Duahiduahi Karana Oi Goadalaia
“Buka Helaga taunimanima dekenai do oi duahia, sisiba goada do oi henidia, bona hadibaia gaukara do oi goadalaia noho, ela bona lau ginidae.”—1 TIMOTEO 4:13.
IEHOVA DIRAVA ese diba be taunimanima dekenai ia henia, duahiduahi bona toretore do idia dibaia totona. Ia ese ena Hereva, Baibel, ia henia danu, ita do ia hadibaia namonamo totona. (Isaia 30:20, 21) Baibel ena rau ese ita idia durua, dala ta ai ita be iduhu kwaradia, Aberahamo, Isako, bona Iakobo, Dirava gari henia taudia, ida ita “raka” totona. Ita be Dirava badinaia hahinedia, hegeregere Sara, Rebeka, bona Moaba hahinena, Ruta, ita “itaia” diba. Oibe, bona Iesu Keriso be ororo ai ia henia haroro herevana ita “kamonai” diba. Bema ita be duahiduahi namonamo diba taudia, unai moale bona hahediba ibounai be Buka Helaga amo ita abia diba.
2 Momokani, tau goevadaena Iesu Keriso ia duahiduahi goevagoeva diba, bona Heberu Revarevadia ia diba goevagoeva danu. Unai dainai, Diabolo ese ia dibagania neganai, Iesu ese ia gwauraidia loulou, ia gwau: “Buka Helaga lalonai ia torea vadaeni.” (Mataio 4:4, 7, 10) Nega ta Nasareta ena dubu lalonai, Isaia ena peroveta herevana ena kahana ta be taunimanima vairadiai ia duahia bona ia gwau unai hereva be ia dekenai ia momokani. (Luka 4:16-21) Iesu ena aposetolo taudia be edena bamona? Edia toretore lalonai, nega momo Heberu Revarevadia idia torea hanai. Ena be Petero bona Ioane be Heberu taudia edia sikuli badadia ai idia sikuli lasi dainai Iuda lohiadia idia laloa idia be sikuli bada lasi bona aonega bada lasi taudia, to Dirava ena lauma amo idia torea revarevadia ese idia hahedinaraia goevagoeva idia duahiduahi bona idia toretore namonamo diba. (Kara 4:13) To ta ia duahiduahi diba be mai anina bada, a?
“Ia Duahia Tauna be Do Ia Moale”
3 Ta ese diba maorona be Baibel amo ia abia bona ia badinaia dainai, mauri hanaihanai ia abia diba. (Ioane 17:3) Unai dainai Iehova ena Witness taudia idia diba Buka Helaga bona Keristani bukadia, Dirava ese ena hesiai tauna mai ena kamonai bona mai ena kara maoromaoro oreana, horoa Keristani taudia, edia amo ia henidia gaudia, idia duahia bona idia stadilaia be gau badana. (Mataio 24:45-47) Momokani, Watch Tower oreana ese ia karaia namonamo bukadia haida amo, taunimanima tausen tausen be duahiduahi idia dibaia vadaeni, bona unai amo mauri ia henia dibana be Dirava ena Hereva amo idia abia.
4 Dirava ena Hereva duahia, stadilaia, bona badinaia karadia amo moale ita abia. Unai be momokani, badina be unai kara amo Dirava ita hamoalea bona ita hanamoa, iena hahenamo ita abia, bona moale ena mamina ita abia. Iehova ia ura ena hesiai taudia do idia moale. Unai dainai, ia ese hahelaga taudia ia hagania iena Taravatu be idaunegai Israela taudia dekenai do idia duahia. (Deuteronomi 31:9-12) Toretore tauna Esera bona ma haida ese Taravatu be Ierusalema ai idia hebou taudia iboudiai dekenai idia duahia neganai, ena anina idia gwauraia hedinarai goevagoeva, unai dainai idia “moale” bada. (Nehemia 8:6-8, 12) Gabeai, Keristani aposetolo Paulo be ia ida ia gaukara hebou tauna, Timoteo, ia hamaoroa, ia gwau: “Buka Helaga taunimanima dekenai do oi duahia, sisiba goada do oi henidia, bona hadibaia gaukara do oi goadalaia noho, ela bona lau ginidae.”—1 Timoteo 4:13.
