“Dirava Do Umui Gari Henia, Ia Do Umui Hanamoa Bada”

“Dirava do umui gari henia, ia do umui hanamoa bada.”​—APOKALUPO 14:7.

1. Daidia ita gari henidia be namo, bona daidia ita gari henidia be namo lasi?

DAIKA ita gari henia be namo? Huala kakakakana, Satana, bona ena demoni hutuma ita gari henidia lasi! Lagani 1914 ai Basileia ia vara, bena Keriso Iesu ese idia na guba amo ia negedia diho. Tanobada ai Satana ese Dirava ena palani koua totona ia gaukaralaia oreana be Apokalupo ena matahanai ese idia hahedinaraia. Inai matahanai lalonai dagedage gaudia rua bona ia kekero ariara hahinena, Babulono Badana unai, idia hedinarai. Ita gari henidia be namo a? Lasi! Namona be Iehova bona iena Keriso ita gari henidia. Edia Basileia ese Satana ena tanobada oromana dikana kota henia karana ginigabena ia karaia hari.—Hereva Lada-isidia 1:7; Mataio 10:28; Apokalupo 12:​9-12.

Dirava ena Ladana Hadikaia Dagedage Gaudia

² Apokalupo ena matahanai namba 8 ia hedinarai neganai, dagedage gauna ta be tanobada besedia edia davara mai ena hurehure momo amo ia daekau. Iena kwarana be 7 bona ena doana be 10 mai edia kwara gaudia 10. Unai kwara gaudia be Satana ia henia lohia siahuna ena toana. Iehova ena ladana ia hadikaia, bona leona o bea bamona ia ese iena hesiai taudia ia hadikadia; to iena siahu, hari huala Satana ena amo ia abia siahuna, be do ia noho daudau lasi. Idau negai, peroveta tauna Daniel ia gwau tanobada ena politikol oreadia be dagedage gaudia bamona, bona gavamani momo ese dagedage gaudia idia abia hidi, edia bese edia toadia ai idia halaoa; unai hegeregerena, Britain ese leona ia abia hidi bona America ese ugava ia abia hidi. (Daniel 8:​5-8, 20-22) To hari, animal idauna ta ita itaia, ia lalonai animal idauidau idia hakapua. Ia ese Dirava ena hesiai taudia korikoridia tanobada ai idia hahisidia gavamanidia iboudiai ia laulaulaidia. Unai gavamani badadia o “kwarana” haida be inai: Aigupito, Asuria, Babulono, Mede-Parasa, Greece, Roma, bona Britain bona America edia Basileia Badana.​—Apokalupo 13:​1, 2; 12:​3, 7-9.

3. (a) Dagedage gauna ena kwarana ta ese tuari kaia berona na edena bamona ia abia? (b) Dagedage gauna mai ena doana rua ese dagedage gauna ginigunana ena laulau karaia gaukarana na edena bamona ia gunalaia? (c) Dagedage gauna ginigunana ena ladana be dahaka, bona unai ladana ena anina be dahaka?

³ Lagani 1914 ema bona lagani 1918 lalonai idia karaia tuarina lalonai, Great Britain, basileia badana namba 7, be tuari kaia berona ia abia, mase berona unai. To United States of America ese ia hamauria. Unai negana amo ema bona hari, America bona Britain idia heduru heheni bona basileia badana ta idia lohiaia hebou. Ioane ia gwau, idia be dagedage gauna ta mai ena doana rua, “tano ena lalona dekena amo ia daekau,” anina be idia gini goada besedia edia amo ia vara. Inai dagedage gauna mai ena doana rua ese tanobada taudia ia gunalaidia, dagedage gauna ginigunana ena laulau karaia bona mauri ena laga be ia lalonai hiriria vareai karadia dekenai. Unai ena anina be, Britain bona America ese League of Nations bona iena gabu ia abia oreana, United Nations, haginia gaukarana idia gunalaia. Dagedage gauna ginigunana be mai ena namba​—666. Inai namba 6 be namba goevadaena lasi. Bible lalonai 7 be namba goevadaena. Unai dainai nega toi 6 idia torea ena anina be, hari inai negai idia lohia taudia idia goevadae lasi momokani. Ena be Iehova ena Witness taudia ese tanobada gavamanidia idia matauraidia bona edia taravatu idia badinaia, to “dagedage gauna” eiava ena laulau tomadiho henia karana idia dadaraia mai edia boga-auka ida.​—Apokalupo 13:​3-18; Roma 13:​1-7.

