Program Matamatana Ta Kingdom Hall Haginia Totona
Idia hanaia lagani 10 lalonai Papua New Guinea ai, Iehova ena Witness taudia edia namba be 1,644 amo ia bada ia lao ela bona lagani 1995 ai pablisa taudia be 2,994. Lagani ta ta pablisa matamatadia be mai lalo-tamona ida ita danu Iehova idia tomadiho henia dainai ita moale. Badina ita be Iesu ia herevalaia “uiti utua neganai” ita noho dainai, taoni badadia bona gabu maragidia dekenai Kingdom Hall matamatadia haginia gaukarana be mai anina bada.—Mat. 13:30.
2 Misinari taudia bona spesel painia taudia edia gaukara namona dainai, momo be hereva momokani idia abia dae. Unai dainai, lagani 1986 ai idia matamaia Society ese misinari rumadia bona loaloa naria taudia edia noho gabudia ia haginia Arawa, Madang, Wewak, Goroka, Alotau, Kavieng, Gerehu, bona Popondetta dekenai, danu Lae bona Kimbe dekenai ruma idia hoia bona idia hanamoa. Unai nega tamona lalonai, kongregesen haida hegeregere Wewak bona Alotau, ese Kingdom Hall matamatadia idia haginia, kamonai matamata taudia momo be orea lalonai idia vareai dainai.
3 Gabu iboudiai Iehova ena Witness taudia ese edia Kingdom Hall idia laloa bada. Unai ena badina be Iehova ita tomadiho henia lalonai ia be mai anina bada. Kingdom Hall dekenai ita be Keristani hebamo namona ita mamia bona ita hagoadaia heheni diba. (Sal. 133:1; Heb. 10:24, 25) Kingdom Hall be tomadiho momokani ena gabu, bona taunimanima idia noholaia gabudia lalonai ia be Iehova ena Basileia gaudia ia laulaulaia. Ia lalonai kamonai matamata taudia ese Iehova ena orea idia dibaia matamaia.
4 Hari, Iehova ese haboua gaukarana ia haharagaia dainai, gabu haida dekenai Kingdom Hall badadia idia haginia be mai anina bada. Mai moale ida umui ai hadibaia diba October 1995 ena pura toi lalonai, Popondetta dekenai Australia tadikaka 64 ese edia nega idia henia bona unai gabu ena volantia taudia ida idia gaukara hebou Kingdom Hall idia haginia totona. Ia lalonai hebouhebou taudia 500 idia helai diba. Unai nega tamona lalonai, idia ese misinari rumana namona volantia taudia 6 idia noho totona idia haginia danu. Hari misinari taudia hani, bona spesel painia tamona be unuseniai idia gaukara noho. May 1996 ai, Australia tadikaka haida ese Lae West kongregesen idia durua pura rua lalonai bona Kingdom Hall ta, ia lalonai taunimanima 250 idia helai diba gauna, do idia haginia.
5 Gaukara bada ia do noho. Taoni badadia haida be Kingdom Hall matamatadia do idia haginia be namo eiava hari idia noho Kingdom Hall dekenai hanamoa gaukara sisina bada do idia karaia, edia toana do idia namo totona, bona unai amo Iehova ena ladana do idia hanamoa. Gabu maragidia haida dekenai kamonai taudia be momo herea dainai, unuseniai danu hebou gabudia idia haginia be namo! To, dahaka ita karaia diba?
6 Gabu Maragidia Edia Kongregesen Totona: Lagani haida lalonai, Society Kingdom Hall Fund ese gabu maragidia bona taoni kongregesen idia durua, unai amo abitorehai maragidia edia bada be K1,000 idia hanaia lasi, idia abia diba ruma haginia auna eiava guhi aurina idia hoia totona. Unai moni, Papua New Guinea ena kongregesen iboudiai be hua ta ta idia siaia harihari monina, be ia hegeregere unai grup maragidia ia durua totona, bona hari kongregesen 8 ese unai heduru idia abia vadaeni. Unai abitorehai monina idia ura gaukaralaia kongregesen maragidia be edia sekit naria tauna ida edia ura idia herevalaia murinai, revareva idia torea diba brens opesi ai ia noho Kingdom Hall dipatmen dekenai. Namona be idia laloatao unai moni be abitorehai monina bona nega korikori ai davana do idia henia lou be gau badana. Unai amo unai moni be ia ore lasi, to kongregesen ma ta durua totona do idia gaukaralaia diba.
