Iseda Hebou Helagadia Matauraia
“Inai taudia be lau ese egu ororo helagana dekenai do lau hakaua, bona egu guriguri rumana dekenai lau ese moale do lau henidia.”—ISAIA 56:7.
1. Iseda hebou matauraia karana ena badina be Baibel ese edena bamona ia gwauraia?
IEHOVA ese ena taunimanima, horoa Keristani taudia bona mamoe idaudia, ia haboudia ena “ororo helagana” dekenai ia idia tomadiho henia totona. Iena “guriguri rumana” dekenai idia ia hamoalea, unai lauma dubuna be “bese ibounai edia guriguri Rumana.” (Isaia 56:7; Mareko 11:17) Iehova ena taunimanima ia haboua karana ese ia hahedinaraia Iehova tomadiho henia karana be helaga, goeva bona atai herea. Bema, Iehova tomadiho henia bona Baibel stadilaia totona ita karaia heboudia ita matauraia, ita hamomokania ita be Iehova ena lalohadai helaga gaudia dekenai ita abia dae.
2. Dahaka ese ia hahedinaraia, Iehova tomadiho henia gabuna be helaga, bona Iesu ese edena dala ai Iehova ena lalohadai ia abia dae?
2 Idaunegai Israela ai, Iehova ese ia tomadiho henia totona ia abia hidi gabuna be helaga. Palai dubu bona idia gaukaralaia kohu ibounai be idia hahelagaia, unai amo idia hahedinaraia idia be Dirava ena bona “taunimanima dekenai idia helaga momokani.” (Esodo 30:26-29) Palai dubu ena daiutu rua idia gwauraia, “Helaga Gabuna” bona “Helaga Herea Gabuna.” (Heberu 9:2, 3) Gabeai, Ierusalema dekenai ia noho dubu helaga ese palai dubu ena gabu ia abia. Ierusalema idia gwauraia “hanua helagana,” badina unuseniai Iehova idia tomadiho henia. (Nehemia 11:1; Mataio 27:53) Iesu be tanobada dekenai ena hesiai gaukara ia karaia neganai, ia ese dubu helaga ia matauraia. Taunimanima dekenai ia badu, badina hemataurai lasi dalanai dubu helaga be hoihoi gabuna bona raka hanai dalana ta bamona idia gaukaralaia.—Mareko 11:15, 16.
3. Dahaka ese ia hahedinaraia Israela taudia edia hebou be helaga?
3 Nega ibounai Israela taudia idia hebou Iehova idia tomadiho henia bona ena Taravatu idia kamonaia totona. Dina haida dekenai idia karaia heboudia idia gwauraia hebou helagadia eiava guriguri dinana, unai ese ia hahedinaraia unai dina be helaga. (Levitiko 23:2, 3, 36, 37) Esera bona Nehemia edia negai idia karaia hebou dekenai, Levi taudia ese “Taravatu ena anina be [taunimanima] dekenai idia hadibaia namonamo.” “Taunimanima ese Taravatu idia kamonai momokani neganai, idia laloa momo, bona idia tai hamatamaia,” unai dainai, Levi taudia be “taunimanima ibounai edia huanai idia lao, idia hamaoroa do idia lalohisihisi lasi, dina be ia helaga.” Bena Israela taudia ese Au Raurau Ruma Maragidia Aria be dina seven lalonai idia karaia “mai moale bada danu.” Ma danu, “Au Raurau Ruma Maragidia Aria ena dina ginigunana ela bona aria ena dina dokona Esera ese dina ta ta ibounai Dirava ena Taravatu ena hereva ia duahia. Dina 7 lalonai aria idia karaia, vadaeni dina namba 8 dekenai, dokona hebou ta idia karaia, Taravatu lalonai ia torea hegeregere.” (Nehemia 8:7-11, 17, 18) Idia karaia heboudia be helaga dainai, hebou lao henia taudia be mai hemataurai ida idia kamonai namonamo.
