‘Duahia Taudia E, Do Umui Laloa Namonamo’

“Gau dika rohorohona, gabu ia hadikaia gauna, Dubu Helaga ena lalonai ia gini dohore umui itaia. . . . Unai neganai Iudea dekenai idia noho taudia be ororo dekenai do idia heau lao.”​—⁠MATAIO 24:​15, 16.

1. Iesu ese Luka 19:​43, 44 ai ia noho sisibana ia henia dainai dahaka ia vara?

BEMA ta ese ita ia hadibaia gau dikana ta do ia vara, unai ese ita ia durua diba unai dika amo do ita siri totona. (Aonega Herevadia 22:⁠3) Unai dainai, Roma taudia ese lagani 66 C.E. ai Ierusalema idia tuari henia murinai, Keristani taudia edia noho mani oi laloa. Iesu ese ia hadibadia, hanua do idia hagegea bona hadikaia ore. (Luka 19:​43, 44) Iuda taudia momo ese ena hereva idia laloa lasi. To ena hahediba taudia ese ena sisiba idia badinaia. Unai dainai, lagani 70 C.E. ena dika amo idia roho mauri.

2, 3. Dahaka dainai Iesu ena peroveta herevana Mataio 24:​15-21 ai ita laloa be namo?

² Hari inai negai ita dekenai mai anina bada peroveta herevana ta lalonai, Iesu ese toa ta mai ena kahana idauidau ia gwauraia. Unai gau haida be tuari, hitolo, tano mareremarere, daihanai goreredia, bona Dirava ena Basileia idia harorolaia taudia hahisia karana. (Mataio 24:​4-​14; Luka 21:​10-​19) Iesu ese gau ma ta ia gwauraia danu, unai ese ena hahediba taudia do ia durua bena do idia diba dokona be ia kahirakahira​—⁠“gau dika rohorohona, gabu ia hadikaia gauna, Dubu Helaga ena lalonai ia gini.” (Mataio 24:15) Mani unai anina bada herevadia ita laloa bena do ita tahua edena dala ai idia be mai anina hari iseda mauri lalonai bona vaira neganai danu.

³ Iesu be unai toa ena kahana idauidau ia gwauraia murinai, ia gwau: “Peroveta tauna Daniela ese guna ia gwauraia, gau dika rohorohona, gabu ia hadikaia gauna, Dubu Helaga ena lalonai ia gini dohore umui itaia. (Duahia taudia e, inai hereva ena anina do umui laloa namonamo.) Unai neganai Iudea dekenai idia noho taudia be ororo dekenai do idia heau lao. Bona ruma ena atai dekenai ia helai noho tauna be ruma lalonai do ia raka vareai lasi iena kohu abia totona. Bona uma dekenai ia gaukara noho tauna danu ese iena dabua abia totona do ia giroa lao lasi. Unai neganai rogorogo hahine bona natuna maragi idia rata henia hahine be madi do idia dika. Do umui guriguri, keru neganai, o Sabati Dina neganai be do umui heau lasi. Badina be unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari.”​—⁠Mataio 24:​15-21.

⁴ Mareko bona Luka ese heduru herevadia ma haida idia henia. Mataio ia gwau “Dubu Helaga ena lalonai ia gini,” bona Mareko 13:14 ai ia gwau “iena gabu lasi dekenai ia gini.” Luka 21:20 danu be Iesu ena hereva ia gwauraia, ia gwau: “Tuari orea ese Ierusalema do idia koua hagegea do umui itaia, vadaeni do umui diba, iena dokona ia kahirakahira vadaeni.” Unai ese ita idia durua bena ita lalo-parara, unai hereva ena anina ia guguru dalana ginigunana be Roma taudia ese lagani 66 C.E. ai Ierusalema bona ena dubu​—⁠Iuda taudia dekenai ia be helaga gabuna, to Iehova dekenai hari ia be helaga gabuna lasi​—⁠idia hadikaia matamaia negana. Lagani 70 C.E. ai Roma taudia ese hanua bona dubu idia hadikaia neganai, idia haorea momokani. Unai neganai “gau dika rohorohona” be dahaka? Bona edena dala ai “Dubu Helaga ena lalonai ia gini”? Unai henanadai edia haere ese iseda nega lalonai ena anina do ia guguru dalana do idia hahedinaraia.