7 Taoni Edia Kongregesen Totona: Mai moale ida umui ai hadibaia diba, Papua New Guinea Building Committee idia haginia vadaeni, ia ese Kingdom Hall haginia eiava hanamoa gaukarana idia naria elda taudia do ia durua, Papua New Guinea ibounai lalonai. Unai komiti ese do ia itaia dahaka idia karaia be namo Kingdom Hall matamata do idia haginia eiava ia noho Kingdom Hall do idia hanamoa totona, bona tano hoia, palani karaia, bona moni gaukaralaia dalana dekenai heduru ia henia ela bona Kingdom Hall do idia haginia ore. Nega momo, Kingdom Hall hanamoa gaukara be nega bona moni bada do ia haorea lasi. Tano matamata hoia bona Kingdom Hall matamata haginia be namo to hekwakwanai be tano bona Kingdom Hall gunana do ita hoihoilaia. Momokani, unai gaudia idia laloa neganai, gau momo idauidau idia lalohadailaia namonamo be gau badana.
8 Daika ese Gaukara Do Idia Karaia? Tano momo dekenai tanobada hegegemadai, mai edia ura volantia taudia tausen momo ese edia tano lalonai unai gaukara idia durua, edia nega bona goada idia henia hegaegae gaukarana dekenai, ruma ena kohu idia hoia gaukarana ai, bona konstraksen gabuna ai. Papua New Guinea dekenai danu mai edia diba tadikaka momo idia noho bona bema idia hegeregere gaukara haida dekenai edia nega idia henia diba. Nega sisina murinai, elda edia orea iboudiai be Kingdom Hall Construction Workers Questionnaire (Kingdom Hall Haginia Taudia Edia Henanadai) fom do idia abia.
9 Bema oi be hesiai tauna, eiava elda tauna, eiava haheitalai namona Keristani tauna ta mai ena diba, bona oi ura oiemu gabu kahirakahira dekenai Kingdom Hall haginia gaukarana do oi durua, unai fom ta be oiemu kongregesen ena elda taudia amo do oi abia diba. Oi hahonua ore murinai elda taudia mani oi henia lou. Idia ese edia hereva do idia torea, bena sekit naria tauna dekenai idia siaia, ia ese hereva ginigabedia do ia torea bena Papua New Guinea Building Committee dekenai ia siaia. Bema oiemu mauri bona oiemu diba be idia hegeregere, hahenamo badadia do oi abia Kingdom Hall idia haginia ore neganai tadikaka bona taihu edia moale oi itaia neganai, unai ibounai ese Iehova ia hanamoa.
10 Ibounai Idia Heduru Diba: Idia volantia diba lasi taudia edia gaukara be mai anina bada danu. Idia ese kongregesen lalonai gaukara idia naria, ma haida be gabu ma ta dekenai Kingdom Hall haginia gaukarana idia durua neganai.
11 Danu, bema Kingdom Hall be kahirakahira gabuna ta ai idia haginia neganai, emui kongregesen dekenai idia noho konstraksen gaukara idia diba lasi pablisa taudia be reana gaukara ma haida dekenai idia heduru diba. Unai taudia ese volantia taudia edia henanadai pepana idia hahonua lasi. Nega ta ta ai, heduru taudia ma haida idia ura neganai, konstraksen idia durua kongregesen ena elda taudia bona kahirakahira idia noho kongregesen edia elda taudia idia hadibaia bena idia ese unai do idia hegaegaelaia.
12 Kingdom Hall haginia gaukarana ena gwaumaoro idia abia neganai, Papua New Guinea Building Committee ese do idia itaia bema volantia taudia be hegeregere nega sisina lalonai gaukara do idia haorea totona. Bema edia namba be hegeregere lasi neganai, Australian Quickbuild Committee do idia noia volantia taudia ma haida do idia siaia totona.
13 Edena Dala ai Gaukara Do Idia Hamatamaia? Namona be kongregesen elda taudia ese edia ura be sekit naria tauna ida do idia herevalaia guna, bona bema ia noho, taoni naria tauna ida idia herevalaia danu. Unai murinai elda taudia be Kingdom Hall dipatmen brens opesi dekenai revareva do idia torea. Unai dipatmen ese Papua New Guinea Building Committee do ia hadibaia, bona unai komiti ese heduru do ia henia.
