Duahia Taudia Edia Henanadai

Veksenesen o medikol hekodona idauna ta, idia lalodiai be taunimanima edia rara amo idia abia gauna albumin, ita abia dae be maoro, eiava?

Namona be unai gau ai Keristen taudia ta ta ena lalona ena lalona do idia hadaidia.

Dirava ena hesiai taudia idia ura rara taravatuna Kara 15:​28, 29 ai do idia badinaia. Unai hegeregerena, Keristen taudia ese vamu mai rarana o rara ida idia buloa anianina do idia ania lasi. To Dirava ena taravatu be mai anina, medikol karadia ai danu. Iehova ena Witness taudia ese pepa ta idia loalaia, ia gwau idia ese ‘rara henia hanai, rara idoinai, sel kakakakadia, sel kurokurodia, pleitelet, eiava rara plasma be idia abia dae lasi. To, siram hekododia, idia lalodiai be rara proutin sisisisina mo gaudia, be edena bamona?

Nega daudau lalonai Witness taudia idia diba namona be ta ta ena lalona ena lalona do idia hadaidia, Baibel ena hereva idia lalo-pararalaia hegeregerena. Doketa taudia ese reana ta idia sisiba henia, siram hekododia do ia abidia, gorere dikadia haida do ia abidia garina. Unai hekodo idia hasiahua gaudia be rara plasma lasi, to idia be antibodi, idia edia tauanina ese unai gorere idia koua diba taudia edia rara amo idia abia gaudia unai. Keristen taudia haida idia laloa unai bamona hekododia idia abidia be kerere lasi, badina be idia diba antibodi haida bona albumin haida be rogorogo hahinena ena rara amo idia hanai, ena bogana lalonai ia noho beibina ena rara ai idia vareai.

Momo ese inai idia laloa, badina be veksin haida, rara amo idia karaia lasi gaudia, lalodiai be plasma albumin sisina; veksin karaia taudia ese idia gaukaralaia, ena anina idauidau hahekamodia bou totona. Hari inai negai albumin sisina be hekodo ladana EPO (erthropoietin) lalonai idia gaukaralaia danu. Witness taudia haida ese EPO hekododia idia abia dae, badina be ia ese rara sel kakakakadia havaradia karana ia haharagaia diba, bona unai dainai reana doketa do ia laloa lasi rara do idia abia be namo.

Reana muramura ma haida, idia lalodiai be albumin sisina gaudia, be nega vairai do idia gaukaralaidia matama, badina be muramura karadia kampanidia ese gau matamatadia idia karadia eiava gunadia idia haidaudia. Unai dainai Keristen taudia be reana do idia ura do idia diba, doketa ese ia gwauraia hekodona lalonai albumin ia noho eiava lasi. Bema idia daradara eiava idia laloa ia lalonai albumin ia noho, edia doketa idia nanadailaia be namo.

Ai hereva vadaeni hegeregerena, Witness taudia momo ese hekodo mai edia albumin sisina idia abidia dae. To, bema ta ia daradara, namona be inai kara herevadia do ia tahudia namonamo guna, bena ena lalona do ia hadaia.