Dirava Gari Henia​—Dahaka Dainai?

⁴ Ma gau idauna ta do ita herevalaia hari. Matahanai namba 9 lalonai Mamoe ena Natuna ia hedinarai. Siona Ororona ai ia gini bona ia ida taunimanima 144,000, taunimanima bogaragidia amo ia hoidia taudia ginigunadia unai, be idia gini. Ena be idia haida be tanobada ai idia do gaukara noho, to lauma dalanai idia iboudiai, 144,000, be “Siona ororo kahirakahira [idia] ginidae vadaeni. . . . Inai gabu ena ladana be Ierusalema, guba dekenai.” (Heberu 12:22) Danu, tau badadia 24 idia hedinarai, Dirava ena terona vairanai idia gini. Unai be maoro, badina be idia ese unai horoa taudia idia laulaulaidia​—idia toreisi vadaeni bona lohia taudia bona hahelaga taudia ai idia lao vadaeni neganai. Unai taunimanima 144,000 be “ane matamatana” idia abia, badina be Dirava ese tanobada amo idia mo sibodia ia hoidia, Basileia abia taudia ai idia lao totona. Hutuma bada herea danu ese “Iehova dekenai ane matamatana [idia] abia,” to idia abia badina edia helaro be mauri hanaihanai tanobada dekenai do idia abia, Basileia ese do ia lohiaia neganai.​—Apokalupo 7:9; 14:​1-5; Salamo 96:​1-10; Mataio 25:​31-34.

⁵ Inai matahanai lalonai ma gau haida idia hedinarai. Ioane ese aneru ta ma ia itaia, guba padanai ia roho. Sivarai namo hereana ia harorolaia! Ia be noho hanaihanai sivaraina namona, badina unai sivarai be, hari inai kota negana lalonai Dirava idia badinaia taudia iboudiai, bese iboudiai, iduhu iboudiai, bona gado iboudiai amo, ese mauri hanaihanai do idia abia diba. Namona be inai Dirava hereadaena ita tomadiho henia bona ita hanamoa, badina ia ese Ioane ia gwauraidia dagedage gaudia ia hereadia momokani, ani? Ia be guba bona tanobada ia karaia Diravana. Idia noho gaudia iboudiai​—mauri gaudia bona mauri lasi gaudia​—edia badina be Ia. Unai dainai aneru ia hereva badabada ia gwau: “DIRAVA DO UMUI GARI HENIA, IA DO UMUI HANAMOA BADA”! Tanobada hegegemadai unai aneru ena gadona idia kamonai, bona Iehova ena Witness taudia ese ena hereva idia gwauraia loulou taunimanima iboudiai dekenai, gado 200 bamona lalodiai.​—Apokalupo 14:6, 7; Isaia 45:​11, 12, 18.

Babulono Badana ena Moru

⁶ Ma aneru ta ia hedinarai. Hoa herevana ia harorolaia, ia gwau: “Babulono badana be ia moru vadaeni, oibe, unai hanua badana ia dika vadaeni. Oibe, Babulono ese bese ibounai iena uaina aukana ia henidia, ia hakaudia kerere, vadaeni iena heudahanai karadia idia karaia.” (Apokalupo 14:8) Babulono Badana, bese iboudiai edia lalona ia ania diba bona ia hakekerodia diba hahinena, be daika?

7. Babulono Badana be dahaka, bona edena bamona ia bada ia lao?

⁷ Babulono hanuana gunana be tomadiho koikoi ena badina, iena amo tomadiho koikoi be tanobada hegegemadai ia lao bona ia be demoni ese idia biagua basileiana badana ai ia lao, ena ladana idia hatoa “Babulono badana.” Gabeai, unai tomadiho basileiana lalonai Roma be siahu bada ia abia, bona iena siahu henunai Keristen tomadiho koikoina ia vara. Ema bona hari Roma ese Babulono tomadihona ia gunalaia, tanobada ibounai lalonai. Lagani 1986 ai unai ia hedinarai goevagoeva: Roma ena pope ese tanobada ena tomadiho oreadia edia gunalaia taudia ia boiridia, ia ida, Assisi dekenai, Roma kahirakahira dekenai, do idia hebou, Bese Iboudiai edia Maino Laganina, United Nations ese ia gwauraia laganina, do idia gurigurilaia totona.

