Duahia Taudia Edia Henanadai

Iehova ena Witness taudia haida dekenai dala ia kehoa tomadiho rumana ta eiava tomadiho gabudia ma haida dekenai do idia gaukara totona. To Baibel ena lalohadai unai bamona moni gaukara dekenai be dahaka?

Idia ura momokani 1 Timoteo 5:8 ena hereva idia badinaia Keristani taudia ese reana unai henanadai idia laloa. Unai siri ese ia hahedinaraia ta be tauanina dalanai ena ruma bese taudia ia naria namonamo be gau badana. Momokani, ena be Keristani taudia ese unai sisiba idia badinaia be gau badana, to ia hamaorodia lasi moni gaukara idauidau ibounai, herevana edena bamona gaukara, do idia abia dae be hegeregere. Keristani taudia idia lalo-parara Dirava ena ura gau ma haida dekenai idia laloa namonamo danu be gau badana. Hegeregere, tau ta ia ura tauanina dalanai ena ruma bese ia naria dainai, Baibel ena hereva lebulebu karadia eiava ala-ala karadia dekenai ia utua be maoro lasi. (Mani Genese 39:​4-9; Isaia 2:4; Ioane 17:14, 16 itaia.) Keristani taudia ese Babulonia Badana, tanobada ena tomadiho koikoi oreadia ibounai, amo idia raka siri haheganina idia badinaia be gau badana danu.​—Apokalupo 18:​4, 5.

Tanobada hegegemadai, Dirava ena hesiai taudia idia davaria moni gaukara be idauidau. Idia vara diba gaudia ibounai edia lista ita karaia bona edia taravatu aukadia ita atoa be anina lasi bona ita be mai eda siahu lasi unai ita karaia totona. (2 Korinto 1:​24) To, namona be Keristani taudia ese edia moni gaukara idia abia hidi neganai, idia laloa be namo gaudia haida ita herevalaia. Unai gaudia be March 1, 1983 ena Gima Kohorona lalonai idia hahedinaraia. Unai hereva ese Dirava ia henia lalona ena mamina ena heduru ia herevalaia. Maua ta lalonai, henanadai badadia rua idia henia bena heduru herevadia ma haida idia hahedinaraia.

Henanadai badana ginigunana be inai: Baibel ese unai moni gaukara ia gwauraia dika, a? Unai ia herevalaia neganai, Gima Kohorona ia gwau Baibel ese henaohenao, rara gaukaralaia kava, bona kaivakuku tomadiho henia karadia ia gwauraia dika. Namona be Keristani tauna ese Dirava ia ura henia lasi karadia, ai gwauraia vadaeni karadia unai, ia durua moni gaukarana ia karaia lasi.

Henanadai iharuana be inai: Bema unai gaukara do ia karaia, Baibel ese ia gwauraia dika karana ena durua tauna ai ia lao, a? Ita daradara lasi, bema ta be laki gadara rumana ai, bogana lalonai natuna idia hamasea kliniki ai, eiava ariara hahine edia ruma ai ia gaukara, ia be Baibel ese ia gwauraia dika karana ena durua tauna ai ia lao. Ena be dina ta ta ai foloa ia daroa eiava telefon ia haerelaia sibona, to unai gaukara amo Dirava ena Hereva ese ia gwauraia dika karana ia durua.

Moni gaukara idia abia hidi gwauraia Keristani taudia momo ese unai henanadai idia laloa namonamo amo heduru idia abia, sibona edia lalona idia hadaia totona.

Hegeregere, unai henanadai rua dainai ta ia lalo-parara dahaka dainai tomadiho momokani tauna be tomadiho koikoi oreana ta ena dubu totona bona dubu lalonai do ia gaukara lasi. Apokalupo 18:4 ena hahegani be ia gwau: “Lauegu orea taudia e, ia dekena amo do umui raka siri, ia danu do umui kara dika hebou garina.” Bema tau ta be hahediba koikoi ia hadibaia tomadiho oreana totona ia gaukara, ia ese Babulonia Badana ena kara bona ena kara dika ia durua. Herevana unai gaukara tauna be uma naria tauna, gabu ia hagoevaia eiava hanamoa tauna, eiava akaun naria tauna, to ia karaia gaukarana amo tomadiho momokani ese ia dadaraia karadia ia badinaia oreana ia durua. Danu, bema taunimanima idia itaia unai gaukara tauna ese dubu ia hahairaia, ia hanamoa, eiava ena tomadiho karadia haida ia durua, do idia laloa ia be unai tomadiho orea ena memba ta.

