Baibel Hadibaia Bukana amo Stadi Hamatamaia Daladia

Ita momo ita ura Baibel stadi ta ita karaia, to Baibel stadi hamatamaia dalana ita diba lasi. Inai buka matamata, Baibel be Dahaka Ia Hadibaia? ese ita do ia durua diba. Rau 3-7 ai idia noho hamatamaia herevadia ese ruma tauna ena lalona idia veria diba, bena ia ida Baibel do ita herevalaia. Unai kahana ese pablisa matamatadia ia durua diba Baibel stadi idia hamatamaia totona.

◼ Reana rau 3 amo inai oi tohoa diba:

Emu teritori ai idia noho taudia ese idia laloa bada nius ena sivarai ta eiava hekwakwanai ta oi gwauraia murinai, rau 3 dekenai idia noho henanadai toi be ruma taudia dekenai oi hahedinaraia, bona oi noia iena lalohadai ia gwauraia totona. Bena rau 4-5 dekenai oi kehoa.

◼ Eiava rau 4-5 oi herevalaia diba:

Reana oi gwau diba, “Bema inai laulau dekenai ita itaia gaudia idia vara momokani, do ita moale bada, ani?” Eiava reana oi henanadai, “Inai gwauhamata herevadia amo, oi ura edena do ia guguru?” Ena haere oi kamonai namonamo.

Bema ruma tauna ia ura siri ta ena anina ia dibaia, namona be unai Baibel siri ia herevalaia paragraf be ia dekenai oi hahedinaraia. (Inai udaia pepa dekenai ia noho maua itaia.) Unai kahana be Baibel stadi hegeregerena oi karaia. Emu vadivadi ginigunana dekenai iduara ai, miniti faiv eiava ten lalonai unai oi karaia diba.

◼ Dala ma ta be rau 6 oi gaukaralaia diba ruma tauna ena lalona oi veria totona:

Rau 6 henunai idia noho henanadai be ruma tauna dekenai oi hahedinaraia bona oi henanadai, “Nega ta inai henanadai ta oi lalohadailaia, a?” Bema henanadai ta ia laloa bada, namona be unai henanadai ia haerelaia paragraf dekenai emu buka oi kehoa lao. (Inai udaia pepa dekenai ia noho maua itaia.) Unai kahana umui herevalaia hebou neganai, unai be Baibel stadi ta oi karaia.

◼ Rau 7 oi gaukaralaia diba Baibel stadi karaia dalana haheitalaia totona:

Inai sentens ginigunadia toi oi duahia, bena karoa 3 dekenai oi kehoa bona stadi karaia dalana be paragraf 1-3 amo oi haheitalaia. Dala oi karaia oi lou henia totona, unai amo paragraf 3 dekenai idia noho henanadai oi haerelaia diba.

◼ Lou henia karaia dalana:

Unai nega ginigunana ai stadi oi karaia haorea murinai, dala oi karaia nega ma ta ai umui herevahereva totona. Reana oi gwau diba: “Miniti haida sibona lalonai, Baibel ese inai mai anina bada gauna ia gwauraia dalana ita dibaia. Gabeai, ita ese [henanadai ta rakatania] do ita herevalaia. Ia namo pura vaira lau mai bona unai ita herevalaia?”

Iehova ia abia hidi negana be kahirakahira dainai, Ia ese ita ia hadibaia noho iena gaukara ita karaia namonamo totona. (Mat. 28:​19, 20; 2 Tim. 3:17) Namona be inai tulu matamata namona ita gaukaralaia namonamo Baibel stadi ita hamatamaia totona.

Baibel Hadibaia Bukana Hariharilaia Daladia

Inai udaia pepana ai, Baibel Hadibaia buka hariharilaia daladia idia noho. Namona be unai hamatamaia herevadia be oiemu hereva dalanai oi gwauraia, emu teritori taudia edia lalohadai bona diba hegeregerena oi hereva, bona unai buka lalonai idia noho point haida herevalaia dalana oi manadalaia, unai amo anina namona oi havaraia diba. Emu teritori dekenai oi gaukaralaia diba hamatamaia hereva ma haida oi gaukaralaia diba danu.​—January 2005 Iseda Basileia Gaukara, rau 6 itaia.

