Inai Dala Hereadaena Oi Abia Dae Haraga!

PETER be nega daudau iunivesiti dekenai medikol gaudia ia stadilaia vadaeni neganai, Baibel ena hahemauri herevana ia kamonai mai ena ura ida. Ena medikol kosi ia haorea bena hospital dekenai doketa gaukarana ia karaia matamaia neganai, ena biaguna ese idia hagoadaia, taunimanima edia harana bona tauanina varovaro operesen karaia gaukarana do ia tahua. Doketa matamatadia ese do idia abia dae haraga dalana be ia vairanai idia kehoa unai.

To, Petera ese ena lalona ia hadaia unai gaukara abia dalana do ia abia dae lasi. Badina be dahaka? Badina be ena ura bona ena lalona ena goada be hegeregere lasi dainai, a? Lasi, idia henia gwauraia gaukarana ia laloa namonamo. Dirava ia gwauhamata henia bena bapatiso ia abia bona Iehova ena Witness tauna ta ai ia lao murinai, ia ura ena nega bada be Keristani hesiai gaukara idauidau ai do ia haorea. Ia laloa, bema harana operesen karaia dalana ia dibaia murinai, unai gaukara ese ena nega bada bona ena goada bada do ia haorea. Unai gaukara mai ladana bada ia abia dae lasi be kavakava karana eiava aonega karana, a?

Reana haida idia laloa Peter ena kara be kavakava karana. To ia ese Baibel siridia haida ia laloa, idia ta be Efeso 5:​15, 16. Unai siri dekenai aposetolo Paulo ese Keristani taudia ia hamaoroa, ia gwau: “Umui emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi, badina hari nega be nega dikana.”

Inai hereva, “nega namona,” mani oi laloa. Ia be Greek gado herevana ta ida idia hahegeregerea; unai hereva be nega momo Baibel lalonai idia gaukaralaia, nega ta mai ena toana idauna o ia lalonai gaukara idauna do idia karaia be namo negana gwauraia totona. Unai siri lalonai Paulo ese ia hahedinaraia goevagoeva, namona be Keristani taudia ese nega do idia atoa, mai anina bada gaudia karaia totona. Momokani, namona be ‘gau namodia edia toana do idia diba.’ (Filipi 1:​10) Mai anina bada gaudia do idia tahua guna be namo.

Vadaeni, Dirava ena palani hari inai nega totona be dahaka? Iena ura be dahaka, ia idia lalokau henia taudia dekenai? Baibel ena peroveta herevadia ese idia hahedinaraia goevagoeva iseda nega be “dokona negana,” o “nega ena dokona.” (Daniela 12:4; 2 Timoteo 3:​1) Keriso Iesu ese ia hahedinaraia goevagoeva dahaka be mai anina bada iseda nega lalonai. Ia gwau inai tanobada dikana ena dokona be do lasi neganai, “Basileia ena Sivarai Namona be tanobada ibounai dekenai do idia harorolaia.” Unai murinai dokona be do ia ginidae.​—⁠Mataio 24:​3, 14.

Unai dainai, Basileia ena sivarai namona harorolaia bona taunimanima be hahediba taudia ai halaoa dalana do ita davaria negadia ibounai, namona be do ita abia dae haraga. (Mataio 28:19, 20) Unai gaukara be gabeai do idia karaia lou lasi dainai, hari inai nega be taunimanima hamauridia gaukarana be mai eda goada ibounai ida do ita karaia diba negana ena dokona. “Nega namona be harihari!” Momokani, “hari dina hamauria ita abia dae be namo!”​—⁠2 Korinto 6:2.

