“Mai Moale Danu Ia Henia Tauna be Dirava ese Ia Lalokau Henia”

IEHOVA be hariharibada ia haheitalaia tauna. Momokani, Baibel ia gwau ia be “gau namodia ibounai, bona harihari gaudia namodia momokani ibounai” ia Henia Tauna. (Iamesi 1:​17) Dirava ese ia havaraia gaudia mani oi laloa. Ia ese aniani mai mamina namona, palaoapalaoa mai hairaina, dina ia diho neganai guba be mai ena kalakala ia havaraia. Oibe, Iehova ia havaraia gaudia iboudiai ese ena lalokau bona hariharibada idia hahedinaraia. (Salamo 19:​1, 2; 139:14) Danu, Iehova be mai moale danu ia henia Tauna. Ia ese ena hesiai taudia ia kara namo henia mai moale danu.​—⁠Salamo 84:11; 149:⁠4.

Israela taudia ese ta ta dekenai Dirava ena hariharibada idia hahedinaraia be hahegani ta. Mose ese idia ia hamaoroa: “Emui varavara Israela tauna ta ia ogogami neganai, emui lalona do umui ha-aukaia lasi, bona unai ogogami tauna dekena amo do umui raka siri lasi.” “Mai emui kudouna ibounai do umui henia, bona mai lalohisihisi lasi ia dekenai do umui henia.” (Deuteronomi 15:​7, 10) Henia karana be edia kudouna amo idia karaia dainai, Israela taudia ese hariharibada karadia idia moalelaia be namo.

Keristani taudia ese unai bamona hahegani idia abia danu. Momokani, Iesu ia gwau: “Henia kara ena moale be bada.” (Kara 20:35) Iesu murinai idia raka taudia ese henia karana mai moalena idia haheitalaia namonamo. Hegeregere, Baibel ia gwau Ierusalema lalonai hereva momokani idia abia dae taudia ese “edia gau bona edia tano idia hoia, bona davana idia haria karaia, gau lasi taudia dekenai, hegeregere idia henia.”​—⁠Kara 2:​44, 45.

To unai hariharibada Iudea taudia be gabeai idia ogogami. Baibel ia gwau lasi dahaka dainai unai ia vara. Diba bada taudia haida idia gwau reana ena badina be Kara 11:​28, 29 ese ia herevalaia hitolo bada. Herevana ena badina be dahaka, to unai Iudea Keristani taudia edia mauri ia dika momokani, bona Paulo ia ura edia mauri durua gaudia idia abia. Edena dala ai unai ia karaia diba?

Ogogami Taudia Totona Kohu Haboua

Paulo ese kongregesen daudaudia, ela bona Makedonia, edia heduru ia noia bona ogogami Keristani Iudea taudia totona moni haboua karana ia hamatamaia. Unai Korinto taudia dekenai Paulo ia torea, ia gwau: “Galatia ekalesia orea lau hamaoroa hegeregerena, umui danu lau hamaoroa, moni do umui haboua. Pura ena dina ginigunana ibounai umui ta ta ese emui ruma ta ta dekenai moni do umui haboua noho, ena bada be emui gaukara davana ena bada hegeregerena.”a​​—⁠1 Korinto 16:​1, 2.

Paulo ena ura be unai moni be karaharaga idia siaia Ierusalema tadikaka dekenai, to Korinto taudia be Paulo ena hadibaia herevadia idia badinaia haraga lasi. Dahaka dainai? Edia Iudea tadikaka idia hebogahisi henia lasi, a? Lasi, badina Paulo ia diba unai Korinto taudia be ‘kara namodia momokani idia karaia noho. Edia abidadama, bona hereva, bona diba, bona haheauka, bona lalokau be mai sivarai danu.’ (2 Korinto 8:⁠7) Reana Paulo ena revareva ginigunana lalonai ia henia mai anina bada gaukarana idia karaia noho dainai idia bisi bada herea. To hari Ierusalema dekenai idia vara gaudia dainai idia karaia haraga be mai anina. Unai dainai Paulo ese ena revareva iharuana Korinto taudia dekenai unai gauna ia herevalaia.