To, dubu ta eiava tomadiho oreana ta ena gaukara ia karaia hanaihanai lasi tauna be edena bamona? Reana dubu ena badina daiutuna dekenai ranu paipa ta ia dika bena ia idia boiria ia hanamoa totona. Unai be dubu ena guhi koua gauna atoa eiava guhi hanamoa ena kontraka abia totona pepa ia siaia karana amo ia idau, ani?

Guna ita hereva bamona, idia vara diba gaudia be momo herea. Unai dainai Gima Kohorona ese ia hahedinaraia lalohadai ma ima mani ita herevalaia:

1. Unai gaukara be taunimanima durua gaukarana ta, Baibel ese ia taravatua lasi gaukarana unai, a? Hegeregere, revareva abidia lao tauna oi laloa. Ena be revareva ia abidia lao rumana ta be dubu ta eiava bogana lalonai natuna hamasea kliniki ta, to ita gwau lasi ena anina be ia be Baibel ese ia gwauraia dika karana ta ia durua. Dirava ese ia havaraia dina ena diari be ruma iboudiai edia uindo amo ia vareai, dubu bona unai bamona kliniki iboudiai edia danu. (Kara 14:​16, 17) Reana revareva ia abidia lao tauna do ia laloa dina iboudiai ia ese taunimanima iboudiai durua gaukarana ia karaia. Dika ta ia vara dainai idia boiria Keristani tauna be unai bamona gaukara ia karaia danu​—hegeregere dubu dekenai ranu koua totona idia boiria plama tauna ta eiava dubu ena hebou ta lalonai ia gorere tauna durua totona idia boiria ambalans tauna ta. Reana do ia laloa ena gaukara be unai nega ai taunimanima durua gaukarana ta sibona.

2. Ta be mai ena siahu kampani ese ia abia hidi gaukarana dekenai, eiava lasi? Keristani tauna, sitoa ena biaguna ta, ese kaivakuku, meamea gaudia, kuku, eiava aniani gaudia mai edia rara ia oda lasi do ia hoihoilaia totona. Ia be biaguna dainai ia be mai ena siahu hoihoi gaudia abia hidi totona. Reana taunimanima haida ese ena lalona idia veria toho, kuku eiava kaivakuku ia hoihoilaia moni bada ia abia totona, to ia ese ia abia dae Baibel herevadia do ia badinaia noho. To, reana Keristani tauna ta be aniani sitoa badana dekenai kohu edia davana abia gaukarana, foloa hadiaria gaukarana, eiava akaun naria gaukarana ia karaia. Ia be mai ena siahu lasi idia oda bona idia hoihoilaia gaudia abia hidi totona, bona reana idia haida be ia ura lasi gaudia, hegeregere kuku eiava taunimanima ese tomadiho ena dina helagadia dekenai idia gaukaralaia gaudia.a (Mani Luka 7:8; 17:​7, 8 itaia.) Do ita herevalaia gauna be mai anina unai dekenai.

3. Gaukara ia karaia momo eiava? Namona be sitoa ena haheitalai ita laloa lou. Reana sitoa dekenai kohu edia davana abia gabuna eiava hoihoi gaudia be edia gabu dekenai ia atoa tauna be nega haida sibona kuku eiava tomadiho gaudia be ena imana dekenai ia dogoatao; unai be ena gaukara ena kahana maragina sibona. To, bema ta be unai sitoa tamona ai kuku hoihoilaia patana dekenai ia gaukara, unai be idau! Dina ta ta iboudiai ena gaukara lalonai ia be Keristani taudia ese idia abia dae lasi karana ia karaia. (2 Korinto 7:1) Unai ese ia hahedinaraia dahaka dainai moni gaukara ita abia hidi neganai, unai gaukara be do ita karaia momo eiava lasi ita laloa danu be gau badana.

