Taunimanima be Hahediba Taudia ai Halaoa Karana Moalelaia Dalana

TAU ta be Dirava ida idia gaukara hebou neganai, moale bada ia davaria. Hari inai negai, Dirava ena gaukara ena kahana ta be, kara maoromaoro ura henia taudia be Keristani kongregesen lalonai ia haboua bona ia hadibadia, hari inai negai Keristani taudia edia mauri dalana do idia badinaia bona tanobada matamatana lalonai mauri do idia abia totona.​—⁠Mika 4:​1-4; Mataio 28:​19, 20; 2 Petero 3:⁠13.

Latin America dekenai Iehova ena Witness taudia be idia moale bada herea, badina be idia itaia, lagani 1980 amo bema bona hari, taunimanima milioni ta be Iesu Keriso ena hahediba taudia ai idia lao vadaeni. Unai tano lalodiai taunimanima momo ese Baibel idia matauraia bona idia abia dae, unai dainai huahua momo idia vara; ful-taim haroro taudia ese taunimanima momo idia durudia vadaeni edia mauri be Iehova dekenai idia gwauhamatalaia totona. Unai gaukara idia manadalaia vadaeni dainai, reana taunimanima be hahediba taudia ai halaoa gaukarana ena moale be ita idia hamaorolaia diba. Reana edia heduru herevadia haida ese oi do idia durua, oiemu gabu dekenai taunimanima be hahediba taudia ai halaoa gaukarana lalonai moale do oi davaria.

“Mamoe” ai Idia Lao Diba Taudia Edia Toana Oi Diba

Iesu ese ena aposetolo be haroro totona ia siaia lao neganai, ia gwau: “Hanua maragina ta dekenai o hanua badana ta dekenai do umui ginidae negana, kara namona tauna ta do umui tahua.” (Mataio 10:11) Taunimanima oi lao henidia neganai, edena bamona oi diba daidia be lauma dalanai do oi durudia diba? Edward, lagani 50 bamona lalonai ful-taim haroro gaukarana ia karaia tauna, ia gwau: “Edia kara ese ia hahedinaraia; henanadai idia henia mai edia lalo-momokani ida bena ta ese edia henanadai be Baibel amo ia haerelaidia neganai, unai hereva dainai edia lalona idia hegeregere.” Carol, ia gwau: “Bema ta ese iena hekwakwanai o lalo-hekwarahi ta be lau ia hamaorolaia, anina be heduru ia noia. Watch Tower Society ena buka lalonai heduru herevadia lau tahua. Taunimanima edia namo be unai bamona lau tahua dainai, idia momo ida Baibel stadi lau hamatamaia.” To, nega haida lalo-momokani taudia edia toana ita diba be auka. Luis ia gwau: “Matamanai haida edia toana be hereva idia ura henia bada, to gabeai ia hedinarai idia ura henia lasi, to ma haida be matamanai edia toana be hereva idia dadaraia, to Baibel ena hereva idia kamonai neganai edia lalona idia haidaua.” Latin America taudia momo ese Baibel idia matauraia dainai, ma ia gwau, “Baibel ena hahediba herevana lau hahedinarai henidia neganai bema idia abia dae haraga, lau diba lauma dalanai do lau durudia diba.” Unai bamona ‘kara namo’ taudia be lauma dalanai do idia goada idia lao totona idia durudia karana amo, moale momokani idia davaria bona edia lalona idia hegeregere momokani. Edena bamona oi durudia diba?

Baibel Stadi Hamatamaia Dalana

Nega momo, Baibel stadi bukadia, ‘hesiai tauna mai ena kamonai bona mai ena kara maoromaoro’ ese ia halasia bukadia, bema ita gaukaralaia, unai be taunimanima be Baibel ena hereva momokani do idia lalo-pararalaia totona ita durudia dalana namo hereana. (Mataio 24:45) Taunimanima be edena bamona oi durudia diba, unai Baibel stadi bukadia edia namo do idia laloa bada totona? Edward ia gwau: “Taunimanima edia noho, edia kara, bona edia lalohadai be idauidau dainai, dala idauidau amo Baibel stadi lau hamatamaia toho.” Taunimanima iboudiai dekenai dala tamona oi gaukaralaia be hegeregere lasi.