Aramagedono

◼ “Inai hereva Aramagedono be nega ta oi kamonai vadaeni, a? [Haere naria.] Taunimanima momo be unai hereva ena anina idia diba lasi. Aramagedono ena anina be Dirava ena tuari. [Apokalupo 16:​14, 16 duahia.] Aramagedono murinai mauri ena toana mani oi itaia.” Rau 82-4 dekenai buka oi kehoa bona paragraf 21 oi duahia.

Baibel

◼ “Nega momo taunimanima ese Baibel idia gwauraia Dirava ena Hereva. To nega ta oi laloa dahaka dainai taunimanima ese idia torea bukana ita gwauraia Dirava ena Hereva, a? [Haere naria. Bena 2 Petero 1:21 bona rau 19 ai paragraf 5 duahia.] Inai buka ese Baibel ena haere inai henanadai dekenai ia henia.” Rau 6 dekenai idia noho henanadai hahedinaraia.

◼ “Hari taunimanima momo be dala idauidau ai gau momo idia dibaia. To iseda mauri ita moalelaia totona, oi laloa sisiba namodia be edeseniai ita davaria diba? [Haere naria. Bena 2 Timoteo 3:​16, 17 bona rau 22-3 dekenai paragraf 12 duahia.] Inai buka ese ia hahedinaraia edena bamona Dirava ia hamoalea bona mauri dalana namona ita noholaia diba.” Rau 122-3 dekenai ia noho maua bona laulau hahedinaraia.

Dika Bada/Hisihisi

◼ “Dika bada ta ia vara neganai, taunimanima momo idia daradara bema Dirava ese taunimanima ia laloa bona edia hisihisi ia itaia. Nega ta unai oi laloa, a? [Haere naria. Bena 1 Petero 5:7 bona rau 11-12 ai paragraf 11 duahia.] Inai buka be Dirava ese taunimanima idia mamia hisihisi ibounai do ia haorea momokani dalana ia herevalaia.” Rau 106 ena hamatamaia kahanai idia noho henanadai hahedinaraia.

Guriguri

◼ “Dirava ese guriguri ia haerelaia dalana be nega ta oi laloa, a? [Haere naria. Bena 1 Ioane 5:​14, 15 bona rau 170-2 ai paragraf 16-18 duahia.] Inai karoa ese Dirava sibona dekenai ita guriguri ena badina bona dahaka ita karaia be namo iseda guriguri ia kamonai henia totona, ia herevalaia.”

Iehova Dirava

◼ “Dirava idia abidadama henia taudia momo idia ura Ia kahirakahira idia lao. Baibel ese ita ia boiria Dirava kahirakahira ita lao totona. Unai oi diba, a? [Haere naria. Bena Iamesi 4:8a bona rau 16 amo paragraf 20 duahia.] Inai buka ese taunimanima ia durua edia Baibel amo Dirava idia dibaia namonamo totona.” Rau 8 ena hereva kwarana henunai ia noho henanadai haida hahedinaraia.

◼ “Taunimanima momo be edia guriguri lalonai Dirava ena ladana idia hahelagaia. To nega ta oi laloa Dirava ena ladana be daika, a? [Haere naria. Bena Salamo 83:18 bona rau 195 amo paragraf 2-3 duahia.] Inai buka ese Iehova Dirava bona ena ura taunimanima totona ia gwauraia hedinarai namo herea.”

Iesu Keriso

◼ “Tanobada hegegemadai taunimanima momo be Iesu Keriso idia diba. Haida idia gwau ia be tau hereadaena. Ma haida ese ia be Siahu Ibounai Diravana bamona idia tomadiho henia. Oi laloa ia dainai ita abia dae lalohadaidia be mai anina bada, a?” Haere naria. Bena Ioane 17:3 bona rau 37-8 ai paragraf 3 duahia. Karoa ena hereva kwarana henunai ia noho henanadai haida hahedinaraia.

