Lalo-Tamona mai Lalokau Danu
Gau badana momokani be inai; umui ta ta do umui lalokau henia mai emui lalona ibounai.—1 PETERO 4:8.
HARIHARI Dirava ena taunimanima dekenai unai bamona lalokau ita itaia, a? Oibe ita itaia! Inai lalokau karana ia vara badina idia abia dae Iehova ena lohia siahuna be maoro, guna David ia karaia hegeregerena. Lagani 1922 negana amo “Davida ena natuna” Iesu Keriso, ena horoa tadikakadia ese gaukara badana idia karaia, idia ese Dirava ena Basileia be ia kahirakihira ena sivarai, bona Dirava ena Hahemaoro tauna Iesu Keriso ena imana amo Satana ena dagedage lohia karana idia abia dae taudia iboudiai do idia mase, ena sivarai idia harorolaia tanobada ibounai lalonai.—Mataio 21:15, 42-44; Apokalupo 19:11, 19-21.
2 David be ‘Iehova ena kudouna ia hamoalea.’ Ena kara amo David ese ia hahedinaraia Iehova bona Iena kara maoromaoro ia ura henia bada—gari tauna Pavapava Saulo danu ia gwau David be unai bamona karaia tauna ta—oibe, David be ia gari lasi, ena kudouna ibounai amo Iehova ia tomadiho henia, taunimanima ia gunalaidia namonamo, bona mai manau danu Dirava ena taravatu ia badinaia.—1 Samuel 13:14; 16:7, 11-13; 17:33-36; 24:9, 10, 17.
3. Ionatan ena lalohadai David dekenai be edena bamona, bona dahaka dainai?
3 Goliata ia alaia murinai, David be ia lao Saulo dekenai unai sivarai ia hamaoroa totona. Unai neganai kara maoromaoro ia ura henia tauna ma ta ia hedinarai. Ena ladana be Ionatan, ia be Pavapava Saulo ena natuna merona ginigunana. “David ese Saulo ia haere henia vaitani, bena Ionatan bona David be lalo-tamona ai idia hetura heheni; Ionatan ese David ia lalokau henia, ia sibona ia lalokau henia bamona.” (1 Samuel 18:1) Ena be tuari ai David be mai goadana bona vilipopo gaukaralaia dalana ia diba bada, to ita gwau lasi unai kara sibona dainai Ionatan ese David ia ura tura henia, to David be ia ura Dirava ena ladana do ia hanamoa, sibona ena namo ia laloa lasi, bona Iehova dekenai ia abidadama bada dainai, Ionatan ia moale ia dekenai.—Salamo 8:1, 9; bona 9:1, 2 oi hahegeregeredia.
4. Pavapava dagina ia abia totona David idia horoa neganai, Ionatan be dahaka ia karaia?
4 Ena be Ionatan ena lagani be bada, ia ese David ena lagani be lagani 30 amo ia hanaia, to ia bona inai tuari tauhauna, David, be lalo-tamona dekenai idia hetura heheni. “Bena Ionatan be David ida idia gwauhamata; badina ia ese ia lalokau henia, sibona ia lalokau henia bamona. Ionatan ese ia karaia dabua badana bona ena tuari dabuadia ia kokidia, ena dare bona ena peva bona ena beleta danu ia kokia, bena David ia henia.” (1 Samuel 18:3, 4) Ionatan ena lalo-parara be ia bada herea momokani! Ionatan be Saulo murinai pavapava dagina bema abia. To pavapava dagina abia totona David idia horoa neganai, ia badu lasi badina ia be mai ena lalokau bada David dekenai. Ia diba David ia ura bada Iehova ena ladana ia hanamoa bona ia ura Iehova ena lohia siahuna ena maoro ia hamomokania.—2 Samuel 7:18-24; 1 Sisiga 29:10-13.
5. Ionatan ia diba Dirava ena tuari lalonai kara ta be mai anina bada, unai be dahaka?
5 Ionatan danu be ia tuari karaia kara maoromaoro havaraia totona. Ia gwau: “Bema Iehova ia ura haida do ia hamauridia, hutuma imadia amo eiava hutuma lasi imadia amo, tau ta ese do ia koua diba lasi.” Dahaka dainai unai bamona ia hereva? Ionatan ia diba Dirava ena tuari lalonai idia kwalimu totona iena heduru idia tahua be gau badana. Nega ta Ionatan ia kerere dainai Saulo ia gwau do idia hamasea, unai hahemaoro herevana be mai manau danu ia abia dae. To Israel taudia ese Saulo ena hereva idia koua, badina idia ura lasi Ionatan ia mase.—1 Samuel 14:6, 9, 10, 24, 27, 43-45.
