Keristani gaukaradia amo ita hahonua. (1 Kor. 7:​29) Haroro gaukara ena nega ita laloa neganai, namona be ia ita atoa guna, ma gau ibounai be gabeai. Namona be haroro gaukara lalonai ita gaukara namonamo mai lalo-goada ida. Nega be Iehova ese ita ia henia gauna namona ta. Hanaihanai oi gaukaralaia namonamo mai aonega ida.

Ruma Bese Ena Moale Bukana be Mauri Lagani Idauidau Taudia Dekenai Hariharilaia

¹ Ena mauri lagani be 11 mero maragina ta United States amo, ese Ruma Bese Ena Moale Havaraia Dalana bukana dekenai ena moale herevana ia gwauraia. Ia gwau: “Unai buka dainai lau moale bada, bona ia be namo herea dainai ruma bese ma haida lau hagoadaia inai buka idia duahia totona. Unai buka ese . . . egu ruma bese ia durua noho maino bona moale ai davaria totona.” Unai mero matamata ena ekspiriens ese ita ia durua be namo Ruma Bese Ena Moale bukana be mauri lagani idauidau taudia dekenai ita hariharilaia totona. Henunai idia noho hereva haida be September lalonai emui haroro gaukara dekenai umui tohoa diba.

² Matamata tauna oi davaria neganai, reana oi gwau:

◼ “Oiemu mauri lagani tamona taudia momo be headava idia laloa. To unai gauna dekenai heduru hereva namodia be edeseniai oi abia diba? [Haere naria.] Nega momo matamata taudia idia gwau idia hegeregere momokani lasi idia headava totona. Inai buka ese unai ia herevalaia dalana mani lau hahedinaraia oi dekenai.” Ruma Bese Ena Moale bukana ena rau 14 dekenai kehoa, bona paragraf 3 duahia. Bena unai karoa ena hereva kwarana maragidia ta ta hahedinaraia. Buka oi henia, bona dala karaia oi lou henia totona.

³ Tama eiava sina ta ida oi hereva neganai, reana oi gwau:

◼ “Ai be tama sina ida natudia naria dalana dekenai hakaua hereva namodia haida ai herevalaia noho. Unai hereva ibounai be inai buka Ruma Bese Ena Moale Havaraia Dalana ai ia noho. Rau 55 oi kehoa. Paragraf 10 oi duahia, bena paragraf 11 ai, Deuteronomi 6:​6, 7 oi duahia. Gabeai paragraf 12 ia lao 16 ai italik ai idia torea sentens oi hahedinaraia. Ma oi gwau: “Inai buka ese tama sina momo ia durua vadaeni namo bada idia davaria totona. Bema oi ura inai buka oi duahia, lau moale inai buka be oi dekenai lau henia.”

⁴ Buruka tauna ta ida oi hereva neganai, reana oi gwau:

◼ “Inai hereva kwadogina lau duahia murinai, mani lau oi hadibaia dahaka oi laloa.” Ruma Bese Ena Moale bukana oi kehoa rau 169 dekenai, bona paragraf 17 ena sentens rua oi duahia. Bena oi nanadaia unai hereva dekenai dahaka ia laloa. Ena haere hegeregerena, reana buka amo hereva ma haida oi duahia diba, bena gabeai oi hariharilaia.

⁵ Ruma Bese Ena Moale bukana idia abia taudia ita lou henia neganai, ita laloa gauna be Baibel stadi ta do ita hamatamaia. Dahaka Ita Karaia? buklet ena kahana 8 eiava Diba bukana ena karoa 15 be kahana namona stadi hamatamaia totona. Unai ita karaia lalonai, namona be ita hekwarahi mauri lagani idauidau taudia ita durua Keristani ruma bese mauri mai moalena idia haginia totona.