Buka, Buka, Buka!

Idaunegai aonega King Solomona be inai hereva ia torea: “Buka momo idia torea noho, doko lasi.” (Hadibaia Tauna 12:12) Lagani 1995 lalonai, Britain ai, taunimanima 580 edia orea ta ta totona buka ta idia halasia, unai dainai tanobada tanodia amo Britain be buka matamatadia ia halasia tanona ginigunana. China, taunimanima momo herea tanona, be gabu iharuana ia abia. China dekenai buka 92,972 idia halasia, to Britain dekenai buka 95,015 idia halasia. Idia murinai be Germany (buka 67,206), bona unai murinai United States (buka 49,276), bena France (buka 41,234). London ena niuspepa The Daily Telegraph, ia gwau: “Britain ese tano iboudiai ia halusia badina be English gado dainai.”

Ripoti idia hahedinaraia lagani momo lalonai, idia hoihoilaia buka edia namba ia diho, bona hari Britain ai taunimanima badadia 80 pesen sibona ese lagani ta ta ai buka tamona eiava haida idia hoia. To taunimanina be idia hoia buka iboudiai idia duahia, a?

Gabu momo dekenai idia hariharilaia bona idia duahia buka ta be Baibel, hari Baibel ena kahana eiava ibounai be gado 2,120 ma haida ai idia abia diba. Bema oi sibona emu kopi oi do abia lasi, oi kahirakahira ia noho Watch Tower Society ena opesi dekenai oi lao ta do oi abia totona. Bema oi dekenai Baibel ia noho vadaeni, oi abia bona inai magasin lalonai idia noho Baibel siri oi duahidia. Unai oi karaia neganai, Baibel ena mauri henia dibana do oi davaria.

Duahia Taudia Edia Henanadai

Iehova ena Witness taudia be idia hekwarahi kara maoromaoro idia badinaia totona bona idia abidadama heheni dainai, badina be dahaka idia ta be ma ta ida bisinesi karadia idia karaia neganai, kontraka pepana idia torea be gau badana?

Unai bamona idia karaia be Baibel ena hereva hegeregerena, ia be mai ena namo, bona ia be lalokau karana. Edena bamona? Mani unai gau edia anina bisinesi kontraka dekenai do ita laloa.

Dirava ese ia gwauhamata henia besena, Israela taudia unai, ia kara henidia sivaraina be Baibel lalonai idia torea. Baibel ese tomadiho momokani taudia edia bisinesi karadia haida ia gwauraia danu. Genese karoa 23 ena sivarai ta mani ita tahua. Aberahamo ena adavana lalokauna Sara ia mase neganai, ia ura guria gabuna ta do ia abia. Ia ese Heberona kahirakahira dekenai idia noho Kanana taudia edia amo tano ta ia tahua. Siri 7-9 ese idia hahedinaraia ia gwau unai tano ena davana korikori do ia henia. Siri 10 ese ia hamomokania unai be hanua ena ikoukou ai idia helai taudia vairadiai ia gwauraia hedinarai. Tano biaguna ia gwau do ia henia kava Aberahamo dekenai, to Aberahamo be siri 13 lalonai ia haere, ia gwau unai tano do ia abia dalana tamona be do ia hoia. Siri 17, 18, bona 20 ese idia hahedinaraia ia be unai bamona ia karaia; “Hiti taudia edia vairana dekenai, bona hanua lalonai idia haboua taudia ibounai edia vairana dekenai ia hoia.”

To, bema unai bamona bisinesi karadia idia karaia hebou taudia ruaosi be tomadiho momokani taudia, idia edia kara do ia idau, a? Ieremia karoa 32 ese haere ia henia. Siri 6 amo ela, ita davaria Ieremia ese tano ta be ena tamana maragina ena natuna ena amo ia hoia gwauraia. Siri 9 ia gwau idia ruaosi ese ena davana korikori dekenai idia lalo-tamona. Ieremia be siri 10-12 ai ia gwau: “Egu ladana be tano biaguna pepa dekenai lau torea, bona hamomokania bona koua totona egu maka aukana lau atoa. Unai neganai danu, egu hoia kara uitnesi taudia ese danu unai pepa idia sainia, bona moni be metau abia sikele dekenai metau lau abia. Vadaeni tano biaguna pepa, koua maka lau atoa gauna, bona unai pepa ena kopi ta, mai koua maka lasi gauna, unai pepa, ruaosi lau abia, bona tau ta ladana Baruku dekenai lau henia. Baruku be Neraia Maseaia ena natuna tau. Ia dekenai unai pepa lau henidia neganai, Hanamele bona pepa idia sainia uitnesi taudia ese idia itaia.”