Lalokau Bada Ia Hahedinaraia
6 David be tuari dekenai ia kwalimu bada dainai Saulo be ia dekenai ia mama, bona dala ia tahua ia alaia mase totona. To Ionatan be mai ena lalokau bada David dekenai unai dainai ia durua! Unai sivarai be inai: “Ionatan, Saulo natuna, ese David ia lalokau henia. Bena Ionatan ese David ia hamaoroa, ia gwau, ‘Tamagu Saulo ese dala ia tahua oi ia hamasea totona; unai dainai, daba ai oi naria namonamo, gabu hehunina dekenai do oi noho, do oi komu.’ ” Unai nega lalonai Ionatan ese Saulo ena badu ia haorea, unai dainai David ia hamasea lasi. Murinai David ese “Filistia taudia ia tuari henidia, hutuma ia aladia mase,” unai dainai Saulo ma ia mama ia dekenai. Bona ma ia gwauhamata David do ia alaia mase totona, unai dainai David ia heau mauri.—1 Samuel 19:2-10.
7. Ionatan bona David be hehuni gabunai idia hedavari neganai, guna idia gwauhamata herevana ma idia hamomokania totona, dahaka idia gwau?
7 Murinai, Ionatan bona ia komu noho tauna David, idia hedavari lou neganai Ionatan ia gwau: “Dahaka do oi gwauraia, unai do lau karaia oi totona.” Bena Iehova vairanai idia gwauhamata heheni lou, David ia gwau hanaihanai Ionatan ena ruma bese dekenai hebogahisi do ia hahedinaraia—bona unai gwauhamata ia hagugurua. “Bena Ionatan ese David ia gwauhamata henia lou, ia lalokau henia dainai; badina be ia ese ia lalokau henia, ia be sibona ia lalokau henia hegeregerena.”—1 Samuel 20:4-17; 2 Samuel 21:7.
8. Dahaka dainai Ionatan bona David be hehuni dalanai idia hedavari, bona unai neganai dahaka ia vara?
8 Pavapava Saulo ia goada karaia David ia hamasea totona. Ionatan ese David durua totona Saulo ia hereva henia neganai, Saulo ia badu dikadika bona ena io ia negea Ionatan dekenai! Unai dainai hanua murimurinai, hehuni gabuna dekenai, Ionatan ese David ia hereva henia. “David be . . . tano ai ia goru diho, nega toi ia goru diho. Bena ruaosi idia harahu heheni bona idia taitai hebou, ela bona David ena taitai be ia bada herea. Bena Ionatan ese David ia hamaoroa, ia gwau, ‘Mai emu maino danu oi lao; badina be ita ruaosi be Iehova ena ladana dekenai ita gwauhamata heheni vadaeni, ita gwau, “Iehova be lau bona oi padanai bona lauegu garana bona oiemu garana padadiai ela bona hanaihanai.” ’ ” Bena David ia raka oho bona Sifi ena tano gagaena dekenai ia noho hehuni.—1 Samuel 20:41, 42.
9, 10. (a) Nega ginigabena idia hedavari heheni neganai Ionatan ese David edena bamona ma ia hagoadaia? (b) Filistia taudia ese Ionatan bona Saulo idia hamsedia neganai, David be edena tai anena ta ia abia, bona unai ane ena hereva ginigabena be dahaka?
9 Lalokau dalana amo Ionatan ese David ia hagoadaia noho. Bible lalonai ia gwau: “Ionatan ia tore isi, David ia lao henia Hore dekenai, Dirava ladana dekenai ia hagoadaia totona. Ia ese ia hamaoroa, ia gwau, ‘Oi gari lasi; badina be egu tamana Saulo imana ese oi do ia dogoatao lasi, oi be Israel pavapavana ai do oi lao, bona lau be oi henunai do lau noho. Egu tamana Saulo be inai ia diba.’ Bena idia ruaosi be Iehova vairanai idia gwauhamata heheni.”—1 Samuel 23:15-18.
