Manau—Maino Ia Habadaia Karana
Bema taunimanima iboudiai be manau idia hahedinaraia tanobada be gabu namona momokani. Unai neganai taunimanima be sibodia edia ura do idia doria momo lasi, ruma bese taudia do idia heai momo lasi, kampani ta ese ma ta do ia hanaia toho momo lasi, bona bese idauidau do idia hepapahuahu momo lasi. Oi ura unai bamona gabu ai do oi noho, a?
IEHOVA Dirava ena hesiai taudia momokanidia idia hegaegae ia ese ia gwauhamatalaia tanobada matamatana ai do idia noho totona, unuseniai idia laloa manau be manoka toana lasi to edia goada toana bona kara namona. (2 Petero 3:13) Idia be manau karana ai idia tubu noho hari inai nega ai danu. Badina be dahaka? Ena badina badana ta be Iehova ia gwau unai idia karaia be namo. Iena peroveta tauna Mika ia gwau: “Lohiabada ese kara namo dalana ita ia hamaoroa vadaeni. Lohiabada ia ura ita karaia gauna be inai: Kara maoromaoro do ita karaia, taunimanima ibounai do ita lalokau henia nega ibounai, bona mai manau danu Dirava danu do ita raka hebou.”—Mika 6:8.
Manau be mai ena anina idauidau: ia heagi lasi, ia hekokoroku lasi, bona ia ura lasi sibona ena diba, ena gaukara, bona ena kohu ia heagilaia. Buka ta ia gwau, manau ena anina danu be “sibona ena hetoana ia hanaia lasi.” Manau tauna be kara namo ena hetoana ia hanaia lasi. Danu, ia diba ia hegeregere lasi gau iboudiai ia karaia bona gau haida ia karaia lasi be namo. Ia diba gau haida ia abia lasi be namo. Manau taudia ita ura henidia momokani. England ena toretore tauna ta Joseph Addison ia gwau: “Taunimanima hanamoa karadia iboudiai amo manau momokani be namo herea.”
Goevadae lasi taudia be manau idia hahedinaraia haraga lasi. Unai kara dekenai ita tubu noho totona ita hekwarahi be namo. Ita ia hagoadaia totona, Dirava ena Hereva lalonai sivarai haida amo manau kara ena toana idauidau ia hahedinaraia.
Idia Manau King Rua
Iehova ia abidadama henia momokani tauna ta be Davida, ia be tau matamatana neganai Israela ena king ai ia lao totona idia horoa. Unai murinai, ia lohia tauna King Saulo ese Davida ia hametaua bada badina ia ura ia alaia bona ia lulua, heau boio tauna bamona ia noho totona.—1 Samuela 16:1, 11-13; 19:9, 10; 26:2, 3.
Ena be iena noho dalana be unai bamona to Davida ia diba, sibona ena mauri ia gimaia neganai gau haida ia karaia lasi be namo. Nega ta ranu lasi gabuna ai, Abisai ia ura King Saulo ia mahuta lalonai ia hadikaia neganai Davida ese ia koua, ia gwau: “Lohiabada ese egu dala ia koua, lau ese Lohiabada ia abia hidi king totona tauna lau hadikaia diba lasi momokani.” (1 Samuela 26:8-11) Davida ia diba king dagina amo Saulo kokia gaukarana be iena lasi. Unai dainai Davida be unai neganai kara maoro ena hetoana ia hanaia lasi dainai manau ia hahedinaraia. Unai hegeregerena, hari inai negai Dirava ena hesiai taudia idia diba, ena be edia mauri idia haboioa diba to Iehova ena matanai gau haida do idia karaia diba lasi.—Kara 15:28, 29; 21:25.
