Tama Sina E, Emui Ruma Bese Umui Naria Namonamo
“Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni.”—1 TIMOTEO 5:8.
1, 2. (a) Dahaka dainai ruma bese iboudiai ese Keristani heboudia idia lao henia hebou be hagoadaia gauna? (b) Ruma bese iboudiai be nega korikori ai hebou ai idia ginidae totona, dahaka hekwakwanai haida idia hanaia?
HEBOU ia do matamaia lasi lalonai Keristani kongrigeisen oi itaia neganai, oi itaia natudia be dabua namodia idia atoa, edia toana ia namo bona edia tama sina badinai idia helai. Ita itaia unai bamona ruma bese lalonai be lalokau ia noho—Iehova bona ta ta idia lalokau henia dainai ita moale, ani? To, ruma bese ta be nega korikori ai hebou iboudiai dekenai idia ginidae totona, idia karaia gaudia be ita laloaboio haraga.
2 Nega momo, daba ela bona adorahi ai tama sina be idia bisi, bona hebou be hanuaboi ai negadiai, ruma bese taudia be idia bisi bada herea. Aniani idia hegaegaelaia, ruma gaukara ma haida idia karaia, bona houmwok idia haorea be namo. Tama sina be maduna momo idia huaia, idia itaia ibounai idia digu, idia aniani, bona nega korikori ai idia hegaegae totona. To, natudia dekenai hekwakwanai haida be nega kereredia ai idia vara. Natuna badana be gadara ai ena dabua ia darea. Natuna maragina be ena aniani ia bubua. Natudia idia heai matamaia. (Aonega Herevadia 22:15) Dahaka ia vara? Unai ese tama sina edia palani namona ia hadikaia diba. To, kahirakahira nega ibounai ruma bese be Kingdom Hall dekenai idia ginidae guna bena hebou ia matamaia. Pura ta ta eiava lagani ta ta ai, unuseniai natudia ita itaia, idia tubu lalonai Iehova idia hesiai henia be hagoadaia gauna!
3. Edena bamona ita diba Iehova be ruma bese iboudiai ia laloa bada?
3 Ena be nega haida umui tama sina emui gaukara be mai ena hekwarahi, to namona be umui diba Iehova be emui hekwarahi ia laloa bada. Iehova be ruma bese dalana ia Havaraia Tauna. Unai dainai, Baibel ia gwau ruma bese iboudiai be Iehova amo “edia ladana idia abia”—Ia dainai ruma bese iboudiai idia noho. (Efeso 3:14, 15) Unai dainai, umui tama sina be dala umui tahua emui ruma bese maduna umui karaia maoromaoro neganai, umui be iunives ena Siahu Ibounai Lohiabadana umui hanamoa unai. (1 Korinto 10:31) Unai be hahenamo namo hereana, ani? Vadaeni, Iehova ese tama sina dekenai ia henia gaukarana ita laloa be namo. Inai stadi lalonai, ita be ruma bese naria dalana do ita laloa. Mani dala toi ita kikilaia, bona Dirava ia ura tama sina ese unai dala amo edia ruma bese idia naria be namo.
Tauanina Dalanai Ruma Bese Naria
4. Ruma bese lalonai, Iehova ia gwau daika ese natudia ia naria be namo?
4 Aposetolo Paulo ia gwau: “Ma, oi kamonai. Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” (1 Timoteo 5:8) Paulo be inai hereva “tau ta” ia gwauraia neganai, daika ia herevalaia? Ruma bese kwarana ia herevalaia, bona nega momo unai be tamana. Dirava ese danu hahine dekenai gaukara namona ia henia, ena tau ia durua totona. (Genese 2:18) Baibel negadiai, nega momo hahine be edia tau idia durua ruma bese idia naria totona. (Aonega Herevadia 31:13, 14, 16) Hari inai negai, tama o sina sibona ia noho ruma besedia be momo.a Unai bamona Keristani tama o sina momo be edia ruma bese idia naria namonamo diba. To, ruma bese lalonai tamana bona sinana ruaosi idia noho, bona tamana ese ruma bese ia gunalaia be namo.
5, 6. (a) Tauanina dalanai edia ruma bese idia naria taudia ese idia davaria hekwakwanai haida be dahaka? (b) Keristani tatau be mai haheauka ida edia ruma bese idia naria totona, edia moni gaukara be edena bamona idia laloa be namo?
