Duahia Taudia Edia Henanadai

Keristen tauna ta ia gorere eiava ia laolao dainai bema Memorial ai ia lao lasi, hua ta do ia ore murinai do ia karaia be namoa?

Idaunegai Israelana ai, Paseka be lagani ta ta ai idia karaia, hua ginigunana ladana Nisan (o, Abib) ena dina namba 14 ai. To hahegani idauna ta be Numera 9:​10, 11 ai ita davaria: “Israel taudia oi hamaorodia, oi gwau, ‘Ena be umui emui ai eiava emui garana ediai tau ta do ia miro mase tauna enai do ia daukau dainai, eiava gabu daudauna ai do ia laolao, to ia be Iehova ena paseka ariana do ia badinaia. Idia ese hua iharuana [ladana Iyyar, o Ziv] ena dina namba 14 ai, adorahi ruaosi padadiai, do idia karaia. Mai paraoana, idia hatubua lasi gauna, bona mai aniani avadia iditadia ida do idia ania.’ ”

To mani inai oi laloa: Unai hahegani dainai Israel tauna ta ese unai dina rua (Nisan 14 or Ziv 14) ta be sibona ena ura hegeregerena ia abia hidi diba lasi. Nisan 14 ai ia miro tauna o gabu daudauna ai ia laolao tauna mo sibodia ese Paseka ariana be hua iharuana ai idia karaia diba.

Taunimanima momo be unai hahegani hegeregerena idia kara negana tamona be King Hesekia ese Hatubua Lasi Paraoana Ariana ia badinaia matamaia lou negana. Idia be nega lasi hua ginigunana totona do idia hegaegae (hahelaga taudia idia hegaegae lasi bona taunimanima idia do haboudia lasi), unai dainai hua iharuana ena dina namba 14 ai idia karaia.​—2 Sisiga 29:17; 30:​1-5.

To unai bamona hekwakwanai be lasi negadiai, Iuda taudia ese Paseka idia karaia, Dirava ese ia gwauraia hidi dinana ai. (Esodo 12:​17-20, 41, 42; Levitiko 23:5) Iesu bona ena hahediba taudia ese Taravatu hegeregerena idia karaia, unai dina idia laloa maragi lasi. “Idia hatubua lasi paraoa ena aria dinana, Paseka ena mamoe alaia dinana, ia ginidae. Vadaeni Iesu ese Petero bona Ioane ia siaia, ia gwau, ‘Umui lao, Paseka do umui karaia hegaegae, vadaeni do ita ania.’ ”​—Luka 22:​7, 8.

Unai neganai Iesu ese kara ta ia hamatamaia, Keristen taudia ese lagani iboudiai do idia karaia; ena ladana idia hatoa Lohiabada ena Adorahi Anibouna. Idia karaia be mai anina bada herea. Lagani lalonai dina badana Iehova ena Witness taudia ediai be unai. Badina be Iesu ia gwau: “Inai bamona do umui karaia, lau dekenai do umui laloa totona.” (Luka 22:19) Unai dainai, hua haida idia do noho ela bona unai dina neganai, namona be Iehova ena Witness taudia ta ta iboudiai be dala do idia lailaia, kara idauna ta be unai adorahi ai do idia karaia lasi totona. Lohiabada ena Adorahi Anibouna be Tuesday, April 6, 1993 ai do idia karaia, dina do ia diho murinai.

To ia laloa guna lasi gauna, gorere o laolao ena hekwakwanai, bema ia vara dainai Keristen tauna ta be ena palani hegeregerena do ia lao diba lasi, dahaka do ia karaia be namo?

Unai anibou ai, idia hatubua lasi paraoana bona uaina kakakakana be Dirava ese ena lauma helaga amo ia horodia bona mauri be gubai do idia abia totona ia abidia hidi taudia ese idia abia. (Mataio 26:​26-29; Luka 22:​28-30) Bema hari lagani ai idia ta be gorere dainai ena ruma o hospital do ia rakatania diba lasi, kongregesen ena elda taudia ese dala do idia karaia, idia ta ese paraoa bona uaina do ia abia lao ia dekenai, Baibel siridia haida be ia dekenai do ia herevalaia, bona paraoa bona uaina do ia henia. Bema unai neganai horoa Keristen tauna ta be idau gabuna ai do ia noho, namona be dala do ia karaia, unai dina ai unai gabu ena kongregesen do ia lao henia totona.

Unai dainai, hekwakwanai idau hereana ta do ia vara neganai mo, horoa Keristen tauna ta ese Lohiabada ena Adorahi Anibouna na dina 30 (hua ta) murinai do ia karaia, Numera 9:​10, 11 ena hahegani bona 2 Sisiga 30:​1-3, 15 ena sivarai hegeregeredia.

Iesu ena “mamoe idaudia,” edia helaro be mauri hanaihanai tanobada ai do idia abia taudia, be ia haganidia lasi paraoa do idia ania bona uaina do idia inua. (Ioane 10:16) Unai hebou idia lao be gau badana, to unai gau idia abidia lasi. Unai dainai, bema idia ta ia gorere o ia laolao dainai, unai adorahi ai kongregesen ta ida do ia hebou lasi, namona be ia ese Iesu be unai kara ia hamatamaia sivaraina bona Baibel siridia maorodia ma haida do ia duahidia bona Iehova do ia noia, unai hebou tanobada hegegemadai idia karadia be do ia hanamodia. To ia dainai hebou ma ta be hua ta murinai do idia karaia lasi.