Ena Lalona Ia Hadaia mai Ena Aonega Ida

Peter​—⁠matamanai ai gwauraia tauna matamatana​—⁠ese ena lalona ia hadaia namonamo bona dala ta ia abia hidi namonamo. Ia diba harana ena operesen ia karaia doketa ai do ia lao totona diba do ia tahua be kerere lasi. To dahaka be mai anina bada momokani ia dekenai? Gauna be iena Keristani hesiai gaukarana, badina be unai gaukara karaia negana be ia ore gwauraia. To ia be mai ena maduna ma haida danu. Ia be mai ena adavana, haroro gaukarana be ful-taim ia karaia hahinena, bona ia ese ia naria be maoro. (1 Timoteo 5:8) Peter ena maduna ma ta be inai: Ia abia torehai monina, iena edukeisini ena davana, be do ia henia lou. Vadaeni, ena lalona ia hadaia dahaka do ia karaia?

Peter ese ena lalona ia hadaia radiology do ia stadilaia bona ultrasound scan do ia karadia. Unai bamona gaukara be dina neganai, taunimanima edia gaukara korikori neganai, do ia karaia diba. Bona unai gaukara be iena gaukara horadia lalonai do idia hadibaia ia dekenai. Momokani, reana haida idia laloa unai gaukara lalonai ladana bada do ia abia lasi, to bema ia karaia, ia be mai ena nega bada, tomadiho gaukaradia do ia karaia.

Peter ese ma gau ta danu ia laloa dainai, ena lalona be unai bamona ia hadaia. Reana haida ese unai bamona lalohadaina idia abia lasi, to ia hahemaoro henidia lasi; to ia diba bema Keristani tauna ese tanobada gaudia ia goadalaia momokani, dika do ia davaria diba. Reana unai kara dainai ena tomadiho gaukaradia haida do ia reaia. Ma tau ta ena moni gaukara sivaraina ese unai ia hamomokania.

Basileia be ful-taim ia harorolaia tauna ta be laulau torea karana ia dibaia momokani. Ia torea laulaudia ia hoihoilaia, unai amo ena tauanina durua gaudia ia hoia diba. Ena be iena nega bada be mai anina bada Keristani haroro gaukarana lalonai ia haorea, to ia abia monina be hegeregere sibona do ia naria namonamo totona. To iena ura, laulau torea gaukarana habadaia urana, be ia bada ia lao. Bena unai gaukara ia goadalaia, ful-taim haroro gaukarana ia rakatania, bena gabeai, Basileia harorolaia gaukarana ia rakatania vaitani. Gabeai, Baibel ese ia taravatua karana ta ia karaia, unai dainai Keristani kongregesen amo idia atoa siri.​—⁠1 Korinto 5:​11-​13.

Iseda Nega be Idau

Hari ita be Iehova ita hesiai henia noho dainai, momokani ita ura ia do ita badinaia noho. Ita diba iseda nega be idau herea, nega gunadia bamona lasi. Dirava do ita hesiai henia noho bona hari inai negai idia vara gaudia do ita haheaukalaia totona, reana namona be iseda kara haida do ita haidaua. Unai be uma biaguna ta ena uma ena anina gogoa negana ida ita hahegeregerea diba. Unai be gaukara idauna karaia negana, ia lalonai ia ura ena gaukara taudia be hora momo lalodiai do idia gaukara goadagoada. Badina be dahaka? Badina be uma ena anina be nega kwadogi lalonai do idia gogoa be namo.

Inai tanobada dikana ena nega orena be kwadogi sibona. Keristani tauna korikorina be Iesu ena kara toana do ia tohotohoa goadagoada bona ena aena gabudia ai do ia raka be mai anina bada hari inai nega lalonai. Iesu be tanobada ai ia noho neganai, ena mauri dalana ese ia hahedinaraia dahaka be mai anina bada ia dekenai. Ia gwau: “Lau ia siaia Diravana ena kara, be dina lalonai do ita karaia. Badina be hanuaboi do ia mai neganai, tau ta do ia gaukara diba lasi.” (Ioane 9:4) Iesu ia gwau hanuaboi do ia mai; ia do idia dibagania, do idia hasatauroa, do ia mase, bena ena hesiai gaukarana tanobada ai do ia ore bona ena Tamana guba ai ia noho ena gaukara do ia karaia diba lasi negana be ia ese ia gwauraia unai.

