11. Iehova ese lauma dalanai ena taunimanima ia naria totona dahaka gau haida ia henia?

¹¹ Iehova ese ia kahirakahira idia noho taudia be lauma dalanai ia naridia totona gau momo ia henia. Iena Hereva, Baibel, amo ita dekenai aonega ia henia, hahetoho idauidau ita haheaukalaia totona. (Iamesi 1:​2-5) Baibel lalonai idia noho sisiba namodia ita badinaia neganai ita idia gimaia. Danu, Iehova ese “Lauma Helaga be idia noinoi taudia dekenai” ia henia. (Luka 11:13) Tanobada bona guba ibounai lalonai unai lauma helaga be siahu bada hereana, unai dainai ita ia durua diba ita dekenai idia vara hahetoho eiava hedibagani idauidau ita hanaia totona. Iehova ese Keriso ena amo tatau haida “harihari gaudia” bamona ia henia. (Efeso 4:⁠8) Unai lauma dalanai idia goada tatau ese edia tadikaka idia durua neganai, idia hekwarahi Iehova ena hebogahisi bada idia hahedinaraia totona.​—⁠Iamesi 5:​14, 15.

12, 13. (a) Edena dala ai Iehova ese ita dekenai nega korikori ai lauma aniani ia henia? (b) Iehova ese iseda namo lauma dalanai ia laloa dainai ia henia gaudia be edena bamona oi laloa?

¹² Iehova ese ita ia gimaia totona ma gau ta ia henia: lauma aniani, nega korikori ai. (Mataio 24:45) Idia printaia gaudia, hegeregere Gima Kohorona bona Awake! magasin, bona kongregesen heboudia, sekit hebouhebou, bona distrik hebouhebou amo Iehova ese nega korikori ai ita idia durua gaudia ia henia. Kongregesen hebouna ta, sekit hebouhebou ta, eiava distrik hebouhebou ta dekenai oiemu kudouna ia hamarerea eiava emu lalona ia hagoadaia gauna ta oi laloatao, a? Nega ta ataiai ai gwauraia magasin ta lalonai sivarai ta oi duahia bena oi laloa unai be oi totona idia torea, a?

¹³ Satani ena tuari kohu namona ta be lalo-manoka, bona unai gauna ese ita ia hadikaia diba danu. Ia diba lalo-metau daudau karana ese iseda goada ia haorea diba, eda moru dalana ia kehoa danu. (Aonega Herevadia 24:10) Satani ia ura iseda lalona idia hamanokaia gaudia idauidau ia gaukaralaia dainai, heduru ita abia be namo. Gima Kohorona bona Awake! magasin dekenai idia halasia sivarai haida be ita idia durua lalo-manoka ita hanaia totona. Keristani taihu ta be unai sivarai ta dainai inai hereva ia torea: “Inai sivarai be kahirakahira dina iboudiai lau duahia, bona egu mata ranudia idia diho noho. Egu bedi badinai lau atoa, unai amo bema lau lalohisihisi neganai, lau itaia diba. Inai bamona sivarai dainai lau mamia, Iehova ena imana goadana ese lau ia rosia.”a Iehova ita tanikiu henia bada badina nega korikori ai ita dekenai lauma aniani ia henia, ani? Namona be ita laloatao, lauma dalanai iseda namo ia laloa dainai ia henia gaudia ese idia hamomokania ia be ita kahirakahira ia noho bona ia ese ita ia gimaia noho.

‘Guriguri Ia Kamonai’ Diravana Hereva Henia

14, 15. (a) Iehova ese dahaka hahenamo be ia kahirakahira idia noho taudia dekenai ia henia? (b) Dahaka dainai Iehova ita hereva henia be hahenamo namo hereana ta?

¹⁴ Reana oi itaia vadaeni, taunimanima be dagi bona siahu idia abia neganai, idia henunai idia noho taudia ese nega momo idia hereva henia be auka, ani? To, Iehova Dirava be edena bamona? Taunimanima edia hereva do ia kamonai be ia laloa bada lasi badina Ia be daudau herea, a? Lasi! Guriguri be Iehova ese ia kahirakahira dekenai idia noho taudia dekenai ia henia harihari gauna namona ma ta. ‘Guriguri ia kamonai’ Diravana ita hereva henia be hahenamo namo hereana ta. (Salamo 65:⁠2) Dahaka dainai?