Taunimanima haida dekenai, reana nega sisina momo do oi vadivadi henidia bona idia ida Baibel do umui herevalaia hebou guna be namo, unai murinai Baibel stadi bukana amo do oi stadi henidia toho. To, misinari tauna ta bona ena adavana idia gwau: “Ruma tauna ai haroro henia negana ginigunana ai, ai be vaia stadi ai hamaorolaia.” Unai hegeregerena, Witness hahinena ta, taunimanima 55 be edia mauri do idia gwauhamatalaia totona ia durudia vadaeni hahinena, ia gwau: “Baibel stadi hamatamaia totona lau gaukaralaia momo dalana be, maoromaoro Mauri Hanaihanai Paradaiso Lalonai bukana ena hereva lau herevalaia.” Ena be haida idia ura lasi gau ta idia stadilaia, to ma haida bema idia laloa gau ta ese edia mauri do ia durua, idia ura do idia stadilaia. Edia ruma ai davana lasi Baibel stadi kosina abia herevana idia kamonai neganai, idia ura henia. Misinari taudia haida ese unai stadi karana idia herevalaia bena idia gwau: “Lau ura stadi ai karaia dalana lau hahedinaraia oi dekenai. Bema oi ura henia, stadi do oi karaia noho diba. Bema oi ura lasi, oi sibomu.” Unai bamona idia hereva neganai, taunimanima be stadi dalana do idia itaia garina idia gari lasi.

Witness hahinena ma ta, edukeisini bada lasi taudia ogogamidia momo ia durua vadaeni hahinena, ia gwau: “Lau davaria, pepapepa gaukaralaia karana be mai anina bada, Baibel stadi hamatamaia karana ai.” Ful-taim hadibaia taudia, herevana edena buka, buklet, o pepapepa idia gaukaralaia, to Baibel idia gaukaralaia momo. Carola ia gwau: “Stadi ginigunana ai, lau ese laulau bona siri ima bamona sibona lau gaukaralaia, unai amo anina bada herevadia idia hedinarai goevagoeva bona stadi taudia idia itaia Baibel idia lalo-pararalaia be auka lasi.”

Edia Ura Hagoadaia Noho

Taunimanima ese mamina idia abia edia diba ia bada ia lao neganai, idia moale, unai dainai Jennifer ia gwau: “Namona be stadi oi karaia mai emu goada ida. Stadi ena anina oi habadaia lao.” Bema pura ta ta iboudiai oi stadi henidia bona pura haida oi reaia lasi, mamina idia abia edia diba ia bada ia lao. Spesel painia tauna ta, gunika ai ia tubu daekau tauna, ia gwau, gau badana be hereva haragadia amo stadi herevadia edia anina ita gwauraia hedinarai bona hereva badadia ita gwauraia hedinarai goevagoeva danu, bena sikuli bada lasi taudia danu edia diba ia bada ia lao diba. Ma ia gwau: “Egu hanua ai, emai kara be uhe ai hadodia murinai, ranu amo tano ai dairia. Bema ranu amo uma ai ha-utua dae, gabeai tano kopina be ia auka ia lao bena uhe idia tubu diba lasi, bena idia mase. Unai hegeregerena, bema nega tamona hereva momo be kamonai matamata taudia oi henidia, reana do idia hekwarahi bena stadi do idia hadokoa.” Henanadai momo idia henia taudia edia lalo-parara do ia bada ia lao totona, namona be idia danu ese hereva ta idia dibaia guna, unai murinai ma ta idia dibaia. Iesu ese ena aposetolo taudia ia hamaoroa, ia gwau: “Lauegu hereva momo idia noho, lau ura hereva henia umui dekenai, to harihari umui be inai hereva do umui abia dae diba lasi.”​—⁠Ioane 16:⁠12.