8. (a) Babulono Badana be edena bamona ia moru, bona edena nega amo iena moru ia hedinarai? (b) Dahaka ese ia hahedinaraia tomadiho gunalaia taudia edia guriguri maino abia totona be Dirava ese ia haerelaidia lasi?

⁸ To, Babulono Badana be ia moru vadaeni! Lagani 1919 amo ema bona harihari, tanobada hegegemadai, tomadiho koikoi badinaia taudia edia momo be ia maragi ia lao. Dirava idia dadaraia komiunis gavamanidia ese tanobada ena kahana badana idia biagua hari. Sikuli ai, evolusen herevana, taunimanima be animal amo idia vara herevana, idia hadibadia, to unai be Dirava ena Hereva bamona lasi. Europe ai, taunimanima haida sibodia be Protestant dubudia dekediai idia lao, bona pope ia loaloa momo bona iena Katolik basileiana ia hagoadaia toho, do ia parara garina. Tanobada ena tomadiho oreadia idauidau iboudiai be edia dirava momo herea idia guriguri henidia, to idia vara gaudia ese idia hahedinaraia idia haere henidia lasi. Buka ta, World Military and Social Expenditures 1987-88 lalonai, Ruth L. Sivard ia gwau: “Lagani 1987 ai tuari 22 idia tuarilaia; gunaguna amo ema bona hari, lagani tamona lalonai unai bamona ia vara lasi. Unai tuari lalodiai idia mase taudia be 2,200,000​—bona haraga herea unai namba be ia bada ia lao.” Unai guriguri hebouna, Assisi dekenai idia karaia, ese anina namona ia havaraia lasi! To unai hebou laloatao totona, lagani 1987 ai pope ese siliva monina ta ia karaia, unai moni ena kahana ta ai be sibona ena laulau ia hedinarai bona kahana ma ta ai be unai guriguri hebouna ena toana ta ia hedinarai. “Idia gwau, ‘Maino! Maino!’ maino be lasi neganai.”​—Ieremia 6:14.

Babulono ena Heudahanai Idia Hahedinaraia

⁹ Apokalupo 14:8 ese ia hahedinaraia Babulono Badana be heuhadanai hahinena. Ena haroro taudia edia lebulebu karadia edia sivarai be dika rohoroho. TV dekenai idia haroro taudia ese edia orea taudia amo kina milion momo herea idia veria vadaeni, bona unai bamona idia karaia negana lalonai idia heudahanai, hemarai lasi. Philadelphia, Pennsylvania dekenai, magasin ta, The Beacon Journal, January 3, 1988 gauna, ese Katolik fada taudia ia herevalaidia, ia gwau: “United States lalonai, hanaia laganidia 5 lalodiai, Katolik fada taudia ese memero kekeni handred momo dekenai kara bodaga idia karaia dainai, edia tamadia sinadia, bona doketa, pulisi, bona loia danu be idia gwau, unai natu edia lalona idia hisihisi bada herea unai kara dainai.” Kara bodaga ese Babulono Badana ena haroro taudia momo edia ladana ia hadikaia vadaeni.

10. Apokalupo 18:3 lalonai ia gwauraia “matabodaga karadia,” Babulono Badana ena, be dahaka? (b) Apokalupo 18:24 ena hereva hegeregerena, dahaka dainai Babulono Badana ena haroro taudia be mai edia kerere rara dekenai?

