuna e, nega ena dokona be kahirakahira inai. Umui kamonai vadaeni, Keriso dekenai Tuari Henia Tauna be do ia mai. To Keriso idia tuari henia taudia momo idia mai guna vadaeni. Unai dainai ita diba inai nega ena dokona be kahirakahira.”
2 Ioane 7: “Koikoi taudia momo be tanobada gabu ibounai dekenai idia loaloa noho, idia gwau Iesu Keriso be taunimanima edia tauanina dekenai ia mai lasi. Idia be koikoi taudia, bona Keriso idia tuari henia noho.”
Keriso tuari henia tauna be nega vairai mo do ia ginidae, a?
1 Ioane 4:3: “Tau ta bema ia gwau Iesu be tauanina dekenai ia mai lasi neganai, unai tau ese Dirava ena Lauma ia abia lasi. Lasi momokani. To ia ese ia abia laumana be Keriso dekenai ia Tuari Henia Tauna ena. Umui kamonai vadaeni ia be do ia mai. Bona ia be harihari tanobada dekenai ia noho.” (Lagani 98 C.E. ai Ioane ese unai hereva ia torea.)
1 Ioane 2:18: “Keriso idia tuari henia taudia momo idia mai guna vadaeni. Unai dainai ita diba inai nega ena dokona be kahirakahira.” (Ioane ena hereva “nega ena dokona” anina be, aposetolo edia nega ena dokona. Unai negai Ioane ia buruka momokani, bona aposetolo oredia idia mase vadaeni.)
Keriso tuari henia taudia haida be inai:
Idia gwau Iesu be Mesia korikorina lasi taudia
1 Ioane 2:22: “Koikoi tauna be daika? Tau ta, bema ia gwau Iesu be Keriso [Mesia, horoa tauna] lasi, unai tau be koikoi tauna, ani? Unai tau be Keriso ia tuari henia noho.”
Idia gwau Iesu be Dirava ena Natuna tamona sibona lasi taudia
1 Ioane 2:22: “Unai tau be Keriso ia tuari henia noho. Ia ese Tamana bona Natuna danu ia negea noho.”
Ioane 10:36; Luka 9:35 itaia danu.
Hereva momokani idia rakatania taudia
1 Ioane 2:18, 19: “Keriso idia tuari henia taudia momo idia mai guna vadaeni. . . . Inai taudia ese iseda orea idia rakatania. To guna idia be iseda taudia korikori lasi, unai dainai ita dekena amo idia raka siri.”
Keriso murinai idia raka taudia korikoridia idia inai henidia taudia
Ioane 15:20, 21: “Bema idia ese lau dekenai idia dagedage henia, umui dekenai danu do idia dagedage henia. . . . To inai kara ibounai do idia karaia umui dekenai umui be lauegu dainai.”
Keriso ena King dagina idia dadaraia eiava idia koikoi idia gwau idia sibodia be Mesia dagina idia abia, taudia bona besedia
Sal. 2:2: “Tanobada pavapavadia e gini toremu, bona lohia taudia na e henega boumu; Iehova bona ia ese e horoa tauna [Keriso, Mesia] na idia ese e inai henidiamu.”
Apokalupo 17:3, 12-14; 19:11-21 itaia danu.
Mat. 24:24: “Keriso koikoi taudia bona peroveta koikoi taudia do idia toreisi, toa bona hoa gaudia do idia hedinaraia. Inai bamona do idia karaia, Dirava ia abia hidi taudia do idia hakaua kerere totona, bema mai dalana.”