Namona be Oiemu Natuna be Do Ia Lao Bodini Sikuli, A?

MANI oi laloa, oi be ogogami tanona ena taoni maragina ta ai oi noho. Oiemu natuna haida idia lao komiuniti sikuli, to edia mauri laganidia be 12 neganai, do idia lao haisikuli. Oiemu gabu lalonai, haisikuli idia honudae, sikuli kohudia ai idia dabu, bona edia tisa be hegeregere lasi. Straiki dainai nega haida sikuli be pura haida eiava hua haida lalodiai idia koudia.

Vadaeni, tau ta ese buklet mai toana namona, siti lalonai ia noho bodini sikuli ta sivaraina ia gwauraia gauna, be oi ia henia. Ia lalonai be stiuden taudia laulaudia; idia moale bona dabua namodia idia kwatua; edia klasrum, laboratri, bona laiberi be mai edia kohu momo. Kompiuta idia gaukaralaia, bona edia mahuta daiutudia idia goeva bona edia toana be namo. Buklet lalonai oi duahia herevana ta be, sikuli biagudia edia ura ta be stiuden taudia do idia durua, “edia diba hegeregerena edukeisini namo hereana do idia abia.” Oi duahia herevana ma ta be inai: “Stiuden taudia iboudiai ai taravatudia, kara maoromaoro do idia badinaia. Anina be, ruma bese taudia edia kara korikori hegeregerena, do idia kara mai edia hemataurai ida, edia tamadia sinadia bona taunimanima badadia do idia matauraia, do idia gaukara hebou, do idia haheauka, do idia hebogahisi, do idia koikoi lasi bona do idia kara mai edia lalo-maoromaoro ida.”

Ia kiri tauhauna ta ena hereva, buklet lalonai idia torea, be inai: “Lauegu tamana sinana ese hahenamo bada hereana be lau idia henia​—sikuli hereadaena dekenai lau idia siaia.” Kekeni ta ia gwau: “Sikuli ese lau ia hagoadaia bona ia hamoalea. Iniseniai diba lau abia be haraga.” Vadaeni, emu natuna mero o kekeni be unai bamona bodini sikuli dekenai do oi siaia, a?

Edukeisini Bona Lauma Gaudia Goadalaia Karana

Tama sina namodia ibounai, edia natudia edia namo idia tahua taudia, idia ura edia natudia edia mauri be badina aukana latanai do idia haginia, unai dainai edukeisini namona be mai anina bada. Nega momo edukeisini ese moni gaukarana abia daladia ia kehoa bona memero kekeni ia durudia, taunimanima badadia ai do idia lao neganai sibodia do idia naria bena gabeai edia bese do idia naria.

Reana emu lalona ai oi henanadai, oi gwau, ‘Bema bodini sikuli dekenai edukeisini namona do idia abia diba bona kara maoromaoro dalana do idia hadibadia, unai heduru do idia abia be namo, ani?’ Unai henanadai haerelaia totona, namona be Keristani tama sina ese inai mai anina bada gauna do idia laloa mai edia guriguri ida​—gauna be edia natudia edia namo lauma dalanai. Iesu Keriso ia henanadai, ia gwau: “Tau ta bema tanobada ibounai ia abia, to iena mauri ena lauma ia halusia, dahaka namo dohore ia abia?” (Mareko 8:36) Momokani, namo do ia abia lasi. Unai dainai, Keristani tama sina ese edia lalona idia do hadaia lasi edia natudia be bodini sikuli dekenai do idia siaia neganai, namona be idia laloa guna unai ese edia natudia do ia durua mauri hanaihanai do idia abia totona eiava.

Stiuden Taudia Edia Lalo-Ani

Reana bodini sikuli haida edia stiuden taudia ese maka badadia idia davaria. To idia eiava unai sikuli idia biagua taudia haida edia kara be edena bamona? Aposetolo Paulo ese “nega ena dokona” lalonai do idia noho taudia momo edia kara ia gwauraia, ia gwau: “Nega ena dokona dekenai, metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, bona helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi. Dirava badinaia kara be toana sibona do idia hedinaraia, to iena anina momokani do idia negea. Inai bamona taudia ibounai dekena amo do oi raka siri.”​—2 Timoteo 3:​1-5.

Tanobada hegegemadai kara maoromaoro bona Dirava badinaia karana idia maragi idia lao, unai dainai Iehova ena Witness taudia ese Baibel ena taravatu do idia badinadia be auka. Dina ta ta iboudiai edia ruma idia lou henia stiuden taudia ese idia davaria, ena be tanobada karadia idia karaia stiuden taudia be nega kwadogi sibona lalonai idia bamoa, to unai ese lauma dalanai ia hadikadia diba. Ena be dina ta ta iboudiai Witness memero bona kekeni be edia tama sina ese edia lalona idia hagoadaia, lauma dalanai idia durua, bona idia sisiba henidia, to idia danu ese unai taudia edia lalo-ani herevadia idia dadaraia be auka.