¹⁰ “Iena heudahanai baduna ena uaina” ena anina be, tomadiho koikoi oreadia ese lohia taudia idia tura henidia, edia politikol karadia bona edia tuari idia durudia, bona taunimanima idia haganidia, dagedage gauna ena gavamani ta ta do idia tomadiho henidia. Nega momo politikol taudia idia davaria, tomadiho idia gaukaralaia diba edia ura gaudia abia totona; unai hegeregerena, lagani 1933 ai Hitler be Roman Katolik Dubu Oreana ena hedikwota ladana Vatican ida gwauhamata ta idia karaia, bona Franco bona Katolik dubu orea gunalaia taudia idia heduru heheni, tuari ta ladana Spanish Civil War be lagani 1935 bona 1936 lalodiai idia karaia neganai. Tanobada Ibounai Tuarina Iharuana idia karaia neganai, Katolik, Protestant, Buddhist, bona tomadiho oreadia idaudia edia haroro taudia idia ura bada sibodia edia bese na tuari lalonai do idia durudia, bona unai ura dainai idia kara hegeregere idia kekero bamona. Lagani 1914 amo ema bona hari, tuari lalodiai idia mase tuari taudia bona hanua taudia edia rara dekenai, unai tomadiho gunalaia taudia be mai edia kerere. Fascist taudia bona Nazi taudia idia durudia tomadiho gunalaia taudia be mai edia kerere rara dekenai, badina idia durudia taudia ese Iehova ena Witness taudia bona taunimanima ma haida danu idia hamasedia o dibura kamepadia ai idia koudia dainai idia mase.​—Ieremia 2:34; Apokalupo 18: 3, 24, NW.

11. (a) Horoa Keristen taudia bona hutuma bada herea idia ura lasi dahaka do idia tomadiho henia? (b) Edena helaro namodia dainai Dirava ita gari henia bona ita hanamoa?

¹¹ Hanaia laganidia 74 lalodiai, kamonai horoa Keristen taudia, bona idia momo idia lao hutuma bada herea taudia, ese DIRAVA IDIA GARI HENIA BONA IDIA HANAMOA noho. Ita gini goada, dagedage gauna ena politikol oreana ta ita tomadiho henia lasi. Ita ese dagedage gauna ena laulau​—League of Nations bona UN​—ita hanamoa lasi, badina ita diba “eda Lohiabada [Iehova] bona ena Keriso edia basileia” sibona ese maino bona noho namona korikorina ia havaraia diba. Iseda lalona ita hadaia vadaeni, ‘Dirava ena taravatu do ita badinaia, bona Iesu do ita abidadama henia mai eda momokani danu.’ Bema ita haheauka, davana namona do ita abia! Horoa Keristen taudia, “Lohiabada idia abidadama henia noho neganai idia mase taudia be do idia moale,” badina be “edia kara namodia ena sivarai be idia danu nega tamona ia lao noho.” Taunimanima ma haida, hutuma bada herea bogaragidiai, bema dagedage dainai, o gorere dainai, o aksiden dainai idia mase, idia be Dirava idia tura henia dainai, “tanobada matamatana” lalonai do idia toreisi lou haraga. Unai helaro namodia ita abia dainai, DIRAVA ITA GARI HENIA BONA ITA HANAMOA be namo.​—Apokalupo 11:​15, 17, NW; 12:10; 14:​9-13; 21:1.

12. Uma ena anina gogoa gaukaradia ruaosi be dahaka dahaka, bona Iesu be edena negai ia karaia?

¹² Hahemaoro negana lalonai, aneru ese uma ena anina gogoa gaukarana rua idia boiboilaia. Gogoa Tauna ginigunana be Iesu; lagani 1914 ai Pavapava dagina Basileia lalonai ia abia, ori kurokurona ta ai ia helai, bona ia be “Taunimanima ena Natuna” bamona. Hari inai negai, Lohiabada ena dina ai, tanobada ena anina ia gogoa; horoa Keristen taudia oredia ia gogodia guna, bena gabeai hutuma bada herea taudia ia gogodia. (Mataio 25:​31-34 itaia; Ioane 15:​1, 5, 16.) Gogoa gaukarana iharuana be idau. Ia be “tanobada ena vain huahua” gogoa bena “moia gabuna badana, semensi tanika bamona gauna lalonai . . . negea vareai” gaukarana. Aramagedono ai, davana henia neganai, unai gaukara do idia karaia; taunimanima dikadia do idia kokidia bona edia kara dikadia, huahua dikana bamona, do idia moia patapata. Iehova ese inai vain dikana na tanobada amo do ia kokia neganai, ena ladana do idia hanamoa be namo!​—Apokalupo 14:​14-20; 16:​14, 16.