¹⁵ Haheitalai ta ita laloa: Kampani badana ta ena biaguna badana be mai ena maduna idauidau. Dahaka be ia sibona ese do ia naria bona dahaka be ma haida dekenai do ia henia ia abia hidi. Unai hegeregerena, tanobada bona guba ena Siahu Ibounai Lohiana be ia sibona ese dahaka gaukara do ia naria bona ma haida dekenai dahaka maduna do ia henia ia abia hidi. Iehova ese ena Natuna lalokauna, Iesu, dekenai ia henia maduna mani oi laloa. Iena Natuna dekenai ‘siahu ia henia vadaeni, kota gaukara ia karaia’ totona. (Ioane 5:27) Aneru “be Keriso henunai idia noho.” (1 Petero 3:22) Iehova ena lauma helaga mai siahuna be Iesu dekenai ia henia, ena hahediba taudia tanobada dekenai ia hakaudia totona. (Ioane 15:26; 16:⁠7) Unai dainai, Iesu be ia gwau diba: “Siahu ibounai guba dekenai bona tanobada dekenai be lau dekenai ia henia vadaeni.” (Mataio 28:18) To, iseda guriguri ita laloa neganai, unai gauna kamonai henia karana be Iehova sibona ese ia naria! Unai dainai Baibel ese ita ia hamaoroa, Iehova sibona dekenai iseda guriguri do ita gwauraia, Iesu ena ladana ai.​—⁠Salamo 69:13; Ioane 14:​6, 13.

16. Dahaka dainai ita abia dae momokani diba Iehova ese iseda guriguri ia kamonai?

¹⁶ Iehova be iseda guriguri ia kamonai momokani, a? Bema ia be ia ura lasi ia kamonai, ita do ia hagoadaia lasi ‘nega ibounai guriguri ita goadalaia’ totona eiava ia dekenai iseda metau bona lalo-hekwarahi ita atoa totona. (Roma 12:12; Salamo 55:22; 1 Petero 5:⁠7) Baibel negadiai idia noho kamonai hesiai taudia idia diba momokani Iehova ese edia guriguri ia kamonai. (1 Ioane 5:14) Unai dainai salamo torea tauna Davida ia gwau: “[Iehova] ese egu gadona do ia kamonai henia.” (Salamo 55:17) Ita danu be badina idauidau dainai ita abia dae momokani diba, Iehova be ita kahirakahira ia noho, ia ura bada iseda lalohadai bona lalo-hekwarahi ibounai ia kamonai.

Iehova ese Ena Hesiai Taudia Edia Davana Ia Henia

17, 18. (a) Iehova ese ia havaraia taudia edia kamonai hesiai gaukarana be edena bamona ia laloa? (b) Aonega Herevadia 19:17 dekenai Iehova ese iseda hebogahisi karadia ia itaia dalana mani oi herevalaia.

¹⁷ Taunimanima ese idia karaia gaudia eiava idia karaia lasi gaudia ese Iehova ena dagi, Guba bona Tanobada edia Lohia Badana, idia haidaua lasi. To, Iehova be ita ia laloa bada Diravana. Ia ese ia havaraia taudia edia kamonai hesiai gaukarana ia laloa bada​—⁠oibe, ia moalelaia bada. (Salamo 147:11) Vadaeni, Iehova kahirakahira idia noho taudia ese idia moalelaia hahenamo ma ta be inai: Ia ese ena hesiai taudia edia davana namona ia henia.​—⁠Heberu 11:⁠6.

¹⁸ Baibel ese ia hahedinaraia goevagoeva Iehova ese ena hesiai taudia idia karaia gaudia ia laloa bada. Hegeregere, Baibel ia gwau: “Bema ogogami taudia dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.” (Aonega Herevadia 19:17) Iehova ese ogogami taudia ia hebogahisi henia karana be Mose ena taravatu lalonai ia hedinarai. (Levitiko 14:21; 19:15) Ogogami taudia ita kara henidia lalonai Iehova ena hebogahisi ita tohotohoa neganai, ia be edena bamona ia laloa? Bema ogogami tauna dekenai gau ta ita henia, bona davana ta ita tahua lasi, Iehova ia laloa unai be Ia dekenai ita heniatorehai bamona. Iehova ia gwauhamata, iena lalo-namo bona hahenamo amo unai abitorehai ena davana do ia henia. (Aonega Herevadia 10:22; Mataio 6:​3, 4; Luka 14:​12-14) Oibe, iseda tomadiho tamona tadikaka ta be ia dabu dainai ita hebogahisi henia neganai, unai kara ese Iehova ena kudouna ia hamarerea. Ita moale bada badina ita diba iseda hebogahisi karadia be iseda guba Tamana ese ia itadia noho!​—⁠Mataio 5:⁠7.

19. (a) Dahaka dainai ita diba momokani haroro bona hahediba taudia halaoa gaukarana ai ita karaia gaudia be Iehova ese ia laloa bada? (b) Iehova ena Basileia durua totona ita karaia gaukaradia edia davana be edena bamona ia henia?