5 Timoteo Ginigunana 5:8 ai, Paulo be dahaka ruma bese naria karana ia herevalaia? Unai siri ena badina herevadia ese idia hahedinaraia, Paulo be tauanina dalanai ruma bese naria karana ia herevalaia. Hari inai tanobada ai, hekwakwanai momo dainai ruma bese kwarana ia hekwarahi tauanina dalanai ena ruma bese ia naria totona. Tanobada hegegemadai moni be hekwakwanai badana, kampani momo be gaukara taudia idia hadokoa, moni gaukara be lasi, bona kohu edia davana idia bada daekau. Dahaka ese ruma bese kwarana ia durua unai bamona hekwakwanai lalonai ia haheauka totona?
6 Namona be ruma bese kwarana ia laloatao, iena gaukara be Iehova amo ia abia. Dirava ena lauma amo Paulo ese ia torea herevana ia hahedinaraia, bema tau ta be unai hahegani ia diba to ia badinaia lasi, vadaeni ia be “abidadama lasi” tauna bamona. Keristani tauna do ia gaukara goada unai hahegani ia badinaia totona, badina ia ura lasi ena Dirava ena matanai ia be abidadama lasi tauna bamona. To, inai tanobada taudia momo be ‘lalokau idia diba lasi.’ (2 Timoteo 3:1, 3) Momokani, tama momo be edia maduna idia huaia lasi, edia ruma bese idia durua lasi. To, Keristani tatau be unai bamona lasi, idia laloa edia ruma bese idia naria be gau badana. Gaukara turadia momo be gaukara haida idia laloa maragi, to Keristani ruma bese kwaradia dekenai unai bamona gaukara be dika lasi bona mai anina bada, bona ia be Iehova Dirava idia hamoalea dalana ta, badina unai amo edia lalokau taudia idia naria diba.
7. Dahaka dainai tama sina ese Iesu ena haheitalai idia tohotohoa be maoro?
7 Danu, ruma bese kwaradia be Iesu ena haheitalai hereadaena ese ia durudia. Laloatao, Baibel ena peroveta herevana ia gwau, Iesu be iseda “Hanaihanai Noho Tamana.” (Isaia 9:6, 7) Iesu be “Adamu dokona” dainai “tau ginigunana, Adamu” ena gabuna ia abia, bona ia idia abidadama henia taudia edia tamana ai ia lao. (1 Korinto 15:45) Adamu be sibona ena namo ia tahua tamana, to Iesu be idau bona ia be tamana hereadaena. Baibel be Iesu ia herevalaia: “Lalokau ena toana, be inai kara dekena amo do ita diba: Keriso ese ita dainai iena mauri ia atoa diho.” (1 Ioane 3:16) Oibe, Iesu be ma haida dainai ena mauri ia atoa diho. To danu, dina ta ta ai, ia ese dala maragidia ai sibona ena namo ia tahua guna lasi to ma haida edia namo ia laloa bada. Umui tama sina danu ese sibona emui ura umui dadaraia be namo.
8, 9. (a) Tama sina be manu ese edia natudia naria karana amo dahaka idia dibaia? (b) Edena dala ai Keristani tama sina momo be sibona idia henia?
8 Tama sina be Iesu ena hereva amo sibona edia ura dadaraia lalokauna idia dibaia diba. Iesu be Dirava gwau-edeede henia taudia ia hereva henia neganai, ia gwau: “Nega momo lau ura oiemu natuna lau haboua, kokoroku hahine ese iena natuna iena hanina dekenai ia koua bamona, to oi ura lasi!” (Mataio 23:37) Inai siri amo Iesu be kokoroku hahine ese ena hanina amo ena natuna maragidia ia koua ena haheitalai ia herevalaia. Momokani, kokoroku hahine be sibona ena mauri ia laloa lasi to natuna be dika gaudia amo ia gimaia, bona tama sina be unai kara amo diba bada idia abia. To, dina ta ta ai tama sina manudia ese natudia idia naria karana ita laloa neganai ita hoa danu. Hanaihanai idia roho lao bona roho mai, aniani idia tahua. Ena be idia hesiku bada vadaeni, to aniani be edia natudia edia uduna ai idia atoa, bona natudia be unai aniani idia hadonoa bona nega momo aniani ma haida totona idia taitai. Iehova ia havaraia gaudia momo be edia natudia naria dalana dekenai “aonega” bada idia hahedinaraia.—Aonega Herevadia 30:24.