Iehova ena Kara be “Maoromaoro bona Momokani”

¹³ Apokalupo ena matahanai namba 10 lalonai, Dirava ena terona vairanai guba lalonai idia vara gaudia ita itaia lou. Iehova vairanai idia moale bada herea! Mase amo idia toreisi lou vadaeni horoa taudia​—DIRAVA IDIA GARI HENIA BONA IDIA HANAMOA dainai idia kwalimu taudia unai​—ese “Mose ena ane idia abia, bona Mamoe ena Natuna ena ane danu”; idia gwau: “Lohiabada Dirava e, Siahu Ibounai Diravana e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani. Lohiabada e, daika ese oi do ia gari henia lasi? Daika ese oiemu ladana do ia hanamoa lasi? Badina be oi sibona be helaga. Bese ibounai oi dekenai do idia mai, oi do idia tomadiho henia. Badina be oiemu kara maoromaoro be ibounai idia itaia vadaeni.” Inai matahanai ese ia hahedinaraia hegeregerena, Dirava ena hahemaoro be maoromaoro bona momokani. Aneru ese Dirava ena badu ai idia honu disidia 7 idia bubudia, bena bese iboudiai be Aramagedono dekenai idia hebou bona “Dirava ese unai Babulono badana ia laloa”! Unai dainai, namona be aneru ena boiboi hegeregerena DIRAVA ITA GARI HENIA BONA ITA BADINAIA.​—Apokalupo 15:1–16:21.

14. Matahanai namba 11 bona 12 lalodiai, Babulono Badana ese dahaka ia karaia, bona dahaka dainai ita rakatania haraga be namo?

¹⁴ Apokalupo lalonai, nega momo Babulono Badana ia gwauraia. Matahanai namba 11 bona 12 lalodiai ia be mai anina bada. “Ranu momo latadiai ia helai,” taunimanima ia biagudia, bona ena hahediba herevadia koikoidia bona dikadia amo taunimanima ia hakekerodia. “Dirava ena taudia edia rarana” ia inua dainai ia kekero, dagedage karadia amo ia hamasedia taudia unai, bona “tanobada dekenai idia alaia mase taudia ibounai edia rarana” dekenai ia be mai ena kerere, badina tuari ia havaradia dainai. Ia be bisinesi badadia oreadia ida idia gaukara hebou bona ena orea taudia amo moni bada ia veria dainai, dala dikana amo ia taga. Ena kerere badana be inai: Politikol taudia ia tura henidia, bona UN​—maino bona noho namona ia havaraia gwauraia dagedage gauna​—biagua karana lalonai dagi badana ia tahua. To kahirakahira, unai dagedage gauna ena doana mai edia tuari oreadia ese do idia hadikaia bona do idia haorea vaitani. Namona be harihari, DIRAVA IDIA GARI HENIA BONA IDIA HANAMOA TAUDIA ese idia rakatania, “badina be iena kara dikadia be momo herea momokani, ororo bamona idia daekau lao ela bona guba dekenai. Bona Dirava ese iena kara dikadia do ia laloaboio lasi.”​—Apokalupo 17:​1, NW–18:24.

15. Ariara hahinena ia ore murinai, daidia do idia hanamoa, bena dahaka moale gauna ma ta do ia vara?

¹⁵ Iehova be mai ena maoromaoro ida Babulono Badana ia hahemaoro henia dainai, do idia hadikaia ore. Iehova ena kara dainai idia moale taudia do idia boiboi, do idia gwau “Aleluia!” bona do idia gwau, hahemauri bona hairai bona siahu be Iehova dekenai idia noho. Guba ai do idia boiboi guna bena tanobada ai danu. “Umui taunimanima e, Iehova umui hanamoa!” idia boiboilaia neganai, idia hahedinaraia idia moale dikadika, badina ariara hahinena badana ia hadikaia ore ela bona hanaihanai. To guba lalonai moale gauna idauna ta ia vara​—Mamoe ena Natuna, Keriso Iesu, bona ena hahine matamatana, idia kwalimu kamonai taudia 144,000, edia headava unai! Guba ena boiboi bada bamona, “Iehova iseda Dirava, Siahu Ibounai Diravana” idia hanamoa mai edia gado bada ida, idia gwau: “Do ita moale, do ita moale bada, ia sibona do ita hanamoa, badina be Mamoe ena Natuna ena headava negana ia ginidae vadaeni, bona ena adavana ia hegaegae vadaeni”!​—Apokalupo 19:​1-10, NW.