5 Apokalupo 1:3 ese ia hahedinaraia goevagoeva do ita moale totona, namona be Dirava ena hereva ita duahia bona ita badinaia. Ia gwau: “Inai buka ia duahia tauna be do ia moale. Ma danu, inai buka ena peroveta hereva idia kamonai henia, bona iena hadibaia hereva idia badinaia taudia be do idia moale. Badina inai gaudia ibounai do idia vara ena nega be ia kahirakahira vadaeni.” Oibe, namona be Dirava ena peroveta herevadia Apokalupo lalonai bona Baibel ibounai lalonai ita duahia hedinarai bona ita kamonai. Ia moale momokani tauna be ‘Lohiabada ena Taravatu dekenai ia moale, bona Lohiabada ena Taravatu ia laloa, dina bona hanuaboi ibounai lalonai.’ Bena dahaka ia vara? ‘Iena gaukara ibounai ena anina ia vara, bona mai ena kwalimu danu.’ (Salamo 1:1-3) Unai dainai, badina namodia dainai, Iehova ena orea ese ita ta ta ibounai ia hagoadaia, ita sibona, bona iseda ruma bese ida, bona iseda turadia ida, iena Hereva do ita duahia bona do ita stadilaia.
Laloa Goadagoada Bona Laloa Dobu
6 Dirava ena Hereva bona Keristani bukadia duahia karana amo, namo bada be edena bamona oi abia diba? Bema idaunegai Israelana ena gunalaia tauna Iosua, Dirava ia gari henia tauna, ena kara oi tohotohoa, namo do oi davaria. Inai hahegani ia abia: “Inai Taravatu Buka be nega ibounai emui guriguri heboudia lalonai do umui duahia. Dina bona hanuaboi do oi tahua [“sibona dekenai do oi duahia,” NW], bona iena torea herevadia ibounai do oi kamonai henia. Unai neganai oiemu raka do ia namo, bona oiemu kara ena anina do ia vara momokani.” (Iosua 1:8) Bema ta ese hereva ta be ‘sibona dekenai ia duahia,’ anina be unai hereva be ena uduna amo ia gwauraia metaira, unai ese do ia durua unai hereva do ia laloatao, badina be unai kara amo unai hereva be ena lalona ai ia atoa danu. Iosua be hahegani ta ia abia, Dirava ena Taravatu be “dina bona hanuaboi” do ia duahia, anina be do ia duahia loulou. Unai dala amo do ia kwalimu bona Dirava ese ia henia gaukaradia do ia karaia mai ena aonega ida. Dirava ena Hereva duahia loulou karana ese oi danu be unai bamona ia durua diba.
7 Dirava ena Hereva oi duahia neganai, namo lasi oi laloa oi duahia haragaharaga be gau badana. Bema nega oi atoa Baibel eiava Keristani bukana ta duahia totona, reana do oi ura oi duahia metairametaira. Bema gau ta oi stadilaia, hereva badadia haida do oi laloatao totona, unai kara be mai anina bada. Bona oi duahia neganai, oi laloa goadagoada. Baibel torea tauna ena hereva oi tahua namonamo. Emu lalona ai oi henanadai, ‘Iena hereva ena anina be dahaka? Inai hereva be edena bamona lau badinaia diba?’
8 Buka Helaga oi duahia lalonai, ena hereva oi laloa dobu danu. Unai ese oi do ia durua, Baibel sivaraidia do oi laloatao bona Baibel ena hakaua herevadia do oi badinaia totona. Dirava ena Hereva oi laloa dobu bona oi laloatao karana amo, do oi hegeregere mai edia momokani ida idia henanadai taudia be emu kudouna amo haere maorodia do oi henidia; do oi hereva kava lasi bena gabeai unai hereva do oi lalohisihisilaia lasi. Dirava ese ena lauma amo ia havaraia aonega herevana ta be inai: “Kara maoromaoro taudia ese, haere idia henia neganai idia laloa namonamo guna.”—Aonega Herevadia 15:28.