Mase/Toreisi Lou

◼ “Ta ia mase murinai, dahaka ia vara be taunimanima momo ese idia daradaralaia. Oi laloa unai ita dibaia diba, a? [Haere naria. Bena Hadibaia Tauna 9:5 bona rau 58-9 amo paragraf 5-6 duahia.] Inai buka ese Baibel ena gwauhamata, idia mase vadaeni taudia dekenai do ia vara gauna, ia herevalaia.” Rau 75 dekenai ia noho laulau hahedinaraia.

◼ “Ita lalokau henia tauna ta ia mase neganai, vaia ita ura unai tauna ita itaia lou. Unai oi abia dae, a? [Haere naria.] Taunimanima momo be Baibel ena toreisi lou gwauhamatana ese ia hagoadadia. [Ioane 5:​28, 29 bona rau 71-2 amo paragraf 16-17 duahia.] Inai karoa ese inai henanadai ia haerelaidia danu.” Rau 66 ena hamatamaia kahanai idia noho henanadai haida hahedinaraia.

Mauri Hanaihanai

◼ “Taunimanima momo idia ura edia tauanina ia goada bona idia mauri daudau. To bema oi diba mauri hanaihanai oi abia diba dalana ia noho, do oi ura, a? [Haere naria. Bena Apokalupo 21:​3, 4 bona rau 53-4 amo paragraf 17 duahia.] Inai buka ese mauri hanaihanai do ita abia dalana bona unai gwauhamata ia guguru neganai, mauri be edena bamona ia herevalaia.”

Ruma

◼ “Gabu momo dekenai, noho gabu namona davaria be auka. Oi laloa nega ta do ia mai taunimanima ibounai be noho gabuna namona do idia davaria, a? [Haere naria. Bena Isaia 65:​21, 22 bona rau 34 amo paragraf 20 duahia.] Inai buka ese ia hahedinaraia edena bamona Dirava amo ia mai gwauhamatana be do ia guguru.”

Ruma Bese

◼ “Ita ibounai ita ura iseda ruma bese lalonai moale ia noho. Unai oi abia dae, a? [Haere naria.] Ruma bese taudia ta ta ese ruma bese lalonai moale idia havaraia diba dalana be Baibel ese ia gwauraia​—Dirava ese ia hahedinaraia lalokauna idia tohotohoa.” Efeso 5:​1, 2 bona rau 135 amo paragraf 4 duahia.

Tomadiho

◼ “Taunimanima momo idia laloa tanobada ena tomadiho ese taunimanima edia hekwakwanai idia havaraia, to idia hanamoa lasi. Oi laloa tomadiho ese taunimanima be dala maorona ai ia hakaua, a? [Haere naria. Bena Mataio 7:​13, 14 bona rau 145-6 ai paragraf 5 duahia.] Inai karoa ese Dirava ia lalonamo henia tomadihona ese ia hahedinaraia gaudia siks ia gwauraia.” Rau 146 dekenai ia noho lista hahedinaraia.

Tuari/Maino

◼ “Tanobada hegegemadai taunimanima ibounai idia ura maino dekenai idia noho. Oi laloa tanobada dekenai maino ai ita noho be be do ia vara momokani, a? [Haere naria. Bena Salamo 46:​8, 9 duahia.] Inai buka ese ia hahedinaraia edena bamona Dirava ese ena ura do ia hagugurua bona tanobada dekenai maino do ia havaraia.” Rau 35 dekenai ia noho laulau hahedinaraia bona rau 33-6 ai paragraf 17-21 herevalaia.

[Box on page 7]

Kontribusen Gwauraia Dalana

“Bema oi ura tanobada ibounai gaukara durua totona moni sisina oi henia, mai moale ida do lau abia dae.”

“Ena be emai buka bona magasin edia davana be ai gwauraia lasi, to emai tanobada ibounai gaukara durua totona umui henia moni be ai abia dae.”

“Reana oi daradara edena bamona inai gaukara ai karaia diba. Tanobada ibounai dekenai ai karaia gaukara be taunimanima ese idia henia heduru monina ese ia durua. Bema oi ura hari heduru moni sisina oi henia, mai moale ida do lau abia dae.”