10 Reana, unai murinai David bona ena turana Ionatan idia hedavari heheni lou lasi. Murinai, Filistia taudia idia tuari henidia neganai Ionatan bona Saulo idia mase neganai, David ese tai anena ia abia, ena ladana be, “Peva.” Inai ane dekenai iena hemataurai Saulo dekenai ia gwauraia badina ia be Iehova ena horoa tauna dainai, bona ane ena hereva dokona be inai: “Goada taudia madi o, tuari bogaraginai idia moru vadaeni. Ionatan be emu ororo doridiai idia hamasea. Egu kakana Ionatan e, egu lalona ia hisihisi bada oi dainai. Oi ese lau oi lalo-namo henia, lau oi lalokau henia bada; emu lalokau lau dekenai ese hahine lalokau henidia karana ia hereaia. Goada taudia, madi, idia moru vadaeni, bona tuari gaudia idia hamakohidia vadaeni!” (2 Samuel 1:18, 21, 25-27) Murinai, nega iharuana ai David idia horoa Iuda ena pavapava ai ia lao totona.
Hari Inai Negai Idia Laulaulaia Karadia
11 “Buka Helaga ena hereva ibounai be Dirava ena Lauma ese ia havaraia. Bona . . . hereva momokani ita dekenai do ia hadibaia” dainai, David bona Ionatan edia sivarai amo dahaka ita diba? (2 Timoteo 3:16) Inai sivarai amo ita diba lalokau bada ia noho, “hahine lalokau henidia karana ia hereaia” lalokauna unai. Momokani, “hahine lalokau henidia karana” amo moale bada do ia havaraia diba bema Iehova ena taravatu headava dekenai idia badinaia neganai. (Mataio 19:6, 9; Heberu 13:4) To David bona Ionatan ese idia hahedinaraia lalokauna be inai hahegani hegeregerena, ia gwau: “Israel e, oi kamonai: Iehova iseda Dirava be Iehova tamona. Iehova emu Dirava oi lalokau henia mai emu lalona ibounai bona mai emu mauri ibounai bona mai emu goada ibounai ida.”—Deuteronomi 6:4, 5.
11, 12. (a) David bona Ionatan idia hahedinaraia lalokauna be dahaka? (b) David bona Ionatan edia helalokau heheni bada karana ese dahaka ia laulaulaia?
12 David bona Ionatan be mai lalo-tamona dekenai idia ese Iehova idia gwauraia dika taudia idia tuari henidia neganai, unai bamona lalokau hereadaena idia hahedinaraia, bona unai kara amo Iena ladana idia hanamoa. Inai gaukara idia karaia hebou dainai, edia ‘lalokau heheni karana ia habadaia.’ (1 Petero 4:8) Idia hahedinaraia lalokauna be bada, Levitiko 19:18 ena hahegani herevana ia hereaia. Unai siri ia gwau: “Emu dekena tauna do oi lalokau henia, oi sibona oi lalokau henia hegeregerena.” Iesu ia gwauraia lalokauna ia laulaulaia, ia gwau: “Taravatu matamatana lau henia umui dekenai inai bamona, umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia.” Iesu ia hahedinaraia lalokauna be hereadae, ia sibona ena ura ia tahua lasi to Iehova ena ura ibounai ia karaia, bona mai moale danu ia ura “ena mauri do ia atoa diho, ena turana totona.”—Ioane 13:34; 15:13.
Lalo-Tamona “Orea”
13 Horoa Keristen “orea maragi” taudia ese Goliata ia laulaulaia taudia tuari henidia gaukarana idia gunalaia. To lagani 1935 amo idau “magu” badana dekenai idia noho Basileia harorolaia taudia ese idia durudia. Inai “mamoe idaudia” be lalo-tamona dekenai horoa “mamoe” orena taudia idia bamodia, bona idia be ‘orea tamona’ ai idia lao, “naria tauna” tamona, ‘David ena Natuna’ ena siahu henunai, bona lalo-tamona ena lalokau hereadaena ese ia guidia—guna Ionatan bona David ia guidia lalokauna hegeregerena.—Luka 12:32; Ioane 10:16; Esekiel 37:24.
