Iehova Dekenai Gau ta Ita Henia Diba
1 Taunimanima be Dirava dekenai gau ta idia henia diba; unai oi diba, a? Abela ese ena dava bada animal haida be Iehova dekenai ia bouboulaia, Noa bona Iobu be unai bamona idia karaia danu. (Gen. 4:4; 8:20; Iobu 1:5) Momokani, Havaraia Tauna be unai bamona boubou gaudia amo ena taga ia habadaia lasi, badina gau ibounai be Iena. To, unai kamonai taudia be edia boubou gaudia amo idia hahedinaraia, idia be Dirava idia lalokau henia. Hari, ita be eda nega, goada, bona kohu o moni be “iseda boubou gauna bamona” Iehova dekenai ita henia diba.—Heb. 13:15.
2 Nega: Haroro gaukara ita habadaia totona, namona be anina lasi gaudia dekenai eda nega ita haorea kava lasi! (Efe. 5:15, 16, NW ) Hegeregere, reana eda sediual ita haidaua, unai amo lagani ta lalonai hua ta o haida ai ita heduru painia totona. Eiava iseda haroro gaukara ena nega ita habadaia sisina, guna bamona lasi. Hegeregere, bema wiki ta ta ai haroro ena hora be miniti 30 amo ita habadaia, anina be hua dokonai iseda haroro ena hora be hora 2 amo do ita habadaia!
3 Goada: Haroro gaukara lalonai eda goada ita gaukaralaia be namo—namo lasi moale karadia eiava moni gaukara dekenai iseda goada ibounai ita henia dainai, ita hesiku Iehova ita hesiai henia goadagoada totona. Danu, namona be gau momo ita laloa momo lasi, badina unai ese ita ia “hametaua” neganai, iseda goada do ia hegeregere lasi Dirava ita hesiai henia totona. (Aon. 12:25, BHğ) Herevana badina namona ta dainai gau haida ita laloa momo, to namona be iseda ‘hekwarahi be Lohiabada dekenai do ita henia’!—Sal. 55:22; Fili. 4:6, 7.
4 Kohu Bona Moni: Haroro gaukara be eda moni bona kohu amo ita durua diba danu. Paulo ese ena Keristani tadikaka ia hagoadaia, nega ibounai ‘moni do idia haboua’ ma haida idia durua totona. (1 Kor. 16:1, 2) Unai hegeregerena, namona be moni haida ita haboua, unai amo eda kongrigeisen bona Tanobada Ibounai Gaukarana ita durua totona. Iehova be ia moale bema gau maragina o badana ta be mai eda kudouna ibounai ida Ia dekenai ita henia.—Luka 21:1-4.
5 Iehova be ita dekenai gau momo herea ia henia. (Iam. 1:17) Unai dainai, Iehova ena hesiai gaukara ai eda nega, goada, kohu bona moni ita henia neganai, ita hahedinaraia ita be Iehova ita tanikiu henia. “Mai moale danu ia henia tauna be Dirava ese ia lalokau henia noho” bona ia moale.—2 Kor. 9:7.