Oi lao henidia taudia edia ura hagoadaia dalana ma ta be, oi hagoadadia, do oi rakatanidia murinai Dirava ena Hereva do idia laloa noho. Yolanda ia gwau: “Henanadai ta oi henidia. Houmwok haida oi henidia, hegeregere, oi hamaorodia Baibel siridia haida do idia duahia eiava hereva ta do idia tahua namonamo badina be ia be mai anina idia dekenai.”

Iehova Lalokau Henia Karana Habadaia

Oi stadi henidia taudia bema oi durua ‘hereva do idia kamonai kava lasi, to do idia badinaia danu,’ unai neganai emu moale do ia bada ia lao. (Iamesi 1:22) Unai be edena bamona oi karaia diba? Iehova lalokau henia karana ese Keristani korikori taudia ia hasiahua. Pedro, Mexico amo ia mai tauna, ia gwau: “Taunimanima ese idia diba lasi tauna idia lalokau henia diba lasi, unai dainai stadi ginigunana ai Iehova ena ladana be Baibel amo lau hadibadia, unai murinai dala lau tahua Iehova ena kara idauidau do lau gwauraia totona.” Oi stadi henidia taudia ida umui herevahereva neganai, emu hemami Iehova dekenai be oi gwauraia, unai amo oi durudia diba, ia do idia laloa bada. Elizabeth ia gwau: “Nega iboudiai dala lau tahua Iehova ena kara namo do lau gwauraia totona. Taunimanima lau stadi henidia lalonai, bema palaoapalaoa ta mai hairaina, o manu ta mai hairaina, o ia gadara noho pusina maragina ta lau itaia, nega iboudiai lau gwau unai be Iehova ese ia karaia gauna.” Jennifer ia gwau: “Oi diba Dirava ese ia gwauhamatalaia tanobadana matamatana be gau korikorina, unai dainai unai bamona oi herevalaia be namo. Oi nanadaidia idia ura dahaka do idia karaia tanobada matamatana lalonai.”

Ta ese Iehova ia dibalaia gaudia ia laloa dobu neganai, unai diba be ena lalona ai ia diho bena ia hasiahua kara ta do ia karaia totona. To bema hereva ia laloatao lasi, ia laloa dobu diba lasi. Hereva do ia laloatao totona, namona be stadi ta ta murinai, hereva badadia toi eiava hani oi gwauraia lou. Baibel hadibaia taudia momo ese stadi matamata taudia idia hamaoroa, edia Baibel ena murina kahanai siri badadia bona edia anina do idia torea. Misinari hahinena ta England amo ese riviu edia namo ma ta ia gwauraia, ia gwau: “Lau nanadaidia unai hereva ese edena bamona ia durudia. Unai idia laloa neganai, Iehova ena kara bona ena taravatu idia laloa dobu danu.”

Witness hahinena ta mai ena kamonai, Gilead Sikuli ena kalasi ihatoina ia lao henia hahinena, ia gwau: “Namona be ita hereva mai eda ura bada ida. Namona be ita hadibaia taudia idia diba ita hadibalaia herevadia ita abia dae.” Abidadama dainai oi ese gaukara ‘oi karaia’ mai emu moale ida​—⁠bema unai abidadama oi herevalaia, ma haida ese do idia abia diba.​—⁠Iamesi 1:⁠25.

Witness hahinena ta, taunimanima momo ia durua vadaeni Iehova do idia tomadiho henia totona hahinena, ia gwau: “Lau davaria bema taunimanima lau durudia Dirava ese edia guriguri ia haere henidia vadaeni daladia idia lalo-pararalaia totona, mamina idia abia Iehova kahirakahira dekenai idia noho. Lau dekenai idia vara gaudia sivaraidia haida lau hamaorolaidia. Ta be inai: Lau bona egu bamona be painia gaukarana karaia totona gabu matamatana dekenai ai ginidae neganai, ai be mai emai uma aniani sisina bona bata paketi tamona sibona mo, bona ai be moni lasi. Hanuaboi ai unai aniani ai ania ore, bena ai gwau, ‘Ita be mai eda aniani lasi kerukeru ena.’ Ai gurigurilaia bena ai mahuta. Daba ai, unai gabu ena Witness hahinena ta ia mai ai dekenai, ia gwau, ‘Iehova lau noia painia taudia do ia siaia mai. Hari dina lau be umui do lau bamoa diba, to lauegu ruma be gunika ai dainai, dina tubua ai lau be umui ida do lau aniani, unai dainai inai aniani lau mailaia ita ibounai eda.’ Unai aniani be boromakau vamuna bona uma anianina momo herea. Lau stadi henidia taudia be hanaihanai lau hamaoroa, bema Iehova ena Basileia ita tahua guna, ita do ia rakatania lasi.”​—⁠Mataio 6:⁠33.