14. Saulo ese David ia alaia toho, bona Ionatan ena lalokau karana David dekenai ese dahaka idia laulaulaidia?
14 Inai Ionatan oreana be hutuma bada oreana ai ia tubu matamaia neganai, Tanobada Ibounai Tuarina Iharuana ia matamaia, unai nega lalonai orena taudia bona idia bamodia taudia ese hahetoho bada herea idia davaria. Unai lagani lalodiai dagedage bada idia davaria, nega momo dubu edia haroro taudia ese inai dagedage karana idia havaraia. Idia edia kara be Saulo ena kara bamona, ia ese horoa tauna David ia alaia mase toho, bona gabeai Ionatan ia alaia toho, badina ia ese mai moale danu ia hahedinaraia ia be David ena kahana dekenai ia gini. Unai dagedage negana lalonai David bamona orea bona Ionatan bamona orea taudia ese lalokau bada idia hahedinarai heheni! Mataio 25:35-40 dekenai Iesu ia gwauraia herevana be parabole herevana, to nega momo unai gaudia idia vara momokani.
15. (a) Hari inai negai Iehova ena Witness taudia edia kara bona Saulo bamona orea taudia edia kara ena idau be dahaka? (b) “Lauma dikana ta Iehova ena amo” ese Saulo ia hagaria dikadika, hari inai negai unai ese dahaka ia laulaulaia?
15 Iehova ena Witness taudia edia abidadama kara be bada, Idia be Saulo bamona orea taudia bamona lasi! Iehova ena Witness taudia be “tanobada ena lasi,” bona idia ese Iesu ena hahegani idia badinaia, ia gwau tanobada ibounai lalonai “umui ta ta do umui lalokau henia.” (Ioane 15:17-19) To Kerisendom ena haroro taudia edia kara be idau, tanobada ibounai tuari badadia rua lalodiai, idia tuari heheni besedia edia tomadiho haroro taudia be edia “dirava” dekenai idia guriguri idia kwalimu totona, bona unai idia karaia lalonai edia dubu tamona bese idauidau taudia idia ala-ala heheni, bona idia milion momo idia mase. “Lauma dikana ta Iehova ena amo” ese Saulo ia hagaria dikadika ena anina, be Apokalupo karoa 8 ia gwauraia sivaraina ena anina hegeregerena, unai karoa lalonai aneru ese dika idauidau idia bubua diho tanobada dekenai. Ia hedinarai goevagoeva Kerisendom tomadihona ena haroro taudia be Iehova ena lauma helaga idia abia lasi.—1 Samuel 16:14; 18:10-12; 19:10; 20:32-34.
16. (a) Tomadiho edia haroro taudia ese tanobada ibounai tuari badadia rua negadiai, dahaka idia karaia Iehova ena taunimanima idia dagedage henidia totona? (b) Hari inai nega lalonai, Saulo ia laulaulaia oreana be edena dala amo Dirava ena taunimanima ia dagedage henidia?
16 Lagani 1918 lalonai, tuari badana ginigunana neganai, dubu edia haroro taudia United States lalonai ese politikol oreadia idia doridia Watch Tower Society ena dagi taudia idia samanidia totona, bena dibura dekenai idia koudia. (Gabeai kota taudia ese inai Bible student taudia be dibura amo idia ruhadia, badina idia gwau edia kerere be lasi.) Tanobada ibounai tuari iharuana neganai, idia tuari heheni besedia, Germany bona idia durua besedia (Axis besedia) bona England bona idia durudia besedia (British Commonwealth besedia) edia tano momo lalonai, taravatu idia karaia Iehova ena Witness taudia edia gaukara idia koua totona, nega momo unai idia karaia badina tomadiho orea taudia ese idia doridia dainai. Inai hereva hamomokania totona, mani atai dekenai ia noho revarevana oi duahia. Australia dekenai gavamani ese Iehova ena Witness taudia edia gaukara idia do koua lasi neganai, Sydney ena Archbishop (gabeai Cardinal dagina ia abia) tauna ese ia torea. Witness taudia ese Australia ena High Court dekenai idia lao gavamani ese ia atoa taravatuna idia kokia toho totona, unai kota naria diadi, Mr. Justice Starke, ia gwau unai taravatu be taunimanima edia “ura sibona, ia be lalohadai idauna bona dagedage” taravatuna. Bena June 14, lagani 1943 ai, unai taravatu idia kokia bona kota ia gwau gavamani ese davana hida do idia henia Witness oreana dekenai. Vanegai idia ore laganidia lalodiai, Africa bona Asia edia gavamani idauidau ese Iehova ena Witness taudia idia dagedage henidia dikadika tomadiho orea ese idia hasiahudia dainai. Hari inai nega lalonai Saulo bamona orea—Kerisendom ena haroro taudia unai—ese Dirava ena taunimanima idia dagedage henidia noho.
