Ura-Kwalimu

Anina: Ta ia ura-kwalimu, anina be ma ta ese ia biagua lasi, eiava ia gwau ma ta ese ia biagua lasi. Dirava ese taunimanima na siahu ia henidia gau haida be sibodia edia ura hegeregeredia do idia abia hidi, unai dainai idia ura ura-kwalimu idia abia. To unai edia ura idia naria namonamo lasi neganai idia gwau-edeede.

Taunimanima ese Baibel ena taravatu idia negea neganai, ura-kwalimu idia abia momokani, a?

Roma 6⁠:​16, 23: “Umui diba lasi, a? Bema umui ese emui tauanina umui henia tau ta dekenai bona iena hereva umui kamonai henia neganai, umui be iena hesiai gaukara umui karaia noho taudia. Vadaeni, bema umui be kara dika ena hesiai gaukara taudia neganai, umui be mase do umui davaria. To bema umui be Dirava umui kamonai henia neganai, Dirava ese umui do ia gwauraia maoromaoro. . . . Badina be kara dika ena davana be mase, to Dirava ena harihari gauna davana lasi be mauri hanaihanai, Iesu Keriso iseda Lohiabada lalonai ita noho dainai.”

Gal. 6⁠:​7-9: “Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai ia be mase do ia abia. Bema Lauma ena gau ia hadoa neganai ia be mauri hanaihanai do ia abia. Kara namodia ita karaia be namo, ita hesiku lasi.”

Matabodaga karadia: “Heudahanai karadia ia karaia tauna ese sibona ena tauanina ia hadikaia noho.” (1 Kor. 6⁠:18) “E heuda hanaimu tauna na . . . sibona e healamu.” (Her. 6⁠:32) (Tatau ese tatau idia sihari henidia karana be Roma 1⁠:​24-27 ese ia gwauraia.) (Mahuta hebou karadia kereredia idia karaia taudia be nega sisina idia moalelaia reana. To unai kara dainai, gorere dikadia idia abia, idia rogorogo kava, edia bogadia lalodiai idia noho natudia idia hamasedia, idia mama, edia lalona ese idia samanidia, edia lalona idia hekwarahi, bona Dirava, ia sibona ese mauri gabena ita do ia henia diba Diravana, ese ia badu henidia.)

Kohu momo ura henia karadia: “Kohu momo idia ura henia taudia be hedibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura taudia do idia koia bona hadikaia. Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama [henia] kara idia rakatania vadaeni, bona mai lalohisihisi momo, edia mauri idia hadikaia ore vadaeni.” (1 Tim. 6⁠:​9, 10) “Egu laumana dekenai do lau hamaoroa, do lau gwau, ‘Egu laumana e, oiemu kohu be momo herea, lagani momo ena hegeregerena. Do oi laga-ani, do oi aniani, do oi inuinu, do oi moale.’ To Dirava ese ia hereva henia ia dekenai, ia gwau, ‘Kavakava tauna! Hari hanuaboi emu laumana oi dekena amo do lau kokia, vadaeni inai oi haboua kohudia be daika ese do ia abia?’ Ena kohu sibona dekenai ia haboua to Dirava dekenai ia be gau momo ia henia lasi tauna be unai bamona.” (Luka 12⁠:​19-21) (Kohu ese moale hanaihanai ia havaraia lasi. Kohu momo idia tahua taudia momo be unai kara dainai gorere idia davaria, edia abidadama ia boio, bona edia ruma taudia idia moale lasi.)

Inuinu kekero karana: “Daika etomu ‘Inaio’? Daika e tomu ‘Madi ihabaigu’? Daika e heaimu? Daika e maumaumu? Daika na asi badina vada e bero? Daika matana eme kakakaka? Vine ranuna e inu daudaumu taudia, bona vine ranudia idau-idau e bulodiamu bena e inu tohomu taudia. Dokona ai ia na e hekorimu, gaigai na heto; duba na heto e hekorimu.” (Her. 23⁠:​29, 30, 32) (Reana matamana neganai ta ia laloa ia inuinu kekero neganai ena lalo-hekwarahi ia laloaboio diba, to unai dala amo ena lalo-hekwarahi ia haorea lasi. Ena kekero ia ore neganai, ena hekwarahi gaudia idia do noho, bona reana idia momo daekau vadaeni danu. Bema ta ia inuinu kekero loulou, sibona ia matauraia diba lasi, gorere ia davaria, ena ruma bese maurina ia dika, bona Dirava ese ia lalo-namo henia lasi.)

Drag ania kava karana: Rau 106-13 itaia, inai sinado “Drag” henunai.

Hebamo dikana: Bema raskol oreana ta ese oi idia hamaoroa idia be moni momo abia kava dalana idia diba, do oi bamodia a? “Idia ida basio raka hebou edia dala ai, aemu na edia dala irakalaina ai ba rudia; badina be aedia na kara dika e heau heniamu, rara ihahebubuna totona e lao haraḡamu.” (Her. 1⁠:​10-19) Bema ta ese Iehova ia tomadiho henia lasi to ena toana be kara namo tauna ena toana bamona, oi laloa ia oi tura henia be namo, a? Sekem be Kanana lohiana ta ena natuna, bona Baibel ia gwau “tamana ena bese lalonai ia be tau badana momokani,” to ia ese Daina “ia rosia, vadaeni ia karadika henia.” (Gen. 34⁠:​1, 2, 19) Dirava ena Hereva idia abia dae lasi taudia oi bamodia be kerere, eiava? “Umui laloa kerere lasi. Bema kara dika taudia danu umui turana karaia neganai idia ese emui kara namona do idia hadikaia.” (1 Kor. 15⁠:33) Iehova idia ura henia lasi taudia bema oi tura henidia, ia ese oi edena bamona ia laloa? Iuda pavapavana ta be unai bamona ia karaia neganai, Iehova ena gwaukau tauna ese ia hamaoroa, ia gwau: “Ina dainai Iehova ena badu na oi latamu ai vada e kau.”​—⁠2 Sis. 19⁠:​1, 2.

