Duahia Taudia Edia Henanadai

Saulo ena tuari taudia be vamu mai rarana idia ania neganai, dahaka dainai idia aladia mase lasi, badina be Dirava ena Taravatu be unai?

Momokani unai tuari taudia ese Dirava ena taravatu rara dekenai idia utua, to ia bogadia hisi, badina be rara idia matauraia, herevana unai idia hahedinaraia goevagoeva lasi.

Unai neganai Israel taudia be King Saulo bona ena natuna Ionatan henudiai Filistia taudia idia tuari henidia. “Israel taudia edia tauanidia idia manoka dinana ai,” Saulo ese taravatu ia atoa haraga, ia gwau tau ta do ia aniani lasi ela bona edia inai taudia do idia halusidia vaitani. (1 Samuel 14:24) Ena taravatu ese hekwakwanai ia havaraia.

Ena tuari taudia idia tuari auka bona idia kwalimu, to idia hitolo mase bona edia tauanidia idia manoka herea. Dahaka idia karaia? “Idia dadidia gaudia idia heau henidia, mamoe bona boromakau . . . idia abidia, tano ai idia aladia mase, bena mai raradia ida idia anidia.”​—1 Samuel 14:32.

Dirava ena taravatu rara dekenai idia utua unai. Haida ese Saulo idia hamaoroa, idia gwau: “Itaia! Tuari taudia be Iehova vairanai idia kara dika, vamu mai rarana ida idia ania.” (1 Samuel 14:33) Oibe, Taravatu be animal ta do idia alaia mase neganai, ena rarana do idia bubua guna, gabeai vamu do idia ania. Dirava ia gwau lasi rara do idia bubua ela bona sina taina do ia noho lasi. Bema ranu bamona idia bubua, do idia hahedinaraia ena anina idia matauraia. (Deuteronomi 12:​15, 16, 21-25) Animal ena rarana idia bouboulaia diba, to idia ania be taravatu. Bema mai edia hekokoroku ida unai taravatu idia utua, edia davana be mase, badina be Mose ese ia hamaorodia, ia gwau: “Vamu mai rarana umui ania lasi, badina be mauri gaudia iboudiai edia mauri be rara ai. Do ia ania tauna be do idia utua oho.”​—Levitiko 17:​10-14.

King Saulo ena tuari taudia ese unai Taravatu idia utua mai edia hekokoroku ida, a? Dirava ena taravatu rara dekenai idia dadaraia vaitani, a?​—Numera 15:30 itaia.

Reana lasi. Baibel ia gwau “tano ai idia aladia mase, bena mai raradia ida idia anidia.” Reana rara idia bubua toho. (Deuteronomi 15:23) To, edia tauanidia idia manoka herea bona idia hitolo mase dainai, animal edia tauanidia idia taudia dae lasi bona idia naria lasi ela bona rara be ranu bamona ia hebubu ore. Mamoe bona boromakau be “tano ai” idia aladia mase neganai, edia rara ia hebubu haraga lasi reana. Bona unai animal be reana rara ai idia do hekure neganai, vamu be idia edia amo idia utua oho haraga. Unai dainai, ena be reana idia laloa Dirava ena taravatu idia badinaia gwauraia, to dala maorona ai idia badinaia goevagoeva lasi.

Unai dainai vamu “mai raradia ida idia anidia.” Saulo ia diba unai be kara dika, unai dainai ia haganidia nadi badana ta do idia keia mai ia dekenai. Bena ia haganidia, ia gwau: “Umui ta ta ena boromakau ena boromakau mamaruanedia bona ena mamoe ena mamoe do umui mailaidia, iniseniai do umui aladia mase bona do umui anidia; Iehova vairanai do umui kara dika lasi, vamu mai rarana ania karana amo.” (1 Samuel 14:​33, 34) Saulo ena hereva idia badinaia, bona “Saulo ese boubou patana ta ia haginia, Iehova ena.”​—1 Samuel 14:35.

Animal be unai nadi latanai idia aladia mase dainai rara bada ia hebubu diba, bena idau gabuna ta ai vamu idia ania. Reana Saulo ese hebubu rarana sisina be boubou patana ai ia atoa bena Iehova ia noia, kerere taudia do ia bogadia hisi. Toana be Iehova ese ia bogadia hisi, badina be ia diba unai tuari taudia ese dahaka dahaka idia karaia guna, herevana idia hesiku bada bona idia hitolo mase. Reana Dirava ese inai danu ia laloa: Saulo ese taravatu ia atoa haraga dainai, iena tuari taudia be unai hedibagani badana idia davaria.

Inai sivarai ese ia hahedinaraia, hekwakwanai badana ta ia vara neganai danu, Dirava ena taravatu ita utua be kerere. Ma ia hahedinaraia, ita do gwauhamata lasi o taravatu ita do atoa lasi neganai, namona be ita laloa namonamo guna, do ita hereva haraga bena hekwakwanai do ita havaraia garina.​—Kohelete 5:​4-6.