17. (a) Iehova ena Witnesss taudia ese dahaka idia karaia gavamani bona tomadiho oreadia ese idia dagedage henidia neganai? (b) Tanobada ibounai lalonai Iehova ena Witnessa taudia be idia lalo-tamona, unai ese dahaka ia hahedinaraia?
17 Lagani 1980 ia lao 1989 lalodiai gavamani bona tomadiho oreadia ese Iehova ena Witness taudia idia dagedage henidia neganai, dahaka idia karaia? Edia kara be David ese Goliata ia tuari henia hegeregerena, bona David bona Ionatan ese Pavapava Saulo idia inai henia hegeregerena! Idia gari lasi bona edia lalona idia hadaia edia abidadama ia goada noho totona, bona Dirava ena lohia siahuna ena maoro idia harorolaia totona, badina idia diba Dirava ena Basileia do ia kwalimu. (Daniel 2:44) Dagedage karana idia davaria neganai mai lalo-tamona dekenai idia gini goada, bona tanobada ibounai lalonai idia hagoadaia heheni, tanobada taudia ese inai bamona lalo-tamona mai lalokau karana be guna idia itaia lasi. Tuari ia vara neganai idia vareai lasi, idia ese edia tomadiho tamona taudia ma bese haida dekenai idia aladia mase lasi. (Mika 4:3, 4) Edia kara amo idia hahedinaraia idia be Iesu ia gwauraia oreana, ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Tanobada ibounai lalonai Iehova ena Witness taudia iboudiai be tadikaka bamona, bona ‘idia lalokau heheni, mai lalo-tamona ida,’ bona inai lalokau karana ese gado idauidau, iduhu idauidau, bona bese idauidau taudia ia hatamonadia.—Kolose 3:14.
“Lalokau Korikori” Hahedinaraia
18 Ai kikilaia vadaeni sirina ia gwau, “Ionatan bona David be lalo-tamona ai idia hetura heheni; Ionatan ese David ia lalokau henia, ia sibona ia lalokau henia bamona.” Bona “nega dokonai” inai bamona kara hegeregerena be ia vara noho! (2 Timoteo 3:1, 14) Inai dagedage bona hepapahuahu bada negana lalonai, orea tamona, Iehova ena Witness taudia unai, ese tanobada ibounai lalonai lalokau mai lalo-tamona ida idia hahedinarai heheni noho. Inai Keristen korikori taudia ese tanobada ena kara amo idia gini siri dainai, idia hahedinaraia idia ia Havaraia Diravana idia hanamoa bona idia abiadae ia be tanobada taudia iboudiai edia Siahu Ibounai Lohiabadana. (Salamo 100:3) Hari inai negai, tau badabadadia—“Goliata” ena politikol turadia idia laulaulaia taudia unai—ese lauma Israel taudia idia gonagonalaidia noho. (2 Samuel 21:21, 22) Bona Saulo bamona orea taudia—Kerisendom ena haroro taudia unai—ese David bona Ionatan idia laulaulaia orea taudia idia dagedage henidia noho. (1 Samuel 20:32, 33) To “tuari be Iehova ena.” Ia be Siahu Ibounai Lohiabadana dainai, do ia tuari ena abidadama hesiai taudia totona, bona do ia kwalimu. Taunimanima ese David bamona orea taudia edia gini goada idia itaia dainai, idia milion momo—tano idauidau ai—be Ionatan bamona orea taudia ai idia lao, idia haida be guna idia dagedage Witness taudia dekenai, to hari Keriso ena ‘lalokau mai lalo-tamona danu’ idia gaukara hebou.—1 Samuel 17:47; Solomon ena Ane 2:4.
19, 20. (a) Rau Y-Z dekenai dahaka namba ese ia hahedinaraia Witness taudia edia gaukara ia bada ia lao noho? (b) Lagani 1979 ia mai 1988 lalonai Witness taudia be edena bada amo idia daekau lao? (c) Witness taudia be tanobada ibounai dekenai idia lalo-tamona, dahaka dainai unai hereva be maoro, bona henanadai ta be dahaka?