5, 6. (a) Dahaka dainai Daniela karoa 9 idia duahia taudia idia laloa namonamo be gau badana? (b) Iesu ese “gau dika rohorohona” ia perovetalaia herevana be edena bamona ia guguru?

⁵ Iesu ese duahia taudia ia hamaorodia namona be do idia laloa namonamo. Dahaka idia duahia? Reana Daniela karoa 9 idia duahia. Unuseniai, peroveta herevana ta ese Mesia do ia hedinarai negana ia gwauraia bona lagani toi mai kahana murinai ia do idia “hamasea” herevana ia perovetalaia. Unai peroveta herevana ia gwau: “Vadaeni Hadikaia Dika Rohoroho Gauna be Dubu Helaga ena ataiai momokani do idia atoa. Unuseni do ia noho ela bona unai dika ia havaraia tauna be Dirava ese iena dika davana do ia henia.”​—⁠Daniela 9:​26, 27; mani Daniela 11:31; 12:⁠11 itaia.

⁶ Iuda taudia idia laloa lagani 200 gunanai Antiochus IV ese dubu ia hamiroa neganai, unai hereva ena anina ia guguru vadaeni. To, Iesu ese ia hahedinaraia unai be maoro lasi. Ia gwau namona be idia laloa namonamo badina be unai “gau dika rohorohona” be gabeai do ia hedinarai bona ‘dubu helagana’ ai do ia gini. Toana be Iesu ese lagani 66 C.E. ai Roma tuari oreana, mai ena pepe ida do ia mai ia herevalaia. Unai bamona pepe, nega daudau lalonai idia gaukaralaia gaudia, be kaivakuku hegeregerena bona Iuda taudia dekenai idia be gau dika rohorohodia.a To, edena nega ai ‘dubu helagana lalonai do idia gini’? Unai be Roma tuari oreana mai ena pepe ida ese Ierusalema bona ena dubu, Iuda taudia dekenai helaga gauna, idia tuari henia neganai ia vara. Roma taudia ese dubu ia noho gabuna ena magu henuna idia geia danu. Momokani, idaunegai amo ia dika rohoroho vadaeni gauna be hari gabu helagana ai ia gini!​—⁠Isaia 52:1; Mataio 4:5; 27:53; Kara 6:​13.

Iseda Nega Lalonai “Gau Dika Rohorohona”

7. Edena peroveta herevana, Iesu ese ia gwauraia peroveta herevana unai, be iseda nega lalonai ia guguru noho?

⁷ Tanobada Ibounai Tuarina Ginigunana ena nega amo, dala badana ai Iesu ia gwauraia toana, Mataio karoa 24 ai, ena anina ia guguru. To, iena hereva oi laloa lou: “Gau dika rohorohona, gabu ia hadikaia gauna, Dubu Helaga ena lalonai ia gini dohore umui itaia. . . . Unai neganai Iudea dekenai idia noho taudia be ororo dekenai do idia heau lao.” (Mataio 24:​15, 16) Unai hereva be iseda nega lalonai do ia guguru danu.

8. Lagani momo lalodiai, Iehova ena Witness taudia be edena dala ai iseda nega lalonai “gau dika rohorohona” idia gwauraia?

⁸ The Watchtower, January 1, 1921 gauna, ese Iehova ena hesiai taudia edia abidadama unai peroveta herevana do ia guguru karana dekenai ia hahedinaraia neganai, Middle East dekenai idia vara gaudia ia gwauraia. Bona gabeai, The Watchtower, December 15, 1929 gauna, rau 374 dekenai, ia gwau: “League of Nations ena ura be Dirava bona Keriso edia amo taunimanima ia hakaudia siri, bona unai dainai ia be gau dika rohorohona ta, Satani ese ia havaraia gauna, bona ia be Dirava ese ia inai henia momokani gauna.” Unai dainai lagani 1919 ai unai “gau dika rohorohona” ia hedinarai. Gabeai, United Nations ese League of Nations ena gabu ia abia. Nega daudau lalonai Iehova ena Witness taudia ese idia hahedinaraia, unai taunimanima ese idia karaia maino havaraia oreadia be gau dika rohorohodia Dirava ena matana ai.