Iseda Hebou be Helaga
4, 5. Hebou dekenai dahaka gaudia ese idia hamomokania iseda hebou be helaga?
4 Hari inai negai Iehova tomadiho henia totona, hanua helagana ta mai ena dubu helagana ta ia noho lasi. To, namona be ita laloatao, Iehova ita tomadiho henia totona ita karaia heboudia be helaga. Wiki ta lalonai, Baibel ita duahia bona stadilaia totona hebou faiv ita karaia. Nehemia ena nega bamona, unai hebou negadiai, Baibel “ena hereva ibounai ena anina idia hedinaraia namonamo.” (Nehemia 8:8) Kongrigeisen hebou ibounai be guriguri amo ita hamatamaia bona koua, bona kahirakahira unai hebou ibounai lalonai, Iehova hanamoa anedia ita abia. (Salamo 26:12) Iseda kongrigeisen heboudia be iseda tomadiho karana ena kahana ta dainai, mai hemataurai ida hereva ibounai ita kamonai namonamo be namo.
5 Iehova ena taunimanima be Ia idia tomadiho henia, bona Keristani hebamo idia moalelaia totona idia hebou neganai, Iehova ese idia ia hanamoa. Hebou dekenai ita lao neganai, ita diba momokani unuseniai “Lohiabada ese ia gwauhamata vadaeni, iena hanamoa do ia atoa.” (Salamo 133:1, 3) Bema unai hebou dekenai ita lao bona idia gwauraia hereva ibounai ita kamonai namonamo, ita ia hanamoa danu. Iesu ia gwau: “Bema lauegu ladanai tau rua o toi idia hebou gabu ta dekenai, lau danu be idia dekenai lau noho.” Unai siri ese Keristani elda taudia, be tadikaka bona taihu huanai idia vara hekwakwanai hamaoromaoroa totona idia karaia hebou ia herevalaidia, to ena hakaua herevana be mai anina iseda kongrigeisen hebou dekenai danu. (Mataio 18:20) Bema, Keristani taudia be Keriso ena ladanai idia hebou bona Keriso be lauma dalanai idia huanai ia noho, unai hebou be ia helaga.
6. Ena be iseda hebou gabudia be idia maragi eiava bada, to idia be edena bamona gabudia?
6 Momokani, hari Iehova be taunimanima ese idia karaia dubu lalodiai ia noho lasi. To, iseda Kingdom Hall be tomadiho momokani gabudia. (Kara 7:48; 17:24) Unuseniai, Iehova ena Hereva ita stadilaia, ia dekenai ita guriguri bona ia hanamoa anedia ita abia totona. Iseda Assembly Hall dekenai unai bamona ita karaia danu. Iseda hebou helagadia totona ita rentaia ruma badadia eiava gadara gabudia be tomadiho gabudia ai idia lao danu. Namona be iseda lalohadai bona kara ese ia hahedinaraia, Iehova tomadiho henia totona ita karaia hebou maragidia eiava badadia, ita matauraia.
Iseda Hebou Totona Hemataurai Hahedinaraia Daladia
7. Edena dala idauidau ai do ita hahedinaraia iseda hebou ita matauraia?
7 Iseda hebou ita matauraia karana be dala idauidau ai ita hahedinaraia diba. Dala ta be, Basileia anedia ita abia totona ita ibounai ita noho be namo. Unai ane momo be guriguri herevadia dainai, mai hemataurai ida ita abia be namo. Aposetolo Paulo ese Iesu ia herevalaia neganai, Salamo 22 ena hereva ia gwauraia: “Oiemu kara be lauegu tadina dekenai do lau hamaorolaia, bona hebou lalonai oiemu ladana do lau hanamoa.” (Heberu 2:12) Unai dainai, seamani ese ane ia do gwauraia lasi neganai, namona be iseda helai gabudia dekenai ita helai bona ane ita abia neganai, ane ena hereva edia anina ita laloa. Namona be iseda ane amo salamo torea tauna ena hemami ita hahedinaraia: “Iena kara maoromaoro taudia edia hebou badana lalonai, lau ese Lohiabada do lau hanamoa, mai egu kudouna ibounai danu.” (Salamo 111:1) Oibe, hebou dekenai Iehova hanamoa anedia ita abia dainai, ita ginidae haraga bona ita noho ela bona dokona be mai anina bada.