19 Iehova ena Witness taudia milion momo edia gaukara ia bada ia lao toana be inai magasin ena rau Y-Z dekenai oi itaia diba. Lagani 1979 ia mai 1988 lalonai, Dirava ena Basileia ia lohia noho ena sivarai namona idia harorolaia taudia edia namba be 2,186,075 amo ia bada daekau 3,592,654 dekenai. Tanobada ibounai lalonai inai taunimanima idia lalo-tamona momokani, edia tomadiho karana be tamona, edia hesiai gaukara Dirava dekenai be tamona, bona idia iboudiai be Bible ena taravatu idia badinadia noho. Tanobada hegegemadai inai lalo-tamona orea dekenai Iesu ena hereva be ia momokani, ia gwau: “Bema umui ese lauegu taravatu do umui badinaia; vadaeni egu lalokau dekenai do umui noho, lau hegeregerena, egu Tamana ena taravatu lau badinaia, vadaeni iena lalokau dekenai lau noho.”—Ioane 15:10; 1 Korinto 1:10 itaia danu.
20 Ena be gado idauidau 200 bamona lalodiai idia haroro noho, to Iehova ena Witness taudia ese idia gwauraia hereva momokanina be tamona, ia be “gado goevadaena,” bona Dirava ena hesiai gaukara idia karaia “mai lalo-tamona ida.” Edia kara be David bona Ionatan edia kara hegeregerena, idia helalokau heheni. (Sefania 3:9; 1 Samuel 20:17; Hereva Lada-isidia 18:24) Reana Dirava ena taunimanima danu oi do lalo-tamona lasi, to oi ura inai Ionatan bamona orea tauna ta ai do oi lao, a? Namona be oi goada karaia unai orea lalonai oi vareai totona, bona Iehova ena Witness taudia be mai lalokau danu ese oi do idia durua oi vareai totona.
Inai Hereva Oi Laloa Lou
◻ Ionatan ena lalokau David dekenai be edena bamona ia hahedinaraia?
◻ David bona Ionatan idia hahedinaraia lalokauna ese edena bamona lalokau ia laulaulaia?
◻ Kerisendom ena haroro taudia edia kara be Pavapava Saulo ese David ia inai henia karana bamona, dahaka dainai?
◻ Ionatan ena lalokau karana David dekenai ese hari inai negai dahaka ia laulaulaia?
◻ Tanobada ibounai lalonai Witness taudia idia lalo-tamona, unai ese dahaka ia hahedinaraia?
1. Harihari Dirava ena taunimanima dekenai edena bamona lalokau karana ita itaia, bona idia horoa Keristen taudia be lagani 1922 amo dahaka sivarai idia harorolaia?
2. Dahaka dainai David idia gwauraia ‘Iehova ena kudouna ia hamoalea’ tauna, be maoro?
6. Ionatan ena lalokau Davaid dekenai be ia bada dainai, edena dala amo ia durua?
13. Lagani 1935 amo edena orea ia hedinarai Basileia harorolaia totona, bona horoa Keristen taudia danu idia lalo-tamona eiava?
18. (a) Ionatan ena lalokau karana David dekenai ese hari inai nega lalonai dahaka ia laulaulaia, bona edena bamona ita diba unai be maoro? (b) David bamona orea taudia be gari lasi dekenai idia gini goada noho dainai, dahaka ia vara?
[Box on page 25]
St Mary’s Cathedral
Sydney.
August, 20, 1940.
The Rt. Hon. W. M. Hughes, M.H.R., K.C.,
Attorney General,
CANBERRA.
Dear Mr. Hughes;
INAI LETA AI HAHANAIA
Oiemu leta ena deit be dina 9, lau davaria dainai lau moale, unai leta lalonai Mr. Jennings, M.P. (palamen tauna) ena hereva oi dekenai ia torea.
Lau diba inai hereva do oi laloa namonamo bona kara ta do oi karaia kava lasi.
To, bema, kara ta oi karaia diba lasi badina inai taunimanima ese sibodia idia gwauraia idia be Keriso ena hahediba herevadia idia harorolaia, mai egu hemataurai danu oi lau noia, edia hereva oi abiadae lasi, to idia vara momokani gaudia oi laloa. Edia kara momokani oi diba totona, lau ese edia buka, edia hereva bona edia kara lau hahedinaraia oi dekenai, New South Wales ena Polisi taudia ese inai hereva idia hamomokania vadaeni. Edia kara be Keriso ena kara bamona lasi, edia kara be idau momokani.
New South Wales ena Polisi biaguna ia gwau namona be Gavamani ena dagi taudia ese taravatu do idia karaia inai Society edia gaukara do idia koua totona, bena unai neganai Polisi taudia be mai edia dala idia koudia totona.
With every good wish, I remain,
Yours faithfully,
ARCHBISHOP OF SYDNEY.