4. Edena orea ese gaukara ena davana ia henia bona edeseniai ia gaukara? Gau rua mani oi laloa. Taunimanima ese idia lalo-namo henia totona, bogana lalonai natuna hamasea kliniki ese tau ta ena gaukara davana ia henia, kliniki kahirakahira ai idia noho daladia ia hagoevaia totona. Unai kliniki ese ena gaukara ena davana ia henia, to ia be unai kliniki ai ia gaukara lasi, bona taunimanima ese kliniki dekenai ia idia itaia lasi. To, idia itaia ia ese Baibel ena hereva ia utua lasi taunimanima durua gaukarana ia karaia, herevana daika ese ena gaukara ena davana ia henia. Vadaeni gau idauna ta do ita herevalaia. Gavamani ese ariara hahine edia gaukara dekenai ena gwaumaoro ia henia tanona ai, gavamani ena helt dipatmen ese sista ta ena gaukara davana ia henia, ariara hahine edia ruma dekenai gorere tahua karadia ia karaia bona unai amo pokese goreredia ia koua totona. Ena be gavamani ena helt dipatmen ese ena gaukara davana ia henia, to ia be ariara hahine edia ruma dekenai ia gaukara. Ena gaukara be lebulebu karadia amo idia vara goreredia ia koua, bona unai dainai taunimanima ese lebulebu karadia idia abia dae. Unai haheitalai ese idia hahedinaraia dahaka dainai gaukara ena davana ia henia oreana bona gaukara gabuna ita laloa be namo.

5. Gaukara ese ia havaraia anina be edena bamona; ia karaia tauna ena lalona ena mamina ia hadikaia eiava ma haida ia hahekwakwanaia, a? Lalona ena mamina ita laloa be namo, sibona eda bona ma haida edia. Ena be Keristani taudia momo ese gaukara ta (ena gabu bona ena davana ia henia oreana) idia abia dae, to reana ta ia laloa unai gaukara ese ia sibona ena lalona ena mamina do ia hadikaia. Aposetolo Paulo, haheitalai namona ia hahedinaraia tauna, ia gwau: “Ai laloa aiemai kudouna ena laloa be maoromaoro, Dirava ena vairanai. Bona ai ura be nega ibounai kara maoromaoro do ai karaia.” (Heberu 13:18) Namona be sibona eda lalona ena mamina ia hadikaia gaukarana ita karaia lasi; to danu, namona be edia lalona ena mamina be idau taudia ita maumauraia lasi. Danu, reana Keristani tauna ta ia laloa gaukara ta ia karaia neganai Baibel ena taravatu ta ia utua lasi, to ia lalo-parara unai gaukara ese kongregesen taudia bona ena noho gabuna taudia momo edia lalona ena mamina ia hadikaia diba. Paulo ese lalohadai maorona ia hahedinaraia, ia gwau: “Ai ura lasi taunimanima idia gwau aiemai gaukara ia dika. Unai dainai ai ese taunimanima hadikaia kara ta ai karaia lasi, lasi momokani! To aiemai kara ibounai dekena amo ai hedinaraia ai be Dirava ena hesiai taudia.”​—2 Korinto 6:3, 4.

Vadaeni, namona be hari henanadai badana ita laloa lou. Ita ese dubu ena gaukara ta, hegeregere uindo matamatadia atoa, kapet hagoevaia, eiava dubu hasiahua masini hanamoa gaukarana ita henanadailaia. Ataiai ita herevalaia herevadia ese edena bamona ita idia durua diba?

Ta ia abia siahuna ita laloa. Keristani tauna be bisinesi ena biaguna eiava gunalaia tauna bona ia abia hidi diba dubu dekenai gaukara ta do idia karaia eiava lasi, a? Bema Keristani tauna ta be unai bamona siahu ia abia, ia ura Babulonia Badana lalonai gaukara ta karaia totona kontrakana ta ia karaia, bena ena gaukara amo tomadiho koikoi oreana ta ia durua, a? Unai be hegeregere ta ese sibona ena sitoa dekenai kuku eiava kaivakuku ia hoihoilaia, ani?​—2 Korinto 6:​14-​16.