9 Unai hegeregerena, tanobada ibounai, Keristani tama sina be sibona edia ura idia dadaraia. Ena be hisihisi do umui abia to umui ura emui natudia umui gimaia, dika ta idia davaria garina. Ma danu, dina ibounai mai emui ura ida gaukara idauidau umui karaia, emui ruma bese umui naria totona. Umui momo be daba momokani umui toreisi bona gaukara bada umui karaia. Umui hekwarahi ruma bese ena aniani umui abia totona. Umui gaukara goada emui natudia be dabua namodia idia atoa, ruma namona ai idia noho, bona edukeisen namona idia abia totona. Bona dina ta ta bona lagani ta ta ai unai bamona umui karaia noho. Oibe, sibona umui henia bona haheauka dainai Iehova ia moale. (Heberu 13:16) To danu, laloaboio lasi dala badadia ma haida ai emui ruma bese umui naria be namo.
Lauma Dalanai Ruma Bese Naridia
10, 11. Ruma bese naria karana dekenai mai anina bada gauna be dahaka, bona Keristani tama sina ese unai dala dekenai edia natudia idia naria totona dahaka idia karaia guna be namo?
10 Lauma dalanai ruma bese naria karana be mai anina bada bona tauanina dalanai ruma bese naria karana ia hereaia. Iesu ia gwau: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.” (Mataio 4:4; 5:3) Tama sina e, dahaka umui karaia diba lauma dalanai emui natudia umui naria totona?
11 Nega momo Deuteronomi 6:5-7 idia gaukaralaia, lauma dalanai natudia naria karana idia herevalaia totona. Mani emui kara, Baibel umui kehoa bona unai siri umui duahia. Mani oi laloa, unai siri be tama sina ia hadibaia idia ese lauma gaudia idia laloa bada, Iehova idia lalokau henia, bona Iena hereva be edia kudouna lalonai idia atoa guna totona. Oibe, namona be Dirava ena Hereva umui stadilaia namonamo, hanaihanai Baibel umui duahia bona laloa dobu, unai amo Iehova ena dala, hakaua herevadia, bona taravatu do umui lalopararalaia namonamo bona ura henia. Bena emui kudouna be Baibel ena hereva momokani namodia amo do ia honu neganai, unai ese emui lalona do ia veria Iehova umui lalokau henia, matauraia, bona do umui moale. Emui natudia edia lalona dekenai gau namodia momo herea do umui atoa.—Luka 6:45.
12. Bema tama sina idia ura Baibel ena hereva momokani be edia natudia dekenai idia hadibaia goada, edena bamona idia ese Iesu idia tohotohoa diba?
12 Lauma dalanai idia goada tama sina idia ura Deuteronomi 6:7 ena sisiba idia badinaia dainai, dala idauidau ai edia natudia dekenai Iehova ena hereva idia “hadibaia goada.” Inai hereva “hadibaia goada” ena anina be “gwauraia loulou herevadia” amo hadibaia eiava kudouna hamarerea. Iehova ia diba ita ibounai—to gau badana be, natudia—be gau ta ita dibaia totona, hadibaia loulou karana be gau badana. Unai dainai, Iesu be ena hesiai gaukara ai hadibaia loulou karana ia gaukaralaia. Hegeregere, Iesu be ena diba tahua taudia dekenai hekokoroku lasi eiava heau helulu lasi to manau karana ia hadibaia neganai, dala idauidau amo unai hakaua herevana ia hadibaia loulou. Ia be hereva namonamo karana, haheitalai, bona kara amo idia ia hadibaia. (Mataio 18:1-4; 20:25-27; Ioane 13:12-15) To hoa gauna be, Iesu ia haheauka. Unai hegeregerena, namona be tama sina ese dala idia tahua hereva momokani badadia be edia natudia dekenai idia hadibaia totona; mai haheauka ida Iehova ena hakaua herevadia idia hadibaia loulou ela bona edia natuna ese unai idia lalopararalaia bona badinaia.
13, 14. Edena nega haida ai tama sina ese edia natudia dekenai Baibel ena hereva momokanidia idia hadibaia goada diba, bona edena heduru gaudia idia gaukaralaia diba?
13 Famili stadi negadia be natudia ita hadibaia nega namodia. Oibe, bema ruma bese stadi be hanaihanai ita karaia, lalona ia hagoadaia, bona ita moalelaia, vadaeni ruma bese be lauma dalanai do ia goada noho. Tanobada hegegemadai, Keristani ruma bese momo be unai stadi karana idia moalelaia, Iehova ena orea amo idia mai bukadia idia gaukaralaia, bona stadi be natudia idia durua dalanai idia karaia. Hadibaia Tauna Badana amo Diba Ita Abia bona Memero Kekeni Edia Henanadai—Haere Maorodia bukadia be namo herea natudia hadibaia totona.b To, natudia hadibaia totona famili stadi sibona be hegeregere lasi.