14 Kingdom Hall Matamatana Haginia Monina be Edena Dala amo Ita Abia Diba? Nega haida Society ese moni ia henia maoromaoro, Kingdom Hall haginia totona, bena kongregesen be hua ta hua ta ai kontribusen o renta monina ia henia. To nega momo, moni idia henia be kongregesen ena maduna. Idia henia daladia be inai: (1) moni idia henia, (2) kohu idia henia, (3) abitorehai dalana ai tadikaka be edia moni idia henia, (4) Society ese abitorehai ia henia. Society ena abitorehai monina be mai hetoana badina tanobada hegegemadai Kingdom Hall momo idia haginia gwauraia dainai. To, siti momo lalonai kongregesen momo idia noho. Nega haida, kahirakahira ia noho kongregesen ese heduru moni idia henia diba, eiava reana idia ese Society amo abitorehai idia abia diba, Kingdom Hall ia haginia kongregesen totona. Unai dala amo kongregesen tamona ese maduna metauna ia huaia lasi.
15 Idia Noho Kingdom Hall Naria Gaukarana: Mai edia abidadama Israela taudia ese Iehova ena dubu helagana idia naria namonamo bamona, Iehova ena taunimanima edia kongregesen ese edia Kingdom Hall idia naria namonamo idia dika idia lao lasi totona. (2 Siv. 24:13) Bema Kingdom Hall ita naria namonamo lasi, do ia dika ia lao bona moni bada ita halusia diba, to gau badana be Kingdom Hall ena toana dainai taunimanima ese Iehova, iena taunimanima, bona Basileia ena sivarai be edena bamona do idia laloa. Nega ginigunana hebou dekenai idia mai taudia be nega momo edia lalona idia hadaia idia itaia gaudia amo. Edia lalohadai be dahaka emui Kingdom Hall idia itaia neganai? Umui penia lou be namo, a? Helai gaudia, foloa, bona uindo edia toana be edena bamona?
16 Kongregesen iboudiai be sisiba herevana idia abia vadaeni Kingdom Hall idia naria bona hanamoa gaukarana dekenai. Danu, nega ta ta ai Society ese elda taudia oreadia ida do idia naria namonamo gaudia ia herevalaia. To momokani, elda taudia be nega iboudiai gau haida idia naria namonamo be namo. Guhi be ia namo, a? Mei rumana o ruma maragina, paua, bona fan be edena bamona? Unai iboudiai idia gaukara namonamo, a? Namona be lagani ta ta lalonai unai gaudia idia sekea.
17 Hari inai nega ai ‘hutuma bada’ taudia ese Basileia ena sivarai idia abia dae noho. “Kohu namodia” be Iehova ena lauma dubuna dekenai idia aru mai, bona ‘iena dubu be hairai dekenai ia honu.’ (Apok. 7:9; Hag. 2:7) Hagai ena negai idia noho abidadama Iuda taudia bamona, namona be mai eda kudouna ida Dirava ena gaukara ita karaia, bena mai anina bada Kingdom Hall matamatadia haginia gaukarana ita durua. Ena be idia hanaia lagani haida lalonai Kingdom Hall namodia idia haginia vadaeni, to kamonai taudia edia namba be ia bada ia lao noho. Society Kingdom Hall Fund dekenai moni ita henia be Dirava ena gaukara ita durua dalana namona.
[Pictures on page 3]
Misinari rumana Gerehu ai, lagani 1994 ai idia haginia
Misinari rumana Boundary Road, Lae ai, ful-taim gaukara taudia 15 edia noho gabuna, be lagani 1991 ai idia hanamoa
[Pictures on page 4]
Popondetta ena Kingdom Hall, November 1995 ai idia haginia
Popondetta ena misinari rumana, volantia taudia 6 idia noholaia gabuna, November 1995 ai idia karaia haorea
[Picture on page 5]
Kingdom Hall Kwaivagolo ai, lagani 1995 lalonai idia haginia
[Picture on page 6]
Lae West ena Kingdom Hall, ta ese ia torea gauna, May 1996 ai haginia gaukarana idia haorea
This article is unique to PNG.