Iehova Abidadama Henia Momokani, Nega Dikadia Ai
“Dirava be iseda heau mauri gabuna, bona ia ese ita dekenai goada ia henia. Iseda nega dika negadia ibounai ita dekenai ia noho, ita do ia durua totona.”—SALAMO 46:1.
1, 2. (a) Edena haheitalai ese ia hahedinaraia, ita gwau Dirava ita abidadama henia sibona be hegeregere lasi? (b) Dahaka dainai ita gwau sibona lasi Iehova ita abidadama henia, to kara ita karaia danu be namo?
ITA gwau Dirava ita abidadama henia be auka lasi. To iseda kara amo ita hahedinaraia be auka. Hegeregere, nega daudau lalonai inai hereva “Dirava Ita Abidadama Henia” be America ena moni dekenai idia torea.a Lagani 1956 ai, America ena gavamani ese taravatu ta idia karaia bona unai hereva be unai tano ena hereva badana ai idia halaoa. To taunimanima momo—America sibona lasi to tanobada hegegemadai—be Dirava idia abidadama henia lasi to moni bona kohu idia abidadama henia bada.—Luka 12:16-21.
2 Ita be Keristani taudia momokanidia dainai, ita hereva sibona lasi Iehova ita abidadama henia, to kara ita karaia danu. “Abidadama mai ena kara namodia lasi, be mase gauna” hegeregerena, bema ita gwau Dirava ita abidadama henia to kara ta ita karaia lasi, unai be anina lasi. (Iamesi 2:26) Stadi ginigunana lalonai, ita dibaia iseda abidadama Iehova dekenai ita hahedinaraia bema ia ita guriguri henia, iena Hereva amo heduru ita tahua bona ena orea ena hakaua dalana dekenai ita tabekau. Hari, mani ita itaia edena bamona nega dikadia ai unai dala toi ita badinaia diba.
Moni Gaukara Oi Haboioa Eiava Emu Gaukara Davana be Maragi Neganai
3. Inai “metau dikadia” negana ai, Iehova ena hesiai taudia be dahaka moni ena hekwakwanai idia davaria, bona edena bamona ita diba Dirava ia ura ita ia durua?
3 Inai “metau dikadia” idia vara negana lalonai, ita Keristani taudia be taunimanima haida ese idia davaria moni ena hekwakwanai ita davaria danu. (2 Timoteo 3:1) Reana gaukara amo ita idia hadokoa. Eiava dala ma ta be lasi, to hora momo ita gaukara bona davana maragi sibona ita abia. Unai ia vara neganai, ita davaria iseda ruma bese ita naria namonamo diba lasi. (1 Timoteo 5:8) Unai bamona negadiai, Ataiai Momokani Diravana ia ura ita ia durua, a? Oibe! Ita diba, hari ita davaria mauri ena hekwakwanai ibounai amo Iehova ese ita ia gimaia lasi. To, bema ia ita abidadama henia, Salamo 46:1 ena hereva be do ia vara momokani ita dekenai: “Dirava be iseda heau mauri gabuna, bona ia ese ita dekenai goada ia henia. Iseda nega dika negadia ibounai ita dekenai ia noho, ita do ia durua totona.” To, edena dala amo do ita hahedinaraia diba moni dekenai ita dabu neganai, Iehova ita abidadama henia momokani?
4. Moni dekenai ita dabu neganai, dahaka totona ita guriguri diba, bona unai bamona guriguri dekenai Iehova be dahaka ia karaia?
4 Ita hahedinaraia Iehova ita abidadama henia dalana ta be ia ita guriguri henia. To dahaka totona do ita guriguri? Ita be moni dekenai ita dabu dainai, reana ita ura gauna badana be aonega ida do ita kara. Vadaeni, namona be unai ita gurigurilaia! Iehova ena Hereva ese ita ia hagodaia: “Bema umui ta be aonega lasi, namona be Dirava do ia noia, vadaeni Dirava ese aonega ia dekenai do ia henia. Badina be Dirava ese taunimanima ibounai dekenai gau namodia ia henia noho. Bona tau ta bema ia be gau ta lasi, vadaeni Dirava do ia noia neganai, Dirava ese do ia badu henia lasi.” (Iamesi 1:5) Oibe, aonega totona Iehova ita noia—diba bona lalo-parara ita gaukaralaia namonamo totona—unai amo abia hidi maorodia ita karaia diba. Iseda lalokau guba Tamana ese ita ia hadibaia unai bamona guriguri do ia kamonai henia. Ia ura bada edia kudouna ibounai ida Ia idia abidadama henia taudia edia dala do ia hamaoromaoroa.—Salamo 65:2; Aonega Herevadia 3:5, 6.