14 Deuteronomi 6:7 ese ia hahedinaraia, nega idauidau ai tama sina be edia natudia ida lauma gaudia idia herevalaia hebou diba. Umui loaloa, gaukara, eiava laga-ani hebou neganai, dala umui tahua lauma dalanai emui natudia umui naria be namo. Momokani, namo lasi Baibel ena hereva momokanidia dainai emui natudia umui sisiba henia hanaihanai. To, namona be ruma bese taudia ida lauma gaudia bona hagoadaia herevadia umui herevalaia hebou toho. Hegeregere, Awake! magasin be gau idauidau idia kikilaia. Unai bamona magasin ese dala ia kehoa Iehova ese ia havaraia animal, tanobada hegegemadai idia noho gabu hairaidia, bona taunimanima idauidau bona mauri daladia umui kikilaia totona. Unai bamona herevahereva karana be matamata taudia ia veria hesiai tauna mai ena kamonai bona mai ena kara maoromaoro oreana ese ia henia bukadia ma haida idia duahia totona.—Mataio 24:45-47.
15. Edena dala ai tama sina ese edia natudia idia durua diba, unai amo idia itaia Keristani haroro gaukara be gaukara namona bona mai ena namo?
15 Emui natudia ida hagoadaia herevadia umui kikilaia hebou neganai, unai ese umui ia durua lauma dalanai gau ma ta umui karaia totona. Keristani natudia ese idia dibaia gaudia bona edia abidadama be ma haida dekenai idia harorolaia be namo. Gima Kohorona eiava Awake! edia point namodia haida umui kikilaia neganai, namona be haroro gaukara ai unai point gaukaralaia dalana oi kikilaia danu. Hegeregere, oi sibona oi nanadaia: “Bema taunimanima momo be inai point amo Iehova idia diba, unai be namo herea, ani? Oi laloa edena bamona ta ita durua diba inai point ia laloa bada totona?” Unai bamona herevahereva karadia ese matamata taudia ia durua idia dibaia gaudia be ma haida ida idia herevalaia totona? Gabeai, emui natudia ida umui haroro neganai, emu hereva lalonai unai point oi gaukaralaia dalana do idia itaia? Danu, do idia diba haroro gaukara be gaukara namona bona moale bada herea ia havaraia gaukarana.—Kara 20:35.
16. Natudia be edia tama sina edia guriguri kamonaia karana amo dahaka idia dibaia?
16 Danu, tama sina idia guriguri neganai, lauma dalanai edia natudia idia naria unai. Iesu be ena hahediba taudia dekenai guriguri dalana ia hadibaia, bona nega momo idia danu ia guriguri hebou. (Luka 11:1-13) Iehova ena Natuna ida idia guriguri hebou amo idia dibaia gaudia mani oi laloa! Unai hegeregerena, emui natudia be emui guriguri amo gau momo idia dibaia diba. Hegeregere, Iehova ia ura mai iseda kudouna ibounai ida Ia ita hereva henia, reana ita laloa bada gaudia be Ia dekenai ita herevalaia diba. Oibe, emui guriguri ese emui natudia ia durua diba lauma dalanai inai hereva momokani badana ta idia dibaia: Edia guba Tamana idia hetura henia diba.—1 Petero 5:7.
Hemami Dalanai Ruma Bese Naridia
17, 18. (a) Edena dala ai Baibel ese ia hahedinaraia natudia lalokau henia karana be gau badana? (b) Tama be edia natuna dekenai lalokau idia hahedinaraia neganai, edena bamona Iehova ena kara idia tohotohoa be namo?
17 Momokani, natudia edia hemami danu be mai anina bada. Baibel be tama sina ia hamaoroa hemami dalanai edia natudia idia naria be gau badana. Hegeregere, Baibel be hahine matamatadia ia hagoadaia edia “natuna do idia lalokau henia.” Unai bamona idia karaia hahinedia be lalohadai maorona idia abia unai. (Tito 2:4) Momokani, natuna dekenai lalokau idia hahedinaraia be namo. Unai ese natuna ia hadibaia ma haida ia lalokau henia bona ena mauri ibounai lalonai namo ia mailaia. To, natuna dekenai lalokau idia hahedinaraia lasi karana be kavakava karana. Unai ese lalohisihisi bada ia havaraia bona tama sina be Iehova ena kara idia tohotohoa lasi, badina Iehova be ita ia lalokau henia bada, herevana ita be kara dika taudia.—Salamo 103:8-14.