Vadaeni, memero kekeni, edia tama sina ese bodini sikuli dekenai idia siaia taudia, edia noho be edena bamona? Dina ta ta iboudiai edia tama sina mai edia lalokau amo heduru lauma dalanai be idia abia diba lasi. Dina dina iboudiai hora 24 lalodiai edia klas taudia ida idia noho dainai, edia lalona idia ania goada diba, edia kara do idia tohotohoa totona, to edia tama sina ida idia noho stiuden taudia dekenai reana unai lalo-ani ena siahu be maragi. Stiuden merona ta ia gwau: “Bodini sikuli stiuden taudia be daba ela bona hanuaboi edia kara hakererea gaudia bogaragidiai idia noho.”

Paulo ia gwau: “Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia.” (1 Korinto 15:33) Namo lasi Keristani tama sina do idia laloa kerere, do idia lalo bema edia natudia ese Dirava badinaia lasi taudia be nega ibounai do idia bamoa, unai ese lauma dalanai do ia hadikadia lasi. Dirava badinaia memero bona kekeni be nega taina lalonai Keristani taravatudia laloa karana do idia hadokoa bona lauma gaudia edia namo do idia laloaboio vaitani diba. Nega haida edia tama sina ese unai idia lalo-pararalaia lasi ela bona bodini sikuli idia rakatania vadaeni. Unai neganai, momo idia davaria unai kerere hamaoromaoroa dalana ia ore vadaeni.

Clement ena sivarai be momo edia sivarai hegeregerena. Ia gwau: “Bodini sikuli dekenai lau do lao lasi neganai, hereva momokani lau ura henia bona tadikaka ida ruma-ta-ruma-ta gaukarana lau karaia. Emai famili Baibel stadi lalonai bona Kongregesen Buka Stadi lalonai haere karana lau moalelaia. To, egu mauri laganidia be 14 bona bodini sikuli dekenai lau lao neganai, hereva momokani lau rakatania vaitani. Lagani ima lalodiai bodini sikuli ai lau noho, unai nega lalonai hebou dekenai lau lao lasi momokani. Kara dika taudia edia hebamo dainai, drag bona kuku lau ania, bona lau inuinu kekero.”

Tisa Taudia Edia Lalo-Ani

Kara maoromaoro idia badinaia lasi tisa taudia, edia dagi siahuna idia gaukaralaia kerere taudia unai, be reana sikuli lalonai idia noho. Idia haida idia dagedage bona idia kara auka, bona ma haida ese edia stiuden taudia idia sihari henidia. Bodini sikuli lalodiai, unai bamona tisa taudia momo idia samania lasi.

To, tisa taudia momo be memero kekeni idia hadibaia toho mai edia momokani ida, anina namona do idia havaraia taudia ai do idia lao, bona tanobada taudia hegeregeredia do idia kara. To unai be hekwakwanai ma ta, Witness taudia edia natudia vairanai. Tanobada taudia ese idia abia dae karadia haida be Keristani taravatudia hegeregeredia lasi. Tisa taudia ese stiuden taudia idia hamaoroa tanobada taudia ai do idia lao be namo, to Iesu ese ia murinai idia raka taudia ia hamaoroa idia be “tanobada ena lasi.”​—Ioane 17:16.

Memero kekeni ese Baibel taravatudia idia badinaia neganai bema hekwakwanai idia vara be edena bamona? Bema memero kekeni be sibodia edia ruma ai idia mahuta bona sikuli kahirakahira ta dekenai idia lao, unai hekwakwanai be edia tama sina ida do idia herevalaia diba. Edia tama sina ese hakaua herevadia do idia henidia diba, bona reana edia tisa do idia hereva henia diba. Unai dala amo, hekwakwanai bona lalohadai kereredia idia kokia haraga diba.

To bodini sikuli ai idia noho stiuden taudia edia mauri be idau. Edia tisa taudia ese idia biagudia hanaihanai. Memero kekeni, Keristani taravatudia idia badinaia toho taudia, ese edia tama sina edia heduru be dina dina iboudiai idia abia lasi. Nega haida, unai memero kekeni ese Dirava idia badinaia noho. To nega momo, idia badinaia lasi. Idia momo be vaia tisa tauna ena ura hegeregerena idia kara.