16. Matahanai namba 13 hegeregerena, edena hepapahuahu do idia hadokoa, bona edena bamona do idia hadokoa?

¹⁶ To, unai headava be guba lalonai idia do karaia lasi neganai, Iehova ena lohia siahuna, Satana ese ia hepapahuahulaia gauna, do idia hamomokania dalana be matahanai namba 13 ese ia hahedinaraia. King iboudiai edia King bona lohiabada iboudiai edia Lohiabada, Iesu, ese “taunimanima ia kota henidia,” bona “tuari ia karaia neganai, ia be mai kara maoromaoro danu ia karaia noho,” bona Siahu Ibounai Diravana ena badu siahu dikadika vain huahua moia gabuna ai ia moidia tao; unai ia karaia neganai, aneru hutuma ese idia bamoa. Satana ena tanobada oreadia oredia iboudiai idia moidia patapata! (Apokalupo 19:​11-21) Apokalupo ena matahanai amo unai kwalimu karana ita itaia neganai, momokani, DIRAVA ITA GARI HENIA BONA ITA HANAMOA be mai badina korikorina!

Dirava Hanamoa ela bona Hanaihanai

¹⁷ Apokalupo ena matahanai namba 14 bona 15 ese DIRAVA IDIA GARI HENIA BONA IDIA HANAMOA taudia dekenai do ia vara gauna idia hahedinaraia. Aneru ta ese Satana mai ena demoni ida be guri dobu masemasena lalonai do ia koudia lagani 1,000 lalodiai, bena guba lalonai Mamoe ena Natuna bona ena hahine edia headava do idia karaia, bena unai pavapava bona hahelaga taudia 144,001 be lagani 1,000 lalodiai do idia lohia bona taunimanima do idia durudia idia goevadae idia lao totona. Hahetoho ginigabena murinai, DIRAVA IDIA GARI HENIA BONA IDIA HANAMOA noho taudia do idia kwalimu bona mauri hanaihanai do idia abia. Idia milion momo herea be mase amo idia toreisi lou taudia, “ladana bada taudia bona ladana maragi taudia,” edia kara dainai Dirava ese edia ladana be mauri bukana lalonai ia torea taudia. Ita diba momokani “guba matamatana bona tanobada matamatana” ese hahenamo momo herea na taunimanima dekenai do idia mailaidia, badina ‘gau ibounai do ia karaia matamata’ Diravana, Iehova be ia gwau: “Harihari inai hereva do oi torea, badina ia be maoromaoro bona momokani vadaeni, bona inai hereva do umui abidadama henia diba.”​—Apokalupo 20:1–21:8.

18. Matahanai namba 16 hegeregerena, Apokalupo bukana ese ia gwauraia gauna badana be dahaka?

¹⁸ Matahanai namba 16 lalonai, Apokalupo ese ia gwauraia gauna badana ia hedinarai. Unai be dahaka? Ia be hanua ta. Unai hanua, Ierusalem Matamatana, be tanobada ai taunimanima ese idia haginia hanuana ta bamona lasi, ia be idau vaitani. Babulono Badana hanuana be ma ia idau​—ia lalonai idia noho taudia ese hereva momokani idia rakatania, idia kara bodaga, bona lauma dalanai politikol taudia ida idia heudahanai, bona unai kara amo Dirava ena ladana idia hadikaia momokani. Hanua helagana be ia goeva, ia be Dirava ese ia ura henia bada gauna. Ia be Mamoe ena Natuna ena adavana matamatana; ia do ia durua, mauri hanaihanai na taunimanima do ia henidia totona. (Ioane 3:16) Unai dainai idia boiboi badabada bona idia boiboi goevagoeva, idia gwau, Babulono Badana, koikoi hanuana, amo do umui raka lasi!​—Apokalupo 18:4; 21:9–22:5.