8. Edena haheitalai ese ia hahedinaraia hebou dekenai idia gwauraia guriguri be mai hemataurai ida ita kamonai be gau badana?
8 Danu, iseda hebou ia durua gauna ma ta be, tadikaka ese hebou taudia totona mai lalona ibounai ida guriguri idia gwauraia. Nega ta, Ierusalema dekenai idia noho Keristani taudia idia hebou bona “mai laloa tamona danu idia ibounai idia guriguri goada Dirava dekenai.” Unai dainai, ena be dagedage idia davaria, to “Dirava ena hereva idia gwauraia, mai goada danu.” (Kara 4:24-31) Oi laloa unai guriguri idia gwauraia neganai, idia hebou taudia be ma gau haida idia laloa, a? Lasi, “mai laloa tamona danu idia ibounai idia guriguri goada Dirava dekenai.” Iseda hebou dekenai idia gwauraia guriguri ese hebou taudia ibounai edia hemami ia hahedinaraia. Unai dainai, tadikaka ese idia gwauraia guriguri be mai hemataurai ida ita kamonai be gau badana.
9. Edena dala ai iseda dabua bona kara amo ita hahedinaraia iseda hebou helagadia ita matauraia?
9 Danu, iseda hebou ita matauraia bada dalana ma ta be, iseda dabua idia goeva be namo. Mai hemataurai ida ita hahedokilaia dabua bona huina sitaelo ese do ia hahedinaraia iseda hebou ita matauraia eiava lasi. Aposetolo Paulo ia gwau: “Lau ura tatau ibounai, gabu ibounai dekenai do idia guriguri. Lau ura mai helaga danu, edia imana Dirava dekenai idia abia isi. Lau ura inai idia karaia neganai, idia be badu ta lasi, bona hepapahuahu ta lasi. Lau ura danu hahine taudia ese mai manau bona mai mataurai danu edia dabua do idia kwatua. Edia huina danu sitaelo sitaelo bamona do idia karaia lasi, bona golo o kavabukavabu herahera gaudia do idia atoa lasi. Davana bada dabua danu do idia abia lasi. To kara namodia ibounai, be herahera bamona do idia karaia. Unai be maoro, bona Dirava idia matauraia.” (1 Timoteo 2:8-10) Hebouhebou badadia be steidiam badadia dekenai ita karaia neganai, ena be gabu ia siahu, to hemataurai dabua ita karaia be namo. Danu, unai hebouhebou ita matauraia dainai, program ia heau noho lalonai, namo lasi ita aniani eiava PK ita ania. Bema, iseda hebou negadiai dabua namona ita hahedokilaia bona kara namodia ita karaia, unai ese ia hahedinaraia, ita be Iehova Dirava, ia tomadiho henia karana bona iseda tadikaka ita matauraia.
Dirava Ena Taunimanima Edia Kara
10. Aposetolo Paulo ese iseda Keristani heboudia ita karaia dalana be edena bamona ia gwauraia?
10 Korinto Ginigunana, karoa 14 ai, aposetolo Paulo ese Keristani heboudia ita karaia dalana ia herevalaia. Iena hereva dokonai ia gwau: “Ekalesia ena gaukara ibounai umui karaia namonamo, mai dala maorona, karaia kava lasi.” (1 Korinto 14:40) Iseda Keristani kongrigeisen heboudia be mai anina bada, unai dainai Iehova ena taunimanima edia kara hegeregerena ita kara be namo.