Edia Loaloa Idia Koua

Stiuden taudia iunivesiti ai idia noho be edia ura hegeregeredia idia lao mai diba, to bodini sikuli ese memero kekeni edia loaloa dalana idia koua. Unai sikuli momo ese stiuden taudia be gwaumaoro idia henidia, Sunday sibona ai sikuli gabuna do idia rakatania, bona haida ese unai gwaumaoro idia henidia lasi. Ena mauri laganidia be 11 kekenina ta ladana Eru, bodini sikuli ai ia noho, be ia gwau: “Sikuli biagudia ese ai idia koua, hebou dekenai ai lao diba lasi bona ai lao haroro diba lasi. Sikuli lalonai, Katolik taudia bona Muslim taudia edia guriguri sibodia idia karaia. Bema stiuden tauna ta ese unai dubu ruaosi amo ta ia abia hidi lasi, tisa taudia bona stiuden taudia oredia ese idia dagedage henia bada. Bona tisa taudia ese stiuden taudia idia doria, bese ena ladana abia isi anena bona tomadiho anedia do idia abia danu.”

Tama sina ese edia natudia edia ladadia be unai bamona sikulina ta idia henia neganai, idia ese edia natudia be dahaka idia hadibaia? Reana idia hadibadia edukeisini be mai anina bada, tomadiho totona do idia hebou bona taunimanima be hahediba taudia ai idia halaoa karana bona Dirava idia badinaia karana danu be mai anina maragi.​—⁠Mataio 24:14; 28:19, 20; 2 Korinto 6:​14-18; Heberu 10:24, 25.

Bodini sikuli haida lalodiai, Witness stiuden taudia ese Baibel idia stadilaia hebou, to nega momo unai idia karaia be auka. Lagani 16 kekenina ta ladana Blessing ese iena bodini sikuli be inai bamona ia gwauraia: “Dina ta ta iboudiai sibodia idia gwauraia Keristani taudia be guriguri totona idia hebou. Ai Witness taudia ese ai noidia ai sibona emai stadi do ai karaia, to memero kekeni badadia idia gwau unai sikuli taudia ese aiemai orea idia abia dae lasi. Bena ai idia doria, idia ida do ai guriguri. Bema ai karaia lasi, ai idia panisia. Bema tisa taudia edia heduru ai tahua, unai dika ia bada ia lao. Hereva dikadia idauidau amo ai idia gwauraia dika bona stiuden taudia badadia idia hagania ai do idia panisia.”

Idia be Idau

Iehova ena Witness memerodia bona kekenidia be bodini sikuli ai idia noho neganai, bema taunimanima idia diba goevagoeva idia be Witness taudia, unai ese edia namo ia havaraia diba. Sikuli biagudia ese reana gwaumaoro do idia henidia tomadiho karadia koikoidia, Witness taudia ese idia abia dae herevadia idia utua karadia, amo do idia gini siri. Edia bamodia sikuli ai ese reana kara dikadia bona herevahereva dikadia lalodiai do idia veridia vareai toho lasi. Stiuden taudia bona tisa taudia haroro henidia daladia be reana do idia davaria. Inai danu, tisa taudia do idia laloa lasi Keristani taravatudia idia badinaia taudia ese kara dika rohorohona idia karaia, bona nega haida tisa taudia bona edia bamodia sikuli ai ese do idia matauraidia.

To, nega momo unai bamona ia vara lasi. Nega momo, mero o kekeni ta be idau dainai, stiuden taudia bona tisa taudia danu ese idia dagedage henia bona idia kirikirilaia. Lagani 15 merona ladana Yinka, bodini sikuli ai ia noho merona, ia gwau: “Sikuli dekenai, bema idia diba oi be Iehova ena Witness taudia ta, oi do idia hakererea toho. Iseda tomadiho karadia idia diba bona idia diba ita kara maoromaoro, unai dainai ita do idia tarapua dalana idia tahua.”

Tama Sina Edia Maduna

Memero kekeni be Iehova ena hesiai taudia, idia gwauhamata henia taudia, ai halaodia gaukarana be tisa ta, sikuli ta, eiava koledi ta ena lasi. Unai be edia maduna lasi. Dirava ena Hereva ese tama sina sibodia ia hagania edia natudia be lauma dalanai do idia naria. Paulo ia gwau: “Tamana bona sinana e, emui natudia do umui habadua lasi, to Lohiabada ena hadibaia hereva idia dekenai do umui hadibaia.” (Efeso 6:​4) Bema edia natudia be bodini sikuli ai idia noho bona hua ta ta ai nega ta eiava rua sibona idia vadivadi henidia diba, unai sisiba Dirava ena amo be edena bamona do idia badinaia diba?

Taunimanima edia noho be idauidau, to Keristani tama sina ese inai hereva Baibel lalonai dainai, idia naria namonamo: “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.”​—1 Timoteo 5:8.

Sikuli Daladia Idaudia Idia Noho, A?