19. (a) Headava matamata hahinena oreana amo Dirava ese taunimanima ia boiridia dahaka idia karaia totona, bona unai dainai lalo-manau taudia be dahaka idia karaia? (b) Inai hahegani, “Dirava do umui gari henia, ia do umui hanamoa bada,” bema ita badinaia, dahaka do ita davaria?

¹⁹ Iehova ena lauma mai siahuna be headava hahinena matamatana oreana amo ia boiboi, ia gwau: “Oi mai!” Oibe, umui lalo-manau taudia, tanobada paradaisona lalonai mauri hanaihanai umui ura henia taudia e, “mauri ranuna ena sinavai” dekenai umui mai, mauri hanaihanai do umui abia totona Iehova ese Keriso bona ena hahine matamatana amo umui ia henia gaudia umui abia dae! Helaro namona be inai​—mauri goevadaena tanobada paradaisona lalonai do umui abia diba! Inai hahegani, “DIRAVA DO UMUI GARI HENIA, IA DO UMUI HANAMOA BADA” idia kamonai henia taudia ese unai davana namona do idia davaria!​—Apokalupo 22:​6-21.

EMU HAERE BE DAHAKA?

□ Matahanai ta lalonai dagedage gaudia rua idia hedinarai; unai matahanai ese dahaka ia hadibaia ita dekenai?

□ Guba padanai ia roho aneruna ese ia harorolaia sivaraina dainai, edena bamona ita kara be namo?

□ Babulono Badana ena heudahanai karadia be dahaka, bona Dirava idia gari henia taudia ese unai edena bamona idia laloa?

□ Lohiabada ena dina lalonai tanobada ena anina be edena bamona ia gogoa?

□ Apokalupo ena hereva gabedia ese dahaka moale gaudia idia herevalaia, bona Dirava ena orea taudia ese unai hahenamo edena bamona do idia davaria diba?

2. Matahanai namba 8 lalonai, edena dagedage gauna ia hedinarai, bona dahaka ia laulaulaia?

4. (a) Ioane ese daidia ia itadia Siona Ororona dekenai idia gini, bona Dirava ena terona vairanai idia gini tau badadia 24 ese daidia idia laulaulaidia? (b) Horoa taudia ese idia abia “ane matamatana” bona hutuma bada herea ese idia abia “ane matamatana” be edena bamona idia idau?

5. Guba padanai ia roho aneruna ese edena sivarai ia harorolaia, bona dahaka dainai unai be noho hanaihanai sivaraina? (b) Aneru ese edena hahegani ia boiboilaia badabada, bona dahaka dainai unai hahegani be mai anina bada?

6. Aneru ma ta ese edena hoa sivaraina ia harorolaia?

9. Babulono Badana ena haroro taudia ese edena lebulebu karadia idia karaia dainai edia sivarai be dika rohoroho?

13. (a) Matahanai namba 11 lalonai, idia toreisi lou vadaeni horoa taudia ese edena ane idia abia, bona ena hereva be dahaka? (b) Hari matahanai lalonai, Dirava ena hahemaoro maoromaoro be edena dala amo ia hahedinaraidia goevagoeva?

17. Matahanai namba 14 bona 15 hegeregeredia, Dirava idia gari henia bona idia hanamoa taudia ese dahaka do idia davaria?

[Picture on page 27]

Inai medolo, kapa amo idia karaia gauna, be October 1987 ai idia karaia, Assisi ai idia karaia Maino Gurigurina idia laloatao totona. Ena kahana ta ai be “Tamana Helagana” ena laulau ia noho bona isena ai inai hereva idia torea: “John Paul II Pontifex Maximus” bona hua bona lagani idia torea danu. Kahana ma ta dekenai “Saint Francis” ia noinoi, “Dirava ena Harihari Gauna, Maino” be Maino Gurigurina Hebouhebouna dekenai do idia abia, Assisi dekenai,