11, 12. (a) Hebou idia mai natudia dekenai dahaka ita hadibaia be namo? (b) Edena dala ai natudia ese hebou dekenai edia abidadama idia hahedinaraia diba?
11 Namona be natudia ita hadibaia, hebou negadiai hemataurai idia hahedinaraia totona. Namona be Keristani tama sina ese edia natudia idia hadibaia Kingdom Hall bona Kongrigeisen Buka Stadi gabudia be gadara gabudia lasi. Badina unai gabudia dekenai Iehova ita tomadiho henia bona ena Hereva ita stadilaia. King Solomona ia gwau: “Dirava ena Dubu Helaga oi raka vareai neganai do oi naria namonamo. Hadibaia hereva kamonai totona do oi raka vareai be namo.” (Hadibaia Tauna 5:1) Mose ese Israela taudia ia hadibadia tau, hahine bona “memero bona kekeni” do idia haboua. Ia gwau: “Taunimanima ibounai do umui haboua. . . . Vadaeni do idia kamonai, edia lalona be do idia kehoa, bona Lohiabada emui Dirava do idia gari henia. Bona inai Taravatu ena hereva ibounai do idia badinaia, bona edia kara do idia karaia. Edia natudia be inai Taravatu idia do diba lasi. Vadaeni do idia kamonai, bona do idia diba. Unai neganai Lohiabada, emui Dirava do idia gari henia.”—Deuteronomi 31:12, 13.
12 Hari danu, iseda natudia be edia tama sina ida hebou dekenai idia lao, hereva idia kamonai bona diba idia abia totona. Bema hereva idia kamonai namonamo bona Baibel ena hereva momokani idia lalopararalaia, natudia ese haere karana amo edia abidadama idia “gwauraia hedinarai” diba. (Roma 10:10) Natu maragina ese ia lalopararalaia henanadai ta be hereva kwadogina amo ia haerelaia diba. Matamanai, reana ena haere ia duahia diba, to gabeai sibona ena hereva amo ia haere toho diba. Unai ese natuna ia durua bona hamoalea diba, bona sibona ena abidadama ia gwauraia hedinarai dainai, hebou idia lao lo taudia ia hamoalea danu. Momokani, namona be tama sina be hebou dekenai idia haere, unai amo edia natudia ese edia kara idia tohotohoa diba. Gau badana be natudia be mai edia Baibel, ane buka, bona ita stadilaia buka eiava magasin. Bona namona be unai buka bona magasin idia naria namonamo. Unai amo do idia diba iseda hebou be helaga.
13. Ita ura nega ginigunana iseda hebou idia mai henia taudia be dahaka idia gwau?
13 Oibe, ita ura lasi iseda hebou be Kerisendom taudia edia hebou bamona. Badina edia hebou dekenai lalokau korikorina be lasi bona helaga ena toana sibona idia hahedinaraia bona regerege bada idia karaia. Ita ura Kingdom Hall ai ita karaia heboudia dekenai ita hahegoada heheni, to namo lasi ita laloa hebou gabuna be iseda turadia ida ita moale klab ta. Ita hebou ena badina badana be ita ura Iehova ita tomadiho henia, unai dainai hemataurai dalanai iseda hebou ita karaia be namo. Ita ura nega ginigunana hebou idia mai taudia idia kamonai namonamo, bona ita bona iseda natudia edia kara idia itaia murinai, do idia gwau: “Momokani Dirava be umui emui huanai ia noho.”—1 Korinto 14:25.
Iseda Tomadiho Dalana Ena Kahana Badana Ta
14, 15. (a) Edena dala ai ita hahedinaraia ‘Dirava ena Dubu Helaga ita laloaboio lasi’? (b) Isaia 66:23 be edena dala ai ia guguru vadaeni?
