aposetolo Petro bona lauma helaga amo toretore idia karaia taudia ma haida idia perovetalaia herevana idia hamomokania. Idia peroveta “Tau Dika Rohorohona,” sibodia idia gwauraia Keristen edia lohia taudia unai, be siahu bada do idia abia, bona Diocletian ia karaia taravatudia, taravatu iharuana danu, ese unai ia hamomokania. (2 Tesalonika 2:​3, 4; Kara 20:​29, 30; 2 Petero 2:12) Lagani 399 C.E. murinai, Dirava momokanina dadaraia karana be ia bada. Sibodia idia gwauraia Keristen taudia momo herea be Roma ena ami dekenai idia vareai. Aposetolo taudia dekena amo idia abia “hereva momokani” idia badinaia abidadama Keristen taudia haida idia noho, a?​—2 Timoteo 1:13.

Eusebius ese unai dagedage dainai idia mase taudia edia ladana haida ia gwauraia hedinarai, bona idia hahisihisidia dalana, edia hisihisi ena bada, bona gabeai edia tomadiho dainai idia mase sivaraidia ia torea hedinarai. Unai nega lalonai, edia diba hereva momokani dainai idia mase taudia iboudiai be mai edia abidadama danu idia mase ita diba lasi. Reana idia haida ese Iesu ena sisiba idia badinaia, ia gwau ma haida edia hahediba hereva idia abia dae lasi, bona heudahanai, bona edia abidadama hadikaia karadia do idia dadaraia. (Apokalupo 2:​15, 16, 20-23; 3:​1-3) Unai dagedage negana lalonai mai edia abidadama taudia haida idia mase lasi, to edia sivarai idia torea hedinarai lasi. (Mataio 13:​24-30) Oibe, Keristen ena tomadiho karana idia koua gaukarana dekenai idia kwalimu, unai dainai, unai nega lalonai, Diocletian hanamoa totona idia ese Spain dekenai gau ta idia haginia, idia moale badina ia ese ‘Keriso gari henia karana ia haorea dainai.’ Diocletian be Keristen ena tomadiho ia dagedage henia neganai, iena ura badana be Buka Helaga idia tahudia idia haoredia vaitani totona, bona ena be idia hekwarahi bada, to Dirava ena Hereva idia haorea vaitani diba lasi.​—1 Petero 1:25.

Keristen ena tomadiho ia haorea diba lasi dainai, Satana Diabolo, inai tanobada ena lohia, be Pavapava Constantine dekena amo ena koikoi karadia ia karaia noho, ia be lagani 306 ia lao 337 C.E. ai ia lohia. (Ioane 12:31; 16:11; Efeso 6:​11) Kaivakuku tomadiho henia tauna, Constantine, ese Keristen taudia ia dagedage henidia lasi. To, ia laloa namona be kaivakuku tomadiho henia taudia bona Keristen taudia edia hahediba herevadia do idia haboua tamona bona Gavamani ia gwauraia ia be tomadiho matamata badana.

Unai be sisiba badana ita ibounai dekenai! Dagedage mai ena hisihisi bada ita davaria neganai, iseda lalokau Iehova dekenai ese ita do ia durua bena iseda abidadama do ita rakatania lasi unai hisihisi ita koua sisina totona. (1 Petero 5:9) Danu, maino negana lalonai namo lasi iseda Keristen ena goada ia maragi ia lao. (Heberu 2:1; 3:​12, 13) Namona be nega ibounai Bible ia gwauraia dala maorodia ita badinaia, unai ese ita do ia durua Iehova ita abidadama henia noho totona, ia be iena taunimanima do ia hamauridia diba Diravana.​—Salamo 18:​25, 48.

Duahia Taudia Edia Henanadai

Iehova ena Witness taudia edia lalohadai be dahaka taunimanima idia henaoa gaudia hoia karana dekenai?

Bema Keristen taudia idia diba haida ese unai kohu idia henaoa, idia diba unai kohu do idia hoia lasi be namo.

Henaohenao karana be ia dika. Dirava ena Taravatu Israel dekenai ia gwau: “Oi henaoa lasi.” (Esodo 20:15; Levitiko 19:11) Bema idia davaria ta be ia henao, ia vara gauna hegeregerena, ia henaoa gauna, be nega rua, nega hani, eiava nega ima amo davana do ia henia lou.

Idau nega amo ia mai hari, henaohenao taudia idia ura idia henaoa kohudia idia hoihoilaidia haraga moni idia abia totona bona unai kohu be idia dekenai do idia davaria lasi totona. Unai dainai, nega momo unai kohu be davana maragi dekenai idia hoihoilaidia taunimanima idia ura abidia totona. Reana unai bamona ia vara Esodo 22:1 ia gwauraia sivaraina dekenai, ia gwau: “Bema tau ta ese boromakau o mamoe ta ia henaoa, vadaeni ia alaia o ia hoia lao, ia be davana do ia henia boromakau ta ena davana be boromakau 5 do ia henia. Mamoe ta ena davana be mamoe 4 do ia henia.”

Ia laloa unai taravatu dekenai ma hereva haida idia noho dainai, Rabi tauna, Abraham Chill ia torea ia gwau: “Idia henaoa kohudia ita hoidia eiava ita abidia davana lasi be mai taravatuna, ena be idia laloa unai be henaoa