5, 6. (a) Moni ena hekwakwanai hanaia totona dahaka dainai Dirava ena Hereva amo heduru ita tahua diba? (b) Gaukara ita haboioa neganai, lalo-hekwarahi hamaragia totona dahaka ita karaia diba?
5 Ita hahedinaraia Iehova ita abidadama henia dalana ma ta be Dirava ena Hereva ena hakaua dalana ita tahua. Baibel lalonai idia noho aonega herevadia be “noho hanaihanai” herevadia. (Salamo 93:5) Ena be lagani 1,900 gunanai idia torea, inai lauma helaga amo idia torea bukana be mai ena sisiba namodia bona aonega herevadia bona ita ia durua diba moni ena hekwakwanai ita hanaia totona. Baibel ena aonega herevadia haida mani ita itaia.
6 Aonega King Solomona be idau negai ia gwau: “Gaukara tauna ena bogana do ia kunu, o do ia hitolo, to iena mahuta be do ia namo. To kohu momo tauna ena gau momo dainai ia laloa hekwarahi, bona ia mahuta namonamo lasi.” (Hadibaia Tauna 5:12) Iseda kohu ita gimaia, hanamoa bona hagoevaia totona, nega bona moni do ita haorea. Unai dainai gaukara amo ita idia hadokoa neganai, ia be nega namona iseda mauri lalonai, edena kohu be mai anina bada bona edena be anina lasi ita tahua namonamo. Lalo-hekwarahi hamaragia totona, aonega dalana be gau haida ita haidaua. Ia hegeregere bema kohu momo lasi maurina ita abia dae, reana ruma maragina ta ita abia eiava anina lasi kohu ita dadaraia diba, a?—Mataio 6:22.
7, 8. (a) Edena dala ai Iesu ia hahedinaraia goevadae lasi taudia be vaia tauanina gaudia idia laloa momo? (Futnout itaia danu.) (b) Iesu ese laloa momo karana dadaraia totona edena aonega sisibana ia henia?
7 Iesu be ororo ai Haroro Hereva Badana ia henia neganai, inai sisiba ia henia: “Mai gari danu umui laloa momo lasi emui noho mauri dekenai, dahaka do umui ania, o dahaka do umui inua, o tauanina ena dabua dekenai.”b (Mataio 6:25) Iesu ia diba goevadae lasi taudia be vaia mauri durua gaudia abia dalana idia laloa momo. Edena dala ai unai gaudia “laloa momo” karana ita hadokoa diba? Iesu ia gwau: “Dirava ena Basileia . . . umui tahua guna.” Herevana dahaka hekwakwanai ita davaria, namona be Iehova tomadiho henia karana be hanaihanai ita atoa guna iseda mauri lalonai. Bema unai ita karaia, dina ta ta ai, iseda mauri durua gaudia be iseda guba Tamana ese “dohore ia henia.” Herevana edena dala amo, to ia ese iseda dabu gaudia do ia henia.—Mataio 6:33.
8 Iesu ese inai sisiba ma ia henia: “Emui lalona do idia hekwarahi lasi kerukeru totona. Badina be kerukeru ese sibona ena metau do ia huaia.” (Mataio 6:34) Reana kerukeru do idia vara gaudia ita laloa momo be aonega karana lasi. Diba bada tauna ta ia gwau: “Ita gari badina ita laloa nega vaira dekenai idia vara gaudia be do idia dika momokani, to unai bamona ia vara lasi.” Baibel ena sisiba, mai anina bada gaudia ita atoa guna bona dina ta ta sibona ita laloa, be mai manau ida ita badinaia ese ita do ia durua ita laloa momo lasi totona.—1 Petero 5:6, 7.
9. Moni ena hekwakwanai ita davaria neganai, “hesiai tauna mai ena kamonai, bona mai ena kara maoromaoro” ese idia halasia buka bona magasin lalodiai, dahaka heduru ita davaria diba?
9 Moni ena hekwakwanai ita davaria neganai, “hesiai tauna mai ena kamonai, bona mai ena kara maoromaoro” ese ia hegaegaelaia buka bona magasin duahia karana amo ita hahedinaraia Iehova ita abidadama henia. (Mataio 24:45) Nega ta ta ai, Awake! magasin ese moni ena hekwakwanai hanaia daladia bona heduru herevadia ia halasia. August 8, 1991 gauna lalonai idia halasia herevana “Out Of a Job—What Are the Solutions?” ese momo ia durua vadaeni. Ia ese moni ena hekwakwanai bona gaukara lasi dainai idia vara lalohisihisi koua daladia 8 ia herevalaia.c Oibe, unai dala idauidau ita badinaia neganai, namona be moni ena anina ita laloa maoromaoro. Unai lalohadai maorona be unai magasin tamona lalonai idia halasia herevana “Something More Vital Than Money” ese ia herevalaia.—Hadibaia Tauna 7:12.
Gorere Dainai Lalohisihisi Neganai
10. King Davida ena haheitalai ese edena bamona ia hahedinaraia gorere dikadika negadiai Iehova ita abidadama henia diba?
10 Ita gorere dikadika neganai, Iehova ita abidadama henia be namo, a? Oibe! Iena taunimanima huanai idia gorere taudia edia hemami ia diba. Unai sibona lasi, to ia ura ia durudia. Hegeregere, King Davida mani oi laloa. Davida be reana ia gorere bada herea lalonai, Dirava ese ia gorere kara namo tauna ta ia kara henia ena sivarai ia torea. Ia gwau: “Unai tau, ogogami taudia ia laloa tauna, ia gorere neganai, be Lohiabada ese do ia durua. Lohiabada ese unai tau ena gorere, be do ia hanamoa lou momokani.” (Salamo 41:1, 3, 7, 8) King Davida ena abidadama Dirava dekenai ia goada noho, bona gabeai ena gorere amo ia namo. To, gorere dainai ita lalohisihisi neganai, iseda abidadama Iehova dekenai be edena bamona ita hahedinaraia diba?
11. Ita gorere neganai, iseda guba Tamana amo dahaka ita noia diba?
11 Ita gorere neganai, iseda abidadama Iehova dekenai ita hahedinaraia dalana ta be guriguri amo ena heduru ita tahua unai gorere ita haheaukalaia totona. Dirava ita noia ita ia durua “aonega” dalana ai iseda noho hegeregerena heduru ita tahua iseda gorere ita hanamoa totona. (Aonega Herevadia 3:21) Danu, do ita noia ita ia durua iseda gorere do ita haheaukalaia totona. Gau badana be, Iehova ita noia ita ia durua noho, goada do ia henia Ia ita abidadama henia bona ita manoka lasi totona, herevana dahaka do ia vara. (Filipi 4:13) Oibe, hari ita mauri noho be namo, to mai anina bada gauna be inai: Dirava badinaia karana do ita goadalaia noho. Bema Dirava ita badinaia noho, Davana Namona Henia Tauna Badana ese ita dekenai mauri hanaihanai goevadaena bona gorere lasi maurina do ia henia.—Heberu 11:6.
12. Edena Baibel hakaua herevadia ese ita do idia durua mai aonega ida doketa edia heduru ita abia hidi totona?
12 Danu, iseda abidadama karana Iehova dekenai ese ita ia doria ena Hereva, Baibel, dekenai heduru ita tahua totona. Baibel ena hakaua herevadia ese ita idia durua doketa edia heduru ita tahua neganai, mai aonega ida abia hidi do ita karaia. Hegeregere, ita diba Baibel ese “meamea” karana ia gwauraia dika dainai, meamea amo gorere idia tahua eiava hanamoa daladia do ita dadaraia. (Galatia 5:19-21; Deuteronomi 18:10-12) Baibel ena noho hanaihanai aonega herevana ta be inai: “Mai ena lalona kehoa lasi tauna ese, hereva ibounai ia hamomokania noho, to laloa kehoa tauna ese, iena raka dalana ia laloa namonamo noho.” (Aonega Herevadia 14:15) Unai dainai, doketa edia heduru ita tahua neganai, namo lasi ‘hereva ibounai ita hamomokania’ sibona, to aonega dalana be diba korikorina do ita tahua. Unai laloa maoromaoro karana ese ita ia durua dala idauidau ita tahua namonamo bena mai iseda diba maorona ida abia hidi ita karaia.—Tito 2:12.
13, 14. (a) Gima Kohorona, Noga! bona Awake! lalonai edena hereva idauidau be gorere idia herevalaia? (Henunai ia noho maua itaia.) (b) January 22, 2001 ena Awake! ese nega daudau idia gorere taudia dekenai dahaka sisiba ia henia?
13 Mai ena kamonai hesiai tauna ese ia halasia magasin ita duahidia ese iseda abidadama Iehova dekenai ia hahedinaraia danu. Gima Kohorona bona Awake! magasin be nega momo gorere idauidau edia sivarai idia halasia.d Nega haida, unai magasin ese gorere idauidau idia abia bona idia haheaukalaia taudia edia sivarai idia halasia. Bona danu, sivarai haida ese nega daudau lalonai idia gorere taudia edia noho maurina durua totona, Baibel ena sisiba bona heduru idia henia.
14 Hegeregere, January 22, 2001 ena Awake! ese inai hereva “Comfort for the Sick” ia halasia. Unai magasin ena hereva idauidau ese Baibel ena hakaua herevadia ia henia bona lagani momo lalonai mai gorere ida idia noho taudia idia inteviu bona edia sivarai idia torea. Inai hereva “Living Successfully With Your Ailment—How?” ese inai sisiba ia henia: Oiemu gorere dekenai emu diba oi habadaia. (Aonega Herevadia 24:5) Tahua gaudia haida oi atoa, haida durua karadia haida oi atoa danu, to namona be oi diba danu ma haida ese idia karaia diba gaudia be reana oi ese oi karaia diba lasi. (Kara 20:35; Galatia 6:4) Sibona noho karana dadaraia. (Aonega Herevadia 18:1) Haida ese oi idia vadivadi henia neganai nega namona umui abia hebou be namo. (Aonega Herevadia 17:22) Gau badana be, Iehova bona kongregesen kahirakahira oi noho. (Nahumu 1:7; Roma 1:11, 12) Iehova ese ena orea amo ia henia sisiba namodia dainai ita moale, ani?
Manoka Gauna ta ese Ita Ia Veria Neganai
15. Aposetolo Paulo be edena dala ai goevadae lasi tauanina ena manoka gaudia ia koua, bona dahaka hagoadaia herevana ita abia diba?
15 Aposetolo Paulo ia gwau: “Egu lalona dekenai bona egu kudouna dekenai be namo ta ia noho lasi.” (Roma 7:18) Paulo ia diba goevadae lasi tauanina ena ura bona manoka gaudia koua ena hekwarahi be auka herea. To, Paulo be mai lalo-goada ida ia diba unai ia hanaia diba. (1 Korinto 9:26, 27) Edena dala ai? Iehova abidadama henia momokani karana amo. Unai dainai Paulo ia gwau diba: “Lau madi o! Lau be dika momokani inai! Lauegu tauanina ese lau ia hamasea noho, be daika ese lau do ia hamauria? Dirava lau tanikiu henia, ia ese lau ia hamauria, Iesu Keriso dekena amo.” (Roma 7:24, 25) Ita be edena bamona? Ita danu be eda manoka gaudia koua dainai ita hekwarahi bada. Unai manoka gaudia koua totona ita hekwarahi neganai, ita lalo-manoka diba, reana ita laloa do ita gini goada diba lasi. To Iehova ese ita do ia durua, bema Paulo bamona, Ia ita abidadama henia momokani bona ita sibona eda goada dekenai ita tabekau lasi.
16. Manoka gauna ta ese ita ia veria neganai, dahaka totona do ita guriguri, bona dahaka ita karaia bema ita moru lou?
16 Manoka gauna ta ese ita ia veria neganai, Iehova ita guriguri henia goadagoada karana amo ita hahedinaraia Ia ita abidadama henia. Iehova ena lauma helaga ena heduru totona do ita guriguri goadagoada be namo. (Luka 11:9-13) Tauanina ena ura koua karana totona ita guriguri be namo, ia be Dirava ena lauma helaga ena huahua ta. (Galatia 5:22, 23) Dahaka ita karaia bema ita moru lou? Namo lasi ita hesiku. Mai manau ida iseda hebogahisi Diravana ita guriguri henia ita ia gwauatao bona durua totona. Unai ita hesikulaia lasi. Ia kara dika dainai lalona ena mamina dika bona “ia lalohisihisi momokani, bona ia manau momokani” tauna be Iehova ese do ia dadaraia lasi. (Salamo 51:17) Bema iseda kudouna dekenai ita sori bada bona mai momokani ida ita guriguri, Iehova ese ita do ia durua hedibagani ita dadaraia totona.—Filipi 4:6, 7.
17. (a) Dahaka dainai ita hekwarahilaia noho manoka gauna dekenai, Iehova ena hemami ita tahua be namo? (b) Edena Baibel siri ita lalodiatao be namo bema ita hekwarahi badu haraga karana ita koua totona? iseda malana biagua totona? idia maoro lasi moale karadia urana koua totona?
17 Iehova ena Hereva dekenai heduru ita tahua karana amo ita hahedinaraia ita be Iehova ita abidadama henia. Baibel ena konkodens, Watch Tower Publications Index eiava Gima Kohorona lalonai ia hedinarai lagani ta ta edia Gima Kohorona Edia Hereva Iboudiai ena lista ita gaukaralaia diba, inai henanadai ena haere tahua totona, ‘Lau hekwarahilaia noho manoka gauna dekenai, Iehova ena lalohadai be dahaka?’ Iehova ena lalohadai unai gauna dekenai ita diba neganai, iseda Iehova hamoalea urana do ia hagoadaia diba. Unai amo Iehova ena hemami do ita abia bona ia inai henia gaudia do ita inai henia. (Salamo 97:10) Haida idia davaria idia hekwarahilaia manoka gauna ia herevalaia Baibel siri haida be edia lalona dekenai idia laloatao ese idia ia durua. Badu haraga karana koua totona ita hekwarahi noho, a? Vadaeni, namona be Aonega Herevadia 14:17 bona Efeso 4:31 be iseda lalona dekenai ita laloatao. Ita hekwarahi iseda malana ita naria namonamo totona, a? Namona be Aonega Herevadia 12:18 bona Efeso 4:29 ita lalodia tao. Idia maoro lasi moale karadia ita ura henia, a? Namona be Efeso 5:3 bona Kolose 3:5 ita lalodiatao.
18. Iseda manoka gauna hanaia totona, dahaka dainai elda taudia edia heduru noia totona ita hemarai lasi be namo?
18 Lauma helaga ese ia abia hidi kongregesen elda taudia edia heduru ita tahua karana be iseda abidadama Iehova dekenai ita hahedinaraia dalana ma ta. (Kara 20:28) Oibe, inai “harihari gaudia taunimanima dekenai” be Iehova ese Keriso amo ia henia ena mamoe gimaia bona naria totona. (Efeso 4:7, 8, 11-14) Momokani, iseda manoka gauna dainai heduru totona ita noinoi be do ia auka. Reana ita hemarai badina ita laloa elda taudia do idia laloa ita be anina lasi. To, lasi, unai lauma dalanai lo taudia be ita do idia matauraia badina mai lalo-goada ida edia heduru ita noia. Danu, elda taudia be mamoe idia kara henidia neganai, idia hekwarahi Iehova ena kara idia hahedinaraia totona. Edia hahegoada, sisiba bona hahediba herevadia Dirava ena Hereva amo ese ita idia hagoadaia unai manoka gauna ita hanaia totona.—Iamesi 5:14-16.
19. (a) Satani ia ura inai nega ena anina lasi maurina be edena bamona ia gaukaralaia? (b) Abidadama ena anina be dahaka, bona dahaka ita karaia totona iseda lalona ita hadaia be namo?
19 Laloaboio lasi, Satani ia diba ena nega be kwadogi. (Apokalupo 12:12) Ia ura inai tanobada ena anina lasi maurina ia gaukaralaia ita ia hamanokaia bona ita ia hamorua totona. Namona be Roma 8:35-39 ena hereva ita abia dae momokani, ia gwau: “Daika ese Keriso ena lalokau ita dekena amo do ia kokia diba? Nega dika ese, a? O hisihisi ese, a? O dagedage ese? O hitolo ese? O ogogami ese? O gari bada gauna ese? O mase ese? . . . To inai gaudia ita laloa lasi. Badina be Keriso ese ita ia lalokau henia, bona ia dainai do ita kwalimu momokani. Badina be lau diba momokani vadaeni, gau ta ia goada lasi, mase o mauri, o aneru, o lohia herea taudia, o guba ena siahu gaudia, o harihari idia noho gaudia, o gabeai do idia vara gaudia, o ataiai gaudia, o dobu gabuna gaudia, o tanobada dekenai karaia gaudia, ta ese Dirava ena lalokau, Keriso Iesu iseda Lohiabada ese ia hedinaraia vadaeni gauna, dekena amo ita do ia kokia diba lasi.” Iehova abidadama henia herevana unai! To, unai bamona abidadama be hemami ta sibona lasi. Ia be eda dina ta ta maurina lalonai ita laloa maoromaoro abia hidi gauna. Vadaeni, namona be, iseda lalona ita hadaia nega dikadia lalonai Iehova do ita abidadama henia momokani.
[Footnotes]
a Moni naria dipatmen ena Seketere Salmon P. Chase ese revareva ta ena deiti November 20, 1861 ia siaia lao America ena moni idia karaia gabuna dekenai, ia gwau: “Bese ta be sibona ia goada diba lasi, to Dirava ese goada ia henia eiava sibona ia noho namo lasi to Ia ese ia gimaia. Iseda taunimanima edia abidadama Dirava dekenai be iseda bese ena moni dekenai ita hedinaraia be namo.” Unai dainai, lagani 1864 ai idia halasia America ena moni latanai inai hereva badana “Dirava Ita Abidadama Henia” be nega ginigunana ia hedinarai.
b Inai siri lalonai idia herevalaia laloa momo karana be “mai gari ida gau ta oi laloa momo, unai dainai emu mauri lalonai moale be lasi.” Inai hereva “umui laloa momo lasi” anina be ita laloa momo matamaia lasi. To, buka ta ia gwau: “Idia gaukaralaia Greek gado herevana be harihari ia karaia gauna ia herevalaia, anina be oda ia henia ta ese ia karaia noho karana do ia hadokoa totona.”
c Unai dala 8 be inai: (1) Gari lasi; (2) lalohadai maorona abia; (3) gaukara matamata idauidau oi abia dae; (4) emu moni hegeregerena oi noho—ma haida edia noho dalana tohotohoa lasi; (5) abitorehai karana oi naria namonamo; (6) ruma bese ida umui noho hebou; (7) oi sibona oi matauraia; bona (8) moni gaukaralaia dalana umui herevalaia.
d Doketa edia heduru abia hidi karana be ita ta ta eda maduna, unai dainai unai Baibel idia herevalaia magasin be medikol dalana ta idia abia isi lasi. To, unai magasin ese gorere ta idia herevalaia neganai, idia ura duahia taudia ese unai gorere idia dibaia namonamo.
Oi Laloatao, A?
• Moni ena hekwakwanai ita davaria neganai, edena dala amo ita hahedinaraia Iehova ita abidadama henia?
• Ita gorere neganai, edena dala ai ita hahedinaraia Dirava ita abidadama henia?
• Tauanina ena manoka gauna ta ia noho neganai, edena bamona ita hahedinaraia ita be Iehova ita tabekau henia momokani noho?
[Box on page 29]
Inai Hereva Oi Lalodiatao, A?
Gorere dainai ita lalohisihisi neganai, mai kwalimu ida idia haheauka noho gorere taudia eiava tauanina kahana ia gaukara namonamo lasi taudia ma haida edia sivarai duahia karana ese ita idia hagoadaia. Henunai ai torea hereva haida be Gima Kohorona, Noga! bona Awake! magasin lalonai idia halasia.
“Iehova Ena Heduru Lau Moalelaia.”—Gima Kohorona, June 1, 1993.
“Edena Bamona Egu Hekwakwanai Do Lau Noholaia?”—Noga!, January-March, 1994.
“Dahaka Dainai Egu Tauanina Ia Dika?”—Noga!, April-June, 1994.
“Mauri Ia Auka Neganai.”—Noga!, April-June, 1995.
“Lau be Lepera Tauna—Egu Mauri Lalonai Moale Lau Davaria Bona Lauma Dalanai Hahenamo Lau Abia.”—Gima Kohorona, April 1, 1998.
“Loida’s Journey out of Silence” ese cerebral palsy gorerena ia sivarailaia.—Awake!, May 8, 2000.
“Emai Abidadama Idia Tohoa Neganai Ai Sibona Ai Noho Lasi.”—Gima Kohorona, April 15, 2001.
“Iehova ese Ita Dekenai Haheauka Bona Hesiku Lasi Karana Ia Hadibaia.”—Gima Kohorona, February 1, 2002.
[Picture on page 27]
Moni gaukara amo ita idia hadokoa neganai, aonega karana be iseda noho dalana ita tahua
[Picture on page 28]
Loida ena sivarai ese ia hahedinaraia edena dala ai Iehova abidadama henia karana ese ta ia durua ia haheauka totona (Rau 29 dekenai maua itaia)
[Picture on page 30]
Namona be iseda manoka gauna hanaia totona heduru totona ita noinoi karana ita hemarailaia lasi