14 Matamanai ita herevalaia bamona, Iehova ese ena “guriguri rumana”—ena lauma dubuna—dekenai ena taunimanima ia haboua bona ia hamoaledia noho. (Isaia 56:7) Abidadama tauna Nehemia ese Iuda taudia ia haganidia, dubu idia matauraia bona ena kohu idia naria namonamo totona. Ia gwau: “Dirava ena Dubu Helaga do ita naria namonamo momokani. Do ita laloaboio lasi momokani.” (Nehemia 10:39) Iehova be ita ia boiria ena “guriguri rumana” dekenai Ia do ita tomadiho henia totona, unai dainai namona be unai boiboi ita abia dae.
15 Isaia ena peroveta herevana ese ia hahedinaraia, nega ibounai tomadiho totona ita hebou be namo, ia gwau: “Hua matamatana ta ela bona hua matamatana ma ta, bona Sabati Dina ta ela bona Sabati Dina ma ta dekenai, taunimanima ibounai Ierusalema dekenai do idia mai, egu vairana dekenai do idia tomadiho. Lau Lohiabada lau hereva inai.” (Isaia 66:23) Hari, unai ia vara noho. Pura ta ta ibounai, idia gwauhamata vadaeni Keristani taudia idia hebou Iehova idia tomadiho henia totona. Keristani hebou idia lao henia, haroro gaukara bona gaukara ma haida amo Iehova idia tomadiho henia. Oi be hanaihanai ‘oi mai bona Iehova vairana dekenai oi tomadiho,’ a?
16. Dahaka dainai hari hebou lao henia karana ita manadalaia be namo?
16 Iehova ese ia gwauhamatalaia tanobada matamatana ai, Isaia 66:23 ena hereva do ia guguru. Unai nega ai, pura ta ta bona hua ta ta ibounai, “taunimanima ibounai” do idia mai bona Iehova ena “vairana dekenai do idia tomadiho” ela bona hanaihanai. Tanobada matamata ai, Iehova tomadiho henia totona ita hebou karana be hanaihanai do ita karaia dainai, hari hebou ibounai ita lao henia hanaihanai be namo, ani?
17. “Lohiabada ena Dina be kahirakahira do ia ginidae” dainai, dahaka dainai hebou ita laloa bada be gau badana?
17 Tanobada ena dokona be ia kahirakahira dainai, namona be iseda lalona ita hadaia Keristani heboudia dekenai ita lao totona. Iseda hebou be ia helaga dainai, ita ura lasi iseda moni gaukara, homwek, eiava hanuaboi ai idia karaia kosi ese ita ia koua, bena iseda tadikaka ida do ita hebou lasi. Iseda hebamo karana amo goada ita abia. Iseda Keristani heboudia dekenai ta ta ita dibaia namonamo diba, ta ta ita durua bona hagoadaia “lalokau dekena amo kara namodia” idia hahedinaraia totona. Namona be unai ita karaia badina “Lohiabada ena Dina be kahirakahira do ia ginidae.” (Heberu 10:24, 25) Unai dainai, namona be hebou iboudiai ita lao henia, dabua namona ita hahedokilaia bona kara namodia ita karaia, unai amo do ita hahedinaraia iseda hebou helagadia ita matauraia. Unai bamona ita karaia neganai, do ita hahedinaraia Iehova ena lalohadai helaga gaudia dekenai ita abia dae.
Riviu
• Dahaka ese ia hahedinaraia Iehova ena taunimanima ese idia karaia heboudia be helaga?
• Dahaka gaudia ese idia hahedinaraia iseda hebou be helaga?
• Edena dala ai natudia ese do idia hahedinaraia iseda hebou be helaga bona idia matauraia?
• Dahaka dainai hebou lao henia karana ita manadalaia be gau badana?
[Pictures on page 28]
Herevana edeseniai ita hebou Iehova tomadiho henia totona ita karaia heboudia be helaga
[Picture on page 31]
Iseda natudia be hebou idia mai, unai amo Dirava ena hereva idia kamonai bona diba idia abia