9, 10. Guna hisihisi badana ena anina ita laloa dalana dainai gabu helagana dekenai “gau dika rohorohona” ia gini negana be edena bamona ita laloa?

⁹ Hereva gunana ese Mataio karoa 24 bona 25 edia anina ita lalo-pararalaia dalana ia hahedinaraia namonamo. ‘Gau dika rohorohona, dubu helaga ena lalonai ia gini’ ena anina dekenai, namona be gau haida do idia hedinarai namonamo, a? Toana be unai bamona. Iesu ena peroveta herevana ai ‘Dubu Helaga ena lalonai gau dika rohorohona ia gini’ karana be ia gwauraia ‘hisihisi bada hereana’ ida ia hakapua. Unai dainai, ena be gau dika rohorohona be idaunegai ia noho vadaeni, to namona be “Dubu Helaga lalonai ia gini” bona hisihisi bada hereana ia hakapua dalana ita laloa neganai unai ese iseda lalohadai ia durua. Edena dala ai?

¹⁰ Dirava ena orea taudia be guna idia laloa, hisihisi bada hereana ena matamana kahana be lagani 1914 ai ia vara bona kahana ginigabena be Aramagedono tuarina ai do ia vara. (Apokalupo 16:​14, 16; mani The Watchtower, April 1, 1939, rau 110 itaia.) Unai dainai, ita lalo-parara diba dahaka dainai idia laloa inai nega ena “gau dika rohorohona” be Tanobada Ibounai Tuarina Ginigunana murinai gabu helagana ai ia gini matamaia.

11, 12. Lagani 1969 ai, hisihisi badana dekenai edena lalohadai matamatana idia gwauraia?

¹¹ To, idia hanaia laganidia lalonai, eda lalo-parara be ia idau. Thursday, July 10, 1969 ai, New York dekenai “Peace on Earth” Intenesenel Hebouhebouna idia karaia neganai, F. W. Franz, unai nega ai Watch Tower Bible and Tract Society edia presiden henuna tauna, ese hereva idauna ta ia henia. Iesu ena peroveta herevana lalo-pararalaia dalana gunana ia gwauraia lou neganai, Tadikaka Franz ia gwau: “Ita abia herevana be lagani 1914 C.E. ai ‘hisihisi bada hereana’ ia matamaia, to unai negai ia vara guguru lasi badina November 1918 ai Dirava ese Tanobada Ibounai Tuarina Ginigunana ia koua. Unai nega amo Dirava be nega ia henia, ia abia hidi horoa Keristani orena taudia edia gaukara do idia karaia totona bena gabeai Aramagedono tuarina ai ‘hisihisi bada hereana’ ena kahana ginigabena do ia havaraia.”

¹² Bena idia haidaua herevana ia gwauraia, ia gwau: “Aposetolo taudia edia nega ai idia vara gaudia ida do ia hegeregere totona, . . . ‘hisihisi bada hereana’ ese ia laulaulaia gauna be lagani 1914 C.E. ai ia matamaia lasi. To, lagani 1914-1918 lalonai, Ierusalema ia laulaulaia gauna dekenai ia vara gaudia be ‘nega dikana ia matamaia’ sibona . . . ‘Hisihisi bada hereana,’ unai bamona gabeai do ia vara lou lasi gauna be do vairai, badina be unai kara lalonai tanobada hegegemadai tomadiho koikoidia ibounai (Kerisendom danu) do idia hadikaia ore bena Aramagedono ai ‘Siahu Ibounai Diravana ena Dina Badana’ ena tuari do ia vara.” Unai ena anina be hisihisi badana be ia do vara lasi.

