Boga Lalonai Natuna Hamasea Karana
Anina: Rogorogo hahinena ia ura lasi ena bogana lalonai ia noho natuna do ia vara, unai dainai ena vara dalana maorona koua totona kara ta ia karaia bena ena bogana amo ia negea. Unai be taunimanima hamasea karana.
Daika ese taunimanima edia mauri ia henidia dainai, iena lalohadai hegeregerena unai kara ita laloa be namo?
Kara 17:28: “Ia [Dirava] lalonai ita mauri, ita marere bona ita noho.”
Sal. 36:9: “Mauri ranuna na oi [Iehova Dirava] emu amo e lohi lohi daemu.”
Roma 14:12: “Ita ibounai ta ta iseda kara Dirava vairana dekenai do ita hedinaraia.”
Hahine bogana lalonai ia noho natuna ena tauanina be do mai ena oromana lasi neganai, Iehova ia laloa unai natuna ena mauri be mai anina bada, a?
Sal. 139:13-16: “Oi [Iehova] ese taugu anina o karaia, sinagu bogana ai o karagu. . . . Tau-anigu na do asi oromana negana ai, oi matamu ese e itagu; dina o karadia egu na iboudiai emu buka ai vada e tore, ta do se vara negana ai.”
Dirava be nega ta ia gwau, beibi ta, iena sinana ena bogana amo ia do lasi lasi gauna, ia hadikaia tauna ena kerere davana do idia henia, a?
Eso. 21:22, 23, NW: “Tatau idia heatu heheni neganai bema rogorogo hahinena ta idia haberoa, bena ena natuna be ena bogana amo bema idia lasi to mase kererena ia vara lasi, hahine ena biaguna do ia hereva, moni hida ia ese do ia henia, bena hahemaoro taudia edia amo do ia henia. To bema mase kererena ia vara, mauri do umui henia, mauri ena davana.” (Inai siri ena hereva be Baibel haida lalodiai idia hahanaia idau; edia anina be inai: Hari taravatu, Dirava ese Israel ia henia gauna, lalonai, hahine dekenai ia vara kererena be mai anina bada, to ena bogana lalonai ia noho gauna dekenai ia vara kererena be anina lasi. To Heberu gado revarevadia, matamana neganai idia torea gaudia hegeregeredia, ese mase kererena idia gwauraia, hahine dekenai ia vara gauna o ena natuna dekenai ia vara gauna.)
Dirava ese ia gwauraia maoro lasi badina ta dainai ta ese ma ta bema ia hamasea, ena kerere be bada eiava?
Gen. 9:6: “Daika ese taunimanima ta ia alaia, be taunimanima ese do idia alaia. Badina be Dirava ese taunimanima ia karaia, iena toana bamona.”
1 Ioane 3:15: “Mauri hanaihanai be ala-ala tauna lalonai ia noho lasi.”
Eso. 20:13: “Taunimanima oi alaia lasi.”
Bema doketa ta ia gwau, rogorogo hahinena ena natuna be ena bogana lalonai bema ia noho ela bona ena vara negana korikorina unai ese hahine ena mauri do ia hadikaia, unai natuna ia negea kava be maoro, a?
Nega haida doketa taudia edia lalohadai be kerere. Bema tau ta ese tau ma ta ia alaia badina ia laloa reana unai tau ese ma ta do ia hadikaia, iena kara be maoro lasi, ani? Hahine ia mara gwauraia neganai, bema doketa idia diba ia bona ena natuna ruaosi do idia mauri diba lasi to tamona sibona do ia mauri diba, namona be unai hahine bona ena tau idia laloa namonamo daika do idia hamauria—hahine eiava natuna. Tano momo lalodiai doketa taudia be mai edia heduru gaudia momo dainai, nega ta ta sibona unai bamona hekwakwanai ia vara.
Bema Ta Ia Gwau—
‘Lau be mai egu maoro do lau gwau dahaka do ia vara lauegu tauanina dekenai.’
Reana inai bamona oi haere henia diba: ‘Oiemu lalona ena mamina lau diba. Hari inai negai nega momo taunimanima haida ese iseda maoro idia koua; taunimanima momo idia laloa lasi dahaka ia vara ma haida dekenai. To Baibel ena heduru herevadia ese ita idia naria diba. Iena amo namo do ita davaria totona, namona be Dirava ese ita ia henia madunadia ita huaia danu.’ Bena reana ma oi gwau: (1) ‘Hahine momo be sibodia idia noho badina idia harogorogodia tataudia ese idia rakatanidia dainai. To tau mai adavana ida Baibel ena taravatu bema idia badinaia, tau ese ena adavana bona ena natudia do ia lalokau henidia bona idia ida do ia noho hebou bona do ia ubudia bona do ia naridia. (1 Tim. 5:8; Ef. 5:28-31)’ (2) ‘Bema ita ura unai bamona lalokau bona hemataurai do ita davaria, namona be iseda lalohadai iseda ruma bese taudia dekenai be Baibel ena taravatu hegeregerena. Baibel ia gwau ita havaradia natudia edena bamona ita lalodia be maoro? (Sal. 127:3; ma danu Isaia 49:15 itaia.)’