Edia Hariharibada Ia Noia

Guna, Paulo be Makedonia taudia edia sivarai ia kikilaia Korinto taudia dekenai, idia ese unai heduru gaukarana idia durua bada. Paulo ia gwau: “Hisihisi bada idia davaria gaudia ese edia haheauka idia tohoa, to edia moale be ia bada herea noho. Momokani edia ogogami be ia bada, to edia durua idia henia bada herea.” Makedonia taudia do ia doria be anina lasi. Paulo ia gwau “idia sibona edia ura dainai, ai dekenai idia noinoi, edia moni haida do ai abia lao, Dirava ena taudia Iudea dekenai durua totona.” Makedonia taudia be mai moale ida edia moni idia henia ita hoalaia badina ita diba “edia ogogami be ia bada” danu.​—⁠2 Korinto 8:​2-4.

Paulo ese Korinto taudia dekenai Makedonia taudia ia hanamoa unai taudia idia hanaia urana ia havaraia totona, a? Lasi momokani, badina ia diba unai be hagoadaia dalana maorona lasi. (Galatia 6:⁠4) Danu, ia diba Korinto taudia ia hahemaraia kara maorona do idia karaia totona, be anina lasi. Lasi, ia diba unai Korinto taudia ese edia Iudea tadikaka idia lalokau henia bona idia ura idia durua. Idia ia hamaoroa: “Inai durua gaukara, lagani gunana umui hamatamaia gaukara, umui karaia haorea be namo. Umui be inai gaukara hamatamaia taudia ginigunadia, bona umui ura bada do umui karaia.” (2 Korinto 8:​10) Momokani, unai heduru gaukara lalonai, Korinto taudia be haheitalai namona danu. Paulo be idia dekenai ia gwau: “Lau diba emui kara, umui ura bada idia do umui durua, bona lau ese Makedonia taudia edia vairanai umui lau heagilaia.” Ma ia gwau: “Emui goada sivaraina idia kamonai, vadaeni Makedonia taudia momo idia ura durua henia danu.” (2 Korinto 9:⁠2) To hari unai Korinto taudia ese edia ura bona gini hegaegae noho karana idia gaukaralaia be namo.

Unai dainai, Paulo ese ia hamaorodia: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Korinto 9:⁠7) Paulo ia ura lasi Korinto taudia do ia doria, badina ta be mai moale ida do ia henia diba lasi bema ta ese ia doria. Toana be Paulo ia laloa doria gauna namona ia noho vadaeni, idia ta ta be ia laloa vadaeni gauna do ia henia. Danu, Paulo ese idia ia hamaoroa, ia gwau: “Bema tau ta ia ura dikadika harihari gauna do ia henia, Dirava ese inai kara do ia ura henia. Dirava ia diba unai tau ena kohu be hida, bona ia laloa karaia, unai tau ena harihari gauna be iena kohu hegeregerena o lasi. Bema tau ta madi be kohu lasi neganai, Dirava ese unai tau ena henia kara do ia laloa momo lasi.” (2 Korinto 8:12) Oibe, ta ia ura neganai​—⁠lalokau ese ia doria dainai​—⁠Dirava ese ia henia gauna do ia abia dae, herevana ia henia gauna be bada lasi.​—⁠Luka 21:​1-4 itaia.

Hari Inai Negai, mai Moale ida Idia Henia Taudia

Hari inai negai, unai Iudea Keristani taudia durua gaukarana be haheitalai namona. Iehova ena Witness taudia be tanobada hegegemadai haroro gaukarana idia karaia, lauma dalanai idia hitolo mase taudia dekenai aniani idia henia. (Isaia 65:​13, 14) Unai idia karaia Iesu ena oda idia badinaia dainai: “Do umui lao, bese ibounai be diba tahua taudia do umui halaoa . . . Bona idia dekenai do umui hadibaia, umui dekenai lau henia hereva ibounai be do idia badinaia.”​—⁠Mataio 28:​19, 20.

Unai oda hagugurua be mai ena hekwarahi bada. Ena anina be tanobada hegegemadai idia noho misinari rumadia bona brens rumadia 100 bona ma haida idia naria. Danu ena kahana ta be Kingdom Hall bona Assembly Hall idia haginia, unai amo Iehova idia tomadiho henia taudia be gabu namodia dekenai idia hebou bona idia hagoadaia heheni diba. (Heberu 10:​24, 25) Nega haida, Iehova ena Witness taudia ese hekwakwanai idia davaria gabudia dekenai heduru idia siaia.