Bema Keristani tauna be gaukara tauna sibona bona ia be mai ena siahu lasi idia karaia gaukaradia ia abia hidi totona, ma gau haida ia lalohadailaia danu be namo, hegeregere gaukara gabuna bona ia karaia negana ena daudau. Gaukara tauna idia boiria, nega ta helai gaudia matamatadia ia abia lao eiava edia gabu ai ia atoa totona, eiava taunimanima durua gaukarana ta totona, hegeregere lahi habodoa tauna idia boiria lahi ese dubu ia do hadikaia lasi totona, a? Momo idia itaia unai be idau bona bisinesi ta ena gaukara tauna ta ese nega daudau lalonai dubu ia penia eiava ena uma ia hahairaia loulou be idau. Unai bamona gaukara ta ia karaia loulou eiava nega daudau lalonai ia karaia dainai, ena be unai Keristani tauna ia gwau unai tomadiho oreana ia abia dae lasi, to reana momo do idia laloa momokani ia be unai orea tauna ta, bona unai taudia ia hahekwakwanaia diba.​—Mataio 13:41; 18:​6, 7.

Ita ese moni gaukara ita abia hidi neganai ita laloa be namo gaudia momo ita herevalaia vadaeni. Ita ese tomadiho koikoi oreana totona gaukara ta karaia karana ita henanadailaia dainai unai ita herevalaia. To, moni gaukara idauidau ita laloa neganai danu, unai gaudia ita laloa be namo. Nega ibounai, mai guriguri ida ita laloa namonamo be namo, bona ita laloa gaukarana ena kahana idauidau​—bona reana ma gaukara haida amo idau momokani dalana​—ita laloa danu. Ita herevalaia gaudia ese lalo-momokani Keristani taudia momo idia durua vadaeni, moni gaukara namona idia abia hidi totona, bona unai ese ia hahedinaraia idia ura Iehova vairanai idia raka maoromaoro.​—Aonega Herevadia 3:​5, 6; Isaia 2:3; Heberu 12:12-​14.

[Footnote]

Inai Oi Laloatao, A?

Oi ese vanegai idia halasia Gima Kohorona magasin oi moalelaidia, a? Vadaeni, mani henunai idia noho henanadai oi haerelaia toho:

◻ Dahaka dainai Paulo ese horoa Keristani taudia ia herevalaia neganai, inai hereva “Keriso ena hereva gwauraia hedinarai taudia” ia gaukaralaia be maoro? (2 Korinto 5:​20)

Nega gunadia ai, gwaukau taudia be hepapahuahu negadia ai idia siaia, bena dala idia tahua tuari do ia vara lasi totona. (Luka 14:31, 32) Inai kara dika tanobadana ena taunimanima be Dirava amo idia daudau dainai, ia ese ena horoa gwaukau taudia ia siaia noho, taunimanima dekenai iena maino karaia taravatudia idia gwauraia totona, bona taunimanima idia hagoadaia Dirava ida do idia maino.​—12/15, rau 18.

◻ Aberahamo ena abidadama idia hagoadaia gaudia hani be dahaka?

Gau ginigunana be, Dirava ia hereva neganai ia kamonai, unai amo ia hahedinaraia Iehova ia abidadama henia (Heberu 11:8); iharuana be, ena abidadama dekenai ena helaro be mai anina bada (Roma 4:​18); ihatoina be, Aberahamo be nega momo Iehova danu ia herevahereva; bona ihahanina be, Dirava ena hakaua herevadia ia badinaia neganai Iehova ese Aberahamo ia durua. Hari inai negai, unai gaudia ese iseda abidadama idia hagoadaia diba.​—1/1, rau 17, 18.

◻ Inai hereva “Dibagani dekenai ai do oi hakaua vareai lasi” ena anina be dahaka? (Mataio 6:​13)

Dirava ita noia ita do ia durua dibagani ita davaria neganai ena ura do ita utua lasi. Iehova ese ita ia hakaua diba, “dika tauna,” Satani, ese ita ia halusia diba lasi totona. (1 Korinto 10:13)​—1/15, rau 14.