Momokani, Iesu ena hesiai laganidia toi mai kahana lalonai, ia ese ena nega sisina be hoa karadia bona gorere taudia hamauria karadia ai ia haorea. To, ena nega bada be Basileia sivaraina harorolaia gaukarana ai bona tomadiho koikoi ese ‘idia guia taudia ruhaia’ sivaraina harorolaia gaukarana ai ia haorea. (Luka 4:​18; Mataio 4:​17) Iesu ese ena hesiai gaukarana ia goadalaia, bona ena hahediba taudia ia hadibaia, idia ese ruma ena badina, ia atoa vadaeni gauna, latanai ruma do idia haginia diba, bona anina ia havaraia haroro gaukarana do idia karaia noho diba totona. Dala ia davaria negadia ibounai Iesu ese Basileia gaudia edia namo ia herevalaia, bona ia ura ena hahediba taudia danu be unai bamona do idia karaia.​—⁠Mataio 5:​14-​16; Ioane 8:​12.

Iesu hegeregerena, ita, hari inai negai ia murinai ita raka taudia, ese taunimanima edia noho ita laloa, Iehova Dirava ese ia laloa hegeregerena. Inai nega ena dokona be kahirakahira, bona hebogahisi Diravana ia ura taunimanima iboudiai ese hahemauri abia dalana do idia davaria diba. (2 Petero 3:9) Unai dainai, namona be Iehova ena ura karaia dalana do ita tahua guna, bona iseda ura gaudia idaudia be gabeai, ani? (Mataio 6:​25-​33) Inai nega idauna lalonai, reana ita ese guna ita laloa bada gauna be mai anina maragi gauna ai do ita halaoa, iseda Keristani maurina lalonai.

Bema Dirava ena ura be iseda mauri lalonai ita atoa guna, gabeai ita ta ese unai do ia lalohisihisilaia, a? Lasi momokani, badina be ta ese sibona ena ura ia dadaraia Keristani karana amo, davana namo hereana ia davaria diba. Hegeregere, Iesu ese ena hahediba taudia ia hamaoroa, ia gwau: “Momokani lau hamaoroa umui, bema tau ta ese iena ruma ia rakatania, o iena tadikakana, o taihuna, o sinana, o tamana, o natuna, o tano, bema lau dainai bona Sivarai Namona dainai inai gaudia ia rakatania, hari inai mauri neganai, iena gau do ia habadaia nega 100 bamona, ruma, tadikakana, taihuna, sinana, natuna, bona tano. Momokani taunimanima ese unai tau do idia hisihisi henia, to gabeai, vaira neganai, mauri hanaihanai do ia abia.”​—⁠Mareko 10:29, 30.

Edia nega be Iehova hanamoa bona Basileia sivaraina harorolaia gaukarana lalonai idia gaukaralaia taudia ese idia abia davana be moni ida ita hahegeregerea diba lasi. Hahenamo momo herea idia moalelaia! Haida be inai: Tura korikoridia idia abia, Dirava ena ura idia karaia dainai edia lalona idia hegeregere, Dirava ese ia lalo-namo henidia, bona edia helaro be doko lasi maurina do idia abia. (Apokalupo 21:​3, 4) Idia ese taunimanima be lauma dalana ai idia durudia bona idia be Iehova ena Witness taudia dainai iena ladana helagana idia hanamoa be hahenamo badana ta idia dekenai! Momokani, ‘emu nega do oi haorea kava lasi’ be aonega dalana, bona ia dainai davana namona do oi abia. Hari be Dirava ena Basileia sivaraina namona harorolaia negana namo hereana, nega gunadia iboudiai ia hereaia. Unai gaukara karaia dalana hereadaena do oi abia dae haraga bona do oi dogoatao, eiava?

[Footnotes]