13. Dahaka dainai ita gwau diba vaira negana ta ai “gau dika rohorohona” be ‘dubu helaga ai do ia gini’?

¹³ Unai be mai anina bada gabu helagana ai ‘gau dika rohorohona ia gini’ negana ita lalo-pararalaia totona. Aposetolo edia nega ai ia vara gauna mani oi laloa lou. Roma taudia ese lagani 66 C.E. ai Ierusalema idia tuari henia, to kara haraga idia giroa lou, bena dala ia kehoa Keristani taudia idia roho mauri totona. (Mataio 24:22) Unai hegeregerena, ita laloa hisihisi badana be kahirakahira do ia matamaia, to Dirava ese ia abia hidi taudia dainai do ia hakwadogia. Inai hereva badana oi laloatao: Idaunegai ia vara gauna dekenai, ‘gau dika rohorohona Dubu Helaga ena lalonai ia gini’ matamaia dalana be lagani 66 C.E. ai General Gallus henunai Roma taudia idia karaia tuarina ai ia vara. Iseda nega ai, unai tuari hegeregerena karana​—⁠hisihisi badana ena matamana​—⁠be do vairai. Unai dainai toana be “gau dika rohorohona, gabu ia hadikaia gauna,” lagani 1919 amo ia noho vadaeni gauna, be gabu helagana dekenai ia do gini lasi.b Edena dala ai unai do ia vara? Bona ita dekenai dahaka ia vara diba?

Vaira Negana ai Do Ia Vara Tuarina

14, 15. Apokalupo karoa 17 ese edena bamona ita ia durua Aramagedono ia do vara lasi neganai do idia vara karadia ita lalo-pararalaia totona?

¹⁴ Apokalupo bukana ese vaira negana ai tomadiho koikoi do idia hadikaia ore karana ta ia herevalaia. Karoa 17 ai Dirava ese ‘Babulonia badana, ariara hahine ibounai edia sinana’​—⁠tanobada hegegemadai tomadiho koikoi ibounai​—⁠do ia hahemaoro henia karana ia gwauraia. Unai kara dekenai Kerisendom be mai ena kahana badana bona ia sibona ia gwauraia Dirava ida gwauhamata idia karaia. (Ieremia 7:⁠4 itaia.) Tomadiho koikoidia, Kerisendom danu, be nega daudau lalonai “tanobada ena king” taudia ida idia heudahanai, to unai tomadiho oredia do idia hadikaia ore neganai unai kara do ia doko. (Apokalupo 17:​2, 5) Daika ese do ia karaia?

¹⁵ Apokalupo ese nega ta lalonai “dagedage gauna kakakakana ta” ia noho, ia boio, bena ma ia hedinarai lou ia gwauraia. (Apokalupo 17:​3, 8) Unai dagedage gauna be tanobada lohiadia ese idia durua. Unai peroveta herevana ena kahana iboudiai ese ita idia durua bena ita diba unai dagedage gauna ese maino oreana ta ia laulaulaia. Lagani 1919 ai inai ladana League of Nations (“gau dika rohorohona”) ai ia hedinarai matamaia bona hari ia be United Nations. Apokalupo 17:​16, 17 ia hahedinaraia, Dirava ese unai “dagedage gauna” ena lohia taudia badadia haida edia lalona ai, tanobada hegegemadai tomadiho koikoi iboudiai hadikaia ore lalohadaina do ia atoa. Unai kara amo hisihisi badana do ia matamaia.

