Natu Havaraia Siahuna Bona Tuari Dirava Hahinedia

EBLA, Syria dekenai, akioleji gaukarana idia karaia neganai, idaunegai gauna ta idia davaria, ia be Isatara, Babulonia ena dirava hahinena, natu havaraia siahuna bona tuari dirava hahinena, ena laulau. Akioleji tauna Paolo Matthiae ese ia gwauraia, ia gwau ia be “toa karaia gauna kuboruna mai ena tomadiho laulauna; unai laulau ai, hahelaga hahinena ta, iena vairana be dabua amo ia koua vadaeni, be dirava laulauna ta vairanai ia gini . . . [unai kaivakuku] ena kwarana be au latana ta ena dorina ai.”

Unai idia davaria be mai anina bada, badina be unai kaivakuku be lagani 1800 B.C.E. bamona ai idia karaia gauna. Matthiae ia gwau, unai ese “ia hamomokania vaitani” lagani 2,000 bamona lalodiai Isatara idia tomadiho henia.

Isatara tomadiho henia karana be Babulonia dekenai ia matamaia, bena lagani handred haida lalodiai ia bada ia lao ela bona Roma Basileiana ena kahana ibounai. Iehova ese Israela taudia ia hagania tomadiho koikoi ibounai be Gwauhamata Tanona amo do idia kokia, to idia kokia lasi dainai, Asataroto tomadiho henia karana ese ia hahekwakwanaidia. (Asataroto be Kanana taudia edia dirava hahinena, Isatara bamona.)​—Deuteronomi 7:​2, 5; Gunalaia Taudia 10:6.

Ena be hari inai negai Isatara bona ia bamona diravana Asataroto be lasi, to idia ese idia laulaulaidia gaudia​—matabodaga karadia bona dagedage karadia​— be idia vara momo. Ita henanadai, hari inai nega taudia be momokani unai idaunegai besedia, natu havaraia siahuna bona tuari dirava hahinedia idia tomadiho henidia besedia, amo idia idau, eiava?

[Picture on page 20]

Natu idia bouboulaidia Tanit ena

[Credit Line]

Ralph Crane/Bardo Museum