18 Iehova be ena tanobada natudia ia lalokau henia guna. Ioane Ginigunana 4:19 ia gwau, “Dirava ese ita ia lalokau henia guna.” Tama e, Iehova ena kara umui tohotohoa be namo, bona emui natudia umui lalokau henia bada guna be namo. Baibel ese tama ia hadibaia, namona be edia natudia idia habadua kava lasi, “do idia hesiku garina.” (Kolose 3:21) Bema tama sina be unai bamona idia karaia, natudia do idia laloa tama sina be idia ia lalokau henia lasi eiava laloa bada lasi. Edia natudia idia laloa lasi tamadia ese Iehova ena haheitalai idia laloatao be namo. Iehova be guba amo ia gwau, ena Natuna ia lalokau henia bona ena lalona ia moale ia dekenai. (Mataio 3:17; 17:5) Unai ese Iesu ena lalona ia hagoadaia! Unai hegeregerena, bema tama sina be mai momokani ida ia gwau ena natuna ia lalokau henia bona lalona ia moale, vadaeni natudia be goada bada idia abia.
19. Dahaka dainai matahakani be mai anina bada, bona Keristani tama sina be matahakani idia henia neganai dahaka idia karaia be namo?
19 Momokani, tama sina edia lalokau be hereva gauna sibona lasi. To, edia kara amo unai idia hahedinaraia be gau badana. Tama sina ese tauanina bona lauma dalanai edia natudia idia naria be lalokau karana, namona be idia hahedinaraia unai bamona idia karaia ena badina badana be lalokau. Ma danu, matahakani be tama sina edia lalokau karana badana ta. Momokani, “Lohiabada ese ia ura henia tauna ia matakani henia.” (Heberu 12:6) To, bema tama sina ese edia natudia idia matahakani henia lasi, vadaeni idia be edia natudia idia inai henia unai! (Aonega Herevadia 13:24) Hanaihanai Iehova be ia laloa namonamo guna, unai amo ‘ena laloa momokani danu, ita do ia matakani henia.’ (Ieremia 46:28) Nega momo goevadae lasi tama sina idia davaria unai bamona idia karaia be ia auka. To, gau badana be umui hekwarahi unai bamona umui karaia totona. Lalokau dalanai matahakani namona umui henia ese natuna ia durua ia tubu negana lalonai moale ia davaria bona gaukara namodia ia karaia totona. (Aonega Herevadia 22:6) Keristani tama sina ibounai idia ura edia natudia be unai bamona mauri namona idia moalelaia, ani?
20. Edena dala ai tama sina ese edia natudia idia durua diba ‘mauri do idia abia hidi’ totona?
20 Tama sina e, Iehova ia henia gaukara badana—tauanina, lauma, bona hemami dalanai emui natudia umui naria gaukarana—umui karaia neganai, ahuna namodia do umui abia. Unai dainai, emui natudia dekenai dala namona umui kehoa, idia ese ‘mauri do idia abia hidi’ bona gabeai ‘do idia mauri noho.’ (Deuteronomi 30:19) Natudia be Iehova hesiai henia dalana idia abia hidi, mauri dalana ai idia raka, bona lo taudia ai idia lao neganai, edia tama sina idia moale bada herea. (Salamo 127:3-5) Unai bamona moale be do ia boio lasi! To hari, edena dala ai matamata taudia ita durua diba Iehova idia hanamoa totona? Stadi gabena be unai kahana do ia herevalaia.
[Footnotes]
a Inai stadi lalonai, ai hahedinaraia tamana be ruma bese naria tauna. To, bema Keristani hahine haida be sibona ruma bese idia naria, vadaeni inai stadi ena hakaua herevadia be mai anina bada idia dekenai danu.
b Iehova ena Witnes taudia ese idia karaia.
Edena Bamona Do Oi Haere?
Tama sina be dahaka idia karaia diba, unai amo edia natudia idia naria namonamo diba
• tauanina dalanai?
• lauma dalanai?
• hemami dalanai?
[Picture on page 10]
Manu momo be edia natudia idia naria bona idia hesiku lasi
[Picture on page 12]
Tama sina be lauma dalanai idia goada guna be namo
[Pictures on page 12, 13]
Tama sina be dala idauidau ai edia natudia dekenai Havaraia Tauna ena sivarai idia hadibaia diba
[Picture on page 14]
Natudia be edia tama sina edia hereva namona amo goada idia abia