16. Edena kara be hari tomadiho momo dekenai idia vara?

¹⁶ Hisihisi badana ia do vara lasi dainai, ‘dubu helaga lalonai gau dika rohorohona ia gini’ karana be do vairai, a? Oibe. Ena be “gau dika rohorohona” be lagani 1900 murinai ia hedinarai, bona lagani momo ia noho vadaeni, to dala idauna ai kahirakahira “Dubu Helagana lalonai [do] ia gini.” Aposetolo taudia edia nega ai Keriso murinai idia raka taudia ese ‘dubu helagana ai gau dika rohorohona do ia gini’ dalana idia naria mai edia ura ida hegeregerena, Keristani taudia iseda nega lalonai be unai bamona idia naria noho danu. Momokani, namona be do ita naria ela bona unai kara ia vara bena ena kahana maragimaragi ibounai do ita diba. To, namona be ita diba, tano haida dekenai tomadiho idia inai henia bona unai kara ia bada ia lao noho. Politikol taudia haida bona abidadama momokani idia dadaraia taudia, guna idia be Keristani taudia, idia gaukara hebou bona tomadiho oreadia dagedage henia karana idia habadaia, bona Keristani taudia momokanidia dekenai idia karaia badabada. (Salamo 94:​20, 21; 1 Timoteo 6:​20, 21) Unai dainai, politikol siahu oreadia be hari ‘Mamoe ena Natuna idia tuari henia danu,’ bona Apokalupo 17:14 ena hereva bamona, unai tuari do ia bada. Idia ese Dirava ena Mamoe Natuna​—⁠Iesu Keriso, ena dagi mai hairaina ai​—⁠idia dogoatao diba lasi, to edia dagedage karana Dirava tomadiho henia momokani taudia dekenai do idia habadaia, bona iena “helaga taudia” dekenai do idia karaia badabada. (Daniela 7:​25; mani Roma 8:​27; Kolose 1:2; Apokalupo 12:17 itaia.) Dirava ena amo ita diba momokani, Mamoe ena Natuna bona iena kahana ai idia noho taudia be do idia kwalimu.​—⁠Apokalupo 19:​11-​21.

17. Reana lalohadai aukana ta ita haginia lasi, to gabu helagana ai “gau dika rohorohona” do ia gini dalana be edena bamona ita gwauraia diba?

¹⁷ Ita diba tomadiho koikoidia do idia hadikaia ore. Babulonia badana be “Dirava ena taudia edia rarana” amo ia kekero vadaeni bona kwini ta bamona ia kara, to do idia hadikaia ore momokani. Unai hahine ese tanobada ena king taudia ia veria siahuna dikana be do ia ore haraga bena ‘dagedage gauna bona doana 10’ ese do idia inai henia mai dagedage ida. (Apokalupo 17:​6, 16; 18:​7, 8) “Dagedage gauna kakakakana” ese tomadiho dalana ai ia heudahanai ariara hahinena ia hadikaia neganai, “gau dika rohorohona” be dala dikana ai Kerisendom ena gabu helagana ai do ia gini.c Unai dainai hadikaia ore karana be Kerisendom ena amo do ia matamaia, ia be sibona ia gwauraia helaga.

“Heau Lao”​—⁠Edena Dala Ai?

18, 19. Edena badina haida dainai taunimanima do “idia heau lao ororo dekenai” ena anina be tomadiho haidaua karana lasi?

¹⁸ ‘Dubu helaga ai gau dika rohorohona do ia gini’ herevana ia gwauraia murinai, Iesu ia gwau namona be laloa namonamo taudia ese kara ta idia karaia. Iena hereva ena anina be nega ia kwadogi momokani lalonai​—⁠“gau dika rohorohona” be “Dubu Helagana lalonai ia gini” neganai​—⁠taunimanima momo be tomadiho koikoi amo do idia heau siri bona tomadiho momokanina do idia badinaia, a? Lasi momokani. Peroveta herevana ia guguru negana ginigunana mani oi laloa. Iesu ia gwau: “Unai neganai Iudea noho taudia namo idia heau lao ororo dekenai. Ruma ena guhi latanai noho tauna, be namo ia diho lasi ruma lalonai, iena gau abia totona. Uma lalonai noho tauna, namo ia giroa lou lasi, iena dabua abia totona. Unai neganai rogorogo hahine taudia bona hahine taudia, mai rata inua natudia, madi nega dika do idia davaria! Umui guriguri, inai nega dika do ia mai lasi keru neganai.”​—⁠Mareko 13:​14-18.