Danu, idia printaia gaudia edia davana badana mani oi laloa. Pura ta ta ai, Gima Kohorona edia kopi ena averes be 22,000,000 ia hanaia bona Awake! edia kopi be 20,000,000 bamona idia printaia. Unai hanaihanai ia mai lauma aniani sibona lasi, to lagani ta ta ai, buka, buklet, kaset, bona vidio milioni momo idia karaia.

Edena dala ai unai gaukara idauidau edia davana idia karaia diba? Taunimanima be sibodia edia ura hegeregerena moni idia henia dalana amo. Idia ese unai idia karaia taunimanima do idia itaia eiava gau ta do idia abia totona lasi, to idia ura tomadiho momokanina idia durua. Unai dainai, unai bamona kara ese henia tauna dekenai moale ia havaraia bona Dirava ena hahenamo ia abia danu. (Malaki 3:​10; Mataio 6:​1-4) Iehova ena Witness natudia danu idia hahedinaraia idia be mai moale ida harihari gaudia idia henia diba. Hegeregere, mauri lagani hani kekenina Allison ia kamonai United States dekenai lai badana ese dika bada ia havaraia neganai, ena moni $2 (U.S.) ia henia. Ia gwau: “Inai be lauegu moni ibounai. Lau diba unai natudia be edia gadara gaudia bona buka bona doli idia haboioa. Reana inai moni umui gaukaralaia diba egu mauri lagani hegeregerena kekenina ena buka ta umui hoia totona.” Lagani 8 merona Maclean ia torea ia gwau ia moale badina unai lai badana lalonai tadikaka ta ia mase lasi. Ma ia gwau: “Motuka ena uili koua gaudia lau hoihoilaia egu tamana danu bona $17 (U.S.) lau abia. Unai moni amo lau laloa gau ta do lau hoia, bena tadikaka lau laloa.”​—⁠Ataiai mauana itaia danu.

Momokani, Iehova ena kudouna ia hamoalea gauna be matamata taudia bona buruka taudia be ena Basileia ena namo idia atoa guna bona edia “uma ena anina namodia” amo edia hemataurai karana ia dekenai idia hahedinaraia. (Aonega Herevadia 3:​9, 10) Momokani, ta be Iehova dekenai gau ta ia henia diba lasi, badina be gau ibounai be iena. (1 Sivarai 29:​14-​17) To Iehova ia tomadiho henia tauna ena hahenamo ta be unai gaukara ia durua diba, bona unai dala amo ena lalokau Iehova dekenai ia hahedinaraia diba. Edia kudouna ese idia doria dainai idia henia taudia ibounai ai tanikiu henia.

[Footnote]

[Box on page 26, 27]

Haida ese Henia Karana Idia Hahedinaraia Daladia Kontribusen Monidia, Tanobada Ibounai Gaukara Durua Totona

Momo ese edia moni idia atoa hegaegae, maua ta ladana “Society Ena Tanobada Ibounai Gaukarana Durua Monina​—⁠Mataio 24:⁠14” lalonai do idia udaia totona. Hua ta ta iboudiai, kongregesen ese unai moni be Society ena hedikwota Brooklyn, New York dekenai, eiava ena brens opesi ta dekenai idia siaia.

Taunimanima ese kontribusen monina idia siaia diba International Bible Students Association of Papua New Guinea Inc., Box 636, Boroko, NCD 111 dekenai. Mai dava bada herahera gaudia eiava dava bada gaudia idaudia danu idia henia diba. Revareva ta ida idia siaia be namo, unai revareva ai idia gwau idia be harihari gaudia.

Kontribusen Monina mai Taravatuna

Taunimanima ese moni be Watch Tower Society idia henia diba, trust fund ai do idia naria totona, to bema nega ta henia tauna ia dabu, bona ia ura ena moni ia abia lou, do idia henia lou diba. Bema oi ura ma hereva haida oi diba, namona be ai gwauraia vadaeni adres dekenai revareva oi torea.