Oibe, ena be Ieremia be ia ida bisinesi ia karaia tauna be ena tomadiho oreana tauna bona ena varavara ta, to pepa rua ia sainia​—⁠ta ia koua lasi, do idia itaia lou haraga diba totona, bona ta ia koua auka, bena bema ia koua lasi pepa ena maoro idia daradaralaia, pepa iharuana amo do idia hamomokania diba. Siri 13 ena hereva hegeregerena, unai kara ibounai be “idia ibounai edia vairana dekenai” ia karaia. Unai dainai unai be bisinesi karana maorona mai ena uitnesi taudia. Vadaeni, ia hedinarai goevagoeva tomadiho momokani taudia ese bisinesi karadia be unai bamona idia hamomokania bona idia torea be Baibel ena hereva hegeregerena.

Unai kara be mai ena namo. Ita diba inai hereva be momokani: “Ibounai ese nega dika idia davaria noho, bona inai dika ia vara kava noho.” (Hadibaia Tauna 9:11) Dirava idia badinaia abidadama korikori taudia danu ese nega dika idia davaria diba. Iamesi 4:​13, 14 ia gwau: “Umui haida inai bamona umui hereva, umui gwau, ‘Hari dina o kerukeru dina unai hanua badana do ita lao, unuseni lagani ta do ita noho, do ita hoihoi, moni momo do ita abia.’ Umui dekenai inai bamona lau hereva: Umui diba lasi kerukeru dina dahaka do ia vara.” Reana kara ta ita hamatamaia, hegeregere, gau ta ita hoia gwauraia, o ita gwauhamata gaukara ta do ita karaia, o gau ta do ita karaia tau ta ena. To kerukeru​—⁠eiava hua gabena o lagani gabena ai​—⁠dahaka do ia vara? Bema ita eiava ena gaukara ita karaia tauna ese aksiden do ita abia, be edena bamona? Toana be iseda gwauhamata do ita hagugurua diba lasi. Reana unai gaukara ita karaia diba lasi, eiava unai ta be mai dala lasi unai gaukara ena davana do ia karaia eiava ena gwauhamata do ia hamomokania. Bema gwauhamata pepana o kontraka pepana be lasi, hekwakwanai badadia idia vara diba, to bema ita be mai eda pepa, unai hekwakwanai do idia vara lasi o bema idia vara, hanaidia dalana ia noho.

Bona namona be inai ita laloaboio lasi: Iseda mauri lalonai do idia vara diba gaudia dainai, reana ma ta ese iseda bisinesi karadia, eiava unai tau ena bisinesi karadia, do ia naria eiava do ia haorea. Siri 14 lalonai Iamesi be ma ia gwau: “Umui be kwalahu maragina bamona, nega sisina ia hedinarai, vadaeni ia boio momokani.” Oibe, ita laloa lasi, to ita mase haraga diba. Bema gwauhamata pepana o kontraka pepana ta ita torea, bena bema gau ta ia vara kava iseda kahana dekenai eiava unai tau ena kahana dekenai, ma haida ese unai pepa ena hereva do idia hamomokania dalana ia noho.

Unai hegeregerena, kontraka pepana torea karana ena namo ihatoina be inai​—⁠ia be lalokau karana. Momokani, bema kontraka idia karaia taudia ruaosi ta ia mase eiava aksiden ta dainai ia gaukara diba lasi, ia be Keristani tauna ta dainai pepa ta dekenai iena maduna iboudiai eiava ia abia gwauraia monina ibounai ia torea guna vadaeni be lalokau karana. Bisinesi karana ta be iseda tadikaka ta ida ita karaia neganai, bema pepa ta dekenai iena maduna eiava do ia abia monina ita torea namonamo, unai kara ese ia hahedinaraia lasi ita abidadama henia lasi, to ia hahedinaraia ita lalokau henia. Bema unai bisinesi gwauhamata ena kahana idia karaia taudia ta be ia goevadae lasi dainai unai gwauhamata ena kahana haida do ia laloaboio, unai lalokau karana dainai badu havaraia gaudia do idia momo lasi. Bona ita daika be ia goevadae, o gau ta ia laloaboio lasi, o hereva iboudiai o ura iboudiai ia lalo-pararalaia goevagoeva?​—⁠Mataio 16:⁠5.

Bisinesi gwauhamatadia be pepa dekenai ita torea karana ese iseda tadikaka, eda ruma bese, bona kongregesen taudia dekenai iseda lalokau ia hahedinaraia daladia ma haida ita gwauraia diba. To, ia hedinarai goevagoeva gau iboudiai be pepa dekenai ita torea be lalokau karana sibona lasi, to ia be mai anina bona Baibel ena hereva hegeregerena.