¹⁹ Iesu ia gwau lasi namona be Ierusalema lalonai idia noho taudia sibona do idia heau siri, hegeregere unai Iuda taudia edia tomadiho gabuna badana idia rakatania totona; bona iena sisiba lalonai edia tomadiho haidaua karana​—⁠koikoina amo idia heau lao bona momokanina idia badinaia karana​—⁠ia gwauraia lasi. Iesu ena hahediba taudia be tomadiho ta amo idia heau siri bena ma ta idia badinaia sisibana idia abia be anina lasi; idia be Keristani momokanidia ai idia lao vadaeni. Bona lagani 66 C.E. ai ia vara tuarina ese Ierusalema bona Iudea ibounai lalonai idia noho Iuda tomadiho taudia edia lalona ia hamarerea lasi, edia tomadiho do idia rakatania bona Keristani tomadihona idia abia dae totona. Professor Heinrich Graetz ia gwau Roma taudia idia lulua taudia be ma idia giroa lou hanua dekenai. Ia gwau: “Unai Zealot taudia be mai boiboi danu tuari anedia idia abia lalonai Ierusalema dekenai idia giroa lou (October 8), bona mai moale bada ida sibona idia ruhaia bona sibona idia naria karana idia laloa. . . . Dirava ese idia ia durua, guna edia tubudia Ia durua hegeregerena, ani? Herevana vaira neganai dahaka do ia vara, to Zealot taudia idia gari lasi.”

20. Hahediba taudia ginigunadia ese Iesu ena sisiba, ororo dekenai do idia heau lao sisibana, be edena bamona idia badinaia?

²⁰ Vadaeni, Dirava ese ia abia hidi taudia sibona be dahaka idia karaia, Iesu ena sisiba hegeregerena? Iudea idia rakatania, Ioridane Sinavaina idia hahanaia bona ororo gabudia dekenai idia heau lao. Unai amo idia hahedinaraia idia be Iuda taudia edia politikol eiava tomadiho oromana ena taunimanima lasi. Edia tano bona ruma idia rakatania, bona edia ruma lalodiai edia kohu danu idia abia lao lasi. Iehova ena heduru bona naria siahuna idia abidadama henia dainai, iena tomadiho idia atoa guna bona taunimanima ese idia laloa bada gaudia be idia laloa bada lasi.—⁠Mareko 10:​29, 30; Luka 9:​57-​62.

21. “Gau dika rohorohona” ese tuari ia matamaia neganai edena kara do ia vara lasi?

²¹ Hari, dala badana ai peroveta herevana do ia guguru dalana do ita laloa. Lagani 90 bamona lalodiai taunimanima ita hagoadaia tomadiho koikoidia amo do idia raka siri bona tomadiho momokanina do idia badinaia. (Apokalupo 18:​4, 5) Taunimanima milioni momo be unai bamona idia karaia vadaeni. Iesu ena peroveta herevana ia gwau lasi, hisihisi badana ia vara neganai, taunimanima momo herea be tomadiho goevana do idia abia dae; lagani 66 C.E. ai Iuda taudia momo herea be edia tomadiho idia haidaua lasi, lasi momokani. To, Keristani taudia momokanidia be mai edia badina namona dainai Iesu ena sisiba do idia badinaia bona do idia heau siri.

22. Iesu ena sisiba, ororo dekenai ita heau lao sisibana, ita badinaia ena anina be dahaka?

²² Hisihisi bada hereana ena kahana maragidia ibounai ita gwauraia diba lasi, to ita gwau diba ita dekenai Iesu ese ia gwauraia heau lao karana ena anina be gabu korikorina ta dekenai do ita heau lao lasi. Dirava ena taunimanima be tanobada ena kahana ibounai dekenai idia noho vadaeni. Ita diba momokani, heau negana ia ginidae neganai, Keristani taudia ese do idia hahedinaraia goevagoeva idia be tomadiho koikoi oreadia amo idia idau momokani. Iesu ena sisiba, kohu o dabua abia totona ruma dekenai do idia giroa lao lasi sisibana, danu be mai anina bada. (Mataio 24:​17, 18) Unai dainai, reana kohu ita laloa dalana ai hahetoho do ita davaria; idia be mai anina bada momokani, eiava Dirava ena kahanai idia noho taudia ibounai ese do idia davaria hahemaurina be mai anina bada, a? Oibe, ita heau lao ena anina be reana gau haida do ita hekwarahilaia bona gau haida do ita haboioa. Herevana dahaka do ia vara to gau badana be ita noho hegaegae unai ita karaia totona, aposetolo edia nega ai Keristani taudia idia karaia bamona. Idia be Iudea amo Ioridane idia hanaia bona Perea dekenai idia lao.