Lalohadai Matamatadia be Oi Diba Vadaeni Gaudia ida Oi Haboua
9 Keristani taudia momo idia gwau guna idia be Dirava, ena Hereva, bona ena ura idia diba sisina sibona. To hari, unai Keristani hesiai taudia ese Dirava be gau iboudiai ia havaraia bona taunimanima be kara dika lalonai idia moru sivaraina, Keriso ena boubou ena badina, inai tanobada oromana dikana do ia doko herevana, bona kamonai taudia ese mauri hanaihanai paradaiso tanobadana ai do idia abia dalana be idia gwauraia diba. Iehova ena hesiai taudia be unai bamona idia karaia diba, badina be Baibel bona Keristani bukadia stadilaia karana amo ‘Dirava idia diba.’ (Aonega Herevadia 2:1-5) Metairametaira lalohadai matamatadia be idia lalo-pararalaia vadaeni gaudia ida idia haboua.
10 Oi dibaia Baibel herevadia matamata be oi diba vadaeni herevadia ida haboua karana be mai ena hahenamo. (Isaia 48:17) Baibel ena taravatu, ena hakaua herevadia, eiava lalohadai haida oi duahia neganai, unai gau be oi diba vadaeni herevadia ida oi haboua. Unai hereva be oi dibaia vadaeni “hereva momokani” ida oi hatamonaia. (2 Timoteo 1:13) Inai bamona herevadia oi tahua: Oi do idia durua, Dirava do oi badinaia goadagoada, eiava emu Keristani maurina do oi hanamoa, eiava oi do idia durua ma haida dekenai Baibel ena hereva momokani do oi herevalaia totona.
11 Baibel ese taunimanima edia kara ia herevalaia herevana oi duahia neganai, unai hereva ena badina korikori oi lalo-pararalaia toho. Oi laloa dobu, bona emu lalona oi hadaia bema unai bamona kara ia vara, edena bamona do oi kara. Potifara ena adavana ese Iakobo ena natuna Iosepa ia noia loulou ia ida do idia mahuta hebou, to nega iboudiai ia dadaraia, ia gwau: “Inai kerere badana do lau karaia, bona Dirava ena vairana dekenai inai bamona do lau kara dika be edena bamona?” (Genese 39:7-9) Unai sivarai lalonai anina hehunina ta oi davaria—sihari kava be Dirava kara dika henia karana. Emu lalona ai unai hakaua herevana be Dirava ena Hereva lalonai idia noho herevadia ma haida ida oi haboua diba bona oi laloatao diba, bena bema ta ese oi be unai bamona ia dibagania, unai ese oi do ia durua.—1 Korinto 6:9-11.
Baibel Sivaraidia be Emu Lalona Ena Matana amo Oi Itaia
12 Oi duahia herevadia do oi laloatao totona, namona be oi duahiduahi neganai oi duahia gaudia be emu lalona ena matana amo oi itaia. Tano ena toana, ruma, bona taunimanima be emu lalona ena matana amo oi itaia. Edia gadona oi kamonai. Aveni lalonai idia gabua paraoa ena bonana oi bonaia. Oi kara hegeregere oi be unuseniai oi noho. Bena emu duahiduahi ese emu lalona do ia hamarerea, badina be unai dala amo idaunegai hanuana ta do oi itaia diba, ororo lata hereana do oi daekau diba, Dirava ese ia karaia gaudia oi hoalaia diba, eiava mai edia abidadama bada hahine bona tatau oi bamoa diba.
13 Gunalaia Taudia 7:19-22 oi duahia neganai, unai sivarai hegeregerena idia vara gaudia be emu lalona ena matana amo oi itaia. Israela bese gunalaia tauna Gideona bona Israela taudia goadadia 300 be Midiana taudia edia kamepa isena ai idia gini hegaegae. Hora be 10 okaloka bamona hanuaboi ai, “gima taudia idia senisi neganai.” Midiana ena gima taudia matamatadia be edia gabu ai idia gini, Israela ena inai taudia idia mahuta bona dibura ese edia kamepa ia koua. Itaia! Gideona bona ena orea taudia be mai edia kibi. Edia imana lauridia ai kede idia dogoatao, bona hodu badadia amo idia koudia. Karaharaga, orea toi, idia ta ta lalonai be tatau 100, ese edia kibi idia hiriria, edia hodu idia hamakohia, edia kede idia abia isi, bona idia boiboi, idia gwau: “Lohiabada ena tuari kaia, bona Gideona ena!” Kamepa oi itaia. Midiana taudia idia heau bona idia boiboi! Tatau 300 ese edia kibi idia hiriria noho lalonai, Dirava ese Midiana taudia ihuanai daradara ia havaraia bena edia tuari kaia amo sibodia edia bamodia idia tuari henia. Midiana taudia idia heau, bona Iehova ese Israela taudia ia hakwalimua.