Palanilaia Henia Gaudia

Kontribusen moni bona mai taravatu kontribusen sibona lasi, to dala ma haida idia noho Basileia ena gaukara tanobada hegegemadai durua totona. Idia haida be inai:

Insurens: Bema ta ese life insurens ia hoia o moni be retirement fund ta ai ia atoa, Watch Tower Society ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba Watch Tower Society ese ena moni do idia gaukaralaia ia do mauri lalonai, eiava ia mase neganai do idia henia Society dekenai.

Share Monina: Ta ena share monina be Watch Tower Society ia harihari henia diba, eiava dala ia karaia diba unai share be idia edia, to atoa kau monina be ia ese do ia abia.

Tano Bona Ruma: Bema ta be mai ena ruma o tano, ia hoia diba gauna, Watch Tower Society dekenai ia henia diba harihari gauna bamona, eiava do ia noholaia diba ela bona ia mase bena Society ese do ia abia. Bema ta ia ura unai bamona do ia karaia, namona be Society ia hadibaia guna.

Wills Bona Trusts: Bema ta ena ura be ia mase neganai Watch Tower Society ese ena tano, ruma, kohu, o moni do idia abia, loea dekenai ia lao be namo, will pepana, mase murinai kohu hariharilaia gwaumaoro pepana ai, iena ura do ia torea. Eiava bema ena moni be trust fund ai ia noho, ia ese Society ena ladana be trust agreement pepana ai ia torea diba, unai moni do idia abia totona. Tano haida ai, bema ta ese ena trust monina be tomadiho oreana ta ia henia, takisi moni haida do ia henia lasi.

Unai palanilaia henia gaudia idia laloa taudia, bema idia ura hereva ma haida idia diba, namona be International Bible Students Association of Papua New Guinea Inc., Box 636, Boroko, N.C.D. 111, telefon namba 325 3011, eiava Society ena opesi edia tano dekenai idia tore henia eiava idia rini henia.

[Box on page 28]

Natudia be mai Moale Danu Idia Henia Taudia!

Lau ura umui dekenai inai lau henia, ai dekenai ma buka haida umui karaia diba totona. Tamagu lau durua dainai inai moni lau abia bona lau haboua diba. Tanikiu bada herea emui gaukara namona dainai.​—Pamela, ena mauri lagani be 7.

Lau ese $6.85 (U.S.) lau siaia umui dekenai, Kingdom Hall ma haida haginia gaukarana durua totona. Siahu negana ai lau haboua, loliwota lau hoihoilaia neganai.​—Selena, ena mauri lagani be 6.

Lau ese kokoroku hahine ta lau naria bena ia amo kokoroku tau bona ma kokoroku hahine ta lau abia. Kokoroku ginigabena lau gwauhamatalaia Iehova dekenai. Gabeai, ia ese kokoroku hahine toi ia havaraia, bona idia lau hoihoilaia. Lau abia monina lau henia Iehova ena gaukara totona.​—Thierry, ena mauri lagani be 8.

Inai be egu moni ibounai! Mani emui kara mai aonega ida umui gaukaralaia. Lau hekwarahi bada lau haboua totona. Dola 21 inai.​—Sarah, ena mauri lagani be 10.

Sikuli gaukarana ta lalonai kwalimu ahuna ginigunana lau abia, unai dainai provinsi ena ripoti torea karana ta dekenai lau idia siaia. Unuseniai kwalimu ahuna ginigunana lau abia danu bena distrik ripoti torea karana dekenai lau be kwalimu ahuna iharuana lau abia. Unai kwalimu ahuna iboudiai be moni. Lau ura Society dekenai haida lau henia. Lau laloa lau kwalimu badina Haroro Sikuli dekenai lau idia hadibaia. Hahemaoro taudia vairanai egu ripoti lau henia neganai, egu lalona be ia goada.​—Amber, greid 6.

Lau ura inai lau henia umui dekenai Iehova totona. Ia umui nanadaia edena bamona do umui gaukaralaia. Ia be gau ibounai ia diba.​—Karen, ena mauri lagani be 6.

[Pictures on page 25]

Iehova ena Witness taudia edia gaukara be kontribusen monina amo idia karaia