23, 24. (a) Edeseniai sibona, namo do ita davaria? (b) ‘Gau dika rohorohona dubu helagana lalonai ia gini’ herevana dekenai, Iesu ena sisiba dainai dahaka ita karaia be namo?

²³ Namona be ita abia dae momokani, Iehova bona iena ororo bamona oreana be iseda heau mauri gabuna. (2 Samuela 22:​2, 3; Salamo 18:2; Daniela 2:​35, 44, NW) Unuseniai namo do ita davaria! Taunimanima hutuma edia kara do ita tohotohoa lasi. Idia be idia heau lao “nadi ena kohua dekenai, bona nadi badadia henunai idia hunia, ororo dekenai”​—⁠taunimanima edia orea idauidau unai, reana Babulonia Badana ia ore murinai do idia noho sisina gaudia. (Apokalupo 6:15; 18:​9-11) Momokani, reana unai nega ena metau do ia bada herea​—⁠lagani 66 C.E. ai rogorogo hahinedia be Iudea amo idia heau mauri neganai eiava keru bona medu ena nega ai ta ia heau mauri neganai, ia auka hegeregerena. To ita diba Dirava ese hahemauri dalana do ia karaia. Namona be hari inai negai, Iehova bona ena Natuna, Basileia ai ia lohia noho King tauna, dekenai iseda tabekau karana ita habadaia.

²⁴ Vaira negana ai do idia vara gaudia dainai ita gari be badina lasi. Iesu ia ura lasi iena hahediba taudia unai nega ai be do idia gari, bona ia ura lasi ita danu be hari eiava vaira negana ai do ita gari. Ita ia hadibaia, bena unai amo eda kudouna bona lalona dekenai do ita hegaegae. Namona be oi laloatao, tomadiho koikoidia bona tanobada ena oromana dikana ibounai ese dika do idia davaria neganai, kamonai Keristani taudia be dika do idia davaria lasi. Idia be do idia laloa namonamo bona ‘dubu helaga ai gau dika rohorohona ia gini’ neganai dahaka do idia karaia ena sisiba do idia badinaia. Edia abidadama goadana hegeregerena kara ta do idia karaia. Namona be Iesu ena gwauhamata ita laloaboio lasi, ia gwau: “Ia gini auka ela bona dokona tauna, be mauri do ia davaria.”​—⁠Mareko 13:⁠13.

[Footnotes]

Oi Laloatao, A?

◻ “Gau dika rohorohona, gabu ia hadikaia gauna,” be aposetolo edia nega ai edena dala ai ia hedinarai?

◻ Dahaka dainai ita laloa “gau dika rohorohona” iseda nega lalonai be vaira negana ai gabu helagana ai do ia gini?

◻ Edena dagedage karana, “gau dika rohorohona” ta ese do ia havaraia, be Apokalupo bukana ese ia perovetalaia?

◻ Reana edena dala ai do ita ‘heau mauri’?

4. Dahaka ese ia hahedinaraia Mataio 24:15 ena anina be aposetolo edia nega ai ia vara?

[Picture on page 16]

Babulonia Badana idia gwauraia ‘ariara hahine ibounai edia sinana’

[Picture on page 17]

Apokalupo karoa 17 ai, dagedage gauna kakakakana be Iesu ese ia gwauraia “gau dika rohorohona”

[Picture on page 18]

Dagedage gauna kakakakana ese tomadiho oreadia tuari henia karana do ia gunalaia