Diba Namona Ita Abia
14 Dirava ena Hereva duahia karana amo, gau momo ita dibaia diba. Haheitalai ta be inai: Reana oi ura emu natudia oi hadibaia idia manau be namo. Vadaeni, Gideona ena natuna Iotama ena peroveta herevana ena anina idia lalo-pararalaia bona edia lalona ena matana amo idia itaia be haraga. Gunalaia Taudia 9:8 dekenai oi duahia matamaia. Iotama ia gwau: “Nega ta, au momo ese edia king idia ura abia hidi.” Olive auna, fig auna, bona vain auna idia ura lasi do idia lohia. To au ginigini, anina lasi gauna, ia ura king ai do ia lao. Unai sivarai be emu natuna dekenai oi duahia hedinarai murinai, reana do oi hamaorodia unai anina bada audia ese taunimanima namodia, edia bese taudia Israela edia king dagina idia tahua lasi taudia, idia laulaulaia. Au ginigini, ena namo tamona be ia be lahi au namona, ese hekokoroku tauna Abimeleka ena king dagina ia laulaulaia. Ia be ala-ala tauna bona ia ura taunimanima ia biagudia, to Iotama ena peroveta herevana hegeregerena ia mase. (Gunalaia Taudia, karoa 9) Edena mero ia ura ia tubu daekau neganai au ginigini bamona ai do ia lao?
15 Baibel bukana Ruta ese ia hahedinaraia goevagoeva, badinaia karana be gau badana. Reana oiemu ruma bese ese unai sivarai umui duahia hedinarai, ta ta ena nega ena nega ai, bona ena hereva ena anina umui abia toho. Unai umui karaia lalonai, Moaba hahinena Ruta umui itaia, ena ravana hahinena, vabu Naomi, ida Betelehema dalana ai idia raka lao, bona umui kamonai Ruta ia gwau: “Oiemu bese be lauegu bese do idia lao, bona oiemu Dirava be lauegu Dirava do ia lao.” (Ruta 1:16) Umui itaia Ruta be Boasi ena uma ai bali utua taudia edia murinai ia gaukara goadagoada, bali momoru gaudia ia gogoa. Umui kamonai Boasi ese Ruta ia hanamoa, ia gwau: “Lauegu hanua taudia ibounai idia diba oi be hahine namona.” (Ruta 3:11) Nega daudau lasi bena Boasi ese Ruta ia adavaia. Unai be vabu ena nakimi ese ia adavaia karana ena taravatu hegeregerena, bona unai amo Boasi ese Ruta amo mero ta ia havaraia, ‘Naomi ena.’ Ruta be Davida ena tubuna hahinena ta ai ia lao bona gabeai Iesu Keriso ena danu. Unai amo “davana namona” ia abia. Bona inai danu, unai Baibel sivaraina idia duahia taudia ese inai gau namona idia dibaia: Iehova oi badinaia, bena hahenamo momo do oi abia.—Ruta 2:12; 4:17-22; Aonega Herevadia 10:22; Mataio 1:1, 5, 6.
16 Heberu uhaudia, Sataraka, Misaka, bona Abetenigo edia sivarai ese ita ia durua diba, hetoho negadiai Dirava do ita badinaia noho totona. Ta ese Daniela karoa 3 ena sivarai ia duahia hedinarai lalonai, ia gwauraia gaudia be iseda lalona ena matana amo do ita itaia. Golo kaivakuku badana ta be Dura ena tano palaka ai ia gini, bona ia vairanai Babulonia ena lohia taudia iboudiai idia hebou. Miusiki regena idia kamonai neganai, idia goru diho bona King Nebukanesa ese ia haginia kaivakukuna idia tomadiho henia. Sataraka, Misaka, bona Abetenigo sibodia be unai bamona idia karaia lasi. Mai edia hemataurai, to mai edia goada ida king idia hamaoroa, iena dirava do idia hesiai henia lasi bona unai golo kaivakuku do idia tomadiho henia lasi. Unai Heberu uhaudia be siahu herea lahina lalonai idia negea vareai. To dahaka ia vara? King ese tatau goadadia hani be lahi lalonai ia itaia, idia ta “ena toana be dirava ena natuna ta bamona.” (Daniela 3:25) Nebukanesa ese Heberu uhau toiosi be lahi amo ia abia lao, bena edia Dirava ia hanamoa. Unai sivarai be iseda lalona ena matana amo ita itaia karana amo, namo ita davaria. Bona hetoho neganai Iehova badinaia noho karana be ita ia hadibalaia!