Bema toana be sikuli daladia be rua sibona​—bodini sikuli eiava sikuli kahirakahirana ta, ia hegeregere momokani lasi sikulina​—tama sina be dahaka do idia karaia diba? Haida ese edia natudia be sikuli kahirakahirana ta dekenai idia siaia, bona hadibaia tauna ma ta dekenai idia siaia danu, sikuli ai idia dibaia lasi gaudia do ia hadibadia totona. Tama sina ma haida ese hora haida lalodiai sibodia edia natudia idia hadibaia.

Tama sina haida ese hekwakwanai idia davaria lasi, badina be edia natudia be do maragi neganai bona haisikuli dekenai do idia lao negana be do daudau neganai, palani idia karaia guna. Bema oi be mai emu natuna maragidia eiava emu palani be emu bese do oi havaraia, reana haisikuli namona ta be emu gabu dekenai do oi tahua be namo. Bema ta oi davaria lasi, reana ta ia noho gabuna dekenai do umui hanai lao diba.

Tama sina idia diba idia ese edia natudia be Iehova lalokau henia karana do idia hadibadia namonamo totona, namona be nega momo do idia hadibadia mai edia diba bona mai edia haheauka ida. Edia natudia ta be ruma ai ia noho neganai bema idia hadibaia be auka, gabu daudauna ta ai ia noho neganai unai be auka herea! Dahaka do idia abia hidi be mai anina iena mauri hanaihanai abia dalana dekenai, unai dainai namona be tama sina be mai edia guriguri ida do idia laloa namonamo, bodini sikuli dekenai do idia siaia be namo eiava lasi. Bema ta ese ena natuna lauma dalanai idia hanamoa gaudia ia negea, bodini sikuli ai edukeisini namona do ia abia totona, unai be ena nega vaira laloa namonamo lasi karana! Unai be ta ese dava maragi nadina mai hairaina abia totona lahi ia araia noho rumana lalonai ia heau vareai bamona​—lahi ese unai tau ia araia.

Dirava ena Hereva ia gwau: “Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.” (Aonega Herevadia 22:​3) Dika do ia vara dalana do oi koua guna ena namo be bada, ia vara murinai do oi hamaoromaoroa toho ena namo be maragi. Aonega dalana be unai do oi laloa, sibona emu lalona ai inai bamona oi henanadai neganai, ‘Egu natuna do ia lao bodini sikuli be namo, eiava?’

[Box on page 28]

Witness Memero Kekeni Ese Bodini Sikuli Idia Kikilaia

“Bodini sikuli ai, Witness memero bona kekeni be edia tomadiho oreana taudia edia hebamo idia abia lasi. Unuseniai do idia kara namo be auka herea, badina be do idia kara dika totona idia doridia gaudia edia siahu be bada.”​—⁠Rotimi, ena mauri laganidia be 11 ela bona 14 neganai bodini sikuli ai ia noho merona.

“Keristani heboudia lao henia karana be auka herea. Sunday sibona lau lao diba, bona lau lao dalana tamona be stiuden taudia be guriguri totona idia laini karaia neganai, lau heau oho hehuni. Nega ibounai lau moale lasi, badina be emai ruma ai lau noho neganai, kongregesen heboudia iboudiai lao henia karana lau manadalaia, bona Saturday bona Sunday iboudiai haroro gaukarana lau karaia. Sikuli ese lau ia hagoadaia lasi. Hahenamo momo lau reaia.”​—⁠Esther, sikuli ena guriguri lalodiai ia vareai lasi dainai tisa ese nega momo idia dadabaia kekenina.

“Bodini sikuli ai lau ida idia sikuli hebou taudia haroro henidia karana be auka. Idia edia amo lau idau be auka. Lau ura edia orea do lau gavaia. Bema hebou lau lao henidia diba bona ruma-ta-ruma-ta gaukarana lau karaia diba, reana lau goada. To lagani ta ta ai nega toi sibodia, holide negadiai, unai bamona lau karaia diba. Bema emu lamepa be kerosini amo oi hahonua lasi, ena diari do ia maragi ia lao. Sikuli dekenai unai bamona ia vara.”​—⁠Lara, ena mauri laganidia be 11 ela bona 16 neganai, bodini sikuli ai ia noho kekenina.

“Bodini sikuli ai hari lau noho lasi dainai lau moale, badina be hebou iboudiai lau lao henidia, haroro gaukarana lau karaia, bona egu ruma bese taudia ida dina ta ta iboudiai edia siri ai herevalaia. Ena be bodini sikuli ai lau noho be mai ena hahenamo haida, to Iehova lau tura henia be mai anina bada; ma gau ta lasi ese unai ia hereaia.”​—⁠Naomi, ena tamana ia hamaoroa bodini sikuli amo do ia kokia be namo kekenina.