Heduru Momokani Oi Henidia

Taunimanima be Keriso ena hahediba taudia ai halaoa dalana be Baibel stadi henidia karana amo sibona lasi. Misinari tauna ta, lagani momo lalodiai sekit naria gaukarana ia karaia tauna, ia gwau: “Nega oi henidia. Stadi umui karaia ore neganai, oi rakatanidia haraga lasi. Bema hegeregere, oi noho bona nega sisina lalonai umui kiki.” Elizabeth ia gwau: “Lau be edia namo lau tahua, badina be lau ura mauri do idia abia. Nega momo lau lalodia momo, hahine ese ena natuna ia lalodia momo hegeregerena.” Witness taudia ma haida edia sisiba herevadia be inai: “Idia gorere negadiai oi vadivadi henidia.” “Edia ruma kahirakahira dekenai oi haroro negadiai, Witness taudia haida oi hakaua lao bona nega kwadogi lalonai oi vadivadi henidia, do idia hedavari henidia totona.” Eva ia gwau: “Oi hakala namonamo, ta ena noho gunana bona ena noho hari inai negai do oi diba totona. Taunimanima edia noho be mai anina hereva momokani abia dae karana dekenai, bona do idia goada karaia dalana ia koua diba. Edia turana ai oi lao, bena edia hekwakwanai be oi do idia hamaorolaia mai edia gari lasi.” Carol ia gwau: “Stadi tauna ena namo ita tahua mai eda momokani ida be gau badana, badina be hereva momokani ese ena noho dalana do ia haidaua bena reana ena famili bona ena turana ese do idia dadaraia. Bema stadi tauna be iseda noho gabuna ia diba, bona ia diba bema gau ta dainai ia ura ita dekenai do ia mai, ia mai diba, unai be namo.” Namona be oi durua, do ia laloa kongregesen be ena famili matamatana.​—⁠Mataio 10:35; Mareko 10:​29, 30.

Yolanda ia gwau: “Oi gima noho, nega korikori ai heduru momokani henidia totona. Hebou lalodiai idia badinai oi helai, bona oi durudia, edia natudia naria totona.” Kamonai matamata taudia be hahediba taudia ai halaoa gaukarana ena kahana ta be inai: Edia natudia hadibaia dalana, edia hegoeva karana hanamoa dalana, hebou lalonai haere henidia totona hegaegae dalana, bona Haroro Sikuli ai hereva henia dalana oi hahedinarai henidia. Taihu ma ta ia gwau: “Gau badana be matamata taudia be haroro gaukarana karaia dalana ita hadibalaidia. Bema ita hadibalaidia lasi, idia haida ese haroro gaukarana karaia garina do idia gari noho, edia moale, Iehova ena hesiai lao henia moalena, be do ia ore, bona do idia haheauka lasi.” Unai dainai, oi stadi henia tauna be ruma-ta-ruma-ta gaukarana, lou-henia gaukarana, bona Baibel stadi hamatamaia gaukarana oi hadibalaia namonamo. Oiemu heduru bona hahekau herevadia dainai do ia goada ia lao neganai, do oi moale bada.