Ruma Bese ese Baibel Idia Duahia Hebou Karana Ena Namo
17 Bema Baibel umui duahia hebou loulou, unai amo emui ruma bese ese hahenamo momo umui davaria diba. Genese ai umui duahia matamaia, bena Dirava ese gau iboudiai ia karaia karana bona taunimanima edia noho gabuna ginigunana, Paradaiso, be emui lalona ena matana amo do umui itaia diba. Iduhu kwaradia mai edia kamonai bona edia ruma bese dekenai idia vara gaudia edia mamina do umui abia diba, bona Israela taudia murinai oi raka diba Davara Kakakakana be mai edia aena kaukauna ida idia hanaia lalonai. Mamoe naria tauhau Davida ese Pilistia tauna lata hereana, Goliata, ia halusia karana umui itaia diba. Oiemu ruma bese ese inai danu idia itaia diba: Iehova ena dubu helaga be Ierusalema ai idia haginia gaukarana, Babulonia ena tuari taudia ese idia hadikaia ore karana, bona Gavana Serubabele ena siahu henunai Israela taudia ese idia haginia lou karana. Betelehema kahirakahira, mamoe naria taudia ogogamidia ida, Iesu ena vara sivaraina ia gwauraia hedinarai aneruna ena hereva umui kamonai diba. Iesu ena bapatiso bona ena hesiai gaukarana sivaraidia umui dibaia diba, iena tanobada maurina ia henia taunimanima edia davana ia henia totona be umui itaia diba, bona ena toreisi lou moalena ena mamina umui abia diba danu. Unai murinai, aposetolo Paulo ida umui laolao diba bona Keristani tomadihona be gabu idauidau dekenai ia lao lalonai kongregesen matamatadia idia haginia gaukarana umui itaia diba. Bena, Apokalupo bukana lalonai, emu ruma bese ese aposetolo Ioane be mata hanai amo ia itaia gaudia, nega vairai do idia vara gaudia, idia ta be Keriso ena Lagani 1,000 Lohia Negana, do umui moalelaia diba.
18 Bema oiemu ruma bese ese Baibel umui duahia hedinarai hebou, namona be umui duahia goevagoeva mai emui lalo-goada ida. Baibel ena kahana haida umui duahia neganai, ruma bese tauna ta—reana tamana—ese unai kahana ena sivarai herevadia ia duahia diba. Umui oredia ese Baibel taudia ese idia gwauraia herevadia umui duahia diba, unai hereva edia mamina hegeregerena.
19 Emui ruma bese ese Baibel umui duahia hebou neganai, emui duahiduahi karana be reana do ia namo ia lao. Emui diba Dirava dekenai do ia bada ia lao, bona unai ese umui do ia veria lao ia kahirakahira dekenai. Asapa be ane ia abia, ia gwau: “Lau be Dirava badibadinai lau noho. Inai be namo herea momokani. Siahu Ibounai Lohiabada e, oi be lauegu magu momokani. Hari lau ura oiemu kara ibounai do lau gwauraia hedinarai.” (Salamo 73:28) Unai ese oiemu ruma bese do ia durua, Mose ena kara do umui tohotohoa totona. ‘Iena lalona ia goada noho, ita itaia diba lasi Diravana, [Iehova Dirava unai] be ena matana dekenai ia itaia bamona.—Heberu 11:27.