King Davida ena natuna Solomona be tau matamatana neganai ia danu be manau ia hahedinaraia, dala idauna dekenai. Solomona be terona ai ia helai neganai, ia laloa ia hegeregere lasi king ena maduna badana ia huaia totona. Ia guriguri: “Lohiabada e, lauegu Dirava e, lau be mero maragina sibona, to oi ese lau, oiemu hesiai tauna dekenai king dagi oi henia vadaeni, tamagu Davida ena gabu dekenai. Lau be lau diba lasi edena bamona basileia do lau gunalaia namonamo.” Ia hedinarai goevagoeva, Solomona ia diba sibona ena diba bona ena aonega be hegeregere lasi. Unai neganai ia manau, ia heagi lasi, eiava ia hekokoroku lasi. Solomona be Iehova ia noia lalo-parara ia abia totona, bona ia noia gauna ia abia.—1 King Taudia 3:4-12.
Mesia Bona Ia Gunalaia Tauna
Lagani 1,000 bona ma haida Solomona ena nega murinai, Ioane Bapatiso ese gaukara ta ia karaia Mesia ena dala ia hegaegaelaia totona. Horoa Tauna ia gunalaia dainai, Ioane ese Baibel ena peroveta hereva ia hagugurua. Ia ese ena dagi ia heagilaia diba. Ia be sibona ia hanamoa diba badina ia be Mesia ena varavara ta. To Ioane ese ma haida ia hamaorodia ia be hegeregere lasi Iesu ena tamaka varona ia kokia totona. Bona Iesu be Ioridane Sinavaina ai bapatiso ia abia gwauraia neganai, Ioane ia gwau: “Oi ese lau oi bapatiso henia be namo. Badina dahaka lau dekenai oi mai?” Unai ese ia hahedinaraia Ioane be heagi tauna lasi. Ia manau.—Mataio 3:14; Malaki 4:5, 6; Luka 1:13-17; Ioane 1:26, 27.
Iesu ia bapatiso murinai, ia be ful-taim hesiai gaukara ia hamatamaia, Dirava ena Basileia ena sivarai namona ia harorolaia. Ena be Iesu be tau goevadaena to ia gwau: “Lau be sibona gau ta do lau karaia kava lasi . . . lau sibona egu ura lau karaia lasi, to Dirava ena ura sibona lau karaia. Ia ese lau ia siaia.” Ma danu, Iesu be taunimanima vairanai ladana bada ia tahua lasi, to ia karaia gaudia iboudiai dainai Iehova ia abia isi. (Ioane 5:30, 41-44) Unai be manau momokani!
Ia hedinarai goevagoeva, Iehova idia abidadama henia momokani taudia—hegeregere Davida, Solomona, Ioane Bapatiso, bona tau goevadaena Iesu Keriso danu—ese manau idia hahedinaraia. Idia heagi lasi, idia hekokoroku lasi, bona edia dagi ena hetoana idia hanaia lasi. Edia haheitalai dainai hari inai nega ai Iehova ena hesiai taudia be manau dekenai idia tubu noho bona idia hahedinaraia be namo. To, ma badina haida dainai unai idia karaia be namo.
Histori lalonai hari heiriheiri ia bada negana ai, manau be mai anina bada karana Keristani korikoridia dekenai. Unai kara dainai ta be Iehova Dirava ida, taunimanima ida, bona sibona ida maino ia abia diba.
Iehova Dirava ida Maino ai Ita Noho
Iehova ida maino ai ita noho dalana tamona sibona be tomadiho momokani dekenai ia ese ia atoa hetoana ita hanaia lasi. Iseda tama sina ginigunadia, Adamu bona Heva, ese Dirava ia atoa hetoana idia hanaia, bona idia be manau lasi taudia ginigunadia ai idia lao. Iehova vairanai idia gini namonamo diba dalana idia haboioa, bona edia noho gabuna, edia vaira negana namona, bona edia mauri idia haboioa danu. (Genese 3:1-5, 16-19) Madi, kerere dainai davana bada idia henia!
Namona be Adamu bona Heva edia kerere ese ita ia hadibaia, badina tomadiho momokani ese iseda kara dekenai taravatu haida ia atoa. Hegeregere, Baibel ia gwau: “Lebulebu taudia, kaivakuku idia tomadiho henia taudia, heudahanai taudia, o lebulebu hahine edia kara bamona idia karaia tatau, o tatau ese tatau danu hemarai karadia idia karaia taudia. O henaoa taudia, mataganigani taudia, kekero taudia, edia hereva dekenai haida idia hadikaia taudia, o haida edia gau idia dadia taudia. Inai bamona taudia ta lasi be Dirava ena Basileia do ia davaria diba.” (1 Korinto 6:9, 10) Iehova be ena aonega amo iseda namo havaraia totona unai taravatu ia atoa, bona unai hetoana ita hanaia lasi neganai aonega ita hahedinaraia. (Isaia 48:17, 18) Aonega Herevadia 11:2 be ita ia hadibaia, ia gwau: “Manau taudia ese aonega idia davaria noho.”
To bema tomadiho oreana ta ese ita ia hamaoroa unai hetoana ita hanaia diba bona Dirava ida maino ita do moalelaia noho diba, unai be edena bamona? Unai orea ese ita idia hakaua kerere toho. To idau, manau ese ita ia durua diba Iehova Dirava ida turana karana namona ita habadaia totona.
Taunimanima ida Maino ai Ita Noho
Manau karana dainai ma taunimanima haida ida maino ai ita noho danu. Hegeregere, bema tama sina idia laloa idia dekenai idia noho gaudia be hegeregere bona lauma gaudia idia lalodia guna, unai haheitalai namona dainai edia natudia danu be unai bamona do idia laloa diba. Bena, ena be edia natuna maragidia idia ura henia gaudia be nega haida idia abia lasi to do idia laloa idia hegeregere. Unai ese do ia durudia heagi lasi dalana ai idia noho totona, bona ruma bese lalonai maino do ia noho.
Ma haida idia naria taudia idia naria namonamo bona idia manau be namo, edia dagi ena siahu idia gaukaralaia kerere garina. Hegeregere, Keristani taudia be inai hahegani idia abia: “Buka Helaga ena hereva do umui utua lasi.” (1 Korinto 4:6) Kongregesen elda taudia idia diba, namo lasi sibodia edia ura dekenai ma haida idia doria. To namona be Dirava ena Hereva idia gaukaralaia ma haida idia hagoadadia edia kara, edia dabua karaia dalana, edia tauanina ena toana, eiava moale karadia dekenai dala maorona idia badinaia totona. (2 Timoteo 3:14-17) Kongregesen taudia idia itaia elda taudia be Revareva Helagadia ena hereva idia utua lasi neganai, unai ese unai tatau matauraidia karana ia habadaia bona kongregesen lalonai hebogahisi, lalokau, bona maino karana ia habadaia.
Oiemu Lalona ai Maino Ia Noho
Manau idia hahedinaraia taudia be lalo-maino idia davaria. Manau tauna be ladana bada ia abia totona do ia laloa momo lasi. To ita gwau lasi sibona ena ura haida ia tahua lasi. Hegeregere, sedira ia ura ma hesiai gaukara ena dagi ia abia, to Dirava ia naria, bona ia laloa ia abia Keristani hahenamodia be Iehova ena amo ia abia. Do ia laloa lasi sibona ena goada dainai ia abia. Unai dainai manau tauna be Iehova, “maino ia henia Dirava,” kahirakahira dekenai do ia lao.—Filipi 4:9.
Reana nega haida ita laloa ma haida be ita idia laloaboio. Ita manau dainai ita idia laloaboio be namo, to hekokoroku dainai ita idia laloa momo be namo lasi, ani? Manau taudia be ladana bada idia tahua momo lasi. Unai dainai, edia lalona ai maino ia noho, bona unai ese edia hemami bona edia tauanina ia durua.
Manau Karana ai Ita Tubu Bona Hahedinaraia Noho
Adamu bona Heva be idia manau lasi—unai kara be edia natudia idia henia. Dahaka ese ita ia durua diba iseda tama sina ginigunadia edia kerere ita karaia lasi totona? Edena dala ai unai kara namona, manau, dekenai ita tubu noho diba?
Gau ginigunana be, gau ibounai ia Havaraia Tauna, Iehova, vairanai iseda gabu korikori ita diba maoromaoro ese ita do ia durua. Ita sibona eda goada ai ita karaia karadia be edena bamona Dirava ese ia karaia karadia ida ita hahegeregerea diba? Iehova ese iena abidadama hesiai tauna Iobu ia nanadaia: “Lau ese tanobada lau karaia neganai oi be edeseni? Bema oi diba, lau dekenai do oi hamaoroa.” (Iobu 38:4) Iobu ia haere diba lasi. Ita danu be diba, goada, bona aonega dekenai ita hegeregere lasi, ani? Iseda diba ena hetoana ita diba neganai, unai be iseda namo ia havaraia, ani?
Ma danu, Baibel ese ita ia hadibaia: “Tanobada bona ia lalonai noho gaudia ibounai, be Lohiabada ena. Tanobada bona ia lalonai noho taunimanima, ibounai be Lohiabada ena.” Unai be “uda dekenai noho mauri gaudia ibounai . . . ororo ibounai dekenai idia noho boromakau, momo herea, duahia diba lasi, danu.” Iehova ia gwau diba: “Tanobada ena siliva bona golo ibounai be lauegu.” (Salamo 24:1; 50:10; Hagai 2:8) Dahaka kohu ita hahedinaraia diba bona Iehova ena kohu ida ita hahegeregerea diba? Tanobada ena taga herea tauna ese sibona ena kohu ia heagilaia be badina lasi momokani! Unai dainai, Dirava ena lauma amo aposetolo Paulo ese ia torea herevadia Roma ena Keristani taudia dekenai ita badinaia be aonega dalana: “Dirava ese iena hariharibada lau dekenai ia henia dainai, umui ta ta ibounai dekenai lau hamaoroa inai: Oi hekokoroku lasi. Oi ese oi sibona oiemu maka do oi diba, bona inai maka do oi hanaia lasi, do oi laloa lasi oi be bada momokani.”—Roma 12:3.
Ita be Dirava ena hesiai taudia bona ita ura manau karana ai ita tubu noho dainai, namona be lauma helaga ena huahua abia totona ita guriguri—lalokau, moale, maino, haheauka, hebogahisi, kara maoromaoro, abidadama momokani kara, manau, tauanina ena ura koua karana. (Luka 11:13; Galatia 5:22, 23) Badina be dahaka? Badina unai kara ta ta ibounai be ita ia durua ita manau totona. Hegeregere, taunimanima ita lalokau henidia karana be ita do ia durua heagi eiava hekokoroku kara ita koua totona. Bona iseda tauanina ena ura koua karana ese ita ia durua ita laloa namonamo guna bona ita heagi lasi totona.
Ita naria namonamo! Hanaihanai ita gima noho manau lasi kara ena idoa lalonai ita moru garina. Guna ita gwauraidia king rua be nega ibounai idia manau lasi. King Davida be Israela besena ena namba ia duahia neganai ia laloa guna lasi to ia karaharaga, bona unai be Iehova ena ura lasi. King Solomona ia manau lasi bena tomadiho koikoi karana ai ia vareai.—2 Samuela 24:1-10; 1 King Taudia 11:1-13.
Dirava badinaia lasi negana ia do noho lalonai, ita manau totona ita gima hanaihanai be namo. Unai hekwarahi be mai anina namona. Dirava ena tanobada matamatana ai, taunimanima iboudiai be manau taudia sibona. Do idia laloa manau karana be edia goada ena toana, do idia laloa lasi ia be manoka toana. Taunimanima bona ruma bese iboudiai be manau dainai idia abia mainona lalonai idia noho neganai mauri be do ia namo herea momokani!
[Picture on page 23]
Iesu be mai ena manau ida ia karaia karadia iboudiai dainai Iehova ia abia isi