◻ Ta ese dahaka ia karaia be namo Dirava ese ena kara dika ia gwauatao totona?

Namona be ena kara dika ia lalohisihisilaia bona ‘lalona giroa ena anina korikori do ia hahedinaraia.’ (Luka 3:8) Ia helalo-kerehai bona ia ura unai kerere ia hamaoromaoroa dainai, Keristani elda taudia ese lauma dalana ai idia henia heduruna ia tahua danu. (Iamesi 5:​13-​15)​—1/15, rau 19.

◻ Badina be dahaka ita hekwarahi be namo ita manau totona?

Manau tauna be ia hesiku haraga lasi bona ia haheauka, bona sibona ia laloa bada lasi. Manau karana ese oi idia lalokau henia turadia momokanidia ia veria mai. To unai sibona lasi, Iehova ena hahenamo oi abia danu. (Aonega Herevadia 22:4)​—2/1, rau 7.

◻ Iesu ena mase bona Adamu ena mase edia idau be dahaka?

Adamu ena mase be ena kara dika ena davana, badina mai ena ura ida iena Havaraia Tauna ia gwau-edeede henia. (Genese 2:​16, 17) To, Iesu ia mase be maoro lasi, badina “kara dika ta ia karaia lasi.” (1 Petero 2:​22) Unai dainai Iesu ia mase neganai, kara dika tauna Adamu ia mase neganai ia dekenai ia noho lasi gauna be Iesu dekenai ia noho, bona ia be dava bada gauna​—Iesu be mai ena maoro taunimanima ta ena mauri goevadaena ia abia totona. Unai dainai, Iesu ena mase be boubou gauna bamona taunimanima edia mauri davana karaia totona.​—2/15, rau 15, 16.

◻ Esekiela ena peroveta matahanaina lalonai, hanua ese dahaka ia laulaulaia?

Unai hanua be helaga lasi tanona lalonai ia noho dainai, ia be tanobada gauna. Unai dainai, toana be unai hanua ese tanobada gaukarana haheaua karana ia laulaulaia. Ia be kara maoromaoro tanobadana ai do idia noho taudia ibounai edia namo ia havaraia.​—3/1, rau 18.

◻ Lagani 33 C.E. ai, Pasova ariana idia hahelagaia neganai, dahaka dainai Iesu ese ena hahediba taudia edia aena ia huria?

Iesu ese aena huria kastom karana ta ia hamatamaia lasi. To, ia ese ena aposetolo taudia ia durua lalohadai matamatana idia abia dae totona​—namona be idia manau bona edia tadikaka totona anina maragi gaukarana karaia urana idia abia.​—3/1, rau 30.

◻ Haida hadibaia karana lalonai, iseda diba be gau badana lasi to dahaka be gau badana?

Iseda kara be edena bamona bona lauma dalanai edena kara ita manadalaia be gau badana, stadi taudia idia tohotohoa totona. (Luka 6:​40; 2 Petero 3:​11)​—3/15, rau 11, 12.

◻ Hereva idia henia taudia ese edena bamona edia Baibel duahia karana idia hanamoa diba?

Idia karaia loulou karana amo. Oibe, mai edia gado regena ida idia duahiduahi loulou ela bona edia duahiduahi karana ia namo. Bema edia gado dekenai Baibel be kaset teipi dekenai idia duahia, namona be duahia tauna ena anina hahedinaraia dalana, ena gado regena ia haidaua dalana, bona ladana bona hereva aukadia gwauraia dalana idia kamonai.​—3/15, rau 20.

◻ Ta ia mase neganai, ena lauma be edena bamona ia giroa lou Dirava dekenai? (Hadibaia Tauna 12:7)

Badina lauma be iseda mauri siahuna dainai, unai lauma be ‘Dirava dekenai ia giroa lou’ ena anina be nega vairai unai tauna do ia mauri lou dalana tamona be Dirava ese ia biagua. Dirava sibona ese ena lauma, eiava ena mauri siahuna, do ia henia lou diba, unai tauna ia mauri lou totona. (Salamo 104:30)​—4/1, rau 17.