Duahiduahi Bona Keristani Hesiai Gaukarana
20 Namona be “ita itaia diba lasi Diravana” ita tomadiho henia urana ese ita ia ha-uraia, do ita gaukara duahiduahi namonamo taudia ai do ita lao totona. Duahiduahi namonamo diba karana ese ita ia durua, Dirava ena Hereva amo ita haroro totona. Ita ia durua Basileia harorolaia gaukarana do ita karaia noho. Iesu ese ia murinai idia raka taudia dekenai unai gaukara ia henia neganai, ia gwau: “Umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20; Kara 1:8) Haroro gaukarana be Iehova ena bese taudia edia gaukara badana, bona duahiduahi diba karana ese ita ia durua unai gaukara do ita hagugurua totona.
21 Gaukara goada be mai anina bada, ta be duahiduahi namonamo bona Dirava ena Hereva hahedibalaia namonamo tauna ai do ia lao totona. (Efeso 6:17) Unai dainai, ‘oi gaukara goada, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.’ (2 Timoteo 2:15) Duahiduahi oi goadalaia, unai amo emu diba Baibel ena hereva momokani dekenai do oi habadaia bona emu diba Iehova ena hereva gwauraia maoromaoro karana ai do oi habadaia.
Emu Haere be Dahaka?
◻ Dirava ena Hereva duahia karana amo moale be edena bamona ia vara?
◻ Dahaka dainai Baibel lalonai oi duahia herevadia oi laloa dobu be namo?
◻ Baibel oi duahia lalonai, dahaka dainai lalohadai matamatadia be oi diba vadaeni gaudia ida oi haboua bona oi duahia gaudia be emu lalona ai oi itaia be namo?
◻ Baibel duahia karana amo dahaka dahaka ita dibaia diba?
◻ Badina be dahaka ruma bese ese Baibel idia duahia hedinarai hebou be namo, bona duahiduahi karana ena anina be dahaka Keristani hesiai gaukarana ai?
[Study Questions]
1. Baibel duahia karana amo dahaka namo ita davaria diba?
2. Dahaka ese ia hahedinaraia Iesu bona ena aposetolo taudia idia duahiduahi namonamo diba?
3. Dahaka dainai Buka Helaga bona Keristani bukadia ita duahia be gau badana?
4. (a) Badina be dahaka Dirava ena Hereva duahia, stadilaia, bona badinaia karadia amo moale ia vara? (b) Paulo ese Timoteo be duahiduahi karana dekenai edena bamona ia sisibalaia?
5. Apokalupo 1:3 ese moale bona duahiduahi karana be edena bamona ia gwauraia?
6. Dirava ese Iosua ia hagania dahaka do ia duahia, bona unai ese edena dala ai ia durua?
7. Dirava ena Hereva ita duahia neganai, dahaka dainai ita laloa ita duahia haragaharaga be gau badana be namo lasi?
8. Buka Helaga ita duahia lalonai, badina be dahaka ena hereva ita laloa dobu be namo?
9, 10. Baibel amo oi dibaia hereva matamatadia be oi diba vadaeni herevadia ida bema oi haboua, unai ese emu kara, Baibel duahia karana, be edena bamona ia hanamoa diba?
11. Baibel ese taunimanima edia kara ia herevalaia herevana oi duahia neganai, dahaka oi karaia be namo? Mani haheitalai ta oi gwauraia.
12. Baibel sivaraidia oi duahia lalonai, dahaka dainai oi duahia gaudia be emu lalona ena matana amo oi itaia be namo?
13. Gunalaia Taudia 7:19-22 ai ia noho sivaraina be edena bamona do oi gwauraia?
14. Ta ese Gunalaia Taudia karoa 9 be edena bamona ia gaukaralaia diba, natuna do ia hadibaia do ia manau be namo totona?
15. Ruta bukana ese edena bamona ia hahedinaraia badinaia karana be gau badana?
16. Heberu uhau toiosi ese dahaka hetoho idia davaria, bona unai sivarai ese ita be edena bamona ia durua diba?
17. Oiemu ruma bese ese Baibel duahia hebou karana amo umui dibaia gaudia namodia haida be mani oi gwauraia sisina.
18, 19. Heduru herevadia haida be dahaka, Baibel idia duahia hebou ruma bese taudia totona?
20, 21. Duahiduahi diba karana ena anina be dahaka iseda haroro gaukarana dekenai?
[Pictures on page 13]
Emu ruma bese ida Baibel umui duahia hebou lalonai, umui duahia gaudia be emui lalona ena matana amo umui itaia bona edia anina umui laloa dobu