Daika ese taunimanima edia lalona ia ania, idia be sibodia edia lalona do idia hadaia mai edia ura-kwalimu ida bona Dirava ena oda herevadia do idia laloa lasi totona?

Gen. 3⁠:​1-5: “[Satana ese ena uduna amo ia hereva neganai] gaigai. . . ese hahine dekenai ia henanadaia, ia gwau, Momokani, uma gabu ena au huahua ta ania lasi taravatu Dirava ese ia atoa o lasi? Hahine ese gaigai dekenai ia haere, ia gwau, Uma gabu dekenai gini au edia huahua ai ania be ia namo, to uma gabu huanai dekenai au ta ia gini, ena huahua dekenai Dirava ia gwau, Unai au ena huahua umui ania lasi, bona dogoatao lasi, umui mase garina. To gaigai ese hahine dekenai ia gwau, Inai be momokani lasi, dohore umui mase lasi. Dirava be inai bamona ia hereva badina ia diba, umui ania neganai aonega do umui davaria, bona Dirava bamona do umui noho, kara namona bona kara dikana do umui diba.” (Apokalupo 12⁠:9 itaia.)

Sibona ena ura karaia totona Dirava ena ura ia dadaraia tauna ena lalona be dahaka lauma ese ia veria?

Ef. 2⁠:​1-3: “Guna umui be emui kara dika bona kerere dainai umui mase. Unai neganai inai tanobada ena kara dika dalana umui raka. Umui ese lauma dikadia edia biaguna umui kamonai henia. Inai lauma ese Dirava idia kamonai henia lasi taudia edia lalona dekenai harihari ia gaukara noho. Guna ita ibounai be idia bamona ita karaia. Iseda tauanina edia ura dikadia, bona iseda lalona edia ura kava sibona ita karaia. Vadaeni unai bamona ita noho dainai, iseda dika davana korikori be Dirava ena badu, taunimanima oredia ibounai hegeregerena.”

Sibodia be Dirava ena hesiai taudia idia gwauraia taudia be dahaka lalohadai kereredia amo idia siri be namo?

Her. 16⁠:18: “Heaḡi ese hahebuatari dalana e lailaiamu; hekokoroku ese moru dalana e lailaiamu.”

Her. 5⁠:12: “Una negana ai baoto: Mata-hakani na inai heniava, bona lalogu ese sisiba herevadia e dadaraidiava.” (Unai bamona ia laloa tauna ese hekwakwanai badadia ia davaria diba, inai karoa ena siri ma haida ese idia hahedinaraia hegeregerena.)

Num. 16⁠:3: “Idia na Mose bona Aaron [Iehova ese ena bese gunalaia taudia ai ia halaodia taudia ruaosi] vairadiai e hebou, e heai henidia, eto, Umui raruosi na o hekokorokumu; badina be hebou taudia iboudiai na hehelaḡa; oibe, ibouboudiai, bona Iehova na bogaragidiai e nohomu. Dahaka dainai umui raruosi ese Iehova ena orea taudia o lohiadiamu?”

Iuda 16: “Unai dika taudia ese haida edia kara idia maumauraia noho, bona ma haida idia gwauraia kerere. Idia ese edia ura dikadia sibona idia karaia noho. Mai hekokoroku danu edia kara idia herevalaia, bona idia ese haida idia hanamoa koikoi, kohu o namo do idia davaria totona.”

3 Ioane 9: “Diotrefe, sibona ia gwauraia ia be gunalaia tauna, ia ese lauegu hereva ia kamonai henia lasi.”

Her. 18⁠:⁠1: “E haheidaumu tauna ese sibona ena ura e tahuamu; lalo-hadai namodia iboudiai e inai henimu.”

Iak. 4⁠:​13-15: “Umui haida inai bamona umui hereva, umui gwau, ‘Hari dina o kerukeru dina unai hanua badana do ita lao, unuseni lagani ta do ita noho, do ita hoihoi, moni momo do ita abia.’ Umui dekenai inai bamona lau hereva: umui diba lasi kerukeru dina dahaka do ia vara. Badina be emui mauri be dahaka? Umui be kwalahu maragina bamona, nega sisina ia hedinarai, vadaeni, ia boio momokani. To namona be inai bamona do umui hereva: ‘Bema Dirava ia ura, ita be ita mauri noho, vadaeni unai kara o inai kara do ita karaia.’ ”

Ta ese ura-kwalimu ia ura dikadika dainai Keristen kongregesen murimurinai idia noho taudia ia tohotohodia neganai, daika ese ia biagua? Iehova ese unai edena bamona ia laloa?

1 Ioane 2⁠:15; 5⁠:19: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai.” “Satani ese tanobada taudia ibounai ia gunalaia noho.”

Iak. 4⁠:4: “Bema umui ura tanobada danu umui turana karaia neganai Dirava umui tuari henia noho.”