(1) Henanadai, (2) Siri Bona (3) Karoa

Baibel be Dahaka Ia Hadibaia? buka hariharilaia dalana namona be (1) lalona tahua henanadai ta gwauraia, (2) siri maorona ta duahia, bona (3) unai ia herevalaia karoa ena hereva kwarana henunai idia noho henanadai duahia. Bema ruma tauna ia kamonai, unai karoa ena paragraf ginigunadia amo Baibel stadi karaia dalana oi haheitalaia diba. Ruma tauna be nega ginigunana oi davaria eiava lou henia oi karaia neganai, unai dala oi gaukaralaia diba.

◼ “Inai Baibel siri ese ia hahedinaraia bamona, oi laloa taunimanima ese iseda Siahu Ibounai Diravana idia dibaia diba, a?” Kara 17:​26, 27 duahia bena haere naria. Bona karoa 1 ena hereva kwarana henunai idia noho henanadai duahia.

◼ “Hari inai negai hekwakwanai momo ita davaria dainai, oi laloa inai siri ese ita do ia durua ita gini goada totona, a?” Roma 15:4 duahia bena haere naria. Bona karoa 2 ena hereva kwarana henunai idia noho henanadai duahia.

◼ “Bema oi be mai emu siahu inai siri ese ia herevalaia gaudia oi karaia totona, do oi karaia, a?” Apokalupo 21:4 duahia bena haere naria. Bona karoa 3 ena hereva kwarana henunai idia noho henanadai duahia.

◼ “Oi laloa iseda natudia ese inai idaunega anena ese ia herevalaia gauna do idia moalelaia diba, a?” Salamo 37:​10, 11 duahia bena haere naria. Bona karoa 3 ena hereva kwarana henunai idia noho henanadai duahia.

◼ “Oi laloa nega ta do ia mai bona inai siri ena hereva do ia vara momokani, a?” Isaia 33:24 duahia bena haere naria. Bona karoa 3 ena hereva kwarana henunai idia noho henanadai duahia.

◼ “Oi laloa mase taudia be mauri taudia ese idia karaia gaudia idia diba, a?” Haere naria. Bena Hadibaia Tauna 9:5 duahia bona karoa 6 ena hereva kwarana henunai idia noho henanadai duahia.

◼ “Oi laloa nega ta iseda lalokau mase taudia do ita itaia lou, Iesu ese inai siri dekenai ia hahedinaraia bamona, a?” Ioane 5:​28, 29 duahia bena haere naria. Bona karoa 7 ena hereva kwarana henunai idia noho henanadai duahia.

◼ “Oi laloa edena dala ai Dirava ena ura gauna be tanobada dekenai do idia karaia guba dekenai idia karaia bamona, inai guriguri herevana ese ia hahedinaraia bamona?” Mataio 6:​9, 10 duahia bena haere naria. Bona karoa 8 ena hereva kwarana henunai idia noho henanadai duahia.

◼ “Oi laloa ita be inai peroveta herevana ese ia gwauraia negana lalonai ita noho, a?” Timoteo Iharuana 3:​1-4 duahia bena haere naria. Bona karoa 9 ena hereva kwarana henunai idia noho henanadai duahia.

◼ “Taunimanima momo idia daradara dahaka dainai taunimanima edia hekwakwanai be idia bada idia lao. Inai siri ese ia gwauraia badina be nega ta oi laloa, a?” Apokalupo 12:9 duahia bena haere naria. Bona karoa 10 ena hereva kwarana henunai idia noho henanadai duahia.

◼ “Nega ta oi ura inai henanadai ena haere oi diba, a?” Iobu 21:7 duahia bena haere naria. Bona karoa 11 ena hereva kwarana henunai idia noho henanadai duahia.

◼ “Oi laloa taunimanima ese Baibel amo inai sisiba idia badinaia neganai, idia do ia durua diba edia ruma bese maurina idia moalelaia totona, a?” Efeso 5:33 duahia bena haere naria. Bona karoa 14 ena hereva kwarana henunai idia noho henanadai duahia.

Stadi dalana oi haheitalaia bona nega rua stadi oi karaia, bona oi diba unai stadi be do oi karaia noho, oi ripotilaia diba.