Oi Hagoadadia Do Idia Haheauka Totona

Taunimanima be hahediba taudia ai halaoa gaukarana ia manadalaia hahinena ta ia gwau: “Haida edia kara be, idia stadi henia tauna ese bapatiso ia abia vadaeni neganai, idia stadi henia lasi.” Namona be stadi henia tauna bona stadi abia tauna idia diba, bapatiso abia matamata Keristani tauna be lauma dalanai ia do lo lasi. Namona be abidadama ai, Dirava ena taravatu laloa bada karana ai, bona Iehova lalokau henia karana ai do ia tubu daekau noho. Gau badana be oi hagoadaia, sibona ena stadi karaia dalana namona do ia goadalaia, bena do ia goada ia lao noho.​—⁠1 Timoteo 4:15.

Matamata tauna ese tadikaka abidia dae karana do ia goadalaia totona, reana heduru do ia abia be namo. Tadikaka do ia bamodia neganai edia kerere do ia itadia, unai dainai reana sisiba herevadia do ia abia be namo, bena kerere ta ia vara neganai dala maorona ai do ia kara diba. (Mataio 18:​15-35) Reana heduru ia abia be namo, ia sibona be hereva do ia tahudia goevagoeva, bena hahediba tauna namona ai do ia lao totona. Misinari hahinena ta ia gwau: “Lau stadi henia hahinena ta be ia bapatiso murinai ia ura ena hahediba karana ia hanamoa, unai dainai lau ia hamaoroa, ia gwau, ‘Pura vairai, stadi matamatana ta do lau karaia, to buka ena karoa ginigunadia, lau stadilaia vadaeni gaudia, do lau laloa lou be namo. Mani unai karoa ta ta ai lau do oi stadi henia lou, bena edia siri bona edia laulau edia anina gwauraia herevadia do lau laloa, bena unai stadi do lau karaia neganai, unai hereva do lau gwauraia diba.’ Ia be hadibaia hahinena namona ai ia lao; ia stadi henidia taudia hani be hebouhebou ta ai bapatiso idia abia.”

Inai Hekwarahi be mai Anina Namona

Pamela ia gwau: “Taunimanima be hahediba taudia ai halaoa gaukarana dainai ma taunimanima momo be Iehova hanamoa taudia ai idia lao. Ia dainai, hereva momokani idia abia dae taudia ese mauri do idia abia diba. Hereva momokani be taunimanima hadibalaidia gaukarana lau ura henia bada​—⁠ia be namo herea! Lau stadi henidia taudia lau itaia, sisina sisina idia goada idia lao, edia mauri dalana idia haidaua, bona hekwakwanai badadia idia hanaia; bema Iehova ena lauma ese ia durudia lasi, unai hekwakwanai idia hanaia diba lasi. Iehova idia lalokau henia bona idia momo be lauegu turana korikoridia ai idia lao.”

Misinari hahinena ta Germany amo be ia gwau: “Hahediba taudia ai do idia lao totona lau durudia vadaeni taudia lau laloa neganai, egu lalona ena matana ai haida lau itaia, guna idia hemarai bada, to Dirava ena hesiai taudia ai idia lao neganai idia goada idia lao momokani. Unai lau hoalaia bada. Ma haida lau itaia, Iehova ena heduru amo hekwakwanai badadia idia hanaia. Famili haida lau itaia, guna idia parara, to hari idia noho hebou​—⁠edia natudia idia moale bona edia tamadia bona sinadia ese edia maduna idia huaia namonamo. Taunimanima lau itadia, mai anina mauridia idia moalelaia bona Iehova idia hanamoa. Taunimanima be hahediba taudia ai halaoa gaukarana ena moale be unai.”

Oibe, ta ese taunimanima be hahediba taudia ai halaoa gaukarana be Iehova Dirava ida ia karaia hebou neganai, moale bada herea ia davaria. Misinari taudia bona painia taudia edia sivarai ese unai idia hamomokania. Ai gwauraia heduru herevadia bema oi badinaia mai emu lalona ibounai ida, oi danu do oi moale bona emu lalona do ia hegeregere. Iehova ena hahenamo dainai emu moale do ia guguru.​—⁠Aonega Herevadia 10:22; 1 Korinto 15:⁠58.