Magasin Idia Abia Taudia ida Baibel Stadi Hamatamaia Dalana
1. Magasin ita hariharilaia neganai, iseda tahua gauna be dahaka?
1 Saturday ai haroro gaukara ita karaia neganai, ita ese nega momo Watchtower bona Awake! magasin ita hariharilaia. To, iseda tahua gauna be kudou maoro taudia dekenai hereva momokani ita hadibaia. Henunai be dala haida idia noho, lou henia ita karaia neganai Baibel Hadibaia bukana ita rakatania bona Baibel stadi ta ita hamatamaia totona. Emu teritori hegeregerena, kiki herevana oi haidaua bona emu hereva dalana hegeregerena oi hereva diba. To bema oi laloa dala ma ta ese anina namona do ia havaraia, vadaeni oi gaukaralaia.
2. Baibel Hadibaia buka ena rau 4-6 be edena bamona ita gaukaralaia diba, Baibel stadi ta ita hamatamaia totona?
2 Baibel Hadibaia Buka Ena Rau Ginigunadia Gaukaralaia: Lou henia oi karaia neganai, reana oi gwau: “Oi dekenai lau rakatania magasin ese Baibel ia herevalaia. Mani oi itaia dahaka dainai Baibel duahiduahi be mai anina bada.” Isaia 48:17, 18; Ioane 17:3; eiava siri namona ma ta oi duahia. Bena ruma tauna dekenai Baibel Hadibaia bukana oi hahedinaraia, bona ia dekenai kopi ta oi henia murinai, henunai ai gwauraia heduru herevadia oi badinaia diba:
◼ “Baibel ese vaira negana totona helaro korikorina ia gwauraia.” Ruma tauna dekenai rau 4-5 hahedinaraia bena oi nanadaia, “Inai gwauhamata herevadia amo, oi ura edena ia guguru?” Bema ruma tauna be ta ia abia hidi, unai gwauhamata ia herevalaia karoa oi kehoa, bona bema ia ura, vadaeni ia danu paragraf ta eiava rua oi herevalaia.
◼ Eiava oi gwau, “Baibel ese mauri lalonai mai anina bada henanadai ia haerelaidia.” Oi kehoa lao rau 6 bona ruma tauna oi nanadaia bema unai rau henunai idia noho henanadai ta ena haere ia ura dibaia. Unai henanadai ia haerelaia karoa oi kehoa bona nega kwadogi lalonai paragraf ta eiava rua oi herevalaia.
◼ Eiava buka ena anina dekenai idia noho karoa haida be ia dekenai oi hahedinaraia, bona oi nanadaia edena karoa ena hereva ia ura dibaia. Unai karoa oi kehoa, bona nega sisina lalonai Baibel stadi dalana oi hahedinaraia.
3. Edena bamona ruma tauna dekenai Baibel stadi ta ita hamatamaia diba, bema ita rakatania magasin ese inai gaudia idia herevalaia, (a) tanobada ia dika ia lao? (b) ruma bese? (c) Baibel abidadama henia karana?
3 Vadivadi Ginigunana ai Henanadai ta Rakatania: Emu vadivadi ginigunana ai, dala oi karaia ruma tauna oi lou henia totona. Ruma tauna be magasin ia abia murinai, ia dekenai henanadai ta oi henia bona oi gwauhamata gabeai do oi giroa lou bona unai henanadai do umui herevalaia. Namona be dala oi karaia oi lou henia totona, bona emu gwauhamata oi hamomokania. (Mat. 5:37) Oi giroa lou neganai, ruma tauna dekenai unai henanadai oi gwauraia lou, bona Baibel Hadibaia bukana amo unai henanadai oi duahia bona herevalaia. Ia dekenai kopi ta oi henia, unai amo ena buka amo ia badinaia diba. Haheitalai haida be inai:
◼ Bema oi rakatania magasin ese tanobada ia dika ia lao karana ia herevalaia, reana oi gwau: “Lau giroa mai neganai, Baibel ena haere inai henanadai dekenai do ita herevalaia, Dirava ese inai tanobada ai dahaka gaudia do ia haidaua?” Oi giroa lou neganai, rau 4-5 gaukaralaia. Eiava inai henanadai oi henia diba, “Dirava ese dika badadia ia havaraia, a?” Oi lou henia neganai, ruma tauna ida karoa 1 amo paragraf 7-8 umui herevalaia.
◼ Bema oi rakatania magasin ese ruma bese ia herevalaia, oi do lao lasi neganai, reana oi nanadaia, “Ruma bese lalonai moale ia noho totona, ruma bese taudia ta ta ese dahaka idia karaia diba?” Oi giroa neganai, karoa 14 ai paragraf 4 umui herevalaia.
◼ Bema oi rakatania magasin ese Baibel abidadama henia karana ia herevalaia, vadaeni inai henanadai oi rakatania diba, “Baibel be saiens dalanai ia maoro eiava?” Oi lou henia neganai, karoa 2 ai paragraf 8 umui herevalaia.
4. Dahaka do ita karaia bema ruma tauna ese Baibel Hadibaia bukana ia abia dae lasi?
4 Ruma tauna oi lou henia negadia ta ta murinai, henanadai ta oi henia, unai amo oi lou henia neganai, unai umui herevalaia diba. To Baibel stadi oi hamatamaia neganai, namona be buka ena karoa 1 amo umui hamatamaia. To bema ruma tauna ese Baibel Hadibaia bukana ia abia dae lasi, be edena bamona? Magasin oi abia lao noho bona ia dekenai Baibel oi herevalaia diba. Bema unai bamona oi karaia, reana gabeai do ia ura Baibel stadi ia abia dae.
5. Dahaka dainai taunimanima dekenai magasin ita rakatania sibona be hegeregere lasi?
5 Watchtower bona Awake! ese ta ena kudouna ia veria Baibel ena hadibaia herevadia ia diba totona. Unai dainai iseda tahua gauna badana be, magasin idia abia taudia ida Baibel stadi ta ita hamatamaia. Unai dala amo ita ese Iesu ena hahegani ita badinaia, taunimanima be ‘diba tahua taudia ai do ita halaoa bona idia do ita hadibaia.’—Mat. 28:19, 20.