¹⁹ Iehova ena Basileia dainai ita karaia gaudia be ia ese ia lalodia bada. Iehova kahirakahira ita lao neganai, iseda ura be eda nega, goada, bona kohu ita gaukaralaia, Basileia harorolaia bona hahediba taudia halaoa gaukarana ita karaia badabada totona. (Mataio 28:​19, 20) Nega haida, do ita laloa anina sisina ita havaraia noho. Iseda goevadae lasi kudouna ai reana ita daradara bema Iehova ese iseda hekwarahi ia abia dae eiava. (1 Ioane 3:​19, 20) To iseda kudouna amo mai lalokau ida ita henia harihari gaudia ibounai be Iehova ese ia laloa bada​—⁠herevana idia maragi. (Mareko 12:​41-44) Baibel ese ita ia hamaoroa, ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia.” (Heberu 6:10) Oibe, Iehova ese iena Basileia durua totona idia karaia gaukara maragidia danu ia laloatao bona davana do ia henia. Ita ese hari lauma dalanai hahenamo momo do ita abia sibona lasi, to do ia vara tanobada matamatana ai do ita moalelaia gaudia ita laloa diba, unuseniai Iehova be mai ena hariharibada ida ena imana do ia kehoa bona ia kahirakahira idia noho taudia edia ura gaudia maorodia ibounai do ia henia!​—⁠Salamo 145:​16, NW; 2 Petero 3:⁠13.

20. Lagani 2003 lalonai, iseda lagani ena siri badana be edena bamona do ita laloatao, bona dahaka do ia vara?

²⁰ Lagani 2003 lalonai, namona be ita sibona ita nanadaia bema ita be kara haida ita karaia noho, iseda guba Tamana kahirakahira ita lao totona. Bema unai bamona ita karaia, ita daradara lasi Ia be ena gwauhamata hegeregerena do ia karaia danu. Unai ita diba badina “Dirava [ia] koikoi diba lasi.” (Tito 1:⁠2) Bema oi be ia kahirakahira oi lao, ia be oi kahirakahira do ia mai. (Iamesi 4:⁠8) Bona dahaka do ia vara? Hahenamo momo hari inai negai do oi abia bona Iehova kahirakahira momokani do oi noho diba ela bona hanaihanai dalana ia kehoa!

Ena Haheauka Karana Dainai Ahuna Namona Ia Abia

Kudou-maoro taudia momo idia ura edia lalokau taudia ese Dirava ena ura idia diba bona mauri mai moalena idia abia. Ta be Dirava dekenai iena mauri ia gwauhamatalaia neganai, ma haida, matamata bona buruka taudia danu, ese edia kara namona amo unai tauna idia durua unai bamona aonega dalana ia abia hidi totona. Mexico dekenai, ena mauri lagani 15 kekenina, Jearim, dekenai unai ia momokani, ia ese henunai ia noho revareva be Iehova ena Witnes taudia edia dina tamona hebouhebouna ai idia noho tadikaka dekenai ia henia:

“Lau ura egu moale be umui dekenai lau gwauraia. Ena badina be inai, lagani 18 idia lao vadaeni, lau do vara lasi neganai, egu tama sina ese hereva momokani idia dibaia. Egu sinana be lauma dalanai ia goada ia lao, bona gabeai egu tadina mero bona lau be lauma dalanai ai goada ai lao danu. Ai guriguri hebou Iehova dekenai, egu tamana danu be mauri ia lao henia dalana dekenai do ia raka matamaia. Lagani 18 idia lao vadaeni, bona hari dina be mai anina bada dinana ai totona. Egu tamana be bapatiso do ia abia. Iehova lau tanikiu henia badina ia ese dokona ia mailaia haraga lasi dainai, nega daudau lalonai ai naria noho negana ia ginidae. Tanikiu Iehova!”

Idia hanaia laganidia lalonai, inai kekeni matamata ena ruma bese ese Dirava ena lauma amo idia torea sisiba herevana, 1 Petero 3:​1, 2 lalonai ia noho hakaua herevana idia laloatao, ia gwau: “Hahine taudia e, emui adavana do umui kamonai henia. Badina be idia haida ese Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai, sedira do idia laloa namonamo. Vadaeni sedira edia lalona do idia giroa, bona Dirava do idia abidadama henia. Unai bamona do idia karaia, badina be emui kara goevagoeva, bona emui mataurai kara do idia itaia dainai.” Bona kekeni matamata Jearim, ese Deuteronomi 5:16 ena hereva ia badinaia: “Emui tamana bona sinana dekenai do umui matauraia, Lohiabada emui Dirava ese umui ia oda henia vadaeni hegeregerena.” Unai bamona hakaua herevadia badinaia karana bona mai haheauka ida Iehova naria karana ese Jearim bona